Tula Mambu ya Mfunu na Kisika ya Ntete!
Ntangu ya lukutakanu melunga, kisalu kekinga nge na lweka, inki nge tasala ntete?
NGE kele ti nkento ti bana. Kisalu memana, nge melemba, ntangu yai nge keyindula lukutakanu ya tasalama na dibundu na nkokila. Kana nge vutuka nswalu na nzo, nge tazwa mwa ntangu ya kuyobila, ya kulwata lele yankaka, ti ya kudya nswalu sambu na kukwenda na lukutakanu. Kansi, kaka na ntangu yina, patro na nge mekwisa kubasika mpi mesonga nge na kulanda kisalu, nde yandi tafuta nge mbongo mingi sambu na kisalu yina. Nge mpi kele na mfunu ya mbongo.
To nge kele ti bakala ti bana. Ntangu nge kelamba na nkokila, nge meyibuka nde bilele yonso, ti ya beno talwata mbasi, kele ya kugoma ve. Nge mebanda kudiyula nde, ‘Kana mono kwenda na lukutakanu, inki ntangu mono tagoma bilele yai yonso?’ Nge mekatuka kuzwa kisalu ya kebakaka nge kilumbu ya mvimba, nge ke na kumona mpasi na kuvukisa kisalu yina ti bisalu ya nzo.
To nge kele mwana ya nzo-nkanda. Mesa na nge mefuluka ti bisalu ya nzo-nkanda. Bisalu ya bo mepesaka nge tuka ntama nge mebumbaka yau na nzo, ya mpa mayikama, yonso nge fwete vutula yau mbasi. Ntima kesonga nge na kulomba nzila na bibuti, nge tina balukutakanu sambu nge bika kumanisa bisalu yai yonso.
Inki nge tatula na kisika ya ntete: kulanda kisalu, kugoma bilele, kusala bisalu ya nzo-nkanda, to kukwenda na lukutakanu? Na kimpeve, inki beto lenda binga nde kutula mambu ya mfunu na kisika ya ntete? Inki Yehowa keyindula?
Inki Fwete Baka Kisika ya Ntete?
Bilumbu mingi ve na nima ya kuzwa Bansiku Kumi ya Nzambi, bana ya Izraele kangaka muntu mosi kelokuta bankuni na kilumbu ya Kisabatu. Yau vandaka nsiku ya ngolo. (Kutanga 15:32-34; Kulonga 5:12-15) Kana nge vandaka pana, nge zolaka kusambisa muntu yina inki mutindu? Keti nge zolaka kulolula yandi? Keti nge zolaka kutuba nde, yandi mesala yo ve na lulendo, kansi na mpasi sambu na kusadisa dibuta? Keti nge zolaka tuba nde, bilumbu yankaka ya Kisabatu kele mingi yandi tazitisa, mfunu ya kupesa yandi ndola sambu na Kisabatu mosi kele ve, yandi vilaka na kubuka bankuni ya ntwala?
Yehowa monaka yau kifu mosi ya ngolo. Biblia ketuba nde: “Mfumu Nzambi tubaka na Moize nde: ‘Muntu yai bo fweti fwa yandi.’ ” (Kutanga 15:35) Sambu na inki Yehowa monaka mbi mingi na mambu ya muntu yina kusalaka?
Nzambi pesaka bantu bilumbu sambanu ya kubuka bankuni ti kuyidika mambu ya luzingu bonso madya, bilele, ti nzo. Kilumbu ya nsambwadi vandaka sambu na mambu ya kimpeve. Kubuka bankuni vandaka kima ya mbi ve. Kansi, kubuka yau na ntangu ya bo kesambilaka Yehowa vandaka kima ya mbi. Ata Bakristu kelandaka ve Nsiku ya Moize, keti beto mezwa ve dilongi na yina metala kuzaba kutula mambu na kisika ya ntete bubu yai?—Filipi 1:10.
Ntangu ya bamvula 40 memana na ntoto ya zelo na zelo, bana Izraele yilamaka sambu na kukota na Ntoto ya Lusilu. Bankaka vandaka dyaka ve na nzala ya kudya mana yina ya Nzambi vandaka pesa bau na ntoto ya zelo na zelo. Bau vandaka na kyese nde awa beto kekota na madya yankaka. Sambu na kusonga bau dibanza ya bau fwete vanda na yau na kati ya “ntoto ya kufuluka ti miliki mpi bwiki,” Yehowa tubaka nde: “Bantu ke zingaka kaka ve sambu na madia kansi bo ke zingaka mpi sambu na mambu yonso ya Nzambi ke tubaka.”—Kubasika 3:8, NW; Kulonga 8:3.
