Nzambi Kekudibanzaka Sambu na Nge

MARIA, Mukristu mosi ya nkento kumonaka mpasi mingi na luzingu na yandi ntangu yandi kumaka na bamvula kuluta 40. Bizumba ya bakala na yandi nataka na kufwa dikwela nsungi ya kuluta mvukumi mosi meluta. Na manima, Maria vandaka kusala yonso sambu na kulungisa mukumba na yandi bonso kibuti ya bana na yandi iya. Kansi yandi kele kwandi yandi mosi, mpi bantangu ya nkaka, yau kevandilaka yandi mpasi na kuvibidila nkadilu ya kuvanda yandi mosi. Maria kekudiyula nde, ‘keti yau kesonga nde Nzambi kekudibanzaka sambu na mono ve to bana na mono ya kukonda tata?’

Ata nge memonaka kimbeni ya mutindu yai to ve, na ntembe ve nge lenda kuditula na kisika ya Maria sambu na kuzaba mawi na yandi. Bamingi kati na beto mevibidilaka mambu ya mpasi, mpi beto lendaka kudiyula nde inki ntangu mpi inki mutindu Yehowa lendaka kusadisa beto. Mingi kati ya bampasi yango kele malanda ya kwikama na beto na bansiku ya Nzambi. (Matayo 10:​16-18; Bisalu 5:29) Ya nkaka kele malanda ya kukonda kukuka na beto bantu yina kezinga kati ya inza yina metwadisama na Satana. (1 Yoane 5:19) Ntumwa Polo tubaka nde: “Bima yonso ya Nzambi salaka ke dila ngolo, yo ke mona mpasi.”​—Roma 8:22.

Kansi, mutindu nge kevibidila bampasi ya ngolo kemonisa ve nde Yehowa meyambulaka nge to ketadilaka ve mambote na nge. Inki mutindu nge lenda kundima yau? Inki kesonga nde Nzambi kekudibanzaka sambu na nge?

Mbandu Mosi ya Ntama

Biblia kesonga mbotembote bukyeleka ya dikebi ya Yehowa sambu na konso muntu. Beto tadila Davidi. Yehowa vandaka na dikebi mosi ya ngolo sambu na toko ngungudi yai, na kutadilaka yandi bonso “muntu . . . yina ta pesa yandi kiese.” (1 Samuele 13:14) Na manima, ntangu Davidi vandaka kuyala, Yehowa silaka yandi: “Mono [ta vanda] ti nge bisika yonso ya nge . . . [ta kwenda].”​—2 Samuele 7:9.

Keti mambu yango kesonga nde Davidi zingaka luzingu mosi ya “kyese,” ya kukonda bampasi? Ve, Davidi vibidilaka bampasi ya ngolo na ntwala mpi na kati ya luyalu na yandi. Bamvula mingi na ntwala yandi kukuma ntotila, yandi zombamaka mbala mingi na ntotila ya ngondi Saule. Na ntangu yina ya luzingu na yandi, Davidi sonikaka nde: “Mono kele na kati ya bantambu . . . kati ya bantu ke diaka bantu ya nkaka. Meno na bo kele bonso makonga ti batolotolo.”​—Nkunga 57:5.

Ata buna, na nsungi yonso ya kimbeni yina Davidi kwikilaka mbotembote na kudibanza ya Yehowa. Yandi tubaka na kisambu na Yehowa nde: “Ya kieleka, nge zaba mutindu mono kemona mpasi.” Yinga, sambu na Davidi yau vandaka bonso Yehowa sonikaka bampasi yonso ya mvimba kati ya buku na yandi. Ebuna Davidi kuyikaka nde: “Tula mansanga na mono na kati ya mulangi ya mpusu. Keti yau kele ve na kati ya buku na nge?”a (Nkunga 56:​8, NW) Na kufwanisaka mutindu yina, Davidi kutulaka ntima nde Yehowa vandaka kuzaba kaka mvwandilu mpamba ve, kansi mpi malanda na yau na zulu ya mawi.

