² Kaka na nsungi yai ya mpasi, bo kangaka ntumwa Polo mpi bo tulaka yandi na boloko. Ziku Polo kudiyangisaka mingi sambu Bakristu ya nkaka kwendaka ve kusadisa yandi; yo yina, yandi sonikilaka Timoteo nde: “Ntangu mono sambaka na mbala ya ntete, ata muntu mosi ve vandaka na lweka na mono, bo yonso yambulaka mono​—bika nde Nzambi kutangila bo ve mambu yina.” Ata mpidina, Polo ndimaka nde yandi bakaka mpi lusadisu. Yandi sonikaka nde: “Kansi, Mfumu telamaka pene-pene na mono mpi pesaka mono ngolo.” Ya kieleka, Mfumu Yezu pesaka yandi ngolo yina yandi vandaka na yo mfunu. Polo ke monisa lusadisu yina yandi bakaka ntangu yandi ke tuba nde, “[Mfumu] gulusaka mono na munoko ya ntambu.”​—2 Tim. 4:16, 17.a

³ Ziku, Polo bakaka kikesa ntangu yandi yindulaka mambu yina, mpi yo sadisaka yandi na kutula kivuvu nde Yehowa ta pesa yandi ngolo ya kukanga ntima na mambu ya mpasi yina yandi vandaka kukutana ti yo mpi yina vandaka kuvingila yandi. Yo yina, yandi tubaka na kikesa yonso nde: “Mfumu ta katula mono na konso kisalu ya mbi.” (2 Tim. 4:18) Ee, Polo bakisaka nde ata bantu me sadisa yandi ve, Nzambi ti Mwana na yandi ta sadisa yandi!

“MUNOKO YA NTAMBU”

10-12. (a) Inki mpasi Mukristu lenda kutana ti yo ntangu yandi ke sadisa muntu ya dibuta yina kele ti kimbefo yina ke mana ve? (b) Inki mutindu kutudila Yehowa ntima na bantangu ya mpasi ke kumisaka bangwisana na beto ti yandi ngolo? Pesa mbandu.

¹⁰ Ntangu beto ke kutana ti bampasi ya ngolo, beto lenda kuma ti mawi yina Polo vandaka na yo, disongidila, kudiwa pene-pene ya “munoko ya ntambu.” Na bantangu yina, kutudila Yehowa ntima ke vandaka mpasi, kansi yo me fwana kibeni na kutudila yandi ntima. Mu mbandu, yindula nde nge ke sansaka muntu mosi ya dibuta yina kele ti kimbefo mosi ya me sala bamvula mingi. Ziku, nge me lombaka Yehowa na kupesa nge mayele mpi ngolo.b Sambu nge me sala bikesa yonso yina nge fwete sala, keti nge fwete vanda ve na ngemba na kuzaba nde Yehowa ke tudilaka nge dikebi mpi ta pesa nge lusadisu yina nge kele na yo mfunu?​—Nk. 32:8.