Bareferanse ya Mukanda ya Lukutakanu Luzingu mpi Kisalu
© 2024 Watch Tower Bible and Tract Society of Pennsylvania
6-12 JANVIER
BIMVWAMA YA NDINGA YA NZAMBI | BANKUNGA 127-134
Bibuti—Beno Landa Kukeba Makabu na Beno ya Mfunu Mingi
Baka na Valere Kisika na Nge na Dibuta ya Yehowa
9 Yehowa me pesaka bantu makuki ya kubuta bana, mukumba ya kulonga bo na kuzola yandi mpi na kusadila yandi. Kana nge kele ti bana, keti nge ke monisaka ntonda sambu na dikabu yina ya mfunu? Yehowa me pesaka bawanzio makuki ya kusala mambu mingi ya mbote, kansi yandi me pesaka bo ve makuki ya kubuta. Yo yina, bibuti fwete monisa ntonda ya mingi sambu na mukumba yina bo kele ti yo ya kusansa bana. Yehowa me pesaka bibuti mukumba ya mfunu ya kusansa bana na bo ‘na malongi mpi na balukebisu na yandi.’ (Baef. 6:4; Kul. 6:5-7; Nk. 127:3) Sambu na kusadisa bibuti, dibundu ya Yehowa ke basisaka bisadilu mingi ya ke tendulaka Biblia mu mbandu, mikanda, bavideo, bankunga mpi masolo ya ke basikaka na Internet. Ya kieleka, Tata na beto ya zulu mpi Mwana na yandi, ke zolaka baleke. (Luka 18:15-17) Yehowa ke vandaka na kiese mingi ntangu bibuti ke tudilaka yandi ntima mpi ke salaka yonso sambu na kusansa mbote bana na bo ya bo ke zolaka mingi. Kana bibuti ke sala mutindu yai, bo ta sadisa bana na bo na kuzwa dibaku ya kukota na dibuta ya Yehowa mpi na kuvanda mvula na mvula na dibuta na yandi!
Bibuti—Beno Longa Bana na Beno na Kuzola Yehowa
20 Beno zaba bana mbote. Nkunga 127 ke fwanisa bana ti batolo-tolo. (Tanga Nkunga 127:4.) Batolo-tolo yonso ke vandaka ve kiteso mosi mpi nda mosi. Mutindu mosi, bana yonso ke vandaka ve kiteso mosi. Yo yina bibuti fwete zaba mutindu ya kulonga konso mwana. Dibuta mosi na Izraele ya bilumbu na beto, yina sadisaka bana na bo zole na kusadila Yehowa ke tuba mambu yina sadisaka bo. Bo ke tuba nde: “Beto vandaka kulonguka Biblia ti konso mwana na ntangu na yandi.” Ya kieleka, konso mfumu ya dibuta ta tadila kana yo kele mfunu na kulonguka ti konso mwana na ntangu na yandi.
Bimvwama ya Kimpeve
Sepela ti Mambu Yina Nge Ke Salaka Sambu na Kuyela na Kimpeve
6 Dilongi mosi ya mfunu yina bibuti lenda baka kele na Nkunga 131:1, 2. (Tanga.) Ntotila Davidi tubaka nde yandi vandaka ve “na nzala ya kuvanda ti bima ya nene-nene,” to yandi vandaka ve ti mfunu ya kusala mambu yina yandi ta kuka ve kusala. Kikalulu na yandi ya kudikulumusa mpi ya kuzaba bandilu na yandi ‘lembikaka yandi mpi kumisaka yandi pima.’ Inki dilongi bibuti lenda baka na mambu yina Davidi tubaka? Bibuti ta monisa nde bo kele ti kikalulu ya kudikulumusa mpi ya kuzaba bandilu na bo, kana bo ke sala ve mambu yina bo ta kuka ve kusala, mpi kana bo ke lomba ve bana na bo na kusala mambu yina bana ta kuka ve kusala. Sambu bana kumona nde bo kele mfunu, bibuti fwete sadisa bo na kubakisa nde, kele ti mambu yina bo ta kuka kusala mpi yina bo ta kuka ve kusala. Bibuti fwete siamisa mpi bana na bo na kuditudila balukanu yina bo ta kuka kulungisa. Mpangi Marina ke tuba nde: “Mama vandaka kufwanisa mono ve ata fioti ti bampangi na mono tatu to ti bana ya nkaka. Yandi songaka mono nde konso muntu kele ti mambu yina yandi ke salaka mbote mpi nde beto yonso kele mfunu mingi na meso ya Yehowa. Mama me sadisaka mono mingi na kudifwanisa ve ti bantu ya nkaka.”
