Kuzinga Sambu na Ntangu Yai to Sambu na Makwisa ya Kimakulu?
“Nzambi gulusaka beto sambu beto tulaka ntima nde yandi ta gulusa beto.”—ROMA 8:24.
1. Bantu ya Epikure vandaka kulonga inki, ye inki mutindu malongi ya mutindu yina simbaka Bakristu yankaka?
NTUMWA Polo sonikilaka Bakristu ya bwala Korinto nde: “Nki mutindu bantu ya nkaka na kati na beno lenda tuba nde bantu yina me fwaka bo ta telama na lufwa ve?” (1 Korinto 15:12) Na ntembe ve, filozofi ya Mugreki ya mayele yai Epikure kunaka malongi ya mbi na kati ya Bakristu ya mvu-nkama ya ntete. Yau yina, Polo bendaka dikebi na dilongi yai ya Epikure: “Beto dia, beto nwa, sambu mbasi beto ke fwa.” (1 Korinto 15:32) Balandi ya filozofi yina vandaka vweza kivuvu ya luzingu na nima ya lufwa. Bau vandaka kwikila nde kima ya kuluta mfunu na luzingu kele kusepedisa nitu. (Bisalu 17:18, 32) Filozofi ya Epikure vandaka malongi ya kuditudila dikebi, ya ntembe, mpi ya mbi mpenza.
2. (a) Sambu na inki yau vandaka kigonsa kibeni na kubuya dilongi ya lufutumuku? (b) Inki mutindu Polo syamisaka lukwikilu ya Bakristu ya Korinto?
2 Ngindu yai ya kubuya lufutumuku vandaka ti malanda mingi. Polo pesaka mabanza yai: “Kana mambu ya bo ke tubaka kele ya kieleka, yo ke songa nde Nzambi tedimisaka Kristo na lufwa ve. Ebuna kana Nzambi tedimisaka Kristo na lufwa ve, tuba nde malongi na beto kele ya mpamba, beno lenda vanda na lukwikilu diaka ve. . . . Kana beto fweti tula ntima na Kristo kaka na luzingu yai mpamba, beto fweti mona mawa mingi kuluta bantu yonso.” (1 Korinto 15:13-19) Ee, kana kivuvu ya makwisa ya kimakulu vandaka ve, Bukristu zolaka kuvanda kima ya “mpamba.” Yau zolaka kuvanda ya kukonda kikuma. Mfunu ya kuyituka kele ve kana na bupusi ya kimumpani yina, dibundu ya Korinto kumaka nto ya mavwanga. (1 Korinto 1:11; 5:1; 6:1; 11:20-22) Yau yina, dibanza ya Polo vandaka ya kusyamisa lukwikilu na bau na lufutumuku. Na kusadilaka mutindu mosi ya mbote ya kuyindula, bantela ya Masonuku, mpi bambandu, yandi monisaka pwelele nde kivuvu ya lufutumuku vandaka disapu ve, kansi kima ya kyeleka ya talungana. Na lufulu ya mambu yai, yandi syamisaka bampangi na yandi bankwikidi nde: “Beno vanda ngolo, beno vanda bonso bantu yina lenda bwa ve. Beno kudipesa ntangu yonso na kisalu ya Mfumu Yesu, sambu beno zaba nde konso kisalu ya Mfumu ya beno ke salaka yo kele ya mfunu.”—1 Korinto 15:20-58.
“Beno Kangula Meso”
3, 4. (a) Na kutadilaka ngindu ya Piere, inki mboninu ya mbi lenda kanga bantu yankaka na bilumbu ya nsuka? (b) Inki dyambu beto fwete yibukaka?
