Ntangu Adami ti Eva basikaka na kilanga ya Edeni, bo butaka bana mingi. Mwana na bo ya ntete, Kaini, kumaka muntu ya ke salaka bilanga, mpi mwana na bo ya zole, Abele, kumaka ngungudi.

Kilumbu mosi, Kaini ti Abele pesaka bimenga na Yehowa. Keti nge me zaba kana kimenga kele inki? Yo kele makabu ya sipesiali. Yehowa ndimaka dikabu ya Abele, kansi yandi ndimaka ve dikabu ya Kaini. Yo pesaka Kaini makasi mingi. Yehowa kebisaka Kaini nde makasi na yandi lenda nata yandi na kusala kima ya mbi. Kansi Kaini waka ve.

Olie ya kuwa, Kaini songaka Abele nde: ‘Beto kwenda na bilanga.’ Ntangu bo vandaka bo zole na bilanga, Kaini bulaka mpangi na yandi mpi fwaka yandi. Yehowa salaka nki? Yehowa pesaka Kaini ndola; yandi kulaka yandi ntama ti dibuta na yandi. Yandi pesaka ve Kaini nzila ata fioti ya kuvutuka.

Keti beto lenda baka dilongi na diambu yai? Beto lenda wa makasi kana mambu ke salama ve mutindu beto ke yindula nde yo fwete salama. Kana beto wa nde makasi ke kuma ngolo na kati na beto—to kana bantu ya nkaka kukebisa beto sambu bo me mona makasi na beto—beto fwete soba mpi kuyala mawi na beto nswalu na ntwala nde yo kuma kuyala beto.

Sambu Abele vandaka kuzola Yehowa mpi salaka mambu ya mbote, Yehowa ta yibukaka yandi ntangu yonso. Nzambi ta vutula Abele na luzingu ntangu yandi ta kumisa ntoto paladisu.

Na nima, bantu kumaka mingi na ntoto. Bamingi vandaka bantu ya mbi. Ata bawanzio ya nkaka ya zulu kumaka bawanzio ya mbi. Bo bikaka bisika na bo ya kuzinga na zulu mpi bo kulumukaka na ntoto. Keti nge me zaba sambu na nki bo salaka yo? Sambu bo baka nitu ya kimuntu mpi bo kwela bankento.

Bawanzio ti bankento yina butaka bana. Ntangu bana yango yelaka, bo kumaka ngolo mpi bo vandaka kuniokula bantu. Bo vandaka kupesa bantu mpasi. Yehowa lendaka ve kubika nde mambu yina landa kusalama. Yo yina yandi bakaka lukanu ya kufwa bantu ya mbi na mvula ya ngolo.

Kansi vandaka ti muntu mosi ya kuswaswana. Yandi vandaka kuzola Yehowa. Zina na yandi Noa. Yandi vandaka ti nkento mpi bana tatu ya babakala, Semi, Kami, ti Yafeti; konso muntu vandaka ti nkento na yandi. Yehowa songaka Noa na kutunga maswa ya nene sambu yandi ti dibuta na yandi kuguluka na Mvula ya Ngolo. Maswa kele kesi ya nene yina lenda tambula na zulu ya masa. Yehowa songaka mpi Noa na kukotisa bambisi na maswa sambu bo mpi kuguluka.

Noa yantikaka kutunga maswa kukonda kusukinina. Noa ti dibuta na yandi bakaka bamvula kiteso ya 50 sambu na kutunga maswa yina. Bo tungaka maswa kaka mutindu Yehowa songaka bo na kusala. Na ntangu yina, Noa vandaka kukebisa bantu sambu na Mvula ya Ngolo. Kansi, ata muntu mosi ve waka yandi.

Nsuka-nsuka, ntangu ya kukota na maswa lungaka. Beto tala mambu yina salamaka na nima.