“Dikanda ya Fyoti” Mekuma “Bantu Mingi”
“Dikanda ya fyoti takuma bantu mingi, mpi ata bo kele mfunu mingi ve, mono ta kumisa bo ngolo mingi.”—YEZAYA 60:22, NW
1, 2. (a) Sambu na nki mpimpa mefika ntoto bubu yai? (b) Inki mutindu nsemo ya Yehowa kesemaka malembemalembe na bantu na yandi?
“MPIMPA ke fika ntoto ya mvimba, bantu yonso kele na kati ya lubungi; kansi nge Yeruzalemi, Mfumu Nzambi ke kwisa kutelama na ntwala na nge bonso ntangu, lukumu na yandi ke kwisa kumonika na nge!” (Yezaya 60:2) Bangogo yai ketendula mbote mambu yina ke na kusalama na ntoto banda na mvu 1919. Kikristu melosaka kidimbu ya kuvanda ya Yezu Kristu bonso mfumu, “mwinda sambu na bantu yonso.” (Yoane 8:12; Matayo 24:3) Sambu na ‘kudasuka’ ya Satana, mfumu ya “bampeve yina ke yalaka nsi yai ya mpimpa,” mvu-nkama ya 20 vandaka mvu-nkama mosi ya mbi kibeni, yo mevanda ntangu mosi ya bantu mefwa mingi kuluta banda luyantiku ya luzingu na ntoto. (Kusonga 12:12; Efezo 6:12) Bantu mingi kibeni kezinga na mpimpa ya kimpeve.
2 Kansi, mwinda ke na kupela bubu yai. Yehowa yandi mosi ‘kepesa nsemo’ na bansadi na yandi, bapakulami yina mebikalaka, yina ketuba awa na ntoto na zina ya “nkento” na yandi ya zulu. (Yezaya 60:1, NW) Mingimingi, banda bo basikaka na kimpika ya Babilone na mvu 1919, bantu yai kemonisaka lukumu ya Nzambi mpi ‘mwinda na bo kepela na meso ya bantu.’ (Matayo 5:16) Banda na mvu 1919 tii na mvu 1931, nsemo ya Kimfumu kele na kukuma kaka ngolo banda bantu yai kukatukaka na minyololo ya nsuka ya bangindu ya Babilone. Ntalu na bo yantikaka kumata mingi mpenza mutindu Yehowa vandaka kulungisa lusilu na yandi: “Beno bantu ya Israele bayina ke zinga kaka, mono ta vutula beno kisika mosi. Mono ta tula beno kisika mosi bonso mameme na lupangu to bonso bankombo na matiti. Ntoto na beno ta fuluka diaka na makelele ya bantu mingi.” (Mishe 2:12) Na mvu 1931, lukumu ya Yehowa na bantu na yandi kumaka kumonana dyaka mingi ntangu bo bakaka zina ya Bambangi ya Yehowa.—Yezaya 43:10, 12.
3. Inki mutindu yo monanaka pwelele nde nsemo ya Yehowa zolaka kungenga mpi na bantu yankaka katula bapakulami?
3 Keti Yehowa tamonisa nsemo na yandi kaka na bantu ya “kibuka ya fyoti” yina mebikalaka? (Luka 12:32, NW) Ve. Nzozulu ya Nkengi ya Septembri 1, 1931 (ya Kingelesi), tubilaka kibuka yankaka. Ntendula mosi ya kitoko ya Ezekiele 9:1-11, kumonisaka nde muntu yina vandaka ti kima ya tinta yina bo ketubila na baverse yina kele kifwani ya bapakulami yina mebikalaka. Banani “muntu” yango ketula bidimbu na luse? “Mameme ya nkaka,” disongidila bantu yina kele na kivuvu ya kuzinga mvula na mvula na paladisu ya ntoto. (Yoane 10:16; Nkunga 37:29) Na mvu 1935 bo bakisaka nde kibuka yai ya “mameme ya nkaka” kele ‘kibuka ya nene ya ke katuka na bansi yonso’ yina ntumwa Yoane kumonaka na mbona-meso na yandi. (Kusonga 7:9-14) Banda na mvu 1935 tii ntangu yai, bo ketulaka dikebi mingi na kisalu ya kukutika bantu ya kibuka ya nene.