13-19 JANVIER
BIMVWAMA YA NDINGA YA NZAMBI | BANKUNGA 135-137
“Mfumu na Beto Kele Nene Kuluta Banzambi Yonso ya Nkaka”
Kristu Ngolo ya Nzambi
15 Ngolo ya Yezu ke katukaka na Yehowa; yo yina, beto ke ndima nde Nzambi Nkwa-Ngolo Yonso kele ti kiyeka ya mingi ya kuyala bangolo ya lugangu. Mu mbandu, na ntwala ya Mvula ya Ngolo, Yehowa tubaka nde: “Bilumbu nsambwadi me bika, mono ke tinda mvula ya ngolo na nsi-ntoto. Yo ta noka bilumbu makumi iya mpimpa ti mwini.” (Kuy. 7:4) Diaka, Kubasika 14:21 ke tuba nde: “Mfumu Nzambi tindaka mupepe ya ngolo yina katukaka na ndambu ya este.” Yonasi 1:4 ke tuba nde: “Mfumu Nzambi tindaka mupepe ya ngolo sambu na kunikisa masa; kitembo mosi ya nene kwisaka kubula na maswa, maswa zolaka kupasuka mpenza.” Kuzaba nde Yehowa kele ti kiyeka ya kuyala bangolo ya lugangu ke pesa beto kikesa. Yo kele pwelele nde, na nsi-ntoto ya mpa, Yehowa ta yalaka bangolo ya lugangu.
Zola ya Kwikama ya Yehowa Ke Tendula Inki?
16 Kana beto ke ndima nde Yehowa kele kisika na beto ya kubumbana, beto ta kudiwa na lutaninu. Ata mpidina, bantangu ya nkaka beto lenda lemba nitu mpi yo lenda baka bantangu mingi. Inki Yehowa ta sala sambu na kusadisa beto na bantangu ya mutindu yina? (Tanga Nkunga 136:23.) Yandi ta simba beto na maboko na yandi, yandi ta telemisa beto na mawete yonso mpi yandi ta sadisa beto na kubaka diaka kikesa. (Nk. 28:9; 94:18) Mambote yina beto ke bakaka: Beto me zaba nde beto lenda tula ntima ntangu yonso na lusadisu ya Yehowa. Yo ke sadisa beto na kuvila ve nde Yehowa ke sadisaka beto na mitindu zole. Ya ntete, yandi ke taninaka beto konso kisika yina beto ke zinga. Ya zole, Tata na beto ya zola yina kele na zulu ke lungisaka bampusa na beto mbote-mbote.
Bimvwama ya Kimpeve
it-2 1175
Yah
Ngogo Yah ke tadila mingi-mingi mawi ya ke vandaka kibeni kuna na ntima yina bantu ke basisaka ntangu bo ke kumisa Nzambi mpi ke yimbila yandi, na bisambu mpi na badodokilu. Mbala mingi, yo ke vandaka na masonama yina ke monisaka kiese na nima ya kununga to na masonama yina ke monisaka diboko ya ngolo ya Nzambi mpi ngolo na yandi. Bambandu ya ke monisa bisika yina bo me sadilaka ngogo yango kele mingi. Bangogo “Beno Kumisa Yah ! ” (Aleluya) kele mutindu ya kukumisa Nzambi. Mukanda ya Bankunga ke sadilaka yo. Yo ke monana na mbala ya ntete na Nkunga 104:35. Na bankunga ya nkaka, yo ke vandaka na luyantiku (Nk 111, 112), yo ke vandaka kibeni ve mingi na kati ya nkunga (135:3), bantangu ya nkaka yo ke vandaka kaka na nsuka (Nk 104, 105, 115-117), kansi mbala mingi, yo ke vandaka na luyantiku mpi na nsuka (Nk 106, 113, 135, 146-150). Na mukanda ya Kusonga, bigangwa yina kele na zulu ke sadilaka mbala mingi bangogo yina sambu na kukumisa Yehowa.—Kus 19:1-6.
Baverse ya nkaka yina ngogo “Yah” kele ke monisaka kiese yina bantu kele ti yo na bankunga mpi na mambu yina bo ke lombaka Yehowa. Beto lenda tanga nkunga ya luguluku ya Moize. (Kub 15:2) Na yina Yezaya ke tubila, bo ke benda dikebi mutindu bo me vukisa bazina zole “Yah Yehowa.” (Yez 12:2; 26:4) Ezekiasi monisaka mawi ya ngolo yina yandi vandaka ti yo mutindu yandi vandaka kuvutukila zina Yah. Mpidina yandi monisaka kiese ya mingi yina yandi vandaka ti yo sambu yandi gulukaka na mutindu ya kuyituka na ntangu yina yandi vandaka pene-pene ya kufwa. (Yez 38:9, 11) Luswaswanu ke monana mpi na kati ya bantu yina me fwa sambu bo lenda kumisa ve Yah ti ya bantu yina me bakaka lukanu ya kukumisaka Nzambi luzingu na bo ya mvimba. (Nk 115:17, 18; 118:17-19) Bankunga ya nkaka ke monisaka na nzila ya bisambu, ntonda sambu Nzambi gulusaka bantu, sambu yandi taninaka bo to sambu yandi sungikaka bo.—Nk 94:12 ; 118:5, 14.
