“Keti Ntima na Nge Kele ya Kusungama ti Mono?”

“Kwisa nge mosi kutala mutindu mono me kudipesaka na [“kendimaka ve kimbanda ti,” “NW”] Mfumu Nzambi.”​—2 BANTOTILA 10:16.

1, 2. (a) Inki mutindu lusambu kubebaka na Izraele? (b) Na 905 N.T.B., inki mambu finamaka na kusoba na Izraele?

NA MVU 905 N.T.B., makambu sobaka ngolo na Izraele. Kiteso ya bamvula 100 na ntwala, Yehowa salaka nde kimfumu ya Izraele kukabwana sambu Salomo sambaka banzambi yankaka. (1 Bantotila 11:​9-13) Roboami, mwana ya Salomo, bandaka kuyala kimfumu ya Yuda na Sudi na ntangu yina; ye Ntotila Yeroboami, muntu ya Efrayimi, kumaka kuyala kimfumu ya Izraele na Nordi. Mawa mingi, kimfumu ya Nordi yantikaka ti makambu ya mbi. Yoroboami buyaka nde bantu na yandi kukwenda dyaka na kimfumu ya Sudi sambu na kusamba na tempelo. Yandi bangaka nde mbaimbai bau vutuka dyaka na nzo ya Davidi. Na yau, yandi yantikaka lusambu ya bangombe na Izraele, lusambu ya biteki yina bikaka kumana ve na nsungi yonso ya nkenda ya kimfumu ya Nordi.​—⁠1 Bantotila 12:​26-33.

² Mambu yonso bebaka ngolo ntangu Akabi, mwana ya Omri, kumaka ntotila. Nkento na yandi ya nzenza, Yezabele, yalumunaka lusambu ya Baale mpi fwaka baprofete ya Yehowa. Ata profete Elia salaka yonso na kukebisa Akabi, yandi salaka kima mosi ve na kusukisa lusambu ya nkento na yandi. Kansi, na 905 N.T.B. Akabi fwaka, ye mwana na yandi Yorami bandaka kuyala. Ntangu vandaka melunga sambu na kusukula insi. Elisa, yina yingaka Elia, songaka mfumu ya basoda, Yehu, nde Yehowa metula yandi mafuta na ntu sambu na kuyinga ntotila ya Izraele. Kisalu na yandi: kufwa nzo ya masumu ya Akabi ti kuvutula mbela ya menga ya baprofete yonso yina Yezabele kufwaka!​—⁠2 Bantotila 9:​1-10.

3, 4. Inki mutindu Yonadabi monisaka nde ntima na yandi vandaka ya ‘kusungama ti ntima ya Yehu’?

³ Ti bulemfu yonso na ntuma ya Nzambi, Yehu fwaka nkento yai ya mbi, Yezabele, ebuna na nima, yandi yantikaka kusukula Izraele na kufwafwaka bantu yonso ya nzo ya Akabi. (2 Bantotila 9:15–10:14; 9:17) Na nima, yandi kutanaka ti muntu ya kupesa yandi maboko. “Yandi [“monaka Yehonadabi, mwana ya Rekabi, kekwisa na kukutana ti yandi,” NW]. Yehu pesaka yandi mbote, ebuna yandi tubilaka yandi nde: ‘Keti [“ntima na nge kele ya kusungama ti mono, mutindu ntima na mono mosi kele ti ntima na nge,” NW]?’ Yonadabi tubaka nde: ‘E.’ Yehu nde: ‘Kana yo kele mpidina, beto pesana maboko.’ Yonadabi ndimaka, ebuna Yehu kotisaka yandi na pusupusu na yandi. Yandi tubaka nde: ‘Kwisa nge mosi kutala mutindu mono me kudipesaka na [“kendimaka ve kimbanda ti,” NW] Mfumu Nzambi.’ Ebuna bo kwendaka nzila mosi na Samaria.”​—⁠2 Bantotila 10:​15, 16.

