DILONGI 20
Mutindu Nzambi Me Yidikaka Dibundu
Yehowa kele Nzambi ya ndonga. (1 Bakorinto 14:33) Yo yina, bansadi na yandi fwete vanda mpi bantu ya ndonga. Inki mutindu Yehowa me yidikaka dibundu ya Bukristu? Inki beto fwete sala sambu mambu yonso kutambula mbote na dibundu?
1. Nani kele mfumu ya dibundu?
Biblia ke tuba nde: “Kristu kele mfumu ya dibundu.” (Baefezo 5:23) Yezu ke zingaka na zulu mpi yandi ke twadisaka bisalu ya bansadi ya Yehowa na ntoto ya mvimba. Yandi me ponaka “mpika ya kwikama mpi ya mayele,” disongidila kimvuka mosi ya fioti ya bankuluntu ya kuyela yina bo ke bingaka mpi Nto-Kimvuka. (Tanga Matayo 24:45-47.) Nto-Kimvuka ke twadisaka mabundu ya Bambangi ya Yehowa ya ntoto ya mvimba kaka bonso bantumwa mpi bankuluntu yina vandaka na Yeruzalemi. (Bisalu 15:2) Ata mpidina, babakala yai kele ve bamfumu ya dibundu ya Nzambi. Bo ke lemfukaka na mambu yina Yehowa mpi Ndinga na yandi ke tubaka mpi bo ke lemfukaka na mambu yina Yezu ke lombaka bo.
2. Bankuluntu kele banani mpi nki kisalu bo ke salaka?
Bankuluntu kele babakala ya kuyela na kimpeve yina ke longaka bansadi ya Yehowa mambu ya Biblia, ke sadisaka bo mpi ke pesaka bo kikesa. Bo ke futaka ve bankuluntu sambu na kisalu ya bo ke salaka. Kansi, bo ke salaka “na luzolo yonso na ntwala ya Nzambi; na zola ya kubaka ve luta [mbongo] na banzila ya luvunu, kansi na kiese yonso.” (1 Piere 5:1, 2) Bansadi ya kisalu ke sadisaka bankuluntu mpi na nima ya mwa ntangu, bo mpi lenda kuma bankuluntu kana bo me lungisa mambu ya Biblia ke lombaka sambu na kukuma bankuluntu.
Nto-Kimvuka ke ponaka bankuluntu ya nkaka sambu bo vanda bankengi ya nziunga. Bankengi ya nziunga ke kwendaka kutala mabundu sambu na kupesa bampangi kikesa mpi kusonga bo mambu yina organizasio ya Yehowa ke lomba bo na kusala. Bankengi ya nziunga ke ponaka bampangi-babakala yina ke lungisaka mambu ya Biblia ke lombaka sambu na kukuma bankuluntu to bansadi ya kisalu.—1 Timoteo 3:1-10, 12; Tito 1:5-9.
3. Inki kele mukumba ya konso Mbangi ya Yehowa?
Bampangi yonso na dibundu ke ‘kumisaka zina ya Yehowa,’ ntangu bo ke pesaka bamvutu, ke salaka masolo mpi ke yimbaka bankunga na balukutakanu ya dibundu mpi ntangu bo ke longaka nsangu ya mbote na kiteso ya ngolo na bo.—Tanga Nkunga 148:12, 13.
LONGUKA MAMBU MINGI
Beto tala kana Yezu kele mfumu ya nki mutindu, mutindu bankuluntu ke salaka bikesa ya kulanda mbandu na yandi mpi mutindu beto lenda lemfukila Yezu mpi kuwila bankuluntu.
4. Yezu kele mfumu ya mbote mpenza
Yezu ke lomba beto na kusala kima mosi ya mbote. Beno tanga Matayo 11:28-30 mpi na nima beno pesa mvutu na ngiufula yai:
Yezu kele mfumu ya nki mutindu mpi yandi ke zolaka nde beto kudiwa nki mutindu na lweka na yandi?