20-26 JANVIER
BIMVWAMA YA NDINGA YA NZAMBI | BANKUNGA 138-139
Kubika Ve nde Boma Kukanga Nge Nzila ya Kupesa Bamvutu na Balukutakanu
Kumisa Yehowa na Dibundu
10 Keti ntima na nge ke pasukaka ntangu nge ke zola kunangula diboko sambu na kupesa mvutu? Kana mpidina, nge kele ve nge mosi. Diambu ya kieleka kele nde bampangi mingi ke waka mpi boma sambu na kupesa bamvutu. Sambu na kununga boma, nge fwete bakisa diambu yina ke pesaka nge boma. Keti nge ke waka boma nde mvutu na nge ta vanda ve pwelele to nde nge ta pesa mvutu ya mbi? Keti nge ke kudiyangisaka nde mvutu na nge ta vanda ve mbote bonso ya bampangi ya nkaka? Ya kieleka, boma ya mutindu yai kele kidimbu ya mbote. Yo ke monisa nde nge kele muntu ya kudikulumusa mpi ke ndimaka nde bantu ya nkaka me luta nge. Yehowa ke zolaka kikalulu yai. (Nk. 138:6; Bafil. 2:3) Kansi Yehowa ke zolaka nde nge kumisa yandi mpi nge pesa bampangi ya nkaka kikesa na balukutakanu. (1 Bate. 5:11) Yandi ke zolaka nge mpi ta pesa nge kikesa yina nge kele na yo mfunu.
Beto Pesana Kikesa na Balukutakanu
7 Kana nge tadila diaka mambu yina bo tubaka na masolo ya me luta ya Nzozulu ya Nkengi, yo lenda sadisa nge. Mu mbandu, yilama mbote. (Bing. 21:5) Kana nge yidika mbote disolo yina beno ta longuka na lukutakanu, yo ta sadisa nge na kupesa bamvutu kukonda mpasi. Pesa bamvutu ya nkufi. (Bing. 15:23; 17:27) Mvutu ya nkufi ta sadisa nge na kuwa ve boma. Bampangi lenda bakisa kukonda mpasi mvutu ya nkufi yina kele ti nsa mosi to bansa zole na kisika ya kupesa mvutu ya nda yina kele ti bangindu mingi na kati. Kana nge pesa mvutu ya nkufi na bangogo na nge mosi, yo ta monisa nde nge yilamaka mbote mpi nde nge ke bakisa mbote disolo yina beno ke longuka.
Bimvwama ya Kimpeve
‘Beno Landa na Kulolula Bantu ya Nkaka na Kati na Beno’
15 Ebuna inki beto ta sala, kana muntu mesala mbi ya kuluta mbi, kansi yandi kendima ve disumu na yandi, mpi yandi kebalula ve ntima na yandi, mpi yandi kelomba ndolula ve? (Bingana 28:13) Masonuku kemonisa pwelele nde Yehowa kelolulaka ve bantu yina kebalulaka ntima ve, bantu ya mekangamaka na masumu. (Baebreo 6:4-6; 10:26, 27) Ebuna beto bantu? Mukanda Auxiliaire pour une meilleure intelligence de la Bible ke tuba (na lutiti 1135) nde: “Bakristu ke na dilombo ve ya ketuma bau na kulolula bantu yina kesalaka masumu na luzolo ya mvimba, na mayele ya mbi, nkatu kumonisa kubalula ntima. Bantu ya mutindu yina kekumaka bambeni ya Nzambi.” Mukristu yonso ya kemona nde muntu mesadila yandi mambu ya kukonda lunungu, ya kuluta mbi, to ya nku kele na ntuma ve ya kepusa yandi na kulolula to kufwila nkenda na muntu ya mbi ya kezolaka ve kubalula ntima.—Nkunga 139:21, 22.
27 JANVIER–2 FÉVRIER
BIMVWAMA YA NDINGA YA NZAMBI | NKUNGA 140-143
Kana Nge Me Lomba Lusadisu na Yehowa, Sala Mambu na Kuwakana ti Kisambu na Nge
“Wa Mambu Yina Bantu ya Mayele Ke Tuba”
13 Nzambi ke pesaka beto bandongisila sambu yandi ke zolaka beto. Yehowa ke zolaka mambote na beto. (Bing. 4:20-22) Ntangu yandi ke pesaka beto bandongisila na nzila ya Ndinga na yandi, ya mukanda mosi ya ke tendulaka Biblia to na nzila ya mpangi mosi ya kuyela na kimpeve, yandi ke monisaka nde yandi ke zolaka beto. Baebreo 12:9, 10 ke tuba nde: “Nzambi ke salaka yo sambu na mambote na beto.”
14 Tula dikebi na ndongisila kansi ve na mutindu bo me pesa nge ndongisila yango. Bantangu ya nkaka, beto lenda yindula nde bo pesaka beto ve ndongisila na mutindu ya mbote. Ya kieleka, konso muntu yina ke pesa ndongisila fwete sala yonso sambu na kupesa yo na mutindu ya mbote sambu muntu yina yandi ke pesa ndongisila kundima yo. (Bag. 6:1) Kansi kana bo ke pesa beto ndongisila, beto fwete tula dikebi na ndongisila yango, ata kana beto ke yindula nde yo lombaka nde bo pesa beto yo na mutindu ya mbote. Beto lenda kudiyula nde: ‘Ata mono me sepela ve ti mutindu bo pesaka mono ndongisila, keti mambu yina bo tubaka kele ve kieleka? Keti mono lenda vila bifu ya muntu yina pesaka mono ndongisila mpi kubaka mambote ya ndongisila yango?’ Yo ta vanda mbote kana beto ke sosa mutindu ya kubaka mambote na konso ndongisila yina bo ke pesa beto.—Bing. 15:31.