⁴ Yonadabi (to, Yehonadabi) vandaka ve muntu ya Izraele. Kansi, na kuwakana ti ntendula ya zina na yandi (disongidila: “Yehowa Mezola,” “Yehowa Kele Mvwama,” to “Yehowa Kekabaka”) yandi vandaka nsambidi ya Yehowa. (Yeremia 35:⁠6) Ya kyeleka, yandi vandaka na mpusa ya ngolo ya kumona mutindu Yehu ‘kendimaka ve kimbanda ti Yehowa.’ Inki mutindu beto kezaba yau? Ntete, yandi kutanaka ve ti ntotila ya kupakulama ya Izraele na kidiba. Yonadabi vandaka “kekwisa na kukutana ti yandi”; dyaka, yau salamaka na ntangu Yehu mefwa Yezabele imene, ti bantu yankaka na nzo ya Akabi. Ntangu Yehu songaka Yonadabi na kumata na pusupusu, yandi ndimaka sambu yandi zabaka mambu yina tabwa. Nkatu ntembe, yandi vandaka na lweka ya Yehu​—⁠na lweka ya Yehowa​—⁠na ntembe yai ya bwaka na kati ya lusambu ya luvunu ti lusambu ya kyeleka.

Yehu ya Ntangu Yai ti Yonadabi ya Ntangu Yai

5. (a) Ntama mingi ve, inki mambu tasoba sambu na bantu? (b) Yehu ya Nene kele nani, ye banani kele mimonisi na yandi na zulu ya ntoto?

⁵ Bubu yai, makambu tasoba ngolo sambu na bantu yonso, mutindu yau salamaka na Izraele na mvu 905 N.T.B. Ntangu mefinama mpenza, Yehowa takatula mambi yonso ya bupusi ya Satana mebutaka na zulu ya ntoto, bonso lusambu ya luvunu. Nani kele Yehu ya ntangu yai? Muntu yankaka ve, Yezu Kristu. Bangogo ya mbikudulu ketubila yandi nde: “Lwata mbele na nge ya bitumba, ntotila ya ngolo; nge kele ngolo ti lukumu! Mata na mpunda, kwenda na lukumu na nge yonso sambu na kununga; kwenda kunwanina mambu ya kieleka ti ya masonga.” (Nkunga 45:​4, 5) Mimonisi ya Yezu na zulu ya ntoto kele “Israele ya Nzambi,” Bakristu ya kupakulama ‘yina ke landaka bansiku ya Nzambi ti ke [salaka kisalu ya kuta kimbangi ya] mambu ya kieleka yina ya Yesu songaka.’ (Galatia 6:16; Kusonga 12:17) Kubanda na 1922, bampangi ya kupakulama ya Yezu yai kekebisaka bantu kukonda boma nde Yehowa kekwisa kusambisa bantu.​—⁠Yezaya 61:​1, 2; Kusonga 8:7–9:21; 16:​2-21.

6. Banani kubasikaka na makanda sambu na kupesa Bakristu ya kupakulama maboko, ye inki mutindu bau salaka bonso bantu ya kekota na pusupusu ya Yehu ya Nene?

⁶ Bakristu ya kupakulama kele bau mosi ve. Bonso Yonadabi basikaka na kukutana ti Yehu, mutindu mosi, bantu mingi ya kubasikaka na makanda kwisaka kupesa maboko na Yezu, Yehu ya Nene, ti na mimonisi na yandi na ntoto, sambu na kunwanina lusambu ya kyeleka. (Zakaria 8:23) Yezu bingaka bau ‘mameme na yandi ya nkaka.’ Na 1932 bau zabanaka bonso bantu ya mekukana ti Yonadabi na bilumbu yai mpi bau bingamaka na ‘kukota na pusupusu’ ya Yehu ya ntangu yai. (Yoane 10:16) Inki mutindu? Na ‘kulandaka bansiku ya Nzambi’ mpi na kuvukanaka ti bapakulami na ‘kisalu ya kuta kimbangi ya Yesu.’ Na kati na yau bubu yai, beto ketanga kisalu ya kusamuna nsangu ya mbote ya Kimfumu yina mepesamaka na maboko ya Yezu bonso Ntotila. (Marko 13:10) Na 1935, “ba Yonadabi” yai zabanaka bonso “kibuka ya nene” ya Kusonga 7:​9-17, NW.

