Keti Nge Mesadilaka Lutiti ya Nsuka?

Ntangu bantu kebakaka zulunalu mosi, mbala mingi bo ketalaka lutiti na yo ya ntete, ebuna na nima bo kebalulaka yo mbala mosi mpi ketalaka lutiti ya nsuka. Lutiti ya nsuka ya Nzozulu ya Nkengi (ya bantu yonso na Kifalansa) kevandaka na bangyufula mpi na mambu mingi ya kebendaka dikebi ya bantu kumosi ti ntalu ya lutiti yina kemonisaka kisika beto lenda zwa bansangu yango.

Beto lenda sadila lutiti yai sambu na kubaka bangindu yina tasadisa beto na kuzwa bangyufula ya beto lenda sadila sambu na kuyantika disolo. Kana beto kesalaka teritware na beto mbala na mbala, beto lenda soba bangogo na beto ya kukotila na masolo na kusadilaka bangyufula ya kuswaswana na ngonda ya mvimba. Kana muwi kele na mambu mingi ya kusala, beto lenda kumisa bangogo na beto ya kukotila na masolo nkufi na kumonisaka yandi ngyufula mosi na kati ya bangyufula yina kele na lutiti ya nsuka mpi na kutubaka nde, “Kana nge tazola kuzaba mvutu, mono lenda bikila nge bazulunalu yai, mpi beto lenda solula na bunda ntangu nge tavanda ti ntangu.” Sambu na kuyantika disolo, bansamuni yankaka kesongaka muwi lutiti ya nsuka ya magazini mpi kelombaka yandi na kupona ngyufula mosi yina kesepedisa yandi. Na nima bo lenda monisa kifulu bo lenda zwa mvutu mpi kutanga verse mosi yina bo ponaka na ntwala. Ziku nge lenda yindula mitindu yankaka ya kusadila lutiti ya nsuka sambu na kupusa bantu na kusepela ti Nzozulu ya Nkengi.