w10 15/3 32 § 4
Beto Landa Kuvanda ti “Ntima ya Bunkete” na Ntangu ya Mumekamu
Bansadi ya nkaka ya Nzambi ke niokwama sambu bo ke telamina lukwikilu na bo, bo ke mona mpasi ya mbongo to bo ke bela maladi mosi ya ngolo. Bantangu ya nkaka, mambu yina ke lembisaka bo ngolo. Ntotila Davidi mpi lutisaka bantangu bonso yina: “Mpeve na mono ke lemba; ntima na mono me kuma kizitu na kati na mono.” (Nk. 143:4) Inki sadisaka yandi na kubikala ve mpidina? Yandi yibukaka mitindu yonso yina Nzambi sadilaka bantu na yandi mambu, yo vanda mabaku yina Nzambi sadisaka yandi mosi. Yandi yindulaka na mudindu mambu yina Yehowa salaka sambu na zina na yandi. Davidi yambulaka ve kutula dikebi na mambu yina Nzambi me salaka. (Nk. 143:5) Bonso yandi, kana beto mpi, beto ke yindula na mudindu Muntu Yina Salaka beto, mingi-mingi mambu yina yandi me salaka mpi yina yandi ke landa kusala sambu na beto, yo ta sadisa beto kana beto me kutana ti mumekamu.
Kukwela “Kaka na Mfumu”—Keti Yo Kele Kaka Mfunu?
Bantangu ya nkaka nge lenda vanda ti mawi bonso Davidi yina tubaka nde: “Mfumu, ndima mono kaka ntangu yai! Ntima na mono me suka mpenza. Kubumbana ve.” (Nk. 143:5-7, 10) Na bantangu ya mutindu yai, bikila Tata na nge ya zulu ntangu ya kumonisila nge luzolo na yandi sambu na nge. Nge lenda sala yo kana nge ke tanga Ndinga na yandi mpi ke yindulula na mambu yina nge ke tanga. Nge ta zaba bansiku na yandi, mpi nge ta zaba mutindu yandi sadisaka bansadi na yandi ya ntama. Kuwidikila yandi, ta sadisa nge na kutanina lukanu na nge ya kulemfukila yandi.
Bimvwama ya Kimpeve
it-2 1134
Ndikila
Na Mutindu ya Kifwani. Mambu ya luvunu mpi yina bantu ya mbi ke kusilaka bantu sambu na kubebisa lukumu na bo, bo me fwanisa yo ti ndikila ya nioka yina ke fwaka bantu. (Nk 58:3, 4) Sambu na bantu yina ke kusilaka bantu ya nkaka makambu, bo ke tuba nde “ndikila ya vipere ke vandaka na nsi ya bikobo na yo” (to: “na nima ya bikobo na bo”), bonso mate ya nioka yina bo ke bingaka vipere ke vandaka na nima ya kikobo mpi ya meno na yo yina ke vandaka na mashware ya zulu (Nk 140:3; Bar 3:13). Ludimi ya muntu, kana yandi me sadila yo ve mbote, yo lenda kusila muntu ya nkaka makambu, kutuba mambu ya mbi sambu na kupesa yandi mpasi, kulonga mambu ya luvunu to kutuba mambu ya nkaka sambu na kunatila yandi mpasi, yo kele “ya kufuluka ti ndikila ya ke fwaka.”—Yak 3:8.
3-9 FÉVRIER
BIMVWAMA YA NDINGA YA NZAMBI | BANKUNGA 144-146
“Kiese na Bantu Yina Yehowa Kele Nzambi na Bo!”
Bangiufula ya Batangi
2. Ngogo ya mbalula ya mpa me sadila ke wakana mbote ti baverse ya nkaka ya kapu yai. Ngogo “ebuna” ya bo me sadila na verse 12 ke monisa nde mambote yina verse 12 tii na 14 ke tubila ke tadila bantu ya mbote, disongidila bantu yina ke lomba nde bo ‘gulusa bo mpi bo katula bo’ na maboko ya bambeni (verse 11). Ngogo yai ya bo me sadila ke wakana mpi ti verse 15, kisika bo me vutukila ngogo “kiese” mbala zole, yo me wakana mbote ti verse 12. Yo yina na bisika yina zole kiese ke tadila bantu ya mutindu mosi, disongidila “bantu yina Yehowa kele Nzambi na bo!” Beto fwete vila mpi ve nde Kiebreo ya kisina vandaka ve ti bidimbu ya kupema, mu mbandu bidimbu ya ke songa kisina ya bangogo. Yo yina bambaludi fwete bakisa mbote ntendula ya bangogo ya kisina, kutadila mbote-mbote mutindu Kiebreo ke sadilaka bangogo ya nkunga, kutadila bangindu ya kele na ntwala mpi na nima ya baverse mpi baverse ya Biblia ya ke wakana ti yo.