Penepene ya nsuka ya luzingu na yandi, Davidi lendaka kusonika na ngikana na yandi mosi nde: “Mfumu Nzambi ke nataka muntu mbote na nzila ya yandi zola kwenda, kana bikalulu ya muntu yango kupesa yandi kiese; ata yandi bwa, yandi ta vanda ve na ntoto tii kuna, sambu Mfumu Nzambi ta sadisa yandi na kutelama.” (Nkunga 37:23, 24) Nge mpi lenda kutula ntima nde kana bampasi na nge kesyaminina mpi yau kefula, Yehowa kemona mpi ketonda mvibudulu na nge. Polo sonikaka nde: “Nzambi ke salaka bantu mbi ve, kansi yandi ke salaka bo mbote. Yandi ta vila ve kuzola ya ntima yina ya beno ke songaka yandi na bisalu ya beno ke salaka ti ya beno ke sala diaka na bampangi na beno bakristo.”​—Baebreo 6:10.

Kuluta dyaka, Yehowa lenda nwanina nge na kupesaka nge ngolo ya kuvibidila konso lukakilu yina metulama na nzila na nge. Davidi kusonikaka nde: “Mbala mingi muntu ya mbote ke monaka mpasi, kansi Mfumu Nzambi ke gulusaka yandi na bampasi yango yonso.” (Nkunga 34:20) Ya kyeleka, Biblia ketubila beto nde meso ya Yehowa “ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi mpenza.”​—2 Bansangu 16:9.

Yehowa Mebendaka Nge

Banzikisa ya ngika ya kudibanza ya Yehowa lenda kumonana na bangogo ya Yezu. Yandi tubaka nde: “Ata muntu mosi ve lenda kwisa na mono kana Tata yina tindaka mono me benda yandi ve.” (Yoane 6:44) Yinga, Yehowa kesadisaka bantu muntu na muntu na kubaka mambote ya mingi na kimenga ya Kristu. Inki mutindu? Na kiteso ya nene, yau kele na kusala kisalu ya kusamuna Kimfumu. Ya kyeleka, kisalu yango kele bonso “kimbangi sambu na makanda yonso,” ebuna kekumina konso muntu kati na bantu. Mutindu nge kewa mpi kendima nsangu ya mbote kele nzikisa ya kudibanza ya Yehowa sambu na nge.—Matayo 24:14, NW.

Na nzila ya mpeve santu, Yehowa kebendaka bantu na lweka ya Mwana na yandi mpi na kivuvu ya luzingu ya mvula na mvula. Dyambu yango kesadisaka konso muntu na kubakisa mpi kusadila bakyeleka ya kimpeve ata beto kele bantu ya kukonda kulunga. Na ntembe ve, muntu ata mosi ve lenda kubakisa balukanu ya Nzambi kana yandi mekuzwa ve lusadusu ya mpeve ya Nzambi. (1 Korinto 2:​11, 12) Bonso Polo kusonikilaka bantu ya Tesalonika, “bantu yonso ve ke zolaka kundima Nsangu ya Mbote.” (2 Tesalonika 3:⁠2) Yehowa kepesaka mpeve na yandi kaka na bayina kemonisaka luzolo ya mbote sambu yandi kubenda bau.

Yehowa kebendaka bantu mpamba ve yandi kezolaka konso muntu kati na bau mpi kezolaka nde bau kuzwa lugulusu. Nzikisa ya kudibanza ya Yehowa ya inki mutindu! Yezu tubaka nde: “Tata na beno yina kele na zulu ke zolaka ve nde ata leki mosi na kati ya baleki yai kuvila.” (Matayo 18:14) Yinga, na meso ya Nzambi konso muntu kele na mfunu. Yau yina Polo kwisaka kusonika nde: “Nzambi ta futa konso muntu na kiteso ya mambu yina ya yandi salaka.” (Roma 2:⁠6) Mpi ntumwa Piere tubaka nde: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina [konso muntu] ke zitisaka yandi ti ke salaka mambu ya mbote.”​—Bisalu 10:34, 35.

Bimangu ya Yezu

Dikebi ya Nzambi sambu na bantu monisamaka mbotembote na bimangu yina salamaka na nzila ya Mwana na yandi, Yezu. Bambelula kusalamaka ti ngituka ya ngolo. (Marko 1:40, 41) Sambu Yezu lenda “[kusala] mambu ata mosi ve na ngolo na yandi mosi; yandi ke salaka kaka mambu yina ya yandi ke monaka na Tata na yandi,” mawa na yandi kesonga kudibanza ya zola ya Yehowa sambu na konso nsadi na yandi.​—Yoane 5:19.

