Inki Mutindu Yehowa Tayindula Nge?

“O NZAMBI na mono, yindula mono.” Mbala mingi Nehemia sadilaka bangogo yai sambu na kubondila Nzambi. (Nehemia 5:19, NW; 13:14, 31) Yo kele mbi ve nde kana muntu mekutana ti mpasi ya ngolo, yandi baluka na Nzambi sambu na kubondila yandi ti bangogo ya mutindu yina.

Kansi, nki bantu kezolaka kutuba ntangu bo kelombaka Nzambi na kuyindula bo? Yo kele pwelele nde bo ketulaka kivuvu nde Nzambi kuyindula bo ve na bazina mpamba, kansi yandi sadila bo mambu mingi. Ntembe kele ve nde bo kevandaka ti kivuvu bonso ya muntu ya mbi yina bo fwaka kisika mosi ti Yezu. Muntu yai kuvandaka ve bonso muntu yina yankaka. Yandi bondilaka Yezu nde: “Yindula mono ntangu nge takota na kimfumu na nge.” (NW) Yandi zolaka nde Yezu kusuka ve kaka na kuyindula zina na yandi mpamba, kansi nde yandi sala kima sambu na yandi, disongidila, yandi futumuna yandi.​—Luka 23:42.

Biblia kemonisa na mutindu mosi ya sikisiki nde “kuyindula” ya Nzambi keyindulaka ketendulaka kusala dyambu mosi ya mbote. Mu mbandu, ntangu masa kufulukaka na ntoto bilumbu 150 sambu na mvula ya ngolo yina kunokaka, “Nzambi yindulaka Noa . . . ; yandi tindaka mupepe na kuluta na zulu ya masa, ebuna masa yantikaka kuyuma.” (Kuyantika 8:1) Na nima ya bamvu-nkama mingi, Samsoni sambaka mutindu yai na ntangu bantu ya Filistia kutobulaka yandi meso, mpi kukangisaka yandi minyololo ya bibende: “Mfumu Nzambi pardo, yindula mono; pardo Nzambi, pesa mono diaka ngolo na . . . mbala yai.” Yehowa yindulaka Samsoni. Yandi pesaka yandi ngolo ya kuluta ngolo ya bantu kevandaka na yo na mpila nde yandi vutula mbela na bambeni ya Nzambi. (Bazuzi 16:28-30) Sambu na yina metala Nehemia, Yehowa kusambulaka bikesa na yandi, ebuna lusambu ya kyeleka kuvutukaka na Yeruzalemi.

Ntumwa Polo kusonikaka nde: “Mambu yonso ya bo sonikaka na Mukanda ya Nzambi, bo sonikaka yo sambu na kulonga beto na mpila nde beto kukanga ntima, beto kuvanda na kikesa na kuvingila mambu yina ya Nzambi silaka beto.” (Roma 15:4) Kana beto keyindula Yehowa na kusosaka kusala luzolo na yandi, mutindu bansadi na yandi ya kwikama ya ntangu ya ntama vandaka kusala, beto lenda tula ntima nde Yehowa tayindula beto, yandi tasadisa beto na kuzwa bima ya beto kevandaka na yo mfunu konso kilumbu. Yandi tasadisa beto na bampasi na beto, mpi yandi tagulusa beto na ntangu yandi takwisa kusambisa bantu yina kevandaka ve na bikalulu ya bunzambi.​—Matayo 6:33; 2 Piere 2:9.

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, République démocratique du Congo, to na mosi na adresi mebonga na nge yina kele na lutiti 2.