3. Ngogo ya mbalula ya mpa me sadila ke wakana ti baverse ya nkaka yina ke monisa balusakumunu yina bansadi ya kwikama ya Nzambi ta baka. Mutindu bo me balula ngogo asher na mbalula yai ya mpa ke sala nde kapu yai ya mukanda ya Bankunga kumonisa kivuvu ya kitoko yina Davidi vandaka na yo nde ntangu Nzambi ta gulusa dikanda ya Izraele na maboko ya bambeni na bo, bansadi ya Nzambi ta vanda na kiese mpi ti bima mingi. (Levi 26:9, 10; Kul. 7:13; Nk. 128:1-6) Mu mbandu, Kulonga 28:4 ke tuba nde: “Bana na nge, mbuma ya ntoto na nge, bana ya bitwisi na nge, mpi bana ya bangombe ti ya mameme na nge ta baka lusakumunu.” Ya kieleka, na luyalu ya Salomo, mwana ya Davidi, dikanda ya Izraele vandaka kibeni na kiese mpi ti bima mingi. Luyalu ya Salomo monisaka mambu ya nene yina ta salama na luyalu ya Mesia.—1 Bant. 4:20, 21; Nk. 72:1-20.
Landa Kukumisa Kivuvu na Nge Ngolo
16 Kivuvu na beto ya luzingu ya mvula na mvula kele dikabu ya mfunu mingi yina Nzambi me pesaka beto. Beto ke vingila na kiese yonso luzingu ya kuluta kitoko yina beto ke ndima kibeni nde yo ta vanda. Kivuvu yina kele bonso longo sambu yo ke sadisaka beto na kukanga ntima na bampasi, na kukanga ntima ntangu bo ke niokula beto mpi na kuwa ve boma ya lufwa. Yo kele bonso mpu sambu yo ke taninaka mabanza na beto sambu beto sala ve mambu ya mbi kansi beto sala mambu ya mbote. Kivuvu yina Biblia ke pesaka beto ke sadisaka beto na kuzaba Nzambi mbote mpi yo ke monisaka beto nde Nzambi ke zolaka beto mingi kibeni. Beto ke bakaka mambote mingi kana beto ke landa kukumisa kivuvu na beto ngolo.
17 Ntumwa Polo siamisaka Bakristu ya Roma na ‘kuvanda na kiese sambu na kivuvu.’ (Bar. 12:12) Polo vandaka na kiese sambu yandi zabaka mbote nde kana yandi landa kukangama kaka na Yehowa, yandi ta baka luzingu ya mvula na mvula na zulu. Beto mpi lenda vanda na kiese sambu na kivuvu na beto sambu beto ke ndima kibeni nde Yehowa ta lungisa mambu yina yandi tubaka. Muyimbi-bankunga tubaka nde: “Kiese na muntu yina . . . kivuvu na yandi kele na Yehowa Nzambi na yandi, . . . Muntu yina ke vandaka ntangu yonso ya kwikama.”—Nk. 146:5, 6.
Zola ya Nki Mutindu Ke Nataka na Kiese?
19 Nsi-ntoto ya Satana me niokula bantu bamvula kiteso ya 6 000. Na bilumbu yai ya nsuka, ntoto me fuluka ti bantu yina ke kudizolaka, ke zolaka mbongo mpi biese. Bo ke salaka bikesa mingi sambu bampusa na bo kubaka kisika ya ntete na luzingu. Bantu ya mutindu yai lenda vanda ve ata fioti na kiese! Biblia ke tuba nde: “Kiese na muntu yina Nzambi ya Yakobi kele nsadisi na yandi, yina kivuvu na yandi kele na Yehowa Nzambi na yandi.”—Nkunga 146:5.
20 Bansadi ya Yehowa ke zolaka yandi kuluta bima yonso. Konso mvula, bantu mingi ke longukaka mambu ya Yehowa mpi ke kumaka kuzola yandi. Mambu yai ke monisa nde Kimfumu ya Nzambi ke yala mpi ntama ve yo ta natila bantu mambote na mutindu ya kuyituka! Ntangu beto ke salaka mambu yina Yehowa ke zolaka, yandi ke waka kiese mpi yo ke natilaka beto kiese. Bantu yina ke zolaka Yehowa ta vanda na kiese kimakulu! Disolo yina ke landa ta tubila bikalulu ya nkaka yina zola ya mbi ke butaka. Yo ta monisa mutindu bikalulu yango me swaswana ti bikalulu ya mbote ya bansadi ya Yehowa.
Bimvwama ya Kimpeve
Vanda ti Dibanza ya Nzambi Sambu na Luzingu
9 Inki beto lenda tuba na yina metala luzingu ya mbisi? Yo kele mpi kima mosi ya santu na meso ya Ngangi. Nzambi kepesaka nswa ya kufwa bambisi sambu na kuzwa madya mpi bilele to sambu na kutanina bantu na kigonsa. (Kuyantika 3:21; 9:3; Kubasika 21:28) Kansi, kunyokula bambisi na nku to kufwa bo sambu na kusakana kele mbi mpi yo kemonisa kukonda luzitu sambu na busantu ya luzingu.—Bingana 12:10.
10-16 FÉVRIER
BIMVWAMA YA NDINGA YA NZAMBI | BANKUNGA 147-150
Beto Kele ti Bikuma Mingi ya Kukumisa Yah
Sambu na Nki Beto Fwete “Kumisa Yah”?