4. “Bantotila” ti ‘bantu ya nsi-ntoto’ yina bo ketubila na Yezaya 60:3 kele banani?
4 Bo ketubila kisalu yai ya kukutika bantu na mbikudulu ya Yezaya ntangu yo ketuba nde: “Bantu yonso ya nsi-ntoto ta kwisa kutala mwini na nge, bantotila ta zola kumona nsemo na nge.” (Yezaya 60:3) “Bantotila” ya bo ketubila awa kele banani? Kele bayina ya mebikalaka na kati ya bantu 144 000 yina tabaka dikabu ya Kimfumu ya zulu kumosi ti Yezu Kristu, mpi kupesaka mbandu na kisalu ya kitemwe. (Roma 8:17; Kusonga 12:17; 14:1) Bubu yai, ntalu ya ‘bantu ya nsi-ntoto’ meluta mpenza mafunda fyoti ya bapakulami yina kele dyaka na ntoto. Bantu ya makanda ya kele ti kivuvu ya kuzinga na ntoto kekwisa sambu Yehowa kulonga bo mpi bo kebinga bantu yankaka sambu bo mpi kusala mutindu mosi.—Yezaya 2:3.
Bansadi ya kikesa ya Yehowa
5. (a) Inki mambu kemonisa nde kikesa ya bantu ya Yehowa mekita ve? (b) Inki bansi kuzwaka kuyela ya kuluta mingi na 1999? (Tala lapolo na balutiti 27-30.)
5 Bambangi ya Yehowa ya ntangu na beto monisaka kikesa mingi na mvu-nkama ya 20! Ata mpasi vandaka kukuma kaka mingi, kikesa na bo kukitaka ve ntangu mvu 2000 vandaka kupusana. Bo landaka kaka na kulungisa ntuma ya Yezu na ntima ya mvimba: “Beno kwenda kukumisa bantu yonso balonguki na mono.” (Matayo 28:19, 20) Ntalu ya bansamuni ya nsangu ya mbote yina kusalaka kisalu na mvu ya kisalu ya nsuka ya mvu-nkama ya 20 kukumaka 5 912 492. Na kimvuka, bo salaka mingi kiteso ya bangunga 1 144 566 849 sambu na kuzabisa bantu yankaka mambu ya Nzambi ti balukanu na yandi. Bo vutukaka mbala 420 047 796 na kukwenda kutala bantu yina kesepilaka na kyeleka mpi bo longukaka Biblia ti bantu 4 433 884 na banzo na bo. Bantalu yai ya kuyitukisa kemonisa nde bo salaka kisalu ya kikesa mpenza!
6. Inki dyambu ya mpa bo yidikaka sambu na bapasudi-nzila, mpi nki bantu mingi kusalaka na nima ya kuzwa nsangu yina?
6 Na Yanuari ya mvula meluta, Nto-Kimvuka kuzabisaka mutindu bo fyotunaka ntalu ya bangunga yina bapasudi-nzila fwete sala. Dyambu yai kusadisaka bantu mingi na kuzwa dibaku ya kukuma bapasudi-nzila ya ntangu yonso to nsadisi. Mu mbandu, banda na ngonda ya ntete tii na ngonda ya iya ya mvu 1999, biro ya la Société ya Hollande kuzwaka baformilere ya kisalu ya kimupasudi-nzila ya ntangu yonso mbala kuluta iya ya mvimba kana beto tesa yo ti ntalu ya bo zwaka na nsungi yai mosi ya mvula yina kulutaka. Biro ya Ghana kepesa lapolo nde: “Banda beto yantikaka kusadila ntalu ya mpa ya bangunga yina bapasudi-nzila fwete lungisa, ntalu ya bapasudi-nzila na beto ya ntangu yonso memata mpenza mingi.” Na mvu ya kisalu 1999, ntalu ya bapasudi-nzila na inza ya mvimba kukumaka 738 343—yai kele mutindu ya mbote ya beto kemonisa ‘kikesa na kusala bisalu ya mbote.’—Tito 2:14.
