“Ata Beno Me Monaka Yesu Kristo Ve, Kansi Beno Ke Zolaka Yandi”
“Ata beno me monaka Yesu Kristo ve, kansi beno ke zolaka yandi; ata beno ke mona yandi ntangu yai ve, kansi beno ke ndimaka yandi. Yo yina beno ta mona kiese mosi ya nene.”—1 PIERE 1:8.
1. Ata yau kele nde muntu mosi ve na ntoto bubu yai memonaka Yezu, inki mutindu bantu yankaka ya lusambu kesalaka ngolo na kumonisa kudipesa na bau na yandi?
MUNTU mosi ve ya kezingaka bubu yai mebikaka kumona Yezu Kristu. Kansi mafuku ya bantu ketubaka nde bau kezolaka yandi. Konso mvula na Yanuari 9, na Manille, Philippines, kiteki ya Yezu Kristu, nene bonso Yezu ya kyeleka kenata kulunsi, kebendamaka na babalabala, dyambu ya bau tendulaka bonso lumonisu ya kuluta nene, ya kuluta ngituka ya lusambu ya bantu yonso na insi. Bantu ya kufuluka na mawi kepusanaka, kenwaninaka; bamosi kemata nkutu na mubulu yonso na zulu ya bankaka sambu na kusimba kiteki yango. Bantu mingi ya kevandaka pana sambu na kusungimina dyambu yai kebendamaka ntetentete sambu na kyese ya mulongo. Kansi, bankaka na kati na bau kele nkatu ntembe bantu yina kekudiwaka na masonga yonso ya kubendama na Yezu. Bonso nzikisa na yau, bau lenda lwata kulunsi to lenda kwenda ntangu yonso na nzo-nzambi. Kansi, keti lusambu ya biteki ya mutindu yina lenda tadilama bonso lusambu ya kyeleka?
2, 3. (a) Banani na kati ya balandi ya Yezu monaka mpi waka yandi mpenza? (b) Banani yankaka na mvu-nkama ya ntete zolaka Yezu mpi tulaka lukwikilu na yandi, ata bau mosi monaka yandi ve?
2 Na mvu-nkama ya ntete, kuvandaka ti mafunda ya bantu mingi na baprovense ya Roma ya Yudea, Samaria, Perea, ti Galilea yina kumonaka bau mosi mpi kuwaka Yezu Kristu. Bau widikilaka ntangu yandi vandaka kutendula bakyeleka ya kesimba ntima ya metala Kimfumu ya Nzambi. Bau vandaka bamoni-mambu ya bimangu yina yandi salaka. Bankaka na kati ya bantu yai kumaka balongoki na yandi ya kudipesa, na kundimaka nde yandi vandaka “Mesia, Mwana ya Nzambi ya moyo.” (Matayo 16:16) Kansi, bayina Piere sonikilaka mukanda na yandi ya ntete ya kupemama vandaka ve na kati ya bantu yai.
3 Bayina Piere vandaka tubila vandaka bantu ya baprovense ya Roma ya Ponti, Galatia, Kapadosia, Azia, mpi Bitinia—yonso vandaka kisika Turquie kele bubu yai. Piere sonikilaka bau nde: “Ata beno me monaka Yesu Kristo ve, kansi beno ke zolaka yandi; ata beno ke mona yandi ntangu yai ve, kansi beno ke ndimaka yandi. Yo yina beno ta mona kiese mosi ya nene, kiese yina ya beno ta mona mpila ya kutendula mpi ve.” (1 Piere 1:1, 8) Inki mutindu bau kwisaka kuzaba Yezu Kristu na kiteso ya kuzola yandi mpi kutula lukwikilu na yandi?
4, 5. Inki mutindu bantu yina bikaka kumona Yezu ve longukaka mambu mingi ya metala yandi sambu na kuzola yandi mpi kutula lukwikilu na yandi?
4 Na ntembe ve, bankaka vandaka na Yeruzalemi ntangu ntumwa Piere taka kimbangi na kibuka yina kwisaka na nkinsi ya Pantekoti na 33 T.B. Na nima ya nkinsi, balongoki mingi bikalaka na Yeruzalemi sambu na kubaka dyaka ndongolo mingi na bantumwa. (Bisalu 2:9, 41, 42; fwanisa ti 1 Piere 1:1.) Na banzyetolo ya kimisionere ya mbala mingi, ntumwa Polo landaka kusala mpi kisalu ya kikesa na kati ya bantu yina vandaka kuzinga na bisika yina Piere tindaka na nima mukanda ya ntete ya Biblia yina kele ti zina na yandi.—Bisalu 18:23; 19:10; Galatia 1:1, 2.
5 Sambu na inki bantu yina ya bikaka kumona Yezu ve, bendamaka ngolo na yandi? Na bilumbu na beto, sambu na inki mafuku mingi dyaka, na ntoto ya mvimba, kezolaka yandi mingi?
Mambu Yina Bau Waka
6. (a) Kana nge zolaka kuwa Piere keta kimbangi sambu na Yezu na Pantekoti ya mvu 33 T.B., inki nge lendaka kulonguka? (b) Inki mutindu yau simbaka bantu 3000 yina vandaka pana?
6 Kana nge vandaka na Yeruzalemi ntangu Piere tubaka na kibuka yina vandaka na nkinsi na 33 T.B., inki nge zolaka kulonguka sambu na Yezu? Nkatu mbefula, bimangu yina ya yandi salaka monisaka nde yandi tindamaka na Nzambi. Nde, ata bantu ya masumu fwaka Yezu, yandi vandaka dyaka ve na mazyamu kansi yandi futumukaka mpi na nima yandi tombukaka na zulu na diboko ya kibakala ya Nzambi. Nde ya kyeleka, Yezu vandaka Kristu, Mesia yina bambikudi sonikaka. Nde na nzila ya Yezu Kristu, mpeve santu tyamukaka na zulu ya balandi na yandi yau yina bau lendaka kuta kimbangi na mbala mosi na bantu ya makanda mingi na yina metala mambu ya ngituka yina Nzambi vandaka kusala na nzila ya Mwana na yandi. Bantima ya bamingi yina waka Piere kilumbu yina pusamaka ngolo mpenza, mpi bantu kiteso ya 3000 botamaka bonso balongoki Bakristu. (Bisalu 2:14-42) Kana nge vandaka pana, keti nge zolaka kubaka nzengolo ya mbote mutindu yina?
7. (a) Kana nge vandaka na Antioshe ntangu ntumwa Polo samunaka kuna, inki nge lendaka kulonguka? (b) Sambu na inki bantu yankaka na kibuka kumaka bankwikidi mpi kabulaka nsangu ya mbote ti bankaka?
7 Kana nge vandaka na kati ya bayina vandaka pana ntangu ntumwa Polo longaka na Antioshe na provense ya Roma ya Galatia, inki yankaka nge zolaka kulonguka sambu na Yezu? Nge zolaka kuwa Polo ketendula nde nkanu ya lufwa ya Yezu na maboko ya bamfumu na Yeruzalemi yitaka kutubama na bambikudi. Nge zolaka kuwa dyaka nzikisa ya bamoni-mambu ya lufutumuku ya Yezu. Na ntembe ve ntendula ya Polo nde, na kufutumunaka Yezu na lufwa, Yehowa ndimisaka nde muntu yai vandaka Mwana ya Nzambi, zolaka kusimba nge na ntima. Mpi keti ntima na nge zolaka kupusama ve na kuzaba nde ndolula ya masumu yina mepesamaka na nsadisa ya lukwikilu na Yezu lendaka kunata na luzingu ya mvula na mvula? (Bisalu 13:16-41, 46, 47; Roma 1:4) Na kundimaka ntendula ya mambu ya bau vandaka kuwa, bankaka na Antioshe kumaka balongoki, na kukabulaka nsangu ya mbote na kikesa yonso ti bankaka, ata nkutu kusala mutindu yina vandaka kulomba nde bau kukutana ti mbangika ya mingi.—Bisalu 13:42, 43, 48-52; 14:1-7, 21-23.
8. Kana nge vandaka na lukutakanu ya dibundu ya Efezo ntangu bau zwaka mukanda ya Polo sonikilaka bau, inki nge lendaka kulonguka?
8 Inki zolaka kusalama kana nge vandaka muntu ya dibundu ya Bukristu ya Efezo, na provense ya Roma ya Azia, na ntangu balongoki ya kuna zwaka mukanda ya kupemama ya Polo sonikilaka bau? Inki nge zolaka kulonguka na mukanda yina na yina metala kisalu ya Yezu na kati ya lukanu ya Nzambi? Na mukanda yina, Polo tendulaka nde na nzila ya Kristu bima yonso na zulu ti na ntoto zolaka kuvutuka dyaka na kuwakana ti Nzambi, nde dikabu ya Nzambi na nzila ya Kristu pesamaka na bantu ya makanda yonso, nde bantu yina vandaka ya kufwa na meso ya Nzambi sambu na masumu na bau vandaka na kubaka moyo na nzila ya lukwikilu na Kristu, mpi nde bonso mbutu ya ngidika yai, bantu vandaka dyaka na mpila ya kukuma bana ya kuzolama ya Nzambi.—Efezo 1:1, 5-10; 2:4, 5, 11-13.
9. (a) Inki lenda sadisa nge na kuzaba kana nge mosi kebakisa ntendula ya mambu ya Polo sonikaka na bantu ya Efezo? (b) Inki mutindu bampangi yina vandaka na baprovense ya Roma yina Piere tangaka pusamaka na mambu yina bau vandaka kulonguka sambu na Yezu?
9 Keti ntonda sambu na mambu yai yonso zolaka kukumisa zola na nge sambu na Mwana ya Nzambi mudindu? Keti zola yina zolaka kupusa luzingu na nge ya lumbu na lumbu, mutindu ntumwa Polo syamisaka na bakapu 4 tii na 6 ya Efezo? Keti ntonda ya mutindu yina zolaka kupusa nge na kufimpa mbotembote mambu na nge ya ntete na luzingu? Ya kupusama na zola sambu na Nzambi mpi ntonda sambu na Mwana na yandi, keti nge zolaka kusala bansoba ya melombama na mpila nde kusala luzolo ya Nzambi kuvanda mpenza kima ya ntete na luzingu na nge? (Efezo 5:15-17) Na yina metala mutindu Bakristu na Azia, Galatia, mpi baprovense yankaka ya Roma pusamaka na mambu ya bau vandaka kulonguka, ntumwa Piere sonikilaka bau nde: “Ata beno me monaka Yesu Kristo ve, kansi beno ke zolaka yandi; . . . beno ke ndimaka yandi. Yo yina beno ta mona kiese mosi ya nene, kiese yina ya beno ta mona mpila ya kutendula mpi ve.”—1 Piere 1:8.
10. (a) Inki sadisaka nkatu ntembe na zola ya Bakristu ya ntete sambu na Yezu? (b) Inki mutindu beto mpi lenda baka mambote?
10 Na ntembe ve, kuvandaka ti kima yankaka ya sadisaka na zola yina Bakristu ya ntete ya Piere sonikilaka vandaka na yau sambu na Mwana ya Nzambi. Inki yango? Na ntangu yina Piere sonikaka mukanda na yandi ya ntete, kiteso ya Baevanzile zole—Matayo ti Luka—vandaka na maboko ya bantu. Bakristu ya mvu-nkama ya ntete yina bikaka kumona Yezu ve lendaka kutanga bansangu ya Baevanzile yai. Beto mpi lenda kutanga yau. Baevanzile kele ve bansangu ya kuganga; yau kele ti bidimbu yonso ya nkenda ya kuluta kutudila ntima. Na bansangu yina ya kupemama, beto kemona mambu mingi ya keyedisa zola na beto sambu na Mwana ya Nzambi.
Mpeve Yina Yandi Monisaka
11, 12. Inki kele na mpeve yina Yezu monisilaka bantu yankaka yina kepusa nge na kuzola yandi?
11 Kuna na kati ya nsangu ya kusonama ya luzingu ya Yezu, beto kelonguka mutindu yandi vandaka kutadila bantu yankaka. Mpeve ya yandi monisaka kesimbaka ntima ya bantu ata bubu yai, bamvula kuluta 1960 na nima ya lufwa na yandi. Konso muntu ya kezinga kele ti kizitu ya malanda ya disumu. Mafuku mingi kenyokwama na kukonda lunungu, kenwana ti maladi, to kebaka nsoni mingi sambu na bikuma yankaka. Na bantu yonso ya mutindu yai, Yezu ketuba nde: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.”—Matayo 11:28-30.
