DILONGI 59
Kanga Ntima Ata Bantu Ke Niokula Nge
Kilumbu kele bantu ta sosa kutelemina beto to nkutu kuniokula beto ngolo mpenza. Keti yo fwete bangisa beto?
1. Sambu na nki Bakristu fwete yituka ve kana bantu ke niokula bo?
Biblia ke tubaka pwelele nde: “Bantu yonso yina ke zola kuzinga na kukangama na Nzambi na bumosi ti Kristu Yezu, bo ta monisa bo mpi mpasi.” (2 Timoteo 3:12) Bantu niokulaka Yezu sambu yandi vandaka ve muntu ya nsi-ntoto ya Satana. Beto mpi kele ve bantu ya nsi-ntoto yai, yo yina beto fwete yituka ve kana bamfumu ya Leta mpi ya mabundu ke niokula beto.—Yoane 15:18, 19.
2. Inki mutindu beto lenda kudibongisa sambu na konso mpasi yina bantu lenda pesa beto?
Banda bubu yai, beto fwete kuma mpenza kutudila Yehowa ntima. Yo yina, nge fwete bumbaka ntangu konso kilumbu sambu na kusamba Yehowa mpi kutanga Ndinga na yandi. Nge fwete kwendaka na balukutakanu ya dibundu mbala na mbala. Kusala mambu yai yonso ta pesa nge ngolo yina nge ta vanda ti yo mfunu sambu na kukanga ntima ti kikesa ntangu bantu ta niokula nge yo vanda bantu yango kele bantu ya dibuta na beno. Ntumwa Polo, yina bo niokulaka mbala mingi, sonikaka nde: “Yehowa kele nsadisi na mono; mono ta wa boma ve.”—Baebreo 13:6.
Beto ke kumaka mpi ti kikesa mingi kana beto ke longa nsangu ya mbote mbala na mbala. Kulonga nsangu ya mbote ke sadisaka beto na kutudila diaka Yehowa ntima mpi na kuwa ve bantu boma ata fioti. (Bingana 29:25) Kana nge ke longa nsangu ya mbote ti kikesa bubu yai, yo ta sadisa nge na kuvanda ya kuyilama sambu na kulanda kulonga nsangu ya mbote ata ntangu bamfumu ya Leta me buyisa kisalu na beto.—1 Batesalonika 2:2.
3. Inki mambote beto ta baka kana beto ke landa kukanga ntima ntangu bantu ke niokula beto?
Ya kieleka, beto ke sepelaka ve nde bantu kuniokula beto. Kansi kana beto ke landa kukanga ntima, lukwikilu na beto ke kumaka ngolo mingi. Diaka, kinduku na beto ti Yehowa ke kumaka ngolo ntangu beto ke monaka mutindu yandi ke sadisaka beto na bantangu yina beto ke vandaka diaka ve ti ngolo ya me fwana sambu na kulanda kukanga ntima. (Tanga Yakobo 1:2-4.) Yehowa ke waka mpasi mingi ntangu yandi ke monaka mpila bantu ke niokulaka beto. Kansi yandi ke waka kiese na kumona mutindu beto ke landaka kukanga ntima. Biblia ke tuba nde: “Kana beno ke kanga ntima na bampasi sambu beno ke sala mambu ya mbote, yo kele diambu yina Nzambi ke zolaka.” (1 Piere 2:20) Kana beto ke landa kukanga ntima, Yehowa ta pesa beto luzingu ya mvula na mvula na nsi-ntoto ya mpa. Kuna bantu yonso ta sadilaka kaka Yehowa mpi ata muntu mosi ve ta niokulaka bo diaka.—Matayo 24:13.
LONGUKA MAMBU MINGI
Beto tala mambu ya ke ndimisa beto nde nge ta kuka kulanda kukangama na Yehowa ata bantu ke niokula nge mpi beto tala mambote yina yo ta natila nge.
4. Kanga ntima ata bantu ya dibuta na beno ke telemina nge
Yezu zabaka mbote nde bampangi na beto ya dibuta lenda zola ve nde beto sambila Yehowa. Beno tanga Matayo 10:34-36 mpi na nima beno pesa mvutu na ngiufula yai:
Inki bampangi ya dibuta lenda tuba to kusala kana mpangi na bo mosi me baka lukanu ya kusambila Yehowa?
Sambu na kumona mbandu mosi, beno tala VIDEO mpi na nima beno pesa mvutu na ngiufula ya ke landa.
