• Kimfumu ya Nzambi Kele Nki?
    Zinga Mvula na Mvula!—Kulonguka ya Biblia Yina Ta Natila Nge Mambote

    • 7. Kimfumu ya Nzambi kele ti bansiku ya kuluta mbote

      Bimfumu ya bantu ke tulaka bansiku sambu yo tanina mpi yo natila bantu na yo mambote. Kimfumu ya Nzambi mpi kele ti bansiku yina ­bantu na yo fwete landa. Beno tanga 1 Bakorinto 6:9-11 mpi na nima beno pesa mvutu na bangiufula yai:

      • Nge ke yindula nde nsi-ntoto ta vanda nki mutindu ntangu bantu yonso ta kuma kulemfuka na bansiku ya Nzambi?a

      • Nge ke yindula nde yo kele mbote mutindu Yehowa ke lombaka bantu ya Kimfumu na yandi na kuzitisa bansiku yai? Sambu na nki?

      • Inki ke monisa nde bantu yina ke zitisaka ve bansiku yai lenda kuma kuzitisa yo?​—Tala verse 11.

      Polisie mosi ke telemisa bakamio na kisika yina babala-bala mingi me kutana. Bambuta ti baleke ke sabuka na babala-bala yango.

      Bimfumu ya bantu ke tulaka bansiku sambu yo tanina mpi yo natila bantu na yo mambote. Kimfumu ya Nzambi kele ti bansiku ya kuluta mbote yina ke taninaka mpi ke natilaka bantu na yo mambote mingi

  • Inki Biblia Ke Tubaka na Yina Me Tala Kuvukisa Nitu?
    Zinga Mvula na Mvula!—Kulonguka ya Biblia Yina Ta Natila Nge Mambote
    • Dilongi 41. Bakala mosi me simbana ti nkento mosi.

      DILONGI 41

      Inki Biblia Ke Tubaka na Yina Me Tala Kuvukisa Nitu?

      Bantu mingi ke waka nsoni na kutubila mambu ya kuvukisa nitu. Kansi, ntangu Biblia ke tubilaka kuvukisa nitu, yo ke tubilaka yo pwelele mpi na luzitu yonso. Mambu yina yo ke tubaka ke vandaka sambu na mambote na beto. Yo kele mutindu yina sambu Biblia kele Ndinga ya Yehowa Nzambi ya me salaka beto. Yandi ke lombaka beto na kusala mambu yina ta natila beto mambote. Yandi ke songaka beto mambu yina beto fwete sala sambu na kusepedisa yandi mpi sambu na kuzinga mvula na mvula.

      1. Inki mutindu Yehowa ke tadilaka kuvukisa nitu?

      Kuvukisa nitu kele dikabu yina Yehowa me pesaka bantu. Yandi ke zolaka nde yo natila bakala ti nkento yina me kwelanaka kiese. Dikabu yai ke sadisaka bakala ti nkento na kubuta bana mpi na kumonisilana zola ya mingi na mutindu ya mbote mpi ya ke pesa kiese. Yo yina Ndinga ya Nzambi ke tuba nde: “Wa kiese ti nkento na nge ya kileke.” (Bingana 5:18, 19) Yehowa ke zolaka nde Mukristu ya me kwelaka kuvukisa nitu kaka ti nkento to bakala na yandi. Mpidina yandi ta sala ve ata fioti bizumba.​—Tanga Baebreo 13:4.

      2. Pite kele nki?

      Biblia ke tuba nde: “Bantu ya ke salaka pite . . . ta baka ve Kimfumu ya Nzambi.” (1 Bakorinto 6:9, 10) Bantu yina sonikaka Biblia na Kigreki sadilaka ngogo porneia sambu na kutubila pite. Ngogo yai (porneia) ke tendula 1) kuvukisa nitua bakala ti nkento ya me kwelanaka ve, (2) kuvukisa nitu babakala ti babakala to bankento ti bankento mpi (3) kuvukisa nitu bantu ti bambisi. Kana beto ke “sala ve pite,” beto ke pesaka Yehowa kiese mpi yo ke natilaka beto mosi mambote.​—1 Batesalonika 4:3.