Beto tadila nkenda ya kimangu mosi yina Yezu salaka, yina kele na Marko 7:​31-37. Kuna Yezu kubelulaka bakala mosi yina vandaka kifwa-makutu mpi ketuba mbote ve. Biblia ketuba nde yandi “nataka [muntu] yina na kisika mosi, kuna bo vandaka kaka bo zole mpamba.” Ebuna, “Yezu talaka na zulu, yandi pemaka ngolo, yandi tubilaka yandi nde: ‘Efata’, disongidila nde: ‘kanguka!’ ”

Sambu na inki Yezu nataka bakala yango na kingenga? Yau kele mpila yina mpamba ve muntu yina kele kifwa-makutu mpi ketubaka mbote ve kelutaka kumona nsoni na ntwala ya bantu. Yau lenda kuvanda nde Yezu zabaka nsoni yina bakala yango zolaka kumona mpi yau yina yandi solaka kubelula yandi na kingenga. Ntendudi mosi ya Biblia kemonisa nde: “Nkenda ya mvimba kesonga beto mbotembote nde Yezu tadilaka bakala yango bonso mbefo mpamba ve; kansi yandi tadilaka yandi bonso muntu. Bakala yango vandaka na mpusa mpi na mpasi ya kuswaswana, ye na ntadilu mosi ya kufuluka na zola Yezu sadisaka yandi na mutindu mosi ya kulwadisa mawi na yandi ve mpi na mutindu mosi ya yandi lendaka kubakisa.”

Nkenda yango kesonga nde Yezu vandaka ti dikebi ya ngolo sambu na bantu. Nge lenda kundima nde yandi kele na dikebi ya mutindu mosi sambu na nge. Ya kyeleka, lufwa na yandi ya kimenga kele lumonisu ya lutondo sambu na inza ya bantu yina lenda kusumbama. Na yau, nge lenda baka dyambu yango bonso ya nge mosi, bonso Polo, yina kusonikaka nde: “Mwana-Nzambi . . . me zolaka mono, yina me fwaka sambu na mono.” (Galatia 2:​20, beto bantu metengimisa bisono.) Ye sambu Yezu tubaka nde ‘Muntu yina me mona yandi, yandi me mona mpi Tata,’ beto lenda ndima nde Yehowa kele ti kudibanza ya mutindu mosi sambu na konso muntu kati na bansadi na yandi.​—Yoane 14:9.

Yehowa Mekuma Mupesi-Nsendo

Kubakisa nzayilu ya Nzambi kesonga kuzaba konso luse ya kimuntu na yandi mutindu yau memonisama na kati ya Biblia. Ntendula kibeni ya zina ya Yehowa kele “Yandi Kekitukaka,” na kumonisaka nde Yehowa lenda kukituka konso yina yandi kezola sambu na kulungisa luzolo na yandi. Na nsungi yonso ya nkenda ya bantu, yandi mebakaka bisalu mingi, yika mpi yina ya Ngangi, Tata, Nkwa Kimfumu, Ngungudi, Yehowa ya mikangu, Muwi ya bisambu, Zuzi, Mfundisi, Longi ya Nene, ye Ngulusi.b

Sambu na kutonda ntendula yonso ya zina ya Nzambi, beto fwete zaba Yehowa na kisalu na yandi ya Mupesi-nsendo. Polo sonikaka nde: “Kansi kana muntu ke na lukwikilu ve, Yandi lenda pesa Nzambi kiese ve. Sambu konso muntu yina ke kwisaka na Nzambi yandi fweti kwikila nde Nzambi kele, mpi nde Nzambi ke pesaka [nsendo] na bantu yina ke sosaka yandi.”​—Baebreo 11:6.

Yehowa mesila moyo ya mvula na mvula na Paladisu ya ntoto na bayina bubu yai keponaka kusadila yandi na ntima yonso. Yau kele nsoki ve na kuvingila ndungisa ya lusilu yina ya nene, yau kele mpi lulendo ve ya kudiyindula na kuzingaka kuna. Moize “vandaka ke tala kaka [nsendo] yina kele na ntwala.” (Baebreo 11:26) Mutindu mosi, Polo vandaka kuvingila na mpusa yonso ndungisa ya lusilu ya Nzambi sambu na Bakristu ya Kupakulama ya kwikama. Yandi sonikaka nde: “Mono ke bakaka ntinu sambu na kubaka [nsendo]; [nsendo] yango yo yai: Nzambi ke solaka beto na kuzinga na zulu, na lusadisu ya Yezu Kristo.”—Filipi 3:14.