3 Bubu yai, bantu mingi kele ti mboninu ya konda kivuvu, ya kuzinga kaka luzingu ya ntangu yai. (Efezo 2:2) Yau kele kaka mutindu ntumwa Piere yitaka kutuba nde: “Bantu ta kwisa . . . Bo ta sekaka beno . . . nde: ‘[Yesu silaka nde yandi ta kwisa! Ebuna wapi yandi?] Bankaka na beto me fwaka ntama, kansi mambu yonso kele kaka kiteso mosi, katuka ntangu ya Nzambi salaka bima yonso tii bubu yai!’ ” (2 Piere 3:3, 4) Kana bansambidi ya kyeleka kubwa na ngindu ya mutindu yai, bau lenda kuma “bamolo to bantu ya kebutaka ve mbuma.” (2 Piere 1:8, NW) Kyese mingi na kumona nde bamingi na kati ya bantu ya Nzambi bubu yai kesalaka ve mutindu yina.
4 Yau kele mbi ve na kutula dikebi na nsuka ya ngidika ya bima yai ya mefinama. Yibuka dikebi ya bantumwa ya Yezu vandaka na yau: “Mfumu, keti na ntangu yo [yai nge ke] vutula diaka kimfumu na bantu ya Israele?” Yezu vutulaka nde: “Yo kele mambu na beno ve na kuzaba ntangu to bilumbu yina ya Tata Nzambi kanaka na kiyeka na yandi mosi.” (Bisalu 1:6, 7) Bangogo yina kele ti nsangu ya mfunu yina yandi tubaka na Ngumba ya Baolive: “Beno kuzaba ve nki kilumbu Mfumu na beno ta kwisa. . . . Mwana-muntu ta kwisa na ntangu yina ya beno ta zaba ve nde yandi ke kwisa.” (Matayo 24:42, 44) Beto fwete yibukaka ndongisila yina ntangu yonso! Bankaka lenda kusama na ngindu yai, ‘Mu lenda lembisa maboko fyoti mpi kukatula ngindu ya kufinama ya nsuka.’ Yau tavanda kifu ya nene mpenza! Baka mbandu ya Yakobo ti Yoane, “Bana ya Makelele ya Nzasi.”—Marko 3:17, NW.
5, 6. Inki malongi beto lenda baka na mbandu ya Yakobo ti ya Yoane?
5 Beto kezaba nde Yakobo vandaka ntumwa ya kikesa mingi mpenza. (Luka 9:51-55) Ntangu dibundu ya Bukristu salamaka, yau fwete vanda nde yandi vandaka muntu ya mfunu mingi. Kansi, ntangu Yakobo vandaka dyaka ti ngolo na yandi yonso, Herode Agripa I fwaka yandi. (Bisalu 12:1-3) Keti nge keyindula nde, na ntwala ya lufwa na yandi ya kintulumukina, Yakobo bokutaka sambu yandi salaka kisalu ya kusamuna na kikesa yonso? Ata fyoti ve! Na ntembe ve, yandi waka kyese mingi na kumonaka nde kitini ya mingi ya luzingu na yandi yai ya nkufi, yandi lutisaka yau na kisalu ya Yehowa. Ntangu yai, muntu mosi ve na kati na beto lenda zaba kana luzingu na yandi tasuka na kintulumukina. (Longi 9:11; fwanisa ti Luka 12:20, 21.) Yau yina, yau kemonana pwelele nde nzila ya mayele kele kulanda kusadila Yehowa na kikesa mpi ngolo mingi. Mutindu yina, beto talunda zina ya mbote na ntwala na yandi mpi kulanda kuzinga ti ngindu ya makwisa ya kimakulu na ntu na beto.—Longi 7:1.