7. Inki mutindu Bakristu kemonisaka bubu yai nde ‘ntima na bau kele kaka ya kusungama’ ti ntima ya Yezu?

⁷ Kubanda na bamvu 1930, kibuka ya nene ti bampangi na bau ya kupakulama memonisaka na kikesa yonso nde bau kepesaka maboko na lusambu ya kyeleka. Na bansi yankaka na Eropa ya Esti mpi ya Westi, na Nsuka ya Esti, mpi na Afrika, mingi na kati na bau mefwaka sambu na lukwikilu na bau. (Luka 9:​23, 24) Na bansi yankaka, bau menyokwamaka na baboloko, na maboko ya bimvuka ya bantu, mpi na mitindu yankaka. (2 Timoteo 3:12) Bau menungaka mpenza na kumonisa lukwikilu! Ye Lapolo ya Kisalu ya Mvu 1997 kemonisa nde bau kele kaka ya kukangama ngwi na kusadila Nzambi, ata na kyese ata na mpasi. ‘Ntima na bau kele kaka ya kusungama’ ti ntima ya Yezu. Nzikisa na yau monikaka na 1997, ntangu bansamuni ya Kimfumu 5599931, mfinama bau yonso “ba Yonadabi,” salaka bangunga 1179735841 na kisalu ya kuta kimbangi ya Yezu.

Bau Kesamunaka Kaka ti Kikesa

8. Inki mutindu Bambangi ya Yehowa kemonisaka kikesa na bau sambu na lusambu ya kyeleka?

⁸ Yehu zabanaka nde yandi kepusaka pusupusu bonso muntu ya kilau​—⁠yau kemonisa nde yandi vandaka kikesa mingi na kisalu. (2 Bantotila 9:20) Biblia ketendula Yezu, Yehu ya Nene, nde kikesa ‘kepelaka na ntima na yandi bonso tiya.’ (Nkunga 69:⁠9) Ebuna, kima ya kuyituka kele ve, kana bubu yai, Bakristu kezabana sambu na kikesa na bau. Yau vanda na dibundu to na ntwala ya bantu yonso, bau ke “longa nsangu ya Nzambi . . . ata na ntangu ya mpasi ata na ntangu ya mbote.” (2 Timoteo 4:⁠2) Kikesa na bau monikaka mbote kibeni na luyantiku ya mvu 1997 ntangu disolo mosi ya Kisalu na Beto ya Kimfumu syamisaka nde bantu mingi kusala kisalu ya kimupasudi-nzila nsadisi. Konso insi tulaka ntalu ya bapasudi-nzila nsadisi ya bau vandaka kusosa. Inki kusalamaka? Mambu ya ngituka! Bafiliale mingi zwaka ntalu ya bantu kuluta yina bau tulaka. Équateur tulaka ntalu ya 4000, kansi na nsuka ya Marsi, bau tangaka bapasudi-nzila nsadisi 6936. Na Japon, na bangonda yina tatu, bantu 104215 salaka kisalu yango. Na Zambie, bau vandaka sosa bapasudi-nzila nsadisi 6000; kansi na Marsi bantu 6414 kusalaka yau, na Aprili bantu 6532, ye na Mayi bantu 7695. Na kimvuka, bapasudi-nzila nsadisi ti ya ntangu yonso vandaka 110251, kuyela ya 34,2% na zulu ya ntalu ya 1996!