Bantu ya Izraele vandaka ti bisalu mingi ya kusala: kusosa “miliki ti bwiki,” kunwana sambu na ntoto, kutunga banzo, kusala bilanga. Kansi, Yehowa songaka bau na kubumba ntangu konso kilumbu sambu na mambu ya kimpeve, ti kulonga bana na bau nzila ya Nzambi. Yehowa tubaka nde: “Beno longa [bansiku na mono] na bana na beno. Beno fweti tuba yo ntangu beno kele na nzila to na nzo, ntangu beno kele na kisalu to ntangu beno ke pema.”—Kulonga 11:19.
Konso mvula, babakala yonso ya Izraele ti baprozelite vandaka mata na Yeruzalemi mbala tatu sambu na kumonana na ntwala ya Yehowa. Batata mingi vandaka nata bankento ti bana na bau, sambu bau zabaka nde kuna dibuta ya mvimba lendaka kuzwa mambote na kimpeve. Kansi, nani vandaka tanina banzo ti bilanga na bau ntangu dibuta yonso mebasika mutindu yina? Yehowa silaka bau nde: “Ata muntu ve ta meka kukota na ntoto na beno ntangu beno ta sala bankinsi yai tatu konso mvula sambu na kukumisa mono Mfumu Nzambi, Nzambi na beno.” (Kubasika 34:24) Yau lombaka kuvanda ti lukwikilu sambu bana ya Izraele kundima nde kana bau metula mambu ya kimpeve na kisika ya ntete, Nzambi tatanina bima na bau. Keti Yehowa lungisaka lusilu na yandi? Yandi lungisaka yau!
Landa Kusosa Ntete Kimfumu
Yezu longaka balandi na yandi na kutula mambu ya kimpeve na ntwala ya mambu yonso. Na Disolo yina yandi salaka na zulu ya Ngumba, yandi longisilaka bawi na yandi nde: “Beno kumona mpasi ve na kuyulaka nde: ‘Beto ke dia nki? Beto ke nwa nki? Beto ke lwata nki?’ . . . Beno landa kaka na kusosa Kimfumu na yandi ti mambu yina ya yandi ke zolaka, ebuna yandi ta yika beno bima yina yonso [ya kinsuni].” (Matayo 6:31, 33) Ntama mingi ve na nima ya lufwa ya Yezu, Bakristu ya katukaka kubaka mbotika sadilaka ndongisila yai. Bamingi na kati na bau vandaka Bayuda to baprozelite yina kwendaka kuta nkinsi ya Pantekoti ya mvu 33 T.B. na Yeruzalemi. Ntangu bau vandaka kuna, kima mosi ya ngituka kusalamaka. Bau waka nsangu ya mbote ya metadila Yezu, ye bau yambaka yau. Bau vandaka na mpusa ya ngolo ya kuzaba malongi ya lukwikilu na bau ya mpa mbotembote yau yina bau bikalaka na Yeruzalemi. Na nima, ntangu bima ya kinsuni kumanaka, bau monaka yau dikambu ya fyoti. Sambu bau zabaka Mesia! Bampangi na bau ya Bakristu kabilaka bau bima ya bau vandaka na yau. Yau yina, bau yonso landaka “kutula ngolo sambu na kuwa malongi ya bantumwa, . . . ti na kusamba Nzambi.”—Bisalu 2:42.
Na bilumbu ya nima, Bakristu yankaka vilaka nde kuvukana ti bampangi na balukutakanu kele kima ya mfunu mingi. (Baebreo 10:23-25) Ziku bau bandaka kusosa bima ya kinsuni, yoyina bau yambulaka mambu ya kimpeve sambu na kusosa mbongo mingi ya fwete sadisa bau ti mabuta na bau. Polo songaka bau ntete na kuyambula ve balukutakanu. Na nima, yandi sonikaka nde: “Na luzingu na beno, beno lenda pesa ntima na beno na mbongo ve; kansi beno fweti vanda na kiese na bima yina ya beno ke na yo ntete, sambu Nzambi yandi mosi me tubaka nde: ‘Mono ta bikisa nge ve ata fioti.’ ”—Baebreo 13:5.