6 Dilongi ya mutindu mosi kele mpi na mbandu ya Yoane, yina vandaka pana kilumbu Yezu tumaka na ngolo yonso nde, “Beno kangula meso.” (Matayo 25:13; Marko 13:37; Luka 21:34-36) Yoane simbaka yau na ntima mpi salaka kisalu bamvu-kumi mingi na kikesa yonso. Na kutuba ya mbote, yau kemonanaka nde yandi muntu bikalaka na luzingu na kati ya bantumwa yonso. Ntangu Yoane vandaka menuna mpenza, ya kufwana na kuyindula bamvula mingi ya kisalu na yandi ya kwikama, keti yandi monaka yau bonso kifu, luzingu ya kubeba to ya kukonda bukatikati? Ata fyoti ve! Yandi vandaka kinga kaka makwisa na mpusa mingi. Ntangu Yezu ya kufutumuka tubaka nde, “E, kubika fioti mono ke kwisa,” Yoane vutulaka nswalu nde, “Yo vanda mpidina! Mfumu Yesu, kwisa!” (Kusonga 22:20) Ya kyeleka, Yoane vandaka zinga ve sambu na luzingu ya nkufi ya ntangu yai, yandi vandaka ve na mpusa ya luzingu mosi ya bumolo, ya pima mpi ya ‘bukatikati.’ Yandi bakaka lukanu ya kulanda kusala ti luzingu mpi ngolo na yandi ya mvimba, tii konso ntangu yina ya Mfumu takwisa. Ebuna beto?
Bikuma ya Kukwikidila Luzingu ya Mvula na Mvula
7. (a) Inki mutindu Nzambi “me silaka beto” kivuvu ya moyo ya mvula na mvula tuka “ntama mpenza”? (b) Inki mutindu Yezu mwangaka nsemo na yina metala kivuvu ya luzingu ya kimakulu?
7 Ndima kibeni nde kivuvu ya luzingu ya mvula na mvula kele ve ndosi to luvunu ya bantu. Mutindu Tito 1:2 ketuba, beto kekangamaka na Nzambi sambu na “moyo ya mvula na mvula [yina ya] Nzambi yina ke tubaka luvunu ve me silaka beto . . . ntama mpenza.” Lukanu ya Nzambi na kisina vandaka nde bantu yonso ya bulemfu kuzinga kimakulu. (Kuyantika 1:28) Kima mosi ve, ata nkolama ya Adami ti Eva mpi ve, lenda fwa lukanu na yandi. Mutindu yau mesonama na Kuyantika 3:15, nswalunswalu Nzambi silaka “nkuna” mosi ya lungaka katula mambi yonso yina takumina bantu. Ntangu “nkuna” yango to Mesia, Yezu, kumaka, mosi na kati ya malongi na yandi ya nene vandaka kivuvu ya luzingu ya mvula na mvula. (Yoane 3:16; 6:47, 51; 10:28; 17:3) Na kutambikaka luzingu na yandi ya kukuka bonso nkudulu, Kristu zwaka nswa ya kyeleka ya kupesa luzingu ya mvula na mvula na bantu. (Matayo 20:28) Ndambu na kati ya balongoki na yandi, na kimvuka bantu 144000, tazinga mvula na mvula na mazulu. (Kusonga 14:1-4) Na yau, ndambu ya bantu ya vandaka ntete na nitu yina lenda fwa, ta “baka nitu yina lenda fwa ve”!—1 Korinto 15:53.
8. (a) “Nitu yina lenda fwa ve” kele inki, ye sambu na inki Yehowa mepesaka yau na bantu 144000? (b) Inki kivuvu Yezu pesaka sambu na “mameme yankaka”?
