Na mbanza Ninive ya Asiria, bantu vandaka bantu ya mbi. Yehowa songaka profete Yonasi na kukwenda na Ninive mpi na kukebisa bo nde bo fwete soba. Kansi Yonasi tinaka na simu ya nkaka. Yandi kotaka na maswa ya Tarsisi mpi tinaka.

Ntangu yandi vandaka na maswa na nzadi-mungwa, mupepe ya ngolo bulaka, mpi bantu ya maswa vandaka na boma mingi. Bo sambaka banzambi na bo mpi bo yulaka nde: ‘Sambu na nki mambu yai ke salama?’ Nsuka-nsuka, Yonasi songaka bo nde: ‘Foti kele ya mono. Mono ke tina mambu yina Yehowa songaka mono na kusala. Beno losa mu na masa, ebuna mupepe ta mana.’ Bantu ya maswa vandaka kuzola ve kulosa yandi na masa, kansi yandi dindamanaka. Ntangu bo losaka yandi na masa, mupepe manaka.

Yonasi yindulaka nde yandi ta fwa. Ntangu yandi vandaka kudinda na kati ya nzadi-mungwa, yandi sambaka Yehowa. Ebuna Yehowa tindaka mbisi ya masa ya nene. Yo minaka Yonasi, kansi yo fwaka yandi ve. Na divumu ya mbisi, yandi sambaka nde: ‘Mono ke sila na kulemfukilaka nge ntangu yonso.’ Yehowa taninaka Yonasi na divumu ya mbisi bilumbu tatu mpi na nima mbisi yina lukaka Yonasi na ntoto ya kuyuma.

Sambu Yehowa gulusaka Yonasi, keti yo ke tendula nde yo lombaka ve nde yandi kwenda na Ninive? Ve. Yehowa songaka yandi diaka na kukwenda kuna. Na mbala yai, Yonasi lemfukaka. Yandi kwendaka kuna mpi songaka bantu yina ya mbi nde: ‘Na nima ya bilumbu 40, Ninive ta fwa.’ Ebuna diambu mosi ya kuyituka salamaka—bantu ya Ninive waka mpi bo sobaka. Ntotila ya Ninive songaka bantu na yandi nde: ‘Beno binga Nzambi, mpi beno balula ntima. Mbala ya nkaka yandi ta fwa beto ve.’ Ntangu Yehowa monaka nde bantu me balula ntima, yandi fwaka ve Ninive.

Yonasi waka makasi sambu Nzambi fwaka ve mbanza yina. Yindula fioti: Yehowa monisilaka Yonasi ntima-nda mpi mawa, kansi Yonasi wilaka ve bantu ya Ninive mawa. Yandi vandaka na nganda ya mbanza na nsi ya mwa-nti ya bankalu ti makasi. Na nima, mwa-nti yina fwaka, mpi Yonasi waka makasi. Yehowa songaka yandi nde: ‘Nge ke kudiyangisa mingi sambu na mwa-nti yai kansi sambu na bantu ya Ninive ve. Mu me wila bo mawa, mpi bo me guluka.’ Inki kele ngindu ya mfunu? Bantu ya Ninive vandaka mfunu mingi kuluta konso nti.

Kimfumu ya Asiria botulaka kimfumu ya makanda kumi ya Izraele. Ntangu yai, Senakeribi, ntotila ya Asiria, ke zola kubotula kimfumu ya makanda zole ya Yuda. Yandi yantikaka kubaka bambanza ya Yuda mosi-mosi. Kansi mbanza yina bo vandaka kuzola mingi kele Yeruzalemi. Senakeribi zabaka ve nde Yehowa vandaka kutanina Yeruzalemi.

Ezekiasi, ntotila ya Yuda, futaka Senakeribi mbongo mingi sambu yandi bikisa Yeruzalemi. Ata Senakeribi bakaka mbongo yina, yandi tindaka basoda na yandi ya ngolo na kunwanisa Yeruzalemi. Bantu ya mbanza yina vandaka na boma mingi sambu bantu ya Asiria vandaka kukuma pene-pene. Ebuna Ezekiasi songaka bo nde: ‘Beno wa ve boma. Bantu ya Asiria kele ngolo, kansi Yehowa ta kumisa beto ngolo mingi kuluta bo.’

Senakeribi tindaka kinati-nsangu na yandi, Rabshake, na Yeruzalemi sambu na kuseka bantu. Rabshake telamaka na nganda ya mbanza mpi tubaka na ndinga ya ngolo nde: ‘Yehowa lenda sadisa beno ve. Beno bika ve Ezekiasi kukusa beno. Kele ve ti nzambi yina lