Keti Bubu Yai Mpila Kele ya Kusansa Bana ya Bikalulu ya Mbote?
ROBERT GLOSSOP, muntu ya nzo-nkanda mosi (Vanier Institute for the Family) na mbanza Ottawa na Canada, ketuba nde: “Bubu yai beto kezinga na kimvuka ya kufuluka na bantu ya mutindu na mutindu, na bikalulu ya mpila na mpila, kisika ya kukonda mbandu mosi ya bikalulu ya mbote ya bantu yonso fwete landa.” Mbutu kele inki? Lapolo ya zulunalu mosi (The Toronto Star) ketuba nde: “Batoko ya kebaka mavumu, mubulu ya baleke ti kudigonda; yonso yai kekuma kaka mingi.”
Dikambu yango mesuka ve na Amerika ya Nordi. Bill Damon, ntwadisi ya santre mosi sambu na kutoma ya bantu (Center for Human Development) na Universite ya Brown na Kisanga ya Rhode, na États-Unis, melongukaka bamakambu yai na Grande-Bretagne ti na bansi yankaka ya Eropa, kumosi mpi ti na Australie, na Izraele, mpi na Japon. Yandi kesimba ntete kukonda kununga ya mabundu, banzo-nkanda ti bimvuka yankaka na kisalu ya kupesa baleke lutwadisu. Yandi kekwikila nde beto “mevilaka mambu ya bana kele na yau mfunu sambu na kukuna bikalulu mpi bandenda.” Na kutangaka balongi ya bibuti yina kelongaka nde “ndongi kele kigonsa sambu na mavimpi mpi mambote ya bana,” Damon ketuba nde yai kele “mutindu mosi ya kusansa bana ya buzoba mpi ya kukonda bulemfu.”
Inki baleke ya bubu yai kele na yau mfunu? Bau kele ntangu yonso ti mfunu ya malongi ya zola yina kesungikaka mabanza ti ntima. Sambu baleke kele ya kuswaswana, bau kele mpi na mfunu ya ndongi ya kuswaswana. Ndongi ya zola kelutaka kupesama na kuyindula ti mwana. Kikuma yau yina, Bingana 8:33 (NW) kesonga beto nde “widikila ndongi.” Kansi, bana yankaka kesobaka ve mabanza na bau kana nge ketuba “kaka na munoko.” Bayina, bau lenda baka ndola ya mefwana sambu na bantu ya kukonda bulemfu, na kiteso ya kuluta ve ndilu. (Bingana 17:10; 23:13, 14; 29:19) Ntangu Biblia ketuma buna, yau kele na kulonga ve na kupesa mwana fimbu na makasi, kututa yandi ngolo, na kiteso ya nge lenda buka yandi to kulwadisa yandi. (Bingana 16:32) Kansi, mwana fwete bakisa kikuma ya yandi mebakila ndola mpi nde yau kele sambu bibuti kezola mambote na yandi mpi kekotila yandi.—Fwanisa ti Baebreo 12:6, 11.
Bandongisila ya mbote ya mutindu yai mpi ya kebasika na Biblia kele ya kumonisa pwelele na mukanda: Kinsweki ya Kyese ya Dibuta.