8 “Nitu yina lenda fwa ve” ketendula ve kaka kukonda kufwa. Yau ketendula “ngolo ya luzingu yina ke na nsuka ve.” (Baebreo 7:16; fwanisa ti Kusonga 20:6.) Kansi, inki Nzambi kelungisa na kupesaka dikabu yai ya kuluta nene? Yibuka ntembe ya Satana tulaka nde kele ve ti kigangwa mosi ya Nzambi ya kutudila ntima. (Yobi 1:9-11; 2:4, 5) Na kupesaka bantu yai 144000 nitu yina lenda fwa ve, Nzambi kemonisa nde yandi ketulaka kibeni ntima yonso na bantu yai ya pesaka mvutu mbotembote na ntembe ya Satana. Kansi, inki beto lenda tuba sambu na bantu yonso ya mebikala? Yezu songaka bantu ya ntete ya ‘kibuka yai ya fyoti’ ya bamvingidi-difwa ya Kimfumu nde, bau “ta vanda na bakiti ya kimfumu sambu na kuyala makanda kumi na zole ya bantu ya Israele.” (Luka 12:32, NW; 22:30) Yau kemonisa nde bantu yankaka tabaka luzingu ya mvula na mvula na zulu ya ntoto, bonso bantu ya Kimfumu na yandi. Ata ‘mameme yai ya nkaka’ kebaka ve nitu yina lenda fwa ve, bau tabaka “luzingu ya mvula na mvula.” (Yoane 10:16; Matayo 25:46) Na yau, luzingu ya mvula na mvula kele kivuvu ya Bakristu yonso. Yau kele nsaka ve, kansi kima kibeni ya Nzambi, “Nzambi yina ke tubaka luvunu ve,” silaka mpi sambu na yau, yandi futaka menga ya mbalu ya Yezu Kristu.—Tito 1:2.
Keti Ntama na Makwisa?
9, 10. Inki banzikisa kemonisa pwelele nde beto mefinama na nsuka?
9 Ntumwa Polo yitaka kutuba nde ‘mpasi ya mingi’ tamonisa nde beto mekuma na “bilumbu ya nsuka.” Mutindu bantu ya mezyunga beto kekabwana ti kukonda ya zola, kindila, kudisepedisa, ti kukonda bunzambi, keti beto kemona ve nde kilumbu ya Yehowa tazenga nkanu ya ngidika ya inza yai ya mbi kefinama nswalunswalu? Mutindu nku ti kimbeni kemata, keti beto kemona ve na nzyunga na beto kulungana ya bangogo yai yankaka ya Polo: “Bantu ya mbi ti bantu ya luvunu, mbi na bo ta kwisa mingi”? (2 Timoteo 3:1-5, 13) Bamingi lenda boka nde “Beto kele na ngemba, mambu yonso kele mbote” na masonga yonso, kansi bivuvu yonso ya ngemba tamana bonso midinga, sambu “kaka na ntangu yo yina lufwa ta kwisila bo nswalu. Bo ta vanda na mpila ya kutina yo ata fioti ve - yo ta vanda bonso mpasi yina ke simbaka nkento ntangu yandi ke zola kubuta.” Beto kele na mpimpa ve na yina metala disongidila ya ntangu ya beto kezinga. Yau yina, “beto fweti kangula meso na beto, beto fweti mpi kudiyala.”—1 Tesalonika 5:1-6.
10 Dyaka, Biblia kemonisa nde bilumbu ya nsuka kele “ntangu mingi ve.” (Kusonga 12:12; fwanisa ti 17:10.) Kitini ya mingi ya “ntangu mingi ve” yango yina memanaka kwayo. Mu mbandu, mbikudulu ya Daniele tendulaka mbotembote kimbeni mosi na kati ya “ntotila ya nordi” ti “ntotila ya sudi,” kimbeni ya melandaka tii na mvu-nkama yai. (Daniele 11:5, 6, NW) Kima ya melungana ntete ve kele kaka ndwanisa ya nsuka ya “ntotila ya nordi,” yina ya Daniele 11:44, 45 ketendula.—Tala ntendula ya mbikudulu yai na Nzozulu ya Nkengi (ya Kifalansa) ya Yuli 1, 1987, ti ya Novembri 1, 1993.
11. (a) Na inki kiteso Matayo 24:14 melunganaka? (b) Bangogo ya Matayo 10:23 kemonisa inki?