5 Yehowa pesaka ve kikesa kaka na dikanda ya Izraele, kansi mpi na mosi mosi na kati na bo. Bubu yai, Yehowa ke sadisaka mpi konso muntu na kati na beto. Muyimbi-Bankunga sonikaka nde Nzambi “ke belulaka bantu yina kele na mawa; yandi ke sansaka bamputa na bo.” (Nkunga 147:3) Kana beto ke bela to ke niokwama na mabanza, beto fwete tula ntima nde Yehowa ke tudilaka beto dikebi. Yehowa kele ti mpusa ya ngolo ya kupesa beto kikesa mpi ya kusadisa beto. (Nkunga 34:18; Yezaya 57:15) Yandi ke pesaka beto mayele mpi ngolo ya kununga bampasi.—Yakobo 1:5.
6 Na nima muyimbi-bankunga talaka na zulu mpi tubaka nde Yehowa “ke tangaka ntalu ya bambwetete; yandi ke bingaka konso mbwetete na zina na yo.” (Nkunga 147:4) Muyimbi-Bankunga vandaka kumona bambwetete, kansi yandi lendaka ve kutanga yo. Bubu yai, bantu ya mayele ke tubaka nde galaksi na beto kele ti bamiliare ya bambwetete. Kansi na zulu bagalaksi kele bamiliare na bamiliare. Bantu ta kuka ve kutanga bambwetete, kansi Ngangi ke tangaka yo. Ya kieleka, yandi ke zabaka konso mbwetete mpi zina na yo. (1 Bakorinto 15:41) Nzambi ke zabaka kisika konso mbwetete kele, yandi ke zabaka nge mpi. Yandi ke zabaka kibeni kisika yina nge kele, mambu yina ke pesa nge mpasi mpi bima yina nge kele na yo mfunu!
Sambu na nki Beto Fwete “Kumisa Yah”?
7 Yehowa ke bakisaka bampasi na beto mpi yandi ke sadisaka beto na kununga yo. (Tanga Nkunga 147:5.) Nge lenda yindula nde mpasi na nge kele mingi mpi nge ta nunga yo ve. Nzambi ke zabaka bandilu na beto, “yandi ke yibukaka nde beto kele mfututu.” (Nkunga 103:14) Sambu beto kele bantu ya kukonda kukuka, beto lenda vutukilaka mbala na mbala bifu ya mutindu mosi mpi yo lenda lembisa beto. Beto ke waka mpasi kana beto me tuba mambu ya mbi, kana bampusa ya mbi me kwisilaka beto na mabanza to kana beto me wila muntu kimpala! Yehowa ke salaka ve bifu, ata mpidina yandi ke bakisaka mbote-mbote mawi na beto.—Yezaya 40:28.
Sambu na nki Beto Fwete “Kumisa Yah”?
18 Muyimbi-Bankunga zabaka nde Yehowa ponaka dikanda ya Izraele na kuvanda dikanda na yandi. Bantu ya Izraele mpamba vandaka ti “ndinga” mpi “bansiku” ya Nzambi. (Tanga Nkunga 147:19, 20.) Bubu yai, beto kele na kiese kibeni ya kubingama Bambangi ya Yehowa. Beto ke vandaka na kiese sambu beto me zaba yandi, sambu Ndinga na yandi ke twadisaka beto mpi sambu beto kele banduku na yandi. Bonso muntu yina sonikaka Nkunga 147, beto kele ti bikuma mingi ya ‘Kukumisa Yah!’ mpi kusadisa bantu na kukumisa yandi?
Bimvwama ya Kimpeve
Longuka Mambu Mingi ya Yehowa na Nzila ya Bima Yina Yandi Me Salaka
6 Yehowa ke vandaka ti kalandrie. Konso mvula, banda na nsuka ya février tii na kati-kati ya mai, bantu ya Izraele vandaka kumona mutindu bandeke yina bo ke bingaka mubila vandaka kupumbuka mpi kukwenda na ndambu ya nordi. Nzambi songaka bantu ya Izraele nde: “Mubila na zulu ke zabaka bansungi na yo.” (Yer. 8:7) Yehowa tulaka ntangu yina bandeke yina vandaka kukwenda na ndambu ya nkaka. Mutindu mosi mpi, yandi me tulaka ntangu yina yandi ta fwa bantu ya mbi. Bubu yai, ntangu beto ke monaka bandeke yina ke salaka ba voyage ke kwenda bisika ya nkaka, yo ke yibusaka beto na kundima nde Yehowa me ‘tulaka ntangu’ yina yandi ta fwa nsi-ntoto yai ya mbi.—Hab. 2:3.
17-23 FÉVRIER
BIMVWAMA YA NDINGA YA NZAMBI | BINGANA 1
Baleke—Beno Ta Widikila Banani?
Kima Mosi Ve Kukanga Nge Nzila ya Kubaka Lufutu
16 Leke, ziku nge lenda mona nde bibuti na nge ke bakisaka nge ve to nde bo kele makambu ngolo. Mambu ya mutindu yai lenda pesa nge makasi mpi yo lenda pusa nge na kudiyula kana nge fwete landa kusadila Yehowa. Kansi kana nge yambula kusadila Yehowa, nge ta bakisa nde ata muntu mosi ve na nsi-ntoto ke zolaka nge mingi kuluta bibuti mpi bampangi ya dibundu.