Inki mutindu bankuluntu ke landaka mbandu ya Yezu? Beno tala VIDEO.
Biblia ke monisaka pwelele mutindu bankuluntu fwete sala kisalu na bo.
Beno tanga Yezaya 32:2 mpi 1 Piere 5:1-3. Na nima beno pesa mvutu na bangiufula yai:
Inki mutindu nge ke kudiwa mutindu nge me zaba nde bankuluntu ke salaka bikesa ya kupesa bantu ya nkaka kikesa bonso Yezu?
Tanga mambu ya nkaka yina bankuluntu ke salaka na mbandu ya Yezu.
5. Bankuluntu ke pesaka mbandu ya mbote
Yezu ke zolaka nde bankuluntu kutadila mukumba na bo nki mutindu? Beno tala VIDEO.
Yezu tubaka mambu yina bantu ya ke twadisaka dibundu fwete sala. Beno tanga Matayo 23:8-12 mpi na nima beno pesa mvutu na bangiufula yai:
Biblia ke tubaka nki sambu na bankuluntu? Nge ke yindula nde bamfumu ya mabundu ke sadilaka mpi mambu yina Biblia ke tubaka?
Bankuluntu ke salaka ngolo sambu bo mpi mabuta na bo kuvanda ti kinduku ya ngolo ti Nzambi
Bankuluntu ke kudiyangisaka sambu na bantu yonso na dibundu
Bankuluntu ke longaka nsangu ya mbote mbala na mbala
Bankuluntu ke longaka. Bo ke pesaka mpi maboko na bisalu ya kutula bunkete mpi bisalu ya nkaka
6. Beto wila bankuluntu
Biblia ke tubaka sambu na nki yo kele mfunu nde beto wila bankuluntu. Beno tanga Baebreo 13:17 mpi na nima beno pesa mvutu na bangiufula yai:
Biblia ke lombaka beto na kulemfukila mpi kuwila bantu yina ke twadisaka beto. Nge ke ndima nde yo kele sambu na mambote na beto? Kana mpidina to ve, sambu na nki?
Beno tanga Luka 16:10 mpi na nima beno pesa mvutu na ngiufula yai:
Sambu na nki yo kele mfunu na kuwila bankuluntu ata na mambu ya fioti-fioti?
BANTU YA NKAKA KE TUBAKA NDE: “Konso muntu lenda sambila Nzambi mpila yandi me zola.”
Nge ke yindula nde nki mambote muntu lenda baka kana yandi ke sambila Yehowa na dibundu ti bantu ya nkaka?
NA BUNKUFI
Yezu kele mfumu ya dibundu. Bankuluntu ke lemfukilaka yandi, bo ke pesaka beto kikesa mpi mbandu ya mbote. Yo yina beto ke vandaka na kiese ya kuwila bo.
Inki Nge Me Simba?
Nani kele mfumu ya dibundu?
Inki mutindu bankuluntu ke sadisaka dibundu?
Inki kele mukumba ya konso nsadi ya Yehowa?
TALA MPI
Tala mambu ya ke monisa nde Nto-Kimvuka mpi bankuluntu ya nkaka ke kudiyangisaka mingi sambu na bampangi na bo Bakristu.
Beto Pesa Bampangi Kikesa Ntangu Bo Me Buyisa Kisalu na Beto (4:22)
Tala kisalu yina bankengi ya nziunga ke salaka.
Tala mukumba yina bankento ke vandaka na yo na dibundu.
“Keti Bambangi ya Yehowa ya Bankento Ke Longaka?” (Disolo ya kele na Nzozulu ya Nkengi)
Tala mutindu bankuluntu ke salaka ngolo sambu na kupesa bampangi na bo Bakristu kikesa.
“Bankuluntu ‘Banduku ya Kisalu Sambu na Kiese na Beto’” (Nzozulu ya Nkengi, Yanuari 15, 2013)