7. Inki mutindu Yehowa mesakumunaka kisalu ya bansadi na yandi kesala na kikesa yonso?
7 Keti Yehowa sakumunaka kisalu yai kikesa ya bansadi na yandi? Ee. Na nsadisa ya Yezaya, yandi ketuba nde: “Lutisa meso na nge ndambu na ndambu, nge tala! Bantu na nge yonso ke kutana kisika mosi, bo ke kwisa kuvutuka na nge! Bana na nge ya babakala me katuka ntama, bo ke kwisa; bana na nge ya bankento, bo ke kwisa kunata bo na maboko bonso bana-fioti.” (Yezaya 60:4) ‘Bana ya babakala’ ti ‘bana ya bankento’ ya kupakulama yina bo mekutika kesadila kaka Nzambi ti kikesa yonso. Ebuna ntangu yai, bo ke na kukutika mameme yankaka ya Yezu na lweka ya ‘bana ya babakala’ ti ‘bana ya bankento’ ya kupakulama ya Yehowa na bansi ti bisanga yina kele na nzadi mungwa 234.
‘Bisalu ya mbote’
8. Inki ‘bisalu ya mbote’ Bambangi ya Yehowa kesalaka?
8 Bakristu kele ti mukumba ya kulonga nsangu ya mbote ya Kimfumu mpi ya kusadisa bantu yina kesepila na kukuma balongoki. Kansi, bo ‘meyilama mbotembote sambu na kusala konso kisalu ya mbote.’ (2 Timoteo 3:17) Yo yina, bo kesungiminaka mabuta na bo na zola yonso, bo kemonisaka kikalulu ya kuyamba banzenza, mpi bo kekwendaka kutala bambefo. (1 Timoteo 5:8; Baebreo 13:16) Bantu ya luzolo ya mbote kekudipesaka na bisalu ya nene bonso kutunga Banzo ya Kimfumu, kisalu yai ya kepesaka mpi kimbangi. Na Togo, na nima ya kumanisa kutunga Nzo mosi, bamfumu ya dibundu mosi ya kekwikilaka na bimpa, zolaka kuzaba sambu na nki Bambangi ya Yehowa ketungaka bo mosi banzo na bo na kisika ya kubaka bantu sambu na kusala kisalu yai! Biro ya Togo ketuba nde kutunga Banzo ya Kimfumu ya kitoko kepesaka kimbangi ya mbote na bisika yina kele na nzyunga na yo na mpila nde, bantu mingi mekuma kusosa kukwenda kufutila to kutunga banzo na bisika ya bo tatunga banzo ya Kimfumu.