      LONGUKA MAMBU MINGI

      Beto tala mambu ya nge fwete sala sambu na kutina pite mpi mambote ya nge ta baka kana nge ke landa kuvanda bunkete na mambu ya nge ke yindula mpi ke sala.

      Yozefi ke tina nkento ya Potifare mpi nkento yango me bikala ti lele ya Yozefi na maboko.

      3. Tina pite

      Yozefi vandaka kuwa Nzambi boma. Yandi buyaka kusala pite ti nkento mosi yina vandaka kuzola kuvukisa nitu ti yandi. Beno tanga Kuyantika 39:1-12 mpi na nima beno pesa mvutu na bangiufula yai:

      • Inki pusaka Yozefi na kutina pite?​—Tala verse 9.

      • Nge ke yindula nde Yozefi salaka mbote mutindu yandi buyaka kusala pite? Sambu na nki?

      Bubu yai, nki mutindu baleke lenda landa mbandu ya Yozefi mpi kutina pite? Beno tala VIDEO.

      VIDEO: Beno Tina Pite (5:06)

      Yehowa ke zolaka nde beto yonso kubuya pite. Beno tanga 1 Bakorinto 6:18 mpi na nima beno pesa mvutu na bangiufula yai:

      • Inki mambu lenda nata muntu na kusala pite?

      • Inki nge fwete sala sambu na kutina pite?

      4. Buya mambu yina lenda pusa nge na kusala pite

      Inki lenda sala nde yo kuma mpasi sambu muntu kukatula bangindu ya kusala pite? Beno tala VIDEO mpi na nima beno pesa mvutu na ngiufula ya ke landa.

      VIDEO: Tanga Biblia Sambu na Kukatula Bangindu ya Kusala Disumu (3:02)

      • Mutindu video me monisa yo, nki mpangi-bakala yai salaka ntangu yandi bakisaka nde bangindu na yandi mpi mambu yina yandi vandaka kusala zolaka kunata yandi na kusala bizumba?

      Bantangu ya nkaka, nkutu ata Bakristu yina ke kangamaka kaka na Nzambi, ke salaka mpi bikesa sambu na kulanda kuvanda ti bangindu ya mbote. Inki nge fwete sala sambu na kukatula bangindu ya mbi? Beno tanga Bafilipi 4:8 mpi na nima beno pesa mvutu na bangiufula yai:

      • Mambu ya nki mutindu beto fwete yindulaka?

      • Sambu na nki kutanga Biblia mpi kudipesa mingi na kisalu ya Yehowa ke sadisaka beto na kukatula bangindu ya mbi yina lenda pusa beto na kusala disumu?

      5. Bansiku ya Yehowa ke natilaka beto mambote

      Yehowa ke lombaka beto na kusala mambu yina ta natila beto mambote. Yandi ke songaka beto mambu ya beto fwete sala sambu na kulanda kuvanda bunkete na mambu ya beto ke yindula mpi ke sala mpi mambote yina yo ta natila beto. Beno tanga Bingana 7:7-27 to beno tala VIDEO mpi na nima beno pesa mvutu na bangiufula ya ke landa.

      VIDEO: Yandi Kondaka Mayele (9:31)

      • Inki nataka leke yai na kusala pite?​—Tala Bingana 7:8, 9.

      • Mutindu Bingana 7:23, 26 ke monisa yo, pite ke nataka bampasi mingi. Inki bampasi beto ta kutana ve ti yo kana beto ke landa kuvanda bunkete na mambu ya beto ke yindula mpi ke sala?

      • Inki mambote beto ta baka na bilumbu ke kwisa kana beto ke landa kuvanda bunkete na mambu ya beto ke yindula mpi ke sala?

      Bantu ya nkaka ke tubaka nde mambu yina Biblia ke tubaka na yina me tala kuvukisa nitu babakala ti babakala to bankento ti bankento ke monisaka nde Nzambi kele makambu ngolo. Yo kele ve mpidina sambu Yehowa Nzambi kele zola mpi yandi ke zolaka nde bantu yonso kuzinga mvula na mvula. Sambu na kuzinga mvula na mvula, beto fwete zitisa bansiku na yandi. Beno tanga 1 Bakorinto 6:9-11 mpi na nima beno pesa mvutu na ngiufula yai:

      • Katula kuvukisa nitu babakala ti babakala mpi bankento ti bankento, nki mambu ya nkaka Nzambi ke buyisaka?