Inki nge ta sala kana mpangi mosi ya dibuta na beno to nduku na nge mosi ke zola nde nge yambula kusambila Yehowa?
Beno tanga Nkunga 27:10 mpi Marko 10:29, 30. Na nima ya kutanga konso verse, beno pesa mvutu na ngiufula yai:
Inki mutindu verse yai lenda sadisa nge kana bampangi ya dibuta na beno to banduku na nge ke zola nde nge yambula kusambila Yehowa?
5. Landa kusambila Yehowa ata bantu ke niokula nge
Yo ke lombaka kikesa sambu na kulanda kusadila Yehowa ntangu bantu ya nkaka ke sosaka kukanga beto nzila ya kusala yo. Beno tala VIDEO mpi na nima beno pesa mvutu na ngiufula ya ke landa.
Inki mambu ya nge me mona na video ke pesa nge kikesa?
Beno Tanga Bisalu 5:27-29 mpi Baebreo 10:24, 25. Na nima ya kutanga konso verse, beno pesa mvutu na ngiufula yai:
Sambu na nki yo kele mfunu mingi na kulanda kusambila Yehowa ata ntangu bamfumu ya Leta me buyisa beto na kulonga nsangu ya mbote mpi na kusala balukutakanu?
6. Yehowa ta sadisa nge na kukanga ntima
Bambangi ya Yehowa ya ntoto ya mvimba ya bambuta mpi ya baleke, landaka kusadila Yehowa ata ntangu bantu vandaka kuniokula bo. Sambu na kumona mambu ya sadisaka bo, beno tala VIDEO. Na nima beno pesa mvutu na ngiufula ya ke landa.
Mutindu video me monisa yo, nki sadisaka Bambangi ya Yehowa yai na kulanda kukanga ntima?
Beno tanga Baroma 8:35, 37-39 mpi Bafilipi 4:13. Na nima ya kutanga konso verse, beno pesa mvutu na ngiufula yai:
Inki mutindu baverse yai ke ndimisa nge nde nge ta kuka mpi kulanda kukanga ntima na konso mpasi yina?
Beno tanga Matayo 5:10-12 mpi na nima beno pesa mvutu na ngiufula yai:
Sambu na nki nge fwete vanda na kiese ata bantu ke niokula nge?
Bambangi ya Yehowa mingi kibeni ke landaka kusadila Yehowa ata ntangu bantu ke buyisaka bo na kusala yo. Nge ta kuka kusala yo mpi!
BANTU YA NKAKA KE TUBAKA NDE: “Mono ta kuka ve kukanga ntima kana bantu kuniokula mono.”
Inki baverse ya ke pesa kikesa nge lenda tangila bo?
NA BUKUFI
Yehowa ke sepelaka mingi mpenza na bikesa ya beto ke salaka sambu na kulanda kusambila yandi ata ntangu bantu ke niokulaka beto. Ya kieleka ti lusadisu na yandi, beto ta kuka mpenza kukanga ntima!
Inki Nge Me Simba?
Sambu na nki Bakristu fwete yituka ve kana bantu ke niokula bo?
Inki mutindu beto lenda kudibongisa bubu yai sambu na konso mpasi yina bantu lenda pesa beto?
Inki ke ndimisa nge nde nge ta kuka kulanda kusadila Yehowa ata nge me kutana ti konso mpasi yina?
TALA MPI
Tala mutindu Yehowa sadisaka mpangi-bakala mosi ya leke na kukanga ntima ntangu bo tulaka yandi na boloko sambu yandi buyaka kukota na mambu ya politiki.
Tala mambu ya sadisaka bakala mosi ti nkento na yandi na kulanda kusadila Yehowa bamvula mingi ata bantu vandaka kubuyisa bo na kusala yo.
Tala mambu ya nge fwete sala sambu na kulanda kuvanda kikesa ata ntangu bantu ke niokula beto.
“Kudibongisa Banda Bubu Sambu na Mbangika” (Nzozulu ya Nkengi, Yuli 2019)
Inki beto fwete sala kana bantu ya dibuta na beto ke telemina beto mpi nki beto fwete sala sambu na kuzinga ti bo na ngemba mpi kulanda kusadila Yehowa?
“Kieleka Ke Nataka ‘Ngemba Ve, Kansi Mbele ya Bitumba’” (Nzozulu ya Nkengi, Oktobri 2017)