9. Inki mutindu Bambangi ya Yehowa kusalaka na ntangu bampasi kubwilaka bampangi na bo?
9 Ntangu yankaka, yo kelombaka kusala kisalu ya mbote ya mutindu yankaka. Na mvula ya kisalu ya meluta, bansi mingi kukotaka na bampasi yina kebwaka sambu na bisumbula ya inza, mpi mbala mingi bantu ya ntete ya kenataka lusadisu kevandaka Bambangi ya Yehowa. Mu mbandu, Mupepe ya Ngolo ya bo bingaka nde Mitch, kunikisaka kitini ya nene ya insi ya Honduras. Na mbala mosi, biro ya la Société ya insi yina kusalaka bakomite ya ketalaka mambu ya kutudila dikebi nswalunswalu sambu na kuyidika mutindu ya kulembika mpasi yina. Bambangi ya Honduras ti ya bansi yankaka kupesaka bilele, madya, bankisi, mpi bima yankaka ya mfunu. Bakomite ya Kutunga Banzo ya Insi na bo kusadilaka mayele na bo sambu na kutunga dyaka banzo yina kubebaka. Na nima ya ntangu fyoti, bampangi na beto yina kubwilaka mpasi, yantikaka kubaka lusadisu sambu na kuvutukila bisalu na bo. Na insi ya Équateur, Bambangi ya Yehowa kusadisaka bampangi na bo ntangu masa kufulukaka mpi kufwaka banzo mingi. Ntangu yandi monaka mutindu mambu vandaka kusalama, mfumu mosi ya luyalu kutubaka nde: “Kana bantu yai kuvandaka bantu na mono ya kisalu, mono zolaka kusala bisalu ya kuyitukisa mpenza! Bantu ya mutindu yai fwete vanda na bisika yonso ya inza.” Kisalu ya kitoko ya mutindu yina kepesaka lukumu na Yehowa Nzambi mpi yo kele nzikisa ya kemonisaka “kukangama” na beto “na Nzambi, [yina] kele mfunu na mambu yonso.”—1 Timoteo 4:8, NW.
Bo ‘kepumbuka bonso matuti’
10. Ata ntalu ya bapakulami ke na kukita, sambu na nki zina ya Yehowa kelongama na kiteso mosi ya mesalamaka ntete ve?
10 Ntangu yai, Yehowa keyula nde: “Banani bo yai kepumbuka bonso matuti, mpi bonso bapizio kevutuka na nzo na bo? Sambu bisanga ya masa talanda na kutula kivuvu na mono, bamaswa ya bwala Tarsisi mpi mutindu yo vandaka na luyantiku, sambu na kunata bana na nge ya babakala ntama . . . Banzenza tatunga dyaka bibaka na nge, bantotila na bo tasadila nge.” (Yezaya 60:8-10, NW) Bantu ya ntete ya kundimaka ‘nsemo’ ya Yehowa vandaka ‘bana ya babakala’ na yandi, Bakristu ya kupakulama. Na nima, “banzenza” mpi kundimaka, disongidila kibuka ya nene, yina kesadisa bampangi na bo bapakulami na kwikama yonso, bo kelanda mbandu na bo na kisalu ya kulonga nsangu ya mbote. Yo yina, ata ntalu ya bapakulami ke na kukita, bo kesamuna zina ya Yehowa na ntoto ya mvimba na kiteso mosi ya mesalamaka ntete ve.
11. (a) Inki kisalu kelanda kaka na kusalama mpi nki mbuma yo butaka na mvu 1999? (b) Inki bansi kuvandaka na ntalu ya bantu mingi ya kubakaka mbotika na mvu 1999? (Tala tablo yina kele na balutiti 27-30.)
11 Yo yina, bantu mingi kekwisa kuvukana “bonso bapizio kevutuka na nzo na bo,” bo kezwa kisika ya kubumbana na kati ya dibundu ya Bukristu. Mafunda ya bantu ke na kuyikamaka konso mvula, mpi nzila kele ya kukanguka sambu na bantu mingi dyaka. Yezaya ketuba nde: “Mpimpa ti mwini bakielo na nge ta vanda kaka ya kukanguka; [sambu na kunatila nge bimvwama ya makanda, NW].” (Yezaya 60:11) Na mvula meluta, bantu 323 439 kubakaka mbotika bonso kidimbu ya kudipesa na bo na Yehowa, mpi yandi mekanga ntete ve kyelo. “Bima ya mfunu ya makanda yonso,” disongidila bantu yina kele na kibuka ya nene, kekwisa kaka kufuluka na nsadisa na bo. (Agai 2:7, NW) Bo kebuyaka ve ata muntu mosi yina kezola kubasika na mpimpa. (Yoane 12:46) Bika bantu yonso ya mutindu yina kuvidisa ve ntonda na bo na nsemo!