9. Katula kisalu ya nzo na nzo, na inki mutindu dyaka Bambangi ya Yehowa kezwaka bantu na kusonga bau nsangu ya mbote?

⁹ Ntumwa Polo songaka bankuluntu ya Efezo nde: “Mono bumbilaka beno ve mambu yina vandaka ya mfunu sambu na beno. Mono vandaka kuzabisa beno ti kulonga beno Nsangu ya Mbote na meso ya bantu yonso ti na banzo na beno.” (Bisalu 20:20) Bambangi ya Yehowa bubu yai kelandaka mbandu ya Polo mpi kesamunaka nsangu ya mbote na kikesa yonso nzo na nzo. Kansi, yau lenda vanda mpasi na kumona bantu na banzo na bau. Yau yina, “mpika ya kwikama mpi ya mayele” kesyamisaka bansamuni ya Kimfumu na kusolula ti bantu na bisika na bau ya mumbongo, na babalabala, na mabungu, na baparke​—⁠bisika yonso yina bau lenda mona bantu. (Matayo 24:​45-47, NW) Mbutu mosi ya mbote mebasikaka.

10, 11. Inki mutindu, na bansi zole, bansamuni salaka mayele ya mbote na kukutana ti bantu ya mbote yina bau lendaka kumona ve na banzo?

¹⁰ Na mbanza Copenhague, na Danemark, kimvuka mosi ya fyoti ya bansamuni vandaka samuna na balabala na ntwala ya gare ya train. Kubanda na Yanuari tii na Yuni, bau bikisaka bazulunalu 4733, bau solulaka ti bantu mingi, mpi bau salaka bamvutukilu ya mpa mingi. Bansamuni mingi na nsi yina bandaka kisalu ya kubikisa konso nimero ya zulunalu na maboko ya bantu na bamagazini. Zandu mosi kesalamaka konso Kitanu na mbanza mosi, ye banzenza kevandaka mingi. Ebuna, dibundu mebongisaka kisalu ya kusamuna na konso kilumbu ya zandu. Na kisika yankaka, bau ketindaka mabuki ya mikanda ya mebonga na balongi ya banzo-nkanda.

¹¹ Na Hawaii mpi bikesa salamaka sambu na kumona bantu yina kevandaka ve na banzo. Bateritware ya mpa mekangukaka, mu mbandu: bisika ya bantu yonso (babalabala, baparke, baparking, ti ba aret ya bisi), ville base, bisika ya bamagazini, baplene ya avio, kusamuna na telefone, kusamuna na kati ya babisi, ti na banzo-nkanda ya nene. Bau kesalaka na mpila nde ntalu ya Bambangi ya kekwenda na teritware mosi kuvanda ya kufwana, mpi nde bayina kekwenda kuvanda bantu ya kuzaba kisalu mbote. Na bansi yankaka mingi, bau kesalaka mpi kikesa ya kubongisa mambu mbote mutindu yai. Yau yina, bau kele na kuzwa bantu mingi ya kesepela na kyeleka, yina bau lendaka kuzwa ve na kisalu ya nzo na nzo.

Kubikala Ngwi

12, 13. (a) Inki mayele ya mbi Satana salaka kontre Bambangi ya Yehowa na mvu 1997? (b) Inki mutindu mambu ya mbi bedisaka bantu ya kutubaka yau na insi mosi?

¹² Na bansi yankaka na 1997, bantu tubaka mambu mingi ya nsoni mpi ya luvunu sambu na Bambangi ya Yehowa. Lukanu na bau vandaka ya kubendila bau batribinale. Kansi Bambangi bikalaka ngwi! (Nkunga 112:​7, 8) Bau yibukaka kisambu yai ya muyimbi-bankunga: “Bantu ya lulendo ke tuba-tuba luvunu sambu na mono, kansi mono, na ntima na mono yonso, mono ke landaka bansiku na nge.” (Nkunga 119:69) Kupanza luvunu ya mutindu yina kele nzikisa ya kumenga yina Yezu tubaka nde bau tamengaka Bakristu. (Matayo 24:⁠9) Ye mbala mingi yau kebedisaka bau. Na Belgique, muntu mosi tangaka disolo ya mbi ya bau sonikaka sambu na Bambangi ya Yehowa na zulunalu mosi ya mezabanaka mbote. Luvunu yina pesaka yandi makasi ye na Lumingu yina landaka, yandi kwendaka na lukutakanu na Nzo ya Kimfumu. Yandi yantikaka kulonguka Biblia ti Bambangi mpi yelaka nswalu. Muntu yina vandaka ntete na kimvuka mosi ya babandi. Kulonguka ya Biblia sadisaka yandi na kusoba luzingu na yandi. Bantu ya kartie na yandi monaka yau mpi. Na ntembe ve, muntu yina sonikaka luvunu yina na zulunalu zabaka ve nde yau tabuta mambu ya mutindu yai!

¹³ Bantu mingi ya ntima-masonga na Belgique nganaka sambu na luvunu yina bau yalumunaka. Beto lenda tanga ministre mosi na kati na bau, yina tubaka nde yandi kezitisaka Bambangi ya Yehowa mingi sambu na mambu ya bau mesalaka. Depite mosi mpi sonikaka nde: “Ata bau kemwanga mambu ya luvunu mingi mbala na mbala, mono kemonaka nde [Bambangi ya Yehowa] kele kigonsa ve ata fyoti sambu na bansiku ya Leta. Bau kele basitwaye ya kezolaka ngemba, ya kele na kansansa ya mbote, mpi ya kezitisaka bamfumu.” Ya kyeleka, Piere tubaka mambu ya mayele nde: “Beno vanda na bikalulu ya mbote ntangu beno kele na kati ya bamimpani. Kana beno sala mpidina, ata bo ke funda beno nde beno ke salaka mambu ya mbi, kana bo mona mambu ya mbote ya beno ke salaka, bo ta zitisa Nzambi na kilumbu yina ya yandi ta kwisa.”​—⁠1 Piere 2:⁠12.

Nkinsi ya Lusungiminu ya Kuluta Kitoko

14. Tanga mwa balapolo ya kitoko ya Lusungiminu ya mvu 1997.

¹⁴ Yau mefwana mpenza nde bayina ketaka kimbangi ya Yezu kutadila Lusungiminu ya lufwa na yandi bonso kima ya kuluta mfunu na kati ya mvula. Na 1997, bantu 14 322 226 vukanaka na Marsi 23, sambu na kuta nkinsi yina. Bantu 1 400 000 na zulu ya ntalu ya bantu yina vukanaka na 1996. (Luka 22:​14-20) Na bansi mingi, ntalu ya bantu na Lusungiminu vandaka ya kuluta ngolo kebini ntalu ya bansamuni. Yau kemonisa nde na makwisa, kuyela tavanda ya mingi. Mu mbandu na Haïti, na 1997, ntalu ya bansamuni kumataka tii na 10 621, kansi bantu 67 259 vukanaka sambu na Lusungiminu. Nge lenda tala lapolo ya mvu yina kele na balutiti 28 tii na 31, sambu na kumona nde na bansi yankaka mpi mingi, bantu kuvandaka kibeni ya kuluta ntalu ya bansamuni.

15. Na bansi yankaka, inki mutindu bampangi na beto nungaka bampasi ya ngolo sambu na kusala Lusungiminu?

¹⁵ Na bansi yankaka yau vandaka mpasi na kuvukana na Lusungiminu. Na Albanie, bau tulaka couvre-feu kubanda na 7:00 ya mpimpa, sambu mubulu vandaka na kati ya insi. Na bimvuka 115 ya kukabwana na insi yina, Lusungiminu bandaka na 5:45 na nkotila. Ntangu kudindaka na 6:​08, luyantiku ya Nisani 14. Mampa ti vinu lutaka mfinama na 6:15. Bisika mingi, kisambu ya nsuka salamaka na 6:​30, ye bampangi vutukaka nswalu na banzo na ntwala couvre-feu kubanda. Kansi, bantu 3 154, vukanaka na Lusungiminu, na kati ya bansamuni 1 090 mpamba. Na insi mosi ya Afrika, mubulu vandaka mingi, mpila ya kuvukana na Nzo ya Kimfumu vandaka ve, ebuna bankuluntu zole silaka na kukutana na nzo ya nkuluntu ya tatu, sambu na kusosa mpila ya kusala Lusungiminu na bimvuka ya fyoti. Sambu na kukuma na nzo ya nkuluntu yina, bau fwete sabuka kanale mosi ya masa. Kansi, bitumba ya ngolo vandaka na kisika yina, mpi bau vandaka bula masasi na muntu yonso yina vandaka meka kusabuka na kanale. Nkuluntu mosi bakaka ntinu, yandi sabukaka, nkatu kigonsa. Ntangu yina yankaka kesabuka, munduki kubulaka. Yandi kudilosaka na ntoto mpi komfulaka nkatu kigonsa na nsi ya makelele ya masasi yina vandaka kuluta na zulu ya ntu. Lukutakanu ya bankuluntu salamaka mbote, mpi bau bakaka bangidika sambu na kusadisa dibundu.