12 Yezu monisaka dikebi ya ngolo sambu na bansukami, bantu ya nzala, ti bantu ya mpasi. Ntangu mvwandilu kulombaka, yandi disaka nkutu bibuka ya nene na kimangu. (Luka 9:12-17) Yandi katulaka bau na kimpika ya bansiku ya bambuta. Yandi tungaka mpi lukwikilu na bau na ngidika ya Nzambi ya kumanisa kunyokwama sambu na politiki mpi mbongo. Yezu fwaka ve mpeve ya bantu yina bau vandaka yita kunyokula. Na bumbote yonso mpi zola, yandi tombulaka na mayele yonso bantu ya kudikulumusa. Yandi vutulaka ngolo na bayina vandaka bonso matiti ya kukonika ti na bayina vandaka bonso nsinga ya lele ya kebasisa midinga ye kezola kufwa tiya. Kubanda pana tii bubu yai, zina na yandi kepesaka kivuvu, nkutu ti na bantima ya bayina memonaka yandi ntete ve.—Matayo 12:15-21; 15:3-10.
13. Sambu na inki mutindu Yezu vandaka kutadila bansumuki kebendaka bantu?
13 Yezu ndimaka ve bisalu ya mbi, kansi yandi monisaka mbakisa na bantu yina salaka bifu na luzingu kansi monisaka mbalula ya ntima mpi sosaka yandi sambu na lusadisu. (Luka 7:36-50) Yandi vandaka kuvanda mpi kudya kumosi ti bantu yina bau vandaka kuyina na kati ya kimvuka ya bantu ntangu yandi vandaka kumona nde yau tavanda dibaku sambu na kusadisa bau na kimpeve. (Matayo 9:9-13) Bonso mbutu ya mpeve ya yandi monisaka, mafuku ya bantu yina kele na mvwandilu ya mutindu mosi yina mebikaka kumona Yezu ve mepusamaka na kuzaba yandi mpi metulaka lukwikilu na yandi.
14. Inki mesimba nge na kutadilaka mutindu Yezu sadisaka bantu ya maladi, ya kukonda ndenda, to ya vandaka na mafwa?
14 Mutindu Yezu vandaka kusala ti bantu ya maladi to ya kukonda ndenda pesaka nzikisa ya tiya mpi mawa na yandi kumosi ti ndenda na yandi ya kupesa bau kupema. Na yau, ntangu muntu ya kufuluka na lepre kwendaka na yandi mpi dodukilaka yandi sambu na lusadisu, Yezu tinaka dyambu yina ve. Mpi yandi songaka ve muntu yango nde, ata yandi wilaka yandi mawa, maladi vandaka ya kulutana ye mpila ya kusala kima sambu na lusadisu vandaka dyaka ve. Muntu yango dodukilaka: “Mfumu, kana nge zola, nge lenda belula mono.” Nkatu ketiketi, Yezu tandulaka diboko ye simbaka muntu ya lepre, na kutubaka nde: “Mono me zola, beluka ka nge!” (Matayo 8:2, 3) Kilumbu yankaka nkento mosi sosaka kubeluka na kusimbaka nsongi ya lele na yandi na kinsweki. Yezu tadilaka yandi na mutindu mosi ya bumbote mpi ya kutudila ntima. (Luka 8:43-48) Mpi ntangu yandi kutanaka ti mulongo ya bantu kekwenda kuzika muntu, mawa simbaka yandi sambu na mufwidi yina kufwilaka mwana na yandi mosi kaka. Ata Yezu buyaka na kusadila ngolo na yandi ya bimangu ya Nzambi pesaka yandi sambu na kusala madya sambu na yandi mosi, yandi sadilaka yau nkatu mpasi sambu na kufutumuna muntu yina kufwaka mpi vutulaka yandi na mama na yandi.—Luka 4:2-4; 7:11-16.
15. Inki mutindu kutanga bansangu ya ketubila Yezu ti kuyindulula yau kesimba nge?
15 Na ntangu beto ketanga bansangu yai mpi keyindulula na mpeve yina Yezu monisaka, zola na beto kekuma mudindu sambu na muntu yai ya kutambikaka luzingu na yandi ya kimuntu na mpila nde beto lenda zinga kimakulu. Ata beto mebikaka kumona yandi ve, beto kekudiwa ya kubendama na yandi, mpi beto kezola kulanda bitambi na yandi.—1 Piere 2:21.