Kukonda boma na ntwala ya kimbeni
12. Inki mutindu bantu yina kezolaka mpimpa sosaka na kufwa nsemo?
12 Bantu yina kezolaka mpimpa kezolaka ve nsemo ya Yehowa. (Yoane 3:19) Bankaka nkutu kesosaka na kufwa nsemo yango. Beto lenda yituka ve na dyambu yai. Nkutu Yezu, “nsemo ya kieleka, yina . . . ke temusaka mpi bantu yonso,” bo sekaka yandi, bo yinaka yandi, mpi nsukansuka bo fwaka yandi na bantu ya insi na yandi. (Yoane 1:9) Na mvu-nkama ya 20, Bambangi ya Yehowa mpi bo sekaka bo, bo kangaka bo, bo kangisaka kisalu na bo, nkutu bo fwaka bankaka, sambu bo monisaka nsemo ya Yehowa na kwikama yonso. Na bamvula ya mekatuka kuluta, bambeni na beto kudipesaka na kumwanga mambu ya luvunu na radio, na televizio ti na bazulunalu yina metala bantu ya kemonisaka nsemo ya Nzambi. Bankaka kezolaka kunata bantu na kundima nde Bambangi ya Yehowa kele bantu mosi ya kigonsa mpi bo fwete buyisa to kukanga kisalu na bo. Keti bambeni ya mutindu yai menungaka?
13. Kukwenda kusonga na mayele yonso mambu mutindu yo kelutaka na bisika ya bo kemwangaka bansangu kubutaka nki?
13 Ve. Na bisika yina mwaye kumonanaka, Bambangi ya Yehowa kwendaka na bisika ya kumwanga nsangu sambu na kutendula mambu mutindu yo kele. Ntangu bo salaka mutindu yina, zina ya Yehowa kumwanganaka na bazulunalu, na baradio ti na batelevizio. Mambu yai butaka bambuma ya mbote na kisalu ya kusamuna. Mu mbandu, na Danemark, programe mosi ya Televizio ya Leta kutubilaka disolo yai nde: “Sambu na nki lukwikilu ya Bantu ya Danemark ke na kubwa.” Bo yulaka bangyufula na Bambangi ya Yehowa kumosi ti bantu ya mabundu yankaka. Na nsuka, mwana ya nkento mosi ya kutalaka programe yango kutubaka nde: “Yo vandaka pwelele na kumona banani vandaka na mpeve ya Nzambi.” Yandi yantikaka kulonguka Biblia.
14. Ata bo tasala yo na ntima mpasi, nki kima bambeni tabakisa?
14 Bambangi ya Yehowa kezabaka nde na inza yai bantu mingi tazola bo ve. (Yoane 17:14) Kansi, bo kebakaka kikesa na mbikudulu ya Yezaya: “Bana ya bantu yonso yina vandaka kumonisa nge mpasi, bayina vandaka kufinga nge, bo ta kwisa kufukama na ntwala na nge ti kubwa na makulu na nge; bo ta binga nge Bwala ya Mfumu Nzambi, bo ta binga nge Sioni, bwala ya [Yehowa], Nzambi ya Israele.” (Yezaya 60:14) Kubika fyoti bambeni tabakisa ti mpasi na ntima nde, na kutuba ya mbote, bo vandaka kunwanisa Nzambi yandi mosi. Nani lenda nunga bitumba ya mutindu yai?
15. Inki mutindu ‘bantu ya nsi-ntoto kesansaka’ Bambangi ya Yehowa, mpi nki mutindu yo kemonanaka na kisalu na bo ya kulonga ti ya kuzabisa evanzile?