‘Bantu ya Makanda Yonso, ya Bansi Yonso, ti ya Bandinga Yonso’

16. Inki mpika ya kwikama ti ya mayele salaka sambu nsangu ya mbote kukumina bantu ya bandinga ya fyotifyoti?

¹⁶ Ntumwa Yoane tubaka nde kibuka ya nene tabasika na ‘makanda yonso ti na bandinga yonso ti na bansi yonso.’ (Kusonga 7:⁠9) Yau yina, Nto Kimvuka mebongisaka na mpila nde mikanda kusalama na bandinga mingi kibeni​—⁠kumosi ti na bandinga ya makanda ti bimvuka ya bantu ya kezingaka ntama kibeni. Mu mbandu, na Mozambique, trakiti Luzingu ya ngemba na insi yampa basikaka na bandinga yankaka tanu. Na Nicaragua, kamukanda Zinga Mvula na Mvula na Kyese na Ntoto! basikaka na ndinga Kimiskito​—⁠mukanda ya ntete ya la Société Watch Tower na ndinga yina. Bamiskito ya ntoto ya Inde ndimaka kamukanda yai na kyese ya mingi ntangu bau monaka kima mosi na ndinga na bau mosi. Na 1997, la Société ndimaka nde bau balula mikanda na bandinga 25 yankaka, mpi nyemaka bazulunalu na ntalu ya kuluta miliare mosi.

17. Bantu ya inki ndinga kuzwaka lusadisu na Corée, ye inki mutindu bakasete ya video mesadisaka mingi bantu ya mutindu yina?

¹⁷ Na Corée, bantu ya ndinga yankaka bakaka lusadisu. Na 1997, lukutakanu ya distrike ya ntete salamaka na ndinga ya bidimbu ya Corée. Mabundu ya kesadilaka ndinga ya bidimbu kele 15 na Corée, na kati na yau bansamuni kele 543, kansi bantu 1 174 vandaka na lukutakanu ya distrike, ebuna bantu 21 bakaka mbotika. Sambu na kusadisa bababa yina kewaka ve mpi ketangaka ve, mikanda kesalama na babande ya video na bandinga ya bidimbu 13. Yau yina, bababa kele na kuzwa lusadisu na “kutanga” to nkutu na kulonguka nsangu ya mbote, mpi mbutu ya mbote kebasika. Na États-Unis, ntete kiteso ya bamvula 5 vandaka luta na kulonguka ti baba na ntwala yandi baka mbotika. Ntangu yai, ya beto kele ti mwa babande ya video ya Bandinga ya Bidimbu ya Amerika, bababa yankaka kebaka mbotika na nima ya mvula mosi.

‘Kubikala na Pusupusu’

18. Ntangu yandi mekutana na Yonadabi imene, inki Yehu yantikaka kusala?

¹⁸ Na 905 N.T.B., ntangu Yonadabi mevukana ti yandi imene, Yehu bandaka kufwa lusambu ya luvunu. Yandi bingaka bansambidi yonso ya Baale nde: “Nkinsi kele sambu na nzambi Baale!” Na nima, yandi tindaka bantu na kuzikisa na insi ya mvimba, kana nsambidi mosi ya Baale kubikalaka na nzo. Ntangu bantu mefuluka na tempelo ya nene ya nzambi ya luvunu, bau basisaka bansambidi yonso ya Yehowa. Na nsuka, Yehu ti basoda na yandi fwaka bansambidi yonso ya Baale. “Mutindu yo yina Yehu sukisaka bisambu ya nzambi Baale na ntoto ya Israele.”​—⁠2 Bantotila 10:​20-28.