17 Yindula fioti, kana bibuti na nge ke sungika nge ve, nki mutindu nge ta zaba kana bo ke kudibanzaka sambu na nge? (Baebreo 12:8) Ya kieleka, bo kele ve bantu ya kukuka, yo yina mutindu na bo ya kusungika nge lenda pesa nge mpasi. Kansi tula dikebi na bandongisila na bo kansi ve na mutindu bo ke pesa yo. Vanda pima mpi kuwa ve makasi. Biblia ke tuba nde: “Muntu ya kele ti nzayilu ke yalaka bangogo na yandi, mpi muntu ya luswasukusu ta bikala pima.” (Bingana 17:27) Baka lukanu ya kukuma muntu ya kuyela, ndimaka bandongisila mpi bakila yo malongi ata bo me pesa yo ve na mutindu ya mbote. (Bingana 1:8) Kuvila ve nde kuvanda ti bibuti yina ke zolaka Yehowa kele lusakumunu ya nene. Bo ke zolaka kusadisa nge sambu nge baka luzingu ya mvula na mvula.
Beto Tanina Zina na Beto ya Bakristu
11 Sosa na kusepedisa Nzambi, kansi bantu ve. Yo kele mbi ve ata fyoti na kumonisa nde beto kele bantu ya kimvuka mosi. Konso muntu kevandaka na mfunu ya banduku, mpi kana bo mendima beto, yo kepesaka beto kyese. Na ntangu bo kele bangunza, ata na ntangu muntu me kuma mbuta, bupusi ya banduku lenda vanda ngolo, mpi yo lenda pesa yandi mpusa ya ngolo ya kusala bonso bantu ya nkaka to kusepedisa bo. Kansi, banduku ti bantu ya nkaka ya beto ke yela na bo ke kudibanzaka ve ntangu yonso sambu na mambote na beto. Bantangu ya nkaka bo ke zolaka kusala kinduku ti beto kaka sambu beto vukana na mambu na bo ya mbi. (Bingana 1:11-19) Mbala mingi, ntangu Mukristu mosi me bwa na bupusi ya banduku ya mbi, yandi ke sosaka kubumba zina na yandi ya Mukristu. (Nkunga 26:4) Ntumwa Polo kukebisaka Bakristu nde: “Beno landa bikalulu ya bantu ya ntangu yai ve.” (Roma 12:2) Yehowa ke pesaka beto kikesa ya beto ke vandaka na yo mfunu sambu na kunwana ti mpusa ya kulanda bupusi ya banduku.—Baebreo 13:6.
12 Ntangu bupusi ya banduku ke sosa kubebisa zina na beto ya Bakristu, beto fwete yibuka nde kwikama na beto na Yehowa kele mfunu mingi kuluta bangindu ya bantu to kusala mutindu bantu yonso ke na kusala. Bangogo ya kele na Kubasika 23:2 ke pesa beto munsiku ya lenda sadisa beto na kuditanina: “Kulanda ve bantu mingi yina ke zola kusala mambu ya mbi.” Ntangu bantu mingi ya Izraele tulaka badute na ngolo yina Yehowa kele na yo ya kulungisa balusilu na Yandi, Kalebi buyaka na ngolo yonso na kulanda muvuma na bo. Yandi vandaka kundima mpenza nde balusilu ya Nzambi mefwana na kutudila ntima, mpi Nzambi sakumunaka yandi mingi sambu na pozisio na yandi. (Kutanga 13:30; Yozue 14:6-11) Keti nge mpi ke na luzolo ya kukonda kulanda bupusi ya bangindu ya bantu yonso sambu na kutanina kinduku na nge ti Nzambi?
Bimvwama ya Kimpeve
Mayele ya Kieleka Ke Tuba na Ndinga ya Ngolo
6 Bantu mingi ke kangaka makutu sambu na kuwa ve mayele ya kieleka ntangu yo ke tuba na “ndinga ya ngolo na bala-bala.” Biblia ke monisa nde bimvuka tatu ya bantu ke buyaka mayele: “bantu yina me konda mayele,” “bantu yina ke sekaka bantu” mpi “bazoba.” (Tanga Bingana 1:22-25.) Beto tadila mbote-mbote mambu yina ke salaka nde bantu yina kubuya mayele yina ke katukaka na Nzambi. Beto tadila mpi mambu yina beto lenda sala sambu beto kuma ve bonso bo.
11 Kimvuka ya tatu ya bantu yina ke buyaka mayele ya ke katukaka na Nzambi kele “bazoba.” Bo kele bazoba sambu bo ke buyaka kuzitisa bansiku ya Nzambi na yina me tala bikalulu ya mbote. Bo ke salaka mambu yina bo mosi ke mona nde yo kele mbote. (Bing. 12:15) Bantu ya mutindu yina ke buyaka Yehowa, Munkwa ya mayele. (Nk. 53:1) Ntangu beto ke kutanaka ti bo na kisalu ya kulonga, mbala mingi bo ke vwezaka beto sambu beto ke zitisaka bansiku ya Biblia. Kansi bo ta kuka ve kusadisa beto na kuvanda ti luzingu ya mbote. Biblia ke tuba nde: “Zoba lenda baka ve mayele ya kieleka; yandi kele ve na kima ya kutuba na kielo ya mbanza.” (Bing. 24:7) Zoba lenda pesa ve muntu ndongisila ya mbote. Yo yina Yehowa ke songa beto nde beto fwete “vanda ntama ti zoba.”—Bing. 14:7.