15 Yehowa silaka dyaka nde: “Mono ke kumisa nge bonso [kima] ya lukumu . . . tii kuna. Bantu yonso ya nsi-ntoto ta sansa nge bonso mwana na bo, bantotila na bo ta disa nge na kimvwama na bo; ebuna nge ta zaba nde mono Mfumu Nzambi muntu kele Ngulusi na nge.” (Yezaya 60:15, 16) Ee, Yehowa kele Ngulusi ya bantu na yandi. Kana bo tula ntima na bo na yandi, bo tazinga “mvula na mvula.” “Bantu yonso ya nsi-ntoto ta sansa bo,” disongidila, bo tasadila bima yankaka ya mfunu yina tamonana sambu na kunata lusambu ya kyeleka na ntwala. Mu mbandu, kusadila mayele ya ba ordinatere ti bima ya kesadisaka na kusolula ti bantu na bisika ya ntama, kesadisa beto na kubasisa na mbala mosi Nzozulu ya Nkengi na bandinga 121 mpi Réveillez-vous ! na bandinga 62. Beto mesalaka programe mosi ya mbote ya ordinatere yina kesadisa beto na kubalula Traduction du monde nouveau na bandinga mingi ya mpa, ebuna kisalu ya kubalula ya mutindu yina kepesa kyese mingi. Ntangu beto basisaka Masonuku ya Kigreki ya Bukristu na ndinga ya Croatie na mvu 1999, bantu mingi kubasisaka mansanga ya kyese. Mpangi mosi ya bakala ya mununu kutubaka nde: “Mono kekingaka Biblia yai tuka ntama kibeni. Ntangu yai, mono lenda kufwa na ngemba!” Beto mekabula Traduction du monde nouveau, ya mvimba to ya ndambu kuluta bamiliyo 100 na bandinga 34.
Minsiku ya mbote ya kusadila
16, 17. (a) Ata yo kele mpasi, sambu na nki yo kele mfunu na kuzitisa minsiku ya nene ya Yehowa? (b) Inki mbandu kemonisa nde batoko lenda tina mvindu ya inza?
16 Yezu tubaka nde: “Konso muntu yina ke salaka mambu ya mbi, yandi ke buyaka mwini.” (Yoane 3:20) Kansi, bantu yina kevandaka na nsemo kezolaka minsiku ya nene ya Yehowa. Na nzila ya Yezaya, Yehowa tubaka nde: “Bantu na nge yonso ta vanda bantu ya masonga.” (Yezaya 60:21a) Yo lenda vanda mpasi na kuzitisa minsiku ya lunungu na inza ya mefuluka na mansoni, luvunu, bwimi, ti lulendo. Mu mbandu, na bansi mingi, kimvwama na bo kekuma kaka mingi mpenza, ebuna yo kele mpasi ve na kutula mabanza yonso kaka na kusosa kimvwama. Kansi, Polo kebisaka mutindu yai: “Bantu yina ke zolaka kukuma bamvwama, Satana ke bwisaka bo; nzala mingi ya buzoba ti ya mbi yina bebisaka bantu, yina ke fwaka bo, yo ke kangaka bo.” (1 Timoteo 6:9) Yo kevandaka mawa mingi kana muntu mekudipesa mpenza na kusosa kimvwama na mpila nde yo baka kisika ya mambu yina kele mpenza mfunu, bonso balukutakanu ya Bukristu, kisalu ya santu, minsiku ya mbote ya luzingu, mpi mikumba ya dibuta!
