Kieleka ya Kimfumu—Kupesa Madia ya Kimpeve

YINDULA nde nge ke longuka Biblia ti muntu mpi nge me mona nde yandi kele na kiese sambu yandi me bakisa verse ya beno me katuka kutanga. Yandi ke tuba malembe nde, “Keti nge ke zo tuba nde Biblia ke longaka nde beto lenda zinga mvula na mvula na Paladisu, kaka awa na ntoto?” Mpangi yina nge basikaka ti yandi na kisalu ya kusamuna me mweta mpi ke yula yandi nde, “Nge me tanga inki na Biblia?” Longoki yina me nikisa ntu na kiese yonso, mpi me tuba nde, “Mu ke bakisa ve sambu na nki bo me longaka mono ntete ve mambu yai!” Nge me yibuka nde yandi tubaka mpi mutindu yai bamposo fioti me luta ntangu yandi longukaka na mbala ya ntete nde zina ya Nzambi kele Yehowa.

Keti nge me kutanaka dezia ti diambu ya mutindu yai? Bansadi ya Nzambi mingi me kutanaka ti yo. Mambu fioti mpamba lenda yibusa beto ngolo kibeni dikabu ya kitoko yina bo me pesaka beto: nzayilu ya kieleka! Yindula fioti: Inki mutindu nge bakaka dikabu yina? Na kitini yai, beto ta tadila ngiufula yai. Mutindu Yehowa me sadisaka bansadi na yandi na kubakisa malembe-malembe malongi ya kimpeve kele nzikisa ya ngolo ya ke monisa nde Kimfumu ya Nzambi kele kima ya kieleka. Na nsungi ya bamvula 100, Yezu Kristu, ntotila ya Kimfumu yina, salaka yonso sambu bo longa bansadi ya Nzambi kieleka.