24 FÉVRIER–2 MARS
BIMVWAMA YA NDINGA YA NZAMBI | BINGANA 2
Sambu na Nki Nge Fwete Sepela ti Kulonguka na Nge Mosi?
“Landa Kutambula na Kieleka”
16 Bantu yonso ve ke zolaka kutanga mpi kulonguka. Kansi Yehowa ke lomba beto na ‘kulanda kusosa’ sambu na kubakisa mbote kieleka ya Biblia. (Tanga Bingana 2:4-6.) Kana beto ke landa kusala bikesa yina, yo ta natila beto mambote. Ntangu mpangi Corey ke tangaka Biblia, yandi ke tulaka dikebi na konso verse. Yandi ke tuba nde: “Mono ke tangaka konso noti na nsi ya lutiti, mono ke talaka bareferansi mpi mono ke salaka bansosa ya nkaka . . . Metode yina ke sadisaka mono na kulonguka mambu mingi.” Beto lenda sadila metode yina to ya nkaka. Kansi beto ta monisa nde beto ke bakaka kieleka na valere kana beto ke sadila ntangu na beto mpi ke sala bikesa ya kulonguka yo.—Nk. 1:1-3.
Mayele ya Kieleka Ke Tuba na Ndinga ya Ngolo
3 Mayele ke tendula makuki ya kusadila mambu ya nge me zaba sambu na kubaka balukanu ya mbote. Kansi mayele ya kieleka ke tendula mambu mingi ya nkaka. Biblia ke tuba nde: “Boma ya Yehowa kele luyantiku ya mayele, mpi nzayilu ya Muntu ya Kuluta Santu kele mayele ya kubakisa mambu.” (Bing. 9:10) Kana beto kele ti lukanu ya mfunu ya kubaka, beto fwete sosa ntete kuzaba mabanza ya Yehowa disongidila “nzayilu ya Muntu ya Kuluta Santu.” Beto ta zaba mabanza ya Yehowa kana beto ke longuka Biblia mpi mikanda ya ke tendulaka Biblia. Kana beto sala mpidina, beto ta monisa nde beto kele ti mayele ya kieleka.—Bing. 2:5-7.
4 Yehowa mpamba muntu lenda pesa beto mayele ya kieleka. (Bar. 16:27) Sambu na nki beto ke tuba nde mayele ke katukaka na Yehowa? Kikuma ya ntete kele nde Yehowa muntu salaka bima yonso mpi yandi me zaba mambu yonso ya me tala bima yina yandi me salaka. (Nk. 104:24) Kikuma ya zole kele nde konso kima yina Yehowa ke salaka ke monisaka nde yandi kele mayele. (Bar. 11:33) Kikuma ya tatu kele nde ntangu yonso bandongisila ya mayele yina Yehowa ke pesaka ke natilaka bantu yina ke sadilaka yo mambote. (Bing. 2:10-12) Kana beto ke zola kukuma kibeni mayele, beto fwete ndima mambu yina ya kieleka mpi kusadila yo ntangu beto ke baka balukanu mpi na mambu yonso ya beto ke sala na luzingu.
Baleke, Beno Kumisa Lukwikilu na Beno Ngolo
2 Bubu yai, bantu mingi ke kwikilaka ve nde Nzambi gangaka beto. Kana nge kele toko yina ke sadilaka Yehowa to nge ke longuka mambu na yandi, bantangu ya nkaka nge lenda kudiyula nde, ‘Inki mutindu mono lenda ndimisa bantu nde Yehowa kele Ngangi na beto?’ Biblia ke sadisa beto na kutula dikebi na mambu yina beto ke wa to ke tanga mpi kuyindula yo. Ndinga ya Nzambi ke tuba nde: “Mayele ya kuyindula ta landa kukeba nge.” Inki mutindu? Yo ta sadisa nge na kubuya bangindu ya luvunu mpi kukumisa lukwikilu na nge na Yehowa ngolo.—Tanga Bingana 2:10-12.
3 Sambu na kuvanda ti lukwikilu ya ngolo na Yehowa, beto fwete zaba yandi mbote. (1 Timoteo 2:4) Yo yina, ntangu nge ke tanga Biblia mpi mikanda na beto, yo kele mfunu kibeni na kupema mpi kuyindulula mambu yina nge me tanga. Sosa kubakisa yo. (Matayo 13:23) Kulonguka mutindu yai ta sadisa nge na kubakisa mbote-mbote nde Yehowa kele Ngangi na beto mpi Biblia kele mukanda na yandi. (Baebreo 11:1) Beto tala ntangu yai mutindu ya kusala yo.
Bimvwama ya Kimpeve
Bikala Pene-Pene na Yehowa
10 Inki mutindu nge me kumaka nduku ya Yehowa? Kulonguka na nge ya Biblia me sadisaka nge na kuzaba Yehowa mbote-mbote mpi na kukumisa kinduku na nge ti yandi ngolo. Kinduku yina kele bonso tiya yina nge fwete sala yonso sambu yo landa kupela. Kaka mutindu yo ke lombaka nde beto yika bankuni sambu tiya landa kupela, nge fwete landa kulonguka mambu ya Yehowa sambu na kulanda kukumisa kinduku na nge ti yandi ngolo.—Bingana 2:1-5.