Manaka Sambu na Mposo ya Marsi 25

MPOSO YA KE BANDA NA MARSI 25

Nkunga 76 mpi Kisambu

□ Kulonguka ya Biblia ya Dibundu:

jr kap. 7 § 1-6 (Min. 30)

□ Nzo-Nkanda ya Kisalu ya Teokrasi:

Lutangu ya Biblia: Luka 4-6 (Min. 10)

No. 1: Luka 4:22-39 (Min. 4 to na nsi ya minuta 4)

No. 2: Bampusu ya Nitu ya Kuswaswana Me Katukaka Wapi?—rs-F lut. 294 § 4–lut. 295 § 2 (Min. 5)

No. 3: Inki Banzikisa Beto Kele na Yo ya Ke Monisa nde Nzambi Futumunaka Yezu?—1 Bak. 15:3-7 (Min. 5)

□ Lukutakanu ya Kisalu:

Nkunga 111

Min. 5: Yantika Kulonguka Biblia ti Muntu na Sabala ya Ntete. Sadila mbandu ya bangogo ya kukotila na masolo, ya kele na lutiti 8, sambu na kusadisa nsonga ya ke monisa mutindu ya kuyantika kulonguka Biblia ti muntu na Sabala ya ntete ya Aprili. Siamisa bantu yonso na kusala yo.

Min. 25: “Mutindu ya Kusadila Nsangu ya Mbote ya Mekatuka na Nzambi!” Disolo na bangiufula mpi bamvutu. Ntangu beno ke tadila paragrafe 6, sadisa bansonga zole.

Nkunga 97 mpi Kisambu

Mutindu ya Kusadila Nsangu ya Mbote ya Mekatuka na Nzambi!

Kamukanda ya Mpa Sambu na Kusadisa Beto na Kusala Bamvutukila ya Mpa mpi Kuyantika Kulonguka Biblia ti Bantu

1. Inki kamukanda basikaka na Lukutakanu ya Distrike, “Tanina Ntima na Nge,” sambu na kusadisa beto na kusala bamvutukila ya mpa mpi kuyantika kulonguka Biblia ti bantu?

¹ Na Lukutakanu ya Distrike, “Tanina Ntima na Nge,” beto vandaka na kiese ya kubaka kamukanda ya mpa sambu na kusadisa beto na kusala bamvutukila ya mpa mpi kuyantika kulonguka Biblia ti bantu. Nsangu ya Mbote ya Mekatuka na Nzambi! me yinga kamukanda Inki Nzambi Kelombaka; kansi yo kele kiteso mosi sambu malongi na yo kele ya nkufi. Malongi na yo ya nkufi ta sadisa beto na kusadila mbote kamukanda yai sambu na kulonguka Biblia ti bantu na ntwala ya kielo. Kamukanda Inki Nzambi Kelombaka vandaka kutubila mambu yina Bakristu fwete sala; balongoki ya mpa lendaka kundima mambu yango na mpasi; Kansi kamukanda yai ya mpa ke benda dikebi na nsangu ya mbote yina kele na Biblia.—Bis. 15:35.

2. Sambu na nki bo basisaka kamukanda Nsangu ya Mbote?

² Sambu na nki bo basisaka yo? Bampangi ya ntoto ya mvimba vandaka kulomba kamukanda mosi ya pete yina lenda benda bantu na kieleka mpi kulonguka ti bo na mukanda Biblia Kelongaka, kisadilu na beto ya ntete ya kulonguka Biblia ti bantu. Mbala mingi, bantu yina ke waka boma ya kulonguka na mukanda ke ndimaka kulonguka Biblia na kamukanda. Diaka, kamukanda ke vandaka mpasi mingi ve na kubalula na bandinga mingi.

3. Inki mutindu kamukanda yai me swaswana ti mikanda ya nkaka ya kulonguka?

³ Mutindu Bo Me Yidika Mambu na Kati: Bo ke sonikaka mikanda na beto mingi ya kulongukila na mutindu yina muntu lenda tanga yo mpi kubakisa kieleka, ata yandi mosi. Mukanda yai kele ya kuswaswana. Bo me sonika yo sambu na kulonguka Biblia kaka ti longi. Yo yina, ntangu nge ke pesa yo muntu, yo ta vanda mbote na kutadila paragrafe mosi to zole. Sambu baparagrafe kele nkufi, beno lenda tadila yo ti muntu na ntwala ya kielo to na kisika na yandi ya kisalu. Ata yo kele mbote na kuyantika na dilongi 1, beto lenda yantika kulonguka mpi na konso dilongi ya nkaka.

4. Inki mutindu kamukanda yai ke sadisaka beto na kulonga mbala mosi na Biblia?

⁴ Na mikanda na beto mingi, muntu lenda zwa bamvutu na bangiufula na kati ya baparagrafe. Kansi, na mukanda yai, bamvutu kele ntete-ntete na Biblia. Bantu mingi ke zolaka kulonguka mbala mosi na Biblia kansi na mikanda na beto ve. Yo yina, bo me vutukila ve bangogo ya baverse mingi. Beno fwete tanga yo mbala mosi na Biblia. Yo ta sadisa balongoki na kubakisa nde mambu ya bo ke longuka ke katuka na Nzambi.—Yez 54:13.

5. Sambu na nki yo kele mfunu nde longi kudibongisa mbote konso ntangu na ntwala ya kulonguka?

⁵ Kamukanda yai ke tendula ve baverse yonso. Sambu na nki? Bo me sala yo sambu na kupusa balongoki na kuyula bangiufula mpi ke sadisa longi na kusadila mayele na yandi ya kulongila. Yo yina, kudibongisa mbote konso ntangu na ntwala ya kulonguka kele mfunu. Mwa lukebisu: Kutuba ve mingi. Beto ke zolaka kutendula Masonuku. Kansi beto ke sadisaka mingi longoki kana beto ke lomba yandi na kutendula masonuku. Kana beto ke sadila bangiufula na mayele yonso, beto lenda sadisa yandi na kusosa kubakisa konso verse.—Bis 17:2.