Yandi Kudikulumusaka na Kutula Ntima na Nzambi
16. Yezu tulaka dikebi ntetentete na nani, ye yandi syamisaka beto na kusala inki?
16 Na zulu ya mambu yonso yankaka, Yezu tulaka dikebi na yandi ti ya beto na Tata na yandi ya zulu, Yehowa Nzambi. Yandi monisaka nsiku ya kuluta nene na Nsiku ya Moize, na kutubaka nde: “Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.” (Matayo 22:36, 37) Yandi kebisaka balongoki na yandi nde: “Beno vanda ti lukwikilu na Nzambi.” (Marko 11:22, NW) Ntangu bau kutanaka ti kumekama ya nene ya lukwikilu yandi tumaka bau nde: “Beno samba ntangu yonso.”—Matayo 26:41, NW.
17, 18. (a) Inki mutindu Yezu monisaka kutula ntima na yandi na kudikulumusa na Tata na yandi? (b) Sambu na inki mambu ya yandi salaka kele mfunu mingi na beto?
17 Yezu yandi mosi monisaka mbandu. Kisambu vandaka kima ya mfunu na luzingu na yandi. (Matayo 14:23; Luka 9:28; 18:1) Ya ntangu kulungaka sambu yandi pona bantumwa na yandi, Yezu tulaka ve ntima kaka na ngangu na yandi mosi, ata ntete bawanzyo na zulu vandaka na nsi ya lutwadisu na yandi. Na kudikulumusa yonso yandi lutisaka mpimpa mosi ya mvimba na kusambaka Tata na yandi. (Luka 6:12, 13) Na ntwala ya kukangama mpi lufwa ya mpasi, Yezu sosaka dyaka lusadisu ya Tata na yandi, na kusambaka mingi. Yandi bakaka ve mboninu ya kutuba nde yandi zabaka Satana mbote, mpi lendaka kununga nkatu mpasi konso dyambu yina munkwa-mbi yina lendaka kubasisa. Yezu bakisaka nde yau vandaka mfunu mingi nde yandi kubwa ve. Kubwa ya nsoni kibeni yau zolaka kuvanda sambu na Tata na yandi! Mpi mvidisa ya nene kibeni sambu na bantu, sambu bivuvu na bau vandaka ya kukangama na kimenga yina Yezu zolaka kupesa!
18 Yezu sambaka mbala na mbala—na ntangu yandi vandaka ti bantumwa na yandi na kati ya suku ya etaze na Yeruzalemi mpi na kikesa mingi dyaka na masamba ya Getsemane. (Matayo 26:36-44; Yoane 17:1-26; Baebreo 5:7) Ntangu yandi vandaka kumona mpasi na zulu ya nti ya mpasi, yandi fingaka ve bayina vandaka kusosila yandi. Kansi, yandi sambaka sambu na mambote ya bantu yina vandaka kuvila yina bau vandaka kusala: “Tata lolula bo, sambu bo ke zaba ve mambu yina ya bo ke sala.” (Luka 23:34) Yandi tulaka mabanza na yandi kaka na zulu ya Tata na yandi, “yandi tulaka ntima na Nzambi yina ke sambisaka bantu mbote-mbote.” Ndinga ya nsuka yina yandi tubaka na zulu ya nti ya mpasi vandaka kisambu na Tata na yandi. (1 Piere 2:23; Luka 23:46) Beto kele na ntonda mingi kibeni na kumona nde, na kutulaka ntima yonso na Yehowa, Yezu manisaka na kwikama yonso kisalu ya Tata na yandi pesaka yandi! Ata beto memonaka ntete Yezu Kristu ve, beto kezolaka yandi mingi mpenza sambu na mambu yina yandi salaka!