      Sambu na kusepedisa Nzambi, beto yonso fwete yambula mambu ya mbi. Keti kusala bikesa yai kele kibeni mfunu? Beno tanga Nkunga 19:8, 11 mpi na nima beno pesa mvutu na bangiufula yai:

      • Nge ke yindula nde bansiku ya Yehowa kele mpasi na kuzitisa? Kana mpidina to ve, sambu na nki?

      Bifwanisu: 1. Mwana-nkento mosi me vanda mawa-mawa na lweka ya makangu na yandi. Yandi ke nwa malafu mpi makaya ti banduku na yandi na bare mosi na mpimpa. 2. Mwana-nkento yango ke solula na kiese ti bampangi-bankento na Nzo ya Kimfumu.

      Yehowa ke sadisaka bantu mingi na kukuma kuzitisa bansiku na yandi. Yandi ta sadisa nge mpi

      BANTU YA NKAKA KE TUBAKA NDE: “Yo kele ve mbi kana bantu zole ya me zolana kuvukisa nitu.”

      • Inki mvutu nge ta pesa?

      NA BUNKUFI

      Kuvukisa nitu kele dikabu yina Yehowa me pesaka bakala ti nkento yina me kwelanaka sambu yo pesa bo kiese.

      Inki Nge Me Simba?

      • Pite kele nki?

      • Inki beto fwete sala sambu na kutina pite?

      • Inki mambote beto ke bakaka kana beto ke zitisa bansiku ya Yehowa?

      Mambu ya Kusala

      TALA MPI

      Tala sambu na nki Nzambi ke zolaka nde bakala ti nkento yina ke zola kuzinga kisika mosi kukwelana.

      “Inki Biblia Ke Tubaka Sambu na Luzingu ya Kimakangu?” (Disolo ya kele na jw.org)

      Biblia ke tubaka nde kuvukisa nitu babakala ti babakala to bankento ti bankento kele mbi. Keti yo ke tendula nde beto fwete menga bantu ya ke salaka yo?

      “Keti Kuvukisa Nitu Babakala ti Babakala to Bankento ti Bankento Kele Mbi?” (Disolo ya kele na jw.org)

      Tala mutindu bansiku ya Nzambi sambu na mambu yonso ya kuvukisa nitu ke taninaka beto.

      “Keti Kuvukisa Nitu na Munoko Kele Mpenza Kuvukisa Nitu?” (Disolo ya kele na jw.org)

      Na disolo “Bo Sadilaka Mono Mambu ti Luzitu,” tala mambu yina sadisaka bakala mosi ya vandaka kuvukisa nitu ti babakala na kuyambula kikalulu yai sambu na kusepedisa Nzambi.

      “Biblia Ke Sobaka Luzingu ya Bantu” (Disolo ya kele na Nzozulu ya Nkengi)

      a Ngogo porneia ke tendula mpi mambu ya mbi ya mutindu na mutindu, mu mbandu kuvukisa nitu na munoko, na kinama ya kunenina mpi kusimba-simba kinama ya kuvukisila nitu ya muntu ya nkaka yina kele ve bakala to nkento na nge sambu na kuwa kiese ya ke katukaka na kuvukisa nitu.

  • Inki Nge Fwete Sala Kana Nge Me Sala Disumu ya Nene?
    Zinga Mvula na Mvula!—Kulonguka ya Biblia Yina Ta Natila Nge Mambote

    • Ata nge ke zolaka Yehowa mingi mpenza mpi ke salaka yonso sambu nge sala ve ata kima mosi ya ta pesa yandi mpasi, bantangu ya nkaka nge lenda sala mpi masumu. Kansi masumu ya nkaka ke vandaka nene kuluta ya nkaka. (1 Bakorinto 6:9, 10) Kana nge me sala disumu ya nene, kuyindula ve nde pana imene Yehowa ta zola nge diaka ve. Yandi kele ya kuyilama sambu na kulolula nge mpi kusadisa nge.