Nge mpi lenda vingila na kyese mambu yina Yehowa mesila na bayina kevibidila. Kuvingila nsendo yango kele kitini ya mvimba ya nzayilu na nge ya Nzambi mpi ya mvibudulu na nge na kisalu na yandi. Yau yina, yindulaka konso lumbu na balusakumunu yina Yehowa mebumbila nge. Maria yina beto tubilaka na luyantiku, mesalaka ngolo ya kuswaswana sambu na kusala yau. Yandi ketuba nde: “Mono kwisaka kundima, na mbala ya ntete na luzingu na mono, ntama mingi nde nkudulu ya kimenga ya Yezu kele mpi sambu na mono. Mono mebanda kudiwa nde Yehowa kekudibanzaka sambu na mono bonso muntu. Mono kevandaka Mukristu kubanda bamvula 20, kansi mono mebanda kukwikila mambu yai ntama mingi ve.”

Na nsadisa ya kulonguka mpi ya kuyindula ya siki-siki ya Biblia, Maria, kumosi ti mafuku ya bantu ya nkaka, mekwisa kuzaba nde Yehowa kekudibanzaka sambu na bantu na yandi kaka na kimvuka ve, kansi mpi bonso bantu na kingenga. Ntumwa Piere kukwikilaka yau mingi yau yina yandi sonikaka nde: “Beno katula mabanza na beno yina yonso ke yangisaka beno, ebuna beno pesa yo na [Nzambi], sambu yandi muntu ke talaka mambu na beno.” (1 Piere 5:7) Yinga, Nzambi kekudibanzaka sambu na nge!

[Banoti na nsi ya lutiti]

[Lupangu ya kele na lutiti 6]

Lufutumuku—Nzikisa ya Kudibanza ya Nzambi

NZIKISA yina kendimisa dikebi ya Nzambi sambu na konso muntu kele na Biblia na Yoane 5:​28, 29: “Ntangu ke kwisa, bantu yonso yina me fwaka kele na maziamu [ya mbambukilu, NW], bo ta wa ndinga [ya Yezu]; ebuna bo ta basika.”

Kima ya kebenda dikebi kele nde, awa ngogo ya Kigreki mne·meiʹon (mazyamu ya mbambukilu) mesadilama na kisika ya taʹphos (mazyamu). Ngogo taʹphos kepesa kaka ngindu ya kuzika. Kansi mne·meiʹon kemonisa nde bau keyibuka nkenda ya muntu yina kufwaka.

Na dyambu yai, yindula fyoti mambu ya lufutumuku talombila Yehowa Nzambi. Na kuvutula muntu na luzingu, yandi fwete kuzaba kima yonso yina metadila muntu yango​—⁠na kati na yau bidimbu yonso ya yandi butukaka na yau ti mabanza na yandi ya mvimba. Na mutindu yina mpamba, muntu lenda kuvutulama na mpila yandi vandaka ntete.

Ya kyeleka, yai kele dyambu ya lenda kusalama ve na mboninu ya bantu, kansi “[Nzambi] lunga sala mambu yonso.” (Marko 10:27) Nkutu yandi lenda kumonisa mambu yina kele na ntima ya muntu. Ata yau kuvanda nde muntu mefwaka bamvunkama mingi melutaka, mbambuka ya Nzambi sambu na yandi kele kaka, yau kefwanzanaka ve. (Yobi 14:13-15) Yau yina, ntangu yandi kutangaka Abrahami, Izaki mpi Yakobi, Yezu lenda kutuba bamvunkama mingi na nima nde Yehowa “kele Nzambi ya bantu ya moyo, kansi yandi kele ve Nzambi ya bantu me fwaka. Sambu [na yandi bau yonso kezinga, “NW”].”​—Luka 20:38.

Yau yina, mafuku ya bantu yina mefwaka kele na mbambuka ya Yehowa na kiteso ya kufwana. Nzikisa ya kitoko ya inki mutindu nde Nzambi kekudibanzaka sambu na konso muntu!

[Kifwanisu ya kele na lutiti 7]

Yezu monisaka kudibanzaka sambu na bayina yandi belusaka