“Beno Fweti Vibidila”

BETO “fweti [vibidila, NW]” kana beto zola kuzwa “mambu yina ya yandi me silaka beto.” (Baebreo 10:36) Ntendudi ya Biblia mosi ketendula nde ngogo ya Kigreki sambu na “kuvibidila” yina ntumwa Polo kusadilaka na kapu yai kesongaka ntangu ya nkaka “ndenda yina kimenina kele na yau sambu na kuzinga na bamvwandilu ya mpasi mpi ya kukonda mbote.”

Na bangumba ya Europa, kimenina ya mpidina kemenaka. Na ngituka yonso, kimenina yango kebingamaka nde zinga-mvula-na-mvula. Kimenina yai ya ngumba kezingaka mvula na mvula ve, na kutuba ya mbote, kansi yau kevibidilaka bamvula na bamvula na kubutaka bintuntu ya kitoko konso kisiwu. Buku The New Encyclopædia Britannica ketendula nde zina ya zinga-mvula-na-mvula kupesamaka na kimenina yango sambu na “ngolo mpi inda ya luzingu na yau.” (Zina ya siansi ya bimenina yai kele Sempervivum yina kezola kutuba mpi nde “zinga-mvula-na-mvula.”)

Kima kesalaka nde kimenina yai kuzabana mingi kele kuyela na yau na bisika ya mpasi. Yau lenda kumonana na lweka ya bansongi ya ngumba kisika mupepe kebulaka ngolo, kisika ya tiya lenda kumata tii na kiteso ya 60° F (35° C) na kilumbu mosi kaka. Yau lenda kutula bansimbulu na kati ya bampwasa ya matadi yina kele ti ntoto fyoti. Binsweki ya nkaka ya mvibidilu na yau na bamvwandilu ya mutindu yai kele inki?

Zinga-mvula-na-mvula kele ti matiti ya misuni, yina kebumbaka masa na dikebi yonso. Yau kesadisaka yandi na kubaka luta ya madidi mpi ya neige ntangu yau kekuma masa. Dyaka, yau kemenaka na kimvuka yina kevukisaka ngolo na bau sambu na kuvanda na zulu ya matadi ya nene. Na kutulaka bansimbulu na kati ya bampwasa ya matadi, yau ketaninama na mipepe ya imbi, ata nkutu ntoto kele fyoti. Na bangogo ya nkaka, yau kezwaka mavimpi na kusadilaka baluta na yau na bamwandilu ya imbi.

Na kimpeve, beto lenda kudimona na bankadilu yina kenwanisa kiteso ya mvibidilu na beto. Inki tasadisa beto na kuvibidila na kati ya bampasi? Bonso kimenina zinga-mvula-na-mvula, beto lenda kubumba masa yina kepesaka luzingu mpi kuvukana kibeni ti Bakristu ya kyeleka sambu na lusadisu mpi lutaninu. Na zulu ya mambu yonso, bonso kimenina ya ngumba, beto fwete kangama na zulu ya Yehowa, “ditadi” na beto, kumosi ti na Ndinga na yandi mpi na organizasio na yandi.​—2 Samuele 22:3.

Ya kyeleka, kimenina zinga-mvula-na-mvula kebambula beto mbote nde ata beto kele na bamvwandilu mosi ya mpasi, beto lenda vibidila kana beto kesadila mbote lusadisu yina beto kele na yau. Yehowa kesyamisa beto nde mvibidulu ya mutindu yina tatwadisa beto na kubaka ‘mambu yina ya yandi me silaka beto,’ yina tatendula kuzinga mvula na mvula ya kyeleka.​—⁠Baebreo 6:12; Matayo 25:⁠46.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.