Polo pesaka ndongisila yina na ntangu ya mbote. Bamvula kiteso ya tanu na nima ya mukanda ya Polo, Cestius Gallus ti basoda na yandi zyungaka Yeruzalemi. Bakristu ya kwikama yibukaka nde Yezu tubaka nde kana beto memona bau, “na ntangu yina, . . . Muntu yina ta vanda na ludi ya nzo, mbote yandi kutuluka; yandi kukota diaka ve na kati ya nzo sambu na kubaka konso kima. Muntu yina kele na bilanga, yandi kuvutuka diaka ve na nzo na yandi sambu na kwenda kubaka kazaka na yandi.” (Marko 13:14-16) Bau zabaka nde kaka bulemfu na ndongisila ya Yezu mpamba lendaka kugulusa bau, kima yankaka ve: yau vanda kisalu to bimvwama na bau. Ntembe kele ve nde bayina wilaka Polo mpi tulaka mambu ya kimpeve na kisika ya ntete, bau monaka mpasi ve na kuyambula banzo, bisalu, bilele ti bimvwama na bau. Bau tinaka, bau kwendaka na bangumba. Kansi, yau vandaka mpasi na kusala buna sambu na bayina vandaka na zola ya mbongo.
Inki Mutindu Bamingi Ketulaka Mambu ya Mfunu na Kisika ya Ntete Bubu?
Bubu yai Bakristu ya kwikama kezolaka mingi kuvukana ti bampangi na bau. Bamingi kesalaka bibansa sambu na kuvanda na balukutakanu. Na bisika mingi, bantu mingi kesalaka kisalu mosi. Bayai tayantika, bankaka kwisa kuyinga bau. Sabala ke kilumbu ya bafete, bamingi kezolaka ve kusala na mpimpa. Mpangi mosi mebakaka mayele ya kusala na Sabala na kisika ya bankaka, ebuna bau kesalaka na kisika na yandi na kilumbu ya lukutakanu. Bampangi yankaka kekwendaka lukutakanu na dibundu mosi ya kele penepene ti kisika na bau ya kisalu. Bau kesalaka buna kana kisalu mekangisa bau na kukwenda na dibundu na bau mosi. Mpidina, bau kezangisaka ve lukutakanu ata mosi. Na Canada, nkento mosi vandaka muntu ya mpa na dibundu. Yandi vandaka sepela mingi ti Nzo-Nkanda ya Kisalu ya Teokrasi mpi Lukutakanu ya Kisalu. Kansi kisalu vandaka pesa yandi nzila ve na kuvanda na balukutakanu yai. Na yau, kana kilumbu na yandi melunga, yandi vandaka futa muntu yankaka ya kisalu, na kusala na kisika na yandi, sambu yandi kuzwa ntangu ya kukwenda na balukutakanu yai ya mfunu.
Bantu mingi ya mekumaka bambefo kelutaka kuzangisa lukutakanu ve. Kana mpila ya kukwenda na Nzo ya Kimfumu kele ve, bamingi kelandaka lukutakanu na telefone, to bau ketindaka bande ya keseti, bo tudila bau ndinga. Bau kemonisaka mpenza nde bau kezolaka madya ya kimpeve ya Yehowa kepesaka na nzila ya “mpika ya kwikama mpi ya mayele”! (Matayo 24:45) Bakristu yina kesansaka bambefo bonso bibuti ya menuna, kesepelaka mingi kana mpangi mosi mendima kukinga bau ti mbefo sambu bau kwenda na lukutakanu.
Kudibongisa na Ntwala
Bibuti yina kevilaka ve nzala na bau ya kimpeve ke sadisaka bana na bau na kuzaba mfunu ya balukutakanu. Bau kezolaka nde bana na bau kusala bisalu ya nzo-nkanda kilumbu ya bo kepesaka yau. Bau fwete fulusa yau ve na nzo. Na kilumbu ya lukutakanu, bana fwete sala bisalu na bau ya nzo-nkanda nswalu kana bau mekuma na nzo. Muntu lenda konda ve na lukutakanu sambu yandi kwendaka kutala to kusala nsaka mosi.
Kana nge kele ti nkento ti bana, keti nge ketulaka balukutakanu na kisika ya ntete? Kana nge kele ti bakala ti bana, keti nge kesalaka bisalu na nge na ntwala sambu na kukwenda na lukutakanu? Kana nge kele mwana ya nzo-nkanda, na kisika ya ntete nge ketulaka balukutakanu to bisalu na nge ya nzo-nkanda?
Balukutakanu kele ngidika ya zola ya Yehowa mesadilaka beto. Beto fwete sala yonso sambu na kubakila yau mambote. Yehowa tasakumuna nge mingi kana nge ketula mambu ya mfunu na kisika ya ntete.