Kumonisa Zola na Beto Sambu na Yandi
19. Na kumonisaka zola sambu na Yezu, inki bisalu ya mefwana ve ata fyoti beto fwete buya?
19 Inki mutindu beto lenda pesa nzikisa nde zola ya beto kebudilaka ntulu kele kaka ya munoko ve? Sambu Tata na yandi, yina Yezu vandaka kuzola, buyisaka kusala biteki mpi kubaka yau bonso bima ya lusambu, beto talenda nata ve lukumu na Yezu na kulwataka biteki ya mutindu yina ya kukangisa na mayaka na nkingu na beto to kunata yau na babalabala. (Kubasika 20:4, 5; Yoane 4:24) Yau tavanda ve lukumu na Yezu kana beto kekwenda na nzo-nzambi, ata kusala buna mbala mingi na mposo mosi, kana bantangu yankaka yonso ya mposo yango beto zingaka ve na kuwakana ti malongi na yandi. Yezu tubaka nde: “Muntu yina ke ndimaka bansiku na mono ti ke landaka yo, yandi muntu ke zolaka mono. Tata na mono ta zolaka muntu yina ke zolaka mono.”—Yoane 14:21, 23; 15:10.
20. Inki kele mambu yankaka ya tamonisa kana ya kyeleka beto kezolaka mpenza Yezu?
20 Inki bansiku yandi pesaka beto? Ntetentete, kusamba Nzambi ya kyeleka, Yehowa, kaka yandi mpamba. (Matayo 4:10; Yoane 17:3) Sambu na kisalu na yandi na lukanu ya Nzambi, Yezu longaka mpi nde beto fwete tula lukwikilu na yandi bonso Mwana ya Nzambi mpi nde beto fwete songa yau na kutinaka bisalu ya mbi mpi na kutambulaka na nsemo. (Yoane 3:16-21) Yandi longisilaka beto na kusosa ntete Kimfumu ya Nzambi ti lunungu na yandi, na kutulaka yau na zulu ya mayindu ya bima ya kinsuni. (Matayo 6:31-33) Yandi tumaka nde beto zolana bamosi ti bankaka mutindu yandi zolaka beto. (Yoane 13:34; 1 Piere 1:22) Mpi yandi tindaka beto na kuvanda bambangi na yina metala lukanu ya Nzambi, mutindu yandi vandaka. (Matayo 24:14; 28:19, 20; Kusonga 3:14) Ata bau mebikaka kumona Yezu ve, Bambangi ya Yehowa kiteso ya mafuku tanu bubu yai kepusama na zola ya kyeleka sambu na yandi sambu na kulanda bansiku yina. Kukonda kumona Yezu kelembisaka ve lusilu na bau ya kuvanda na bulemfu. Bau keyibukaka mambu ya Mfumu na bau songaka ntumwa Toma: “Keti nge me ndima mono sambu nge me mona mono? Kiese na bantu yina ta tula ntima na mono, ata bo kumona mono ve!”—Yoane 20:29.
21. Inki mutindu beto kebaka mambote na kuvanda na Lusungiminu ya lufwa ya Kristu yina tasalama mvula yai na Lumingu, Marsi 23?
21 Beto ketula kivuvu nde nge tavanda na kati ya bantu yina tavukana na inza ya mvimba na Banzo ya Kimfumu ya Bambangi ya Yehowa na Lumingu, Marsi 23, 1997, na nima ya kudinda ya ntangu sambu na kuyibuka lumonisu ya kuluta nene ya zola ya Nzambi sambu na bantu mpi sambu na kusungimina lufwa ya Mwana na yandi ya kwikama, Yezu Kristu. Mambu yina tatubama mpi tasalama kilumbu yina fwete yedisa zola sambu na Yehowa mpi Mwana na yandi mpi tamatisa na mutindu yina mpusa ya kulunda bansiku ya Nzambi.—1 Yoane 5:3.
Inki Mutindu Nge Tapesa Mvutu?
◻ Inki mutindu bayina bau tindilaka mukanda ya ntete ya Piere kwisaka kuzaba mpi kuzola Yezu?
◻ Inki mambu yankaka ya Bakristu ya ntete kuwaka yina kesimba ntima na nge?
◻ Inki mambu, ya keyedisa zola na nge sambu na Yezu, kele na mpeve yina yandi monisaka?
◻ Sambu na inki kutula ntima na kudikulumusa ya Yezu na Nzambi kele mfunu mingi sambu na beto?
◻ Inki mutindu beto lenda monisa zola na beto sambu na Yezu Kristu?
[Bifwanisu ya kele na lutiti 28]
Beto kekudiwaka ya kubendama na Yezu sambu na mpeve yina ya yandi monisaka