17 Kuzitisa minsiku ya lunungu lenda vanda mpasi ntetentete sambu na batoko, sambu banduku na bo mingi mekudipesaka na kunwa dyamba ti bima yankaka yina kelausaka mpi na mansoni. Na Suriname, mwana-bakala mosi ya kitoko kusolulaka ti mwana-nkento mosi ya bamvula 14 mpi yandi lombaka yandi nde bo vukisa nitu. Mwana-nkento yai buyaka, yandi tendudilaka mwana-bakala yina nde Biblia kebuyisa mambu yina na bantu yina mekwelaka ntete ve. Bana-bankento yankaka ya nzo-nkanda sekaka yandi ngolo mpi bo mekaka kupusa yandi na kubalula mabanza na yandi, nde bana-bankento yonso kesosaka kulala ti mwana-bakala yina ya kitoko. Kansi mwana-nkento yango kubuyaka na ngolo yonso. Na nima ya bamposo fyoti, ba ekzame ya munganga kumonisaka nde mwana-bakala yina vandaka na SIDA mpi yandi kumaka kubela ngolo kibeni. Mwana-nkento yina vandaka na kyese sambu yandi lemfukaka na ntuma ya Yehowa ya ‘kukonda kusala pite.’ (Bisalu 15:28, 29) Bambangi ya Yehowa kevandaka na kyese mingi na kumona batoko yina kele na kati na bo kenwaninaka mambu yina kele ya mbote. Lukwikilu na bo, ti yina ya bibuti na bo, ‘kekumisaka kitoko,’ (NW) disongidila, kepesaka lukumu na zina ya Yehowa Nzambi.—Yezaya 60:21b.
Yehowa muntu keyedisa kisalu
18. (a) Inki kima ya nene Yehowa mesalaka sambu na bantu na yandi? (b) Inki dyambu kemonisa pwelele nde kuyela yango talanda kaka kusalama, mpi nki mambu ya kyese kekinga bantu yina kebikala na nsemo?
18 Ya kyeleka, Yehowa kemwanga nsemo na bantu na yandi, yandi kesakumuna bo, yandi ketwadisa bo mpi yandi kepesa bo kikesa. Na mvu-nkama ya 20, bo monaka kulungana ya mambu yina Yezaya kutubaka: “[Dikanda ya fyoti takuma bantu mingi, NW]; mpi ata bo kele mfunu mingi ve, mono ta kumisa bo ngolo mingi [“dikanda ya ngolo,” NW]. Mono Mfumu Nzambi, mono ta sala nswalu mambu yai, mono ta sala yo na ntangu na yo.” (Yezaya 60:22) Banda bo yantikaka dyaka kisalu na mvu 1919, “dikanda ya fyoti” mekuma mpenza “dikanda ya ngolo.” Ebuna, kuyela yango mesuka ntete ve! Na mvula meluta, bantu 14 088 751 kuvandaka na Lusungiminu ya lufwa ya Yezu. Mingi na kati na bo kuvandaka ve Bambangi. Beto kele na kyese mingi sambu bo kwisaka na nkinsi yina ya mfunu, mpi beto kelomba bo na kulanda kutambula na nsemo. Yehowa kelanda kaka na kupesa nsemo mingi na bantu na yandi. Kyelo ya organizasio na yandi kele kaka ya kukangula. Yo yina, bika beto yonso kubaka lukanu ya kubikala kaka na nsemo ya Yehowa. Yo kepesa beto balusakumunu mingi ntangu yai! Ebuna na bilumbu kekwisa, yo tapesa beto kyese mingi ntangu bigangwa yonso takembilaka Yehowa mpi tayangalalaka na nsemo ya lukumu na yandi!—Kusonga 5:13, 14.
Keti Nge Lenda Tendula?
• Banani kemonisaka lukumu ya Yehowa na bilumbu yai ya nsuka?
• Inki kima kemonisa nde kikesa ya bantu ya Yehowa mekita ve?
• Tanga mwa bisalu ya mbote yina Bambangi ya Yehowa kesalaka?
• Ata kimbeni ya ngolo kele, beto ketula kaka ntima na nki?
[Tablo ya kele na lutiti 27-30]
LAPOLO YA BAMBANGI YA YEHOWA YA INZA YA MVIMBA YA MVULA YA KISALU 1999
(Tala Nzozulu ya Nkengi ya papie)
[Bifwanisu ya kele na lutiti 25]
Bantu ke na kufuluka kaka na organizasio ya Yehowa
[Bifwanisu ya kele na lutiti 32]
Beto kele na kyese mutindu Yehowa mebika kyelo yonso ya kukangula sambu na bantu yina kezolaka nsemo