11 Kima yankaka kele yai ya Yezu yitaka kutuba nde “bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka . . . ta kwisa.” (Matayo 24:14) Bubu yai, Bambangi ya Yehowa kesala kisalu na bau na bansi, bisanga ya masa, mpi bateritware 233. Ya kyeleka, kele ti bateritware ya bau mesimbaka ntete ve, mpi mbala yankaka na ntangu ya Yehowa yandi mosi meponaka, dibaku tamonika sambu na yau. (1 Korinto 16:9) Kansi, bangogo ya Yezu yina kele na Matayo 10:23 kemonisa bukatikati: “Beno ta manisa kisalu na beno na babwala yonso ya Israele ve kana Mwana-muntu me kwisa ntete ve.” Yau kele ya kyeleka nde nsangu ya mbote talongama na ntoto ya mvimba, kansi kimuntu na beto takuma ve na bisika yonso ya ntoto ti nsangu ya Kimfumu na ntwala Yezu ‘kukwisa’ bonso Muzengi-Nkanu.
12. (a) Inki ‘kidimbu’ bau ketubila na Kusonga 7:3? (b) Kukita ya ntalu ya bapakulami na zulu ya ntoto ketendula inki?
12 Baka mu mbandu mukapu ya Kusonga 7:1, 3, yina ketuba nde “bawanzio . . . me simba mipepe yonso iya” ya mbungulu “tii kuna beto ta tula kidimbu na ilungi ya konso muntu yina ke sadilaka Nzambi na beto.” Kidimbu yai kele ve yina ya ntete ya ketulamaka ntangu bayina metangama na 144000 kebingamaka sambu na kukwenda na zulu. (Efezo 1:13) Kansi yau kele kidimbu ya nsuka, ntangu bau kemonisaka pwelele nde bau kele “bansadi ya Nzambi” ya kumekama mpi ya kwikama. Ntalu ya bana ya kyeleka ya Nzambi ya kupakulama na zulu ya ntoto mekita mpenza. Dyaka, Biblia kemonisa pwelele nde “sambu na bansolami,” kitini ya ntete ya mpasi ya nene “tazengama nkufi.” (Matayo 24:21, 22, NW) Bamingi yina ketubaka nde bau kele bapakulami kele bambuta mpenza. Ebuna, keti yau mpi kemonisa ve nde nsuka mefinama mpenza?
Nkengidi Mosi ya Kwikama
13, 14. Mukumba ya kalasi ya nkengidi kele inki?
13 Na kukingaka, beto tasala mbote na kulanda lutwadisu ya “mpika ya kwikama” kepesaka beto. (Matayo 24:45) Na kiteso ya bamvula kuluta nkama mosi, “mpika” ya ntangu yai kesalaka bonso “nkengidi” na kwikama yonso. (Ezekiele 3:17-21) Nzozulu ya Nkengi (ya Kifalansa) ya Yanuari 1, 1984, tendulaka nde: “Nkengidi yai ketalaka mutindu mambu ya keluta na zulu ya ntoto kelungisa mbikudulu ya Biblia; yandi kebulaka ngunga ya kukebisa sambu na ‘mpasi mosi ya ngolo yina me bwaka ntete ve katuka kuna ya Nzambi salaka bima yonso tii bubu yai’; ye yandi kesamunaka ‘nsangu ya mbote, nsangu ya kuguluka ya bantu.’ ”—Matayo 24:21; Yezaya 52:7.
14 Yibuka nde kisalu ya nkengidi vandaka kuzabisa “yina ya yandi ke mona.” (Yezaya 21:6-8) Na ntangu ya Biblia, nkengidi vanda bula ngunga ata ntangu kigonsa vandaka ntama kibeni, na ntwala bau zaba yau mbotembote. (2 Bantotila 9:17, 18) Na ntembe ve, na bilumbu yina, bangunga ya luvunu vandaka bulama. Kansi nkengidi ya mbote vandaka kuwa boma ve nde ziku mono tayangisa bantu mpambampamba. Kana nzo na nge kepia tiya, inki mutindu nge takudiwa kana bantu ya kefwaka tiya kukwisa ve, na kutubaka nde ziku bau kebula ngunga ya luvunu? Bantu yai kekwendaka nswalu kisika yonso yina bau kewa nde kigonsa kele! Mutindu mosi, kalasi ya nkengidi vandaka zabisa ntangu yonso ya makambu vandaka monika nde yandi fwete sala buna.
15, 16. (a) Sambu na inki bantendula ya mpa kepesamaka na mbakisa na beto ya bambikudulu? (b) Inki beto lenda longuka na bansadi ya kwikama ya Nzambi yina vandaka ti mbakisa ya kifu ya bambikudulu yankaka?
15 Kansi, ya mambu kele na kukwenda na ntwala, mbakisa na beto ya mbikudulu mpi kekuma pwelele kuluta. Nkenda kemonisa nde yau kesalamaka mingi ve, to nkutu mpi ve, nde bantu kubakisa bambikudulu ya Nzambi mbotembote na ntwala yau lungana. Nzambi songaka Abrahami pwelele ntalu ya bamvula ya ‘bana na yandi ta vanda banzenza na nsi ya nkaka,’ bamvula 400. (Kuyantika 15:13) Kansi, Moize yitaka kudipesa bonso ngulusi na ntwala kibeni.—Bisalu 7:23-30.
16 Tadila mpi bambikudulu ya Mesia. Kana beto vutuka fyoti na nima, yau kemonana pwelele kibeni nde lufwa ti lufutumuku ya Mesia yitaka kuzabisama. (Yezaya 53:8-10) Kansi, ata balongoki ya Yezu mpi kubakisaka dyambu yai ve. (Matayo 16:21-23) Bau monaka ve nde Daniele 7:13, 14 talungana na ntangu ya pa·rou·siʹa to “kumonana” ya Yezu na 1914. (Matayo 24:3) Na kutanga na bau, bau vilaka kiteso ya bamvula 2000, ntangu bau yulaka Yezu nde: “Mfumu, keti na ntangu yo [yai nge ke] vutula diaka kimfumu na bantu ya Israele?” (Bisalu 1:6) Ata na nima, ntangu dibundu ya Bukristu vandaka metulama mbotembote, bangindu ti bivuvu ya luvunu vandaka basika kaka. (2 Tesalonika 2:1, 2) Ata bantangu yankaka bankaka na kati na bau vandaka na bamboninu ya kifu, ntembe kele ve nde Yehowa sakumunaka kisalu ya bankwikidi yina ya mvu-nkama ya ntete.
17. Inki mutindu beto fwete tadila bantendula ya mpa ya mbakisa na beto ya Masonuku?
17 Mutindu mosi mpi, kalasi ya nkengidi ya bubu yai keyikaka nsemo na bamboninu na yandi mbala na mbala. Kansi, keti kele ti muntu ya lenda tuba nde Yehowa kesakumunaka ve ‘mpika ya kwikama’? Dyaka, kana beto tala bantendula ya mpa yango, keti beto lenda tuba ve nde yau kevandaka kaka na mambu ya fyotifyoti? Mbakisa na beto ya lufulu ya Biblia mesobaka ve. Kundima na beto nde beto kezinga na bilumbu ya nsuka kele ngolo kuluta ntangu yonso!
Kuzinga Sambu na Makwisa ya Kimakulu
18. Sambu na inki beto fwete zola ve kuzinga kaka sambu na bubu yai?
18 Inza lenda tuba nde, “Beto dia, beto nwa, sambu mbasi beto ke fwa,” kansi beto fwete baka mboninu yina ve. Sambu na inki kusala kikesa ya mpamba, sambu na kuzwa inki kyese yango, na kisika ya kusala sambu na makwisa ya kimakulu? Kivuvu yina, yau vanda ya luzingu ya lenda fwa ve na zulu, to ya luzingu ya mvula na mvula na ntoto, kele ndosi ve, nsaka mpi ve. Yau kele kyeleka ya “Nzambi yina ke tubaka luvunu ve” mesilaka. (Tito 1:2) Banzikisa mefuluka ya kemonisa nde kulungana ya kivuvu na beto mefinama! “Ntangu me bika diaka mingi ve.”—1 Korinto 7:29.
19, 20. (a) Inki mutindu Yehowa ketadilaka bibansa yina beto kesalaka sambu na Kimfumu? (b) Sambu na inki beto fwete zinga ti ngindu ya luzingu ya kimakulu na ntu?
19 Ya kyeleka, ngidika yai mesala bilumbu mingi na kiteso ya bantu mingi vandaka yindula ve. Mwa ndambu ya bantu bubu yai lenda yindula nde, kana bau zabaka na ntwala, bau zolaka sala bibansa mingi ve. Kansi, beto lenda bokuta ve sambu na bibansa ya beto mesalaka. Na masonga yonso, kusala bibansa kele mosi na kati ya bisalu ya Mukristu. Bakristu ‘ke yindulaka diaka ve luzingu na bau mosi.’ (Matayo 16:24) Beto mpi fwete kudiwa ve nde bikesa na beto na kusadila Nzambi vandaka ya mpamba. Yezu silaka nde: “Kana muntu kubikisa nzo na yandi, bampangi na yandi ya babakala to ya bankento, mama na yandi, tata na yandi, bana na yandi, to bilanga na yandi sambu na mono ti sambu na Nsangu ya Mbote, na bilumbu yai ya beto kele, yandi ta baka yina me luta yina ya yandi vandaka na yo ntete mbala nkama . . . Ebuna na bilumbu yina ke kwisa na ntwala, yandi ta baka moyo ya mvula na mvula.” (Marko 10:29, 30) Bamvula funda mosi kubanda ntangu yai, kisalu na nge, nzo na nge, ti kimvwama na nge tavanda mingi inki kiteso? Kansi, bibansa ya nge salaka sambu na Yehowa tavanda mingi kibeni na nima ya bamvula difuku mosi katuka ntangu yai—na nima ya bamvula difunda ya mafuku katuka ntangu yai! Sambu, “Nzambi ke salaka bantu mbi ve, . . . Yandi ta vila ve kuzola ya ntima yina ya beno ke zolaka yandi na bisalu [n]a beno.”—Baebreo 6:10.
20 Yau yina, bika beto zinga ti ngindu ya luzingu ya kimakulu, na kutalaka “ve bima yina ke monikaka na meso, kansi . . . bima yina ke monikaka ve na meso. [Sambu], bima yina ke monikaka na meso yo ke zingaka mingi ve, kansi bima yina ke monikaka ve na meso, yo ke zingaka mvula na mvula.” (2 Korinto 4:18) Mbikudi Habakuki sonikaka nde: “Ntangu [ya mbona-meso] me lunga ntete ve. Kansi ntangu ke kwisa nswalu, ebuna mambu yai ya mono ke songa nge yo ta bwa mpidina. Yo lenda kwisa malembe-malembe, kansi vingila yo; yo ta bwa kaka, yo ta konda ve.” (Habakuki 2:3) Inki mutindu ‘kukinga’ nsuka kesimba mutindu beto kelungisaka mikumba na beto mpi ya dibuta? Dilongi na beto ya kelanda tatubila mambu yai.
Mambu ya Kuvutukila
◻ Inki mwa ndambu ya bantu mesalaka bubu yai na kumonaka bonso nsuka ya ngidika ya bima yai mesukininaka?
◻ Lufulu ya kivuvu na beto ya luzingu ya mvula na mvula kele inki?
◻ Inki mutindu beto fwete tadila bibansa ya beto mesalaka sambu na mambu ya Kimfumu?
[Kifwanisu ya kele na lutiti 7]
Kisalu ya kusamuna na ntoto ya mvimba fwete lungana na ntwala nsuka kukwisa