      1. Inki beto fwete sala sambu Yehowa kulolula masumu na beto?

      Bantu yina ke zolaka Yehowa ke waka mpasi mingi kana bo me sala disumu ya nene. Kansi mambu yai ya Yehowa songaka bansadi na yandi ke pesaka bo kikesa: “Ata masumu na beno kele mbwaki bonso menga, yo ta kuma mpembe bonso neige.” (Yezaya 1:18, noti na nsi ya lutiti) Kana beto me balula ntima na masonga yonso, Yehowa ta lolula beto na ntima ya mvimba. Inki beto fwete sala sambu na kubalula ntima? Beto fwete wa mawa mingi sambu na disumu ya beto me sala, kuyambula kusala disumu yango mpi kubondila Yehowa na kulolula beto. Na nima, beto fwete sala yonso sambu na kuyambula bangindu to bikalulu ya mbi yina nataka beto na kusala disumu yango mpi beto fwete sala bikesa sambu na kuzitisa bansiku ya Yehowa.​—Tanga Yezaya 55:6, 7.

      2. Kana beto me sala disumu ya nene, nki mpila Yehowa ke sadisaka beto na nzila ya bankuluntu?

      Kana beto me sala disumu ya nene, Yehowa ke lombaka beto na ‘kubinga bankuluntu ya dibundu.’ (Tanga Yakobo 5:14, 15.) Babakala yai ya Yehowa me ponaka ke zolaka yandi mpi mameme na yandi. Bo ke zabaka mbote mutindu ya kusadisa beto na kuvutukila kinduku na beto ti Yehowa.​—Bagalatia 6:1.

      Inki mutindu bankuluntu ke sadisaka beto kana beto me sala disumu ya nene? Bankuluntu zole to tatu ke sadilaka Biblia sambu na kusadisa beto na kubakisa mbi yina beto me sala. Diaka, bo ke pesaka beto bandongisila ya mfunu mpi ke songaka beto mambu ya beto fwete sala sambu beto sala diaka ve disumu yango. Bankuluntu ke basisaka na dibundu muntu yina me sala disumu ya nene mpi me balula ve ntima sambu yandi pusa ve bampangi ya nkaka na dibundu na kusala mpi masumu.

      LONGUKA MAMBU MINGI

      Beto tala mambu ya beto fwete sala sambu na kumonisa nde beto ke sepelaka ti lusadisu yina Yehowa ke pesaka beto kana beto me sala disumu ya nene.

      3. Kufunguna masumu ke yidikaka kinduku na beto ti Yehowa

      Konso disumu yina beto ke salaka ke pesaka Yehowa mpasi, yo yina beto fwete funguna yo na yandi. Beno tanga Nkunga 32:1-5 mpi na nima beno pesa mvutu na ngiufula yai:

      • Sambu na nki beto fwete funguna masumu na beto na Yehowa kansi ve kusosa kubumba yo?

      Katula kufunguna masumu na beto na Yehowa, beto ta wa mbote kibeni kana beto me sosa mpi lusadisu na bankuluntu. Beno tala VIDEO mpi na nima beno pesa mvutu na ngiufula ya ke landa.

      VIDEO: “Yehowa Ke Pesaka Ndola na Bantu Yina Yandi Ke Zolaka” (3:01)

      • Mutindu video me monisa yo, nki mutindu bankuluntu sadisaka mpangi Canon na kuvutukila Yehowa?

      Beto fwete kangudila bankuluntu ntima mpi kutela bo masonga. Bo kele pana sambu na kusadisa beto. Beno tanga Yakobo 5:16 mpi na nima beno pesa mvutu na ngiufula yai:

      • Sambu na nki kutela bankuluntu masonga ta sala nde bo sadisa beto kukonda mpasi?

      Bifwanisu: 1. Mpangi-bakala yango ke kudiyangisa mingi mpi yandi me tula maboko na ntu. 2. Yandi ke samba Yehowa. 3. Yandi ke solula ti nkuluntu mosi na telefone. 4. Yandi me kwenda kusolula ti bankuluntu tatu. 5. Yandi ke mweta sambu yandi me kuma diaka ti kansansa ya bunkete.

