Mona Bikalulu Ya Mbote Ya Bantu Ya Nkaka

Kikuma Yina Ke Salaka nde Bantu Kumona Ve Bikalulu ya Mbote ya Bantu ya Nkaka

Bantu ya lulendo ke vandaka ti bangindu ya mbi sambu na bantu ya nkaka mpi bo ke yindulaka nde bo me luta bantu ya nkaka. Beto yonso lenda bwa na mutambu yai. Mukanda mosi (Encyclopædia Britannica) ke tuba nde: “Bantu mingi ke yindulaka nde mutindu na bo ya kuzinga, madia na bo, bilele na bo, bikalulu na bo, mambu yina bo ke ndimaka mpi mambu mingi ya nkaka me luta ya bantu ya nkaka.” Inki mutindu beto lenda buya bangindu yai ya mbi?

Mambu Yina Biblia Ke Tubaka

“Ti kudikulumusa yonso beno tadila bankaka nde bo me luta beno.”—BAFILIPI 2:3.

Verse yai ke tendula nki? Sambu beto kudikumisa ve, beto fwete vanda bantu ya kudikulumusa. Kudikulumusa ke sadisaka beto na kuzaba nde na mambu ya nkaka bantu ya nkaka me luta beto. Ata kimvuka mosi ve ya bantu kele ti bikalulu yonso ya mbote mpi me zaba kusala mambu yonso.

Beto tadila mbandu ya Stefan. Yandi yelaka na insi yina bantu mingi vandaka ti bangindu ya mbi sambu na bantu ya nkaka, kansi yandi katulaka bangindu yina ya mbi. Yandi ke tuba nde: “Mono ke ndima nde kana mono ke mona nde bantu ya nkaka me luta mono, yo ke sadisaka mono na kubakila bo ve bangindu ya mbi. Mono ke zabaka ve mambu yonso. Bantu ya nkaka mpi lenda longa mono mambu ya mono ke zabaka ve.”

Mambu Yina Nge Lenda Sala

Tadila mambu na mutindu ya mbote mpi ndima nde nge mpi ke salaka bifu. Nge fwete ndima nde bantu ya nkaka lenda sala mbote diambu mosi buna kuluta nge. Kuyindula ve nde bantu yonso ya kele na kimvuka mosi buna ke vandaka kaka ti bifu ya mutindu mosi.

Na kisika ya kubakila muntu ya kimvuka mosi buna bangindu ya mbi, kudiyula nde:

Nge fwete ndima nde bantu ya nkaka lenda sala mbote diambu mosi buna kuluta nge

‘Keti mono ke sepelaka ve ti bikalulu ya muntu yina sambu yo kele kibeni mbi to kaka sambu yo kele ve mpila mosi ti ya mono?’
‘Keti muntu yango ke monaka mpi bifu na mono?’
‘Inki mambu muntu yango me zaba kusala mbote kuluta mono?’

Kana nge pesa bamvutu ya masonga na bangiufula yai, yo ta sadisa nge na kukatula bangindu ya mbi yina nge vandaka na yo sambu na muntu yina mpi nkutu kusepela ti yandi.

MBANDU: Nelson (États-Unis)

“Mono yelaka na kisika yina bantu mingi vandaka ti mpusu ya nitu ya mutindu mosi mpi katukaka kisika mosi. Kansi ntangu mono lungisaka bamvula 19, mono kwendaka na mbanza mosi ya nene sambu na kusala na izine mosi. Kuna mono kumaka kusala mpi kuzinga ti bantu ya bampusu ya nitu ya nkaka, ya katukaka na bisika ya nkaka mpi bayina mutindu na bo ya kuzinga vandaka mpila mosi ve ti ya mono.

“Mono kumaka kuzabana ti bo mpi beto kumaka banduku. Mono bakisaka nde kana mono ke tala kaka mpusu ya nitu ya muntu, ndinga na yandi mpi kisika yina yandi me katuka, mono ta bakisa ve ata fioti mutindu bo ke vandaka ngolo na kisalu, mutindu bo kele bantu yina mono lenda tudila ntima mpi mutindu bo ke kudiwaka.

“Na nima, mono balaka nkento yina vandaka ve mpusu ya nitu mosi ti mono mpi yandi katukaka na kisika ya nkaka. Mono me kumaka na kiese ya kudia madia ya mutindu ya nkaka mpi kulanda miziki yina mono me landaka ntete ve. Mono me bakisaka nde beto yonso ke vandaka ti bikalulu ya mbote mpi bifu. Na kutuba masonga, mono me kumaka muntu ya mbote sambu mono sepelaka mpi mono landaka mbandu ya bikalulu ya mbote ya bantu yina mpusu na bo ya nitu mpi mutindu na bo ya kuzinga kele ve mpila mosi ti ya mono.”