Kutuba Mambu Yina Kele ya Sikisiki

INKI lenda sala nde Mukristu mosi kutuba mambu yina kele ya kyeleka ve? Yo lenda vanda nde yandi kevutukila kaka dyambu mosi ya yandi waka, kukonda kuzikisa kana yo kele ya kyeleka to ve. To, kukonda kuzaba, yandi lenda lutisa ndilu na kutubila dyambu mosi sambu yandi tangaka yo ve mbote kisika yandi bakaka yo. Kana beto tula dikebi mingi na mambu ya sikisiki ata na mambu ya fyoti, bawi na beto tabakisa nde bo lenda tula ntima na bukyeleka ya mambu ya mfunu yina beto kezabisa bo.

Na Kisalu ya Bilanga. Bantu mingi kewaka boma na kuyantika kubasika na kisalu ya bilanga sambu bo kemonaka nde bo kele dyaka na mambu mingi ya kulonguka. Kansi, bantu ya mutindu yai kesukininaka ve na kumona nde bo lenda ta kimbangi ya mbote, ata na mwa nzayilu ya malongi ya luyantiku ya kyeleka ya bo mezaba. Inki mutindu bo lenda sala yo? Kinsweki na yo kele kudibongisa.

Na ntwala ya kubasika na kisalu ya bilanga, sosa kuzaba mbotembote malongi yina nge tatubila. Meka na kuyindula na ntwala bangyufula yina bawi na nge lenda yula. Sosa bamvutu ya mbote yina mekatuka na Biblia. Yo tasadisa nge na kupesa bamvutu ya sikisiki kukonda boma. Keti nge talonguka Biblia ti muntu mosi? Talulula mambu yina beno talonguka na dikebi yonso. Zikisa kana nge mebakisa mbote baverse yina kesimba bamvutu ya bangyufula yina kele na mukanda.

Inki nge tasala kana muntu ya nge kesolula na yandi to nduku ya kisalu meyula nge ngyufula mosi yina nge kudibongisaka ve na kupesa mvutu? Kana nge kezaba ve mvutu mbote, kubwa ve na mpukumuna ya kumeka na kupesa mvutu. “Na kupesa mvutu, bantu ya mbote ke yindulaka ntete.” (Bing. 15:28) Nge lenda zwa lusadisu ya nge kele na yo mfunu na mukanda Comment raisonner à partir des Écritures to na “Masolo ya Kusolula na Biblia” kana yo kele na ndinga na beno. Kana nge kele ve ti mikanda yai, zabisa yandi nde nge mekwenda kusosa mvutu mpi nge tavutuka na nima. Kana muntu yina kuyulaka ngyufula kele masonga, yandi tamona ve mpasi na kuvingila mvutu ya mbote. Nkutu, kudikulumusa na nge lenda simba ntima na yandi.

Kusala na kisalu ya bilanga ti bansamuni yina kele ti eksperiansi lenda sadisa nge na kuyedisa mayele ya kulonga Ndinga ya Nzambi mbotembote. Tala baverse ya bo kesadila mpi mutindu bo ketendula yo. Ndima na kudikulumusa yonso bangindu to bisika ya bo kesonga nge na kutomisa. Longoki ya kikesa Apolo kubakaka mambote na lusadisu yina bantu yankaka kupesaka yandi. Luka kutubaka nde Apolo kele muntu ya “zabaka kutuba mpenza,” ya “zabaka Mukanda ya Nzambi mbote-mbote,” mpi ya “vandaka kudipesa mpenza.” Yandi vandaka mpi bakala mosi yina vandaka “kuzabisa ti kulonga mbote-mbote mambu yina me tadila Yesu.”Ata mpidina, kele ti mambu yankaka ya yandi vandaka kubakisa mbote ve. Ntangu Akilasi ti Prisila kubakisaka dyambu yai, bo “nataka yandi na nzo na bo, ebuna bo songaka yandi nzila ya Nzambi diaka mbote-mbote.”​—Bis. 18:24-28.

“Landa Kaka Nsangu Yina ya Beto Lunga Kutula Ntima.” Masolo ya beto kesala na balukutakanu fwete monisa nde beto kebaka na valere mingi mukumba yina dibundu kele na yo ya kuvanda ‘dikunzi yina kesimbaka mambu ya kieleka.’ (1 Tim. 3:15) Sambu na kukotila kyeleka, yo kele mfunu nde beto bakisa mbote baverse yina beto kekana na kusadila na masolo. Tadila mambu yina kele na ntwala to na nima na yo mpi dibanza ya yo ketubila.

Bantu lenda vutukila mambu yina nge metuba na lukutakanu mosi ya dibundu. Ya kyeleka, “beto yonso ke salaka bifu mingi.” (Yak. 3:⁠2) Kansi yo lenda sadisa nge na kubaka mambote ya dyambu yai kana nge yedisa bikalulu yina kepusaka na kutuba mambu ya sikisiki. Bampangi mingi ya babakala yina mesonikisaka na Nzo-Nkanda ya Kisalu ya Teokrasi takuma bankuluntu na bilumbu kekwisa. Bo kelombaka “mambu ya kuluta mingi” na bampangi yina bo kepesaka mikumba ya mutindu yina. (Luka 12:48) Sambu na kukonda kutula dikebi, kana nkuluntu mosi mepesa bandongisila ya mbi yina menatila bantu ya dibundu mambu ya mpasi, Nzambi lenda buya nkuluntu ya mutindu yina. (Mat. 12:36, 37) Yo yina, mpangi ya bakala yina mefwana na kuvanda nkuluntu fwete zabana sambu ‘yandi kelandaka kaka nsangu yina ya bantu lunga kutula ntima, nsangu yina kekwendaka kiteso mosi na malongi na beto.’​—Tito 1:9.