      Funguna disumu na nge, songa bankuluntu mambu yonso mpi ndima lusadisu ya zola yina Yehowa ke pesa nge

      4. Yehowa ke wilaka bansumuki mawa

      Kana muntu mosi ya me sala disumu ya nene ke buya kuzitisa bansiku ya Yehowa, bo fwete basisa yandi na dibundu mpi beto fwete lutisa diaka ve ntangu ti yandi. Beno tanga 1 Bakorinto 5:6, 11, na nima beno pesa mvutu na ngiufula yai:

      • Kaka mutindu levire ke vimbisaka pate ya mampa, mutindu mosi mpi kulutisa ntangu ti muntu yina me sala disumu mpi me balula ve ntima kele kibeni kigonsa sambu na dibundu. Sambu na nki?

      Bankuluntu ke landaka mbandu ya Yehowa mutindu yandi ke wilaka bantu ya me sala masumu mawa. Bo ke salaka yonso sambu na kusadisa bantu yina bo katulaka na dibundu. Bamingi me vutukaka na dibundu sambu na disipline yina bo pesaka bo. Ata yo salaka bo mpasi, kansi yo sadisaka bo na kubakisa kifu yina bo salaka.​—Nkunga 141:5.

      Mutindu Yehowa ke sadilaka bantu ya me sala masumu mambu ke monisaka nde yandi kele makambu ngolo ve, yandi kele ntima mawa mpi nde yandi kele zola. Sambu na nki beto lenda tuba mpidina?

      5. Yehowa ke lolulaka beto kana beto me balula ntima

      Yezu pesaka mbandu mosi yina ke sadisaka beto na kubakisa mutindu Yehowa ke waka kana muntu mosi me balula ntima. Beno tanga Luka 15:1-7 mpi na nima beno pesa mvutu na ngiufula yai:

      • Mambu yai ke longa nge nki sambu na Yehowa?

      Beto tanga Ezekiele 33:11 mpi na nima beno pesa mvutu na ngiufula yai:

      • Inki kima ya mfunu nge fwete sala sambu na kumonisa nde nge me balula mpenza ntima?

      Ngungudi mosi ke kanga mwana-dimeme mosi kitenda malembe.

      Yehowa ke taninaka mbote-mbote mameme na yandi kaka bonso muntu yina ke kebaka mameme

      BANTU YA NKAKA KE TUBAKA NDE: “Mono ke banga na kusonga bankuluntu disumu na mono sambu bo ta katula mono na dibundu.”

      • Inki mambu nge ta songa muntu ya ke tuba mambu yai?

      NA BUNKUFI

      Kana beto me sala disumu ya nene kansi beto me wa mpenza mawa mpi beto me baka lukanu ya kusala yo diaka ve, Yehowa ta lolula beto.

      Inki Nge Me Simba?

      • Sambu na nki beto fwete funguna masumu na beto na Yehowa?

      • Inki beto fwete sala sambu Yehowa kulolula masumu na beto?

      • Kana beto me sala disumu ya nene, sambu na nki beto fwete sosa lusadisu na bankuluntu?

      Mambu ya Kusala

      TALA MPI

      Tala mutindu Yehowa monisilaka bakala mosi mawa mutindu Yezaya 1:18 ke monisa yo.

      Yehowa Ke Lolulaka Kibeni (5:02)

      Inki mutindu bankuluntu ke salaka ngolo sambu na kusadisa bampangi yina me sala masumu ya nene?

      “Monisila Nsumuki Zola mpi Wila Yandi Mawa” (Nzozulu ya Nkengi, août 2024)

      Tala mutindu bankuluntu ke monisaka zola mpi mawa na bantu yina me sala masumu mpi bo me balula ve ntima.

      “Sadisa Bampangi Yina Bo Me Katula na Dibundu” (Nzozulu ya Nkengi, août 2024)

      Na disolo “Yo Lombaka nde Mono Vutukila Yehowa,” tala mutindu Yehowa simbaka diaka ntima ya bakala mosi yina yambulaka yandi ntete.

      “Biblia Ke Sobaka Luzingu ya Bantu” (Disolo ya kele na Nzozulu ya Nkengi)