19. Na kumonaka mambu ya kevingila bantu, inki mpeve beto fwete monisa, ye inki kisalu beto fwete sala na kikesa yonso?

¹⁹ Bubu yai, kusambisa mabundu yonso ya luvunu mebikala dyaka ntama ve. Na lutwadisu ya bawanzio, Bakristu kele na kusamuna nsangu ya mbote na bantu yonso, bau kepesa bau kikesa na kubanga Nzambi mpi na kudikabula ti lusambu ya luvunu. (Kusonga 14:​6-8; 18:​2, 4) Bau kepesa kikesa na bantu ya kudikulumusa na kulemfuka na Kimfumu ya Nzambi yina kele na maboko ya Ntotila yina Yehowa meyadisaka, Yezu Kristu. (Kusonga 12:10) Na ntangu yai ya kyese, beto fwete bikisa ve kikesa na beto kukita ntangu beto kebikala ngwi sambu na lusambu ya kyeleka.

20. Inki nge mesila na kusala na mvu ya kisalu 1998?

²⁰ Kilumbu mosi, ntangu Ntotila Davidi vandaka na kati ya mpasi mingi, yandi sambaka nde: “Nzambi, mono me baka kikesa, mono me baka kikesa mpenza! Mono ke yimbila nge bankunga ya lukumu! Mfumu Nzambi, mono ta pesa nge mersi na kati ya bantu yonso.” (Nkunga 57:​8, 10) Bika beto mpi beto vanda na kikesa. Na mvu ya kisalu 1997, ata bampasi vandaka mingi, beto bokaka lukembilu ya ngolo sambu na lukumu ya Yehowa Nzambi. Bika nde kuboka ya mutindu mosi, to nkutu ya kuluta ngolo, kuwakana dyaka na mvu ya kisalu yai. Bika beto landa kukembila Yehowa, ata Satana kumeka kusala konso inki dyambu yina sambu na kuvutula beto nima to sambu na kutelamanina beto. Na mutindu yai, beto tamonisa nde ntima na beto kele ya kusungama ti ntima ya Yehu ya Nene, Yezu Kristu, mpi beto tandima ntuma yai ya kupemama na moyo na beto yonso: “Beno bantu ya masonga, beno vanda kiese, beno sepela sambu na mambu ya Mfumu Nzambi salaka! Beno bayina ke lemfukaka na yandi, beno yimba na kiese!”​—Nkunga 32:11.

Keti Nge Lenda Tendula?

◻ Inki mambu kusobaka na Izraele na 905 N.T.B.?

◻ Nani kele Yehu ya ntangu yai, ye inki mutindu “kibuka ya nene” kemonisaka nde ‘ntima na bau kele ya kusungama’ ti ntima na yandi?

◻ Inki bantalu ya lapolo kemonisa kikesa ya Bambangi ya Yehowa kumonisaka na mvu ya kisalu 1997?

◻ Ata Satana kusala inki kontre beto, inki mpeve beto fwete monisa na mvu ya kisalu 1998?

[Tablo ya kele na lutiti 28-31]

LAPOLO YA BAMBANGI YA YEHOWA YA INZA YA MVIMBA YA MVULA YA KISALU 1997

[Kifwanisu ya kele na lutiti 25]

Ntalu ya mingi ya bantu yina kuvandaka na Lusungiminu kemonisa nde na makwisa, kuyela tavanda mingi

[Kifwanisu ya kele na lutiti 26]

Mutindu Yonadabi pesaka Yehu maboko, mutindu mosi, “kibuka ya nene” bubu yai kepesa maboko na Yehu ya Nene, Yezu Kristu, ti na bampangi na yandi ya kupakulama