Keba na mpila nde bangindu na nge kuwakana ti “mambu ya kieleka” yonso ya kele na Masonuku. (2 Tim. 1:13) Mambu yai fwete pesa nge ve boma. Mbala yankaka yo kelomba nde nge manisa ntete kutanga Biblia ya mvimba. Landa na kusala yo. Kansi na ntwala ya kumanisa yo, tala bangindu ya melanda yina lenda sadisa nge na kutadila malongi ya nge kekana kusadila na ntangu nge kelonga.

Ntetentete, kudiyula nde: ‘Keti malongi yai kewakana ti mambu ya mu melongukaka dezia na Biblia? Keti yo tabenda dikebi ya bawi na mono na Yehowa, to na mayele ya inza na mpila nde yo lenda pusa bo na kubika nde yo twadisa bo?’ Yezu kutubaka nde: “Mambu yina ya nge ke tubaka kele mambu ya kieleka.” (Yoa. 17:17; Kul. 13:1-5; 1 Kor. 1:19-21) Na nima, sadila mbote bisadilu ya kulongukila yina kimvuka ya mpika ya kwikama mpi ya mayele mepesaka beto. Bisadilu yai tasadisa nge na kubakisa kaka ve baverse mbotembote, kansi na kusadila yo mpi na bukatikati mpi kukonda kulutisa ndilu. Kana nge ketuba “mambu ya kieleka” na masolo na nge mpi nge ketula ntima na nzila yina Yehowa kesadilaka ntangu nge ketendula mpi kemonisa mutindu ya kusadila baverse, mambu ya nge ketuba tavanda ya sikisiki.

Zikisa Kana Mambu Yango Kele ya Sikisiki. Mambu ya ke na kusalama, ya mekatuka na mukanda mosi, mpi baeksperiansi lenda sadisa nge ntangu nge kepesa bambandu mpi kemonisa mutindu ya kusadila mambu yankaka. Inki mutindu nge lenda zaba kana mambu yango kele ya sikisiki? Mutindu mosi ya kusala yo kele ya kubaka mambu yango na bantu to mikanda yina mefwana na kutudila ntima. Kuvila ve na kuzikisa kana mambu yango kele dyaka na ngala. Bantalu kemanaka valere, mambu yina bantu ya siansi kesengumunaka kekumaka ya ntama; mpi sambu mayele ya bantu ke na kukuma mingi na yina metala kubakisa mambu yina melutaka mpi bandinga ya ntama. Yo yina, nge fwete zikisa mbote mambu ya nge ketuba ya mekatuka na nzayilu ya ntama. Nge fwete keba mpenza kana nge kezola kusadila bansangu yina mekatuka na bazulunalu, na televizio, na radio, na mikanda ya kekwisaka na nzila ya ordinatere, to na Internet. Bingana 14:15 kelongisila nde: “Zoba ke ndimaka bindima-ndima kansi muntu ya mayele ke yindulaka ntete.” Kudiyula nde: ‘Keti muntu ya mepesa mono bansangu to kisika ya mu mebaka yo mezabanaka nde yo ketubaka mambu ya sikisiki? Keti bantu yankaka lenda zikisa bansangu yango na mitindu yankaka?’ Kana nge kele na badute sambu na yina metala kyeleka ya dyambu mosi, kusadila yo ve.

Katula kuzikisa bukyeleka ya bantu mpi bisika bansangu mekatuka, tadila na dikebi yonso mutindu nge kekana kusadila bansangu yango. Zikisa kana mambu yina nge mebaka na mikanda yankaka ti bantalu kewakana ti mambu ya bo ketubila kisika nge mebaka yo. Ata nge kesala kikesa na kunyata dyambu mosi, keba nde nge soba ve “mwa bantu” kukuma “bantu mingi,” nde “bantu mingi” kukuma “konso muntu,” mpi nde “bantangu yankaka” kukuma “ntangu yonso.” Kulutisa ndilu na kusikisa mambu to barapore yina kele ti bantalu, kiteso ya dyambu mosi mesalama, to bukyeleka na yo lenda nata bantu na kudiyula kana mambu ya nge ketuba kele mpenza ya kyeleka.

Kana ntangu yonso nge ketuba mambu yina kele ya sikisiki, bantu tazaba nge bonso muntu mosi ya kezitisaka kyeleka. Bambangi ya Yehowa na kimvuka mezabanaka nde bo kele bantu ya ketubaka kyeleka. Kuluta dyaka, yo kepesaka lukumu na “[Yehowa] Nzambi ya kieleka.”​—Nk. 31:6.