• Malongi Yina Beto Ke Baka na Mbandu ya Leke ya Yezu
    Nzozulu ya Nkengi (Nimero ya Kulonguka)—2022 | janvier

    • VANDA MUNTU YA KUDIKULUMUSA BONSO YAKOBO

      Yakobo ke sala kisalu ya mabaya mpi Yezu me monana na yandi na nima ya lufutumuku na yandi mpi yandi ke solula ti Yakobo.

      Ntangu Yezu monanaka na Yakobo, Yakobo ndimaka na kudikulumusa yonso nde Yezu vandaka Mesia. Na nima na yo, Yakobo kumaka longoki ya mbote ya Kristu (Tala baparagrafe 5-7)

      5. Inki Yakobo salaka ntangu Yezu kutanaka ti yandi na nima ya lufutumuku na yandi?

      5 Inki ntangu Yakobo kumaka mpenza longoki ya Yezu? Ntangu Yezu futumukaka, “yandi monikaka na Yakobo na nima na bantumwa yonso.” (1 Bak. 15:7) Na nima ya kukutana ti Yezu, luzingu ya Yakobo sobaka. Yandi kumaka longoki ya Yezu. Yandi vandaka mpi na kati ya bantumwa yina vandaka kuvingila mpeve santu na shambre mosi ya zulu na Yeruzalemi. (Bis. 1:13, 14) Na nima, Yakobo vandaka ti dibaku ya nene ya kusala na nto-kimvuka ya mvu-nkama ya ntete. (Bis. 15:6, 13-22; Bag. 2:9) Diaka, na ntwala ya mvula 62 ya ntangu na beto, mpeve santu sadisaka yandi na kusonikila Bakristu yina bo me tulaka mafuta mukanda. Mukanda yango ke sadisa beto mpi bubu yai, yo vanda beto kele ti kivuvu ya kuzinga na zulu to na ntoto. (Yak. 1:1) Joseph, Muyuda mosi yina longukaka mambu ya ntama na mvu-nkama ya ntete tubaka nde nganga-nzambi ya nene ya Bayuda, Ananias muntu pesaka nswa nde bo fwa Yakobo. Yakobo kangamaka kaka na Yehowa tii na nsuka ya luzingu na yandi awa na ntoto.