‘Kungana ya Nduku’

NTUMWA Polo kumonaka nde yo vandaka mfunu na kulongisila Bakristu ya Galatia ya mvu-nkama ya ntete sambu na kusungika bo. Ziku yandi waka nde bo kangilaka yandi kimbeni, yo yina yandi yulaka bo nde: “Keti mono me kuma mbeni na beno ntangu yai, sambu mono ke tubila beno mambu ya kieleka?”​—Galatia 4:16.

Polo kukumaka ve mbeni na bo sambu yandi ‘tubilaka bo mambu ya kieleka.’ Na kuta masonga, yandi vandaka kusala mambu yina kewakana ti munsiku ya Biblia ya ketuba nde: “Nduku kele mbote ata yandi ke nganina nge.” (Bingana 27:6) Yandi zabaka nde ndongisila na yandi lenda pesa bantu yina kusalaka masumu mpasi na ntima. Kansi, yandi zabaka mpi nde kana yandi pesa ve nsumuki ndongisila yina yandi kele na yo mfunu, yo tavanda kukonda kusonga yandi zola ya Yehowa Nzambi. (Baebreo 12:5-7) Yo yina, sambu yandi vandaka nduku ya mbote yina vandaka kutadila mambote ya dibundu ya bilumbu kekwisa na ntwala, Polo kuvutukaka nima ve na kupesa bandongisila sambu na kusungika bo.

Bubu yai, Bambangi ya Yehowa ke na kulungisa kisalu na bo ya ‘kukumisa bantu yonso balonguki . . . kulonga bo mpi na kulanda mambu yonso ya [Yezu Kristu] kusongaka bo na kusala.’ Na ntangu bo kesalaka mutindu yina, Bakristu yai ya masonga kevwezaka ve kyeleka yina kele na kati ya Biblia mpi bo ketungululaka malongi ya luvunu ti bikalulu yina mefwana ve sambu na Bakristu. (Matayo 15:9; 23:9; 28:19, 20; 1 Korinto 6:9, 10) Na kifulu ya kumona Bakristu yai bonso bambeni ya beno fwete buya, beno fwete bakisa nde bo kemonisaka kaka dikebi yina nduku ya kyeleka fwete vanda na yo.

Na lusadisu ya mayele ya kekatukaka na Nzambi, muyimbi-bankunga kusonikaka nde: “Muntu ya ntima ya mbote lenda pesa mono ndola to kunganina mono, kansi mono ta ndima ve bantu ya mbi kukumisa mono, sambu konso ntangu mono ke lombaka nde mambu na bo ya mbi kubeba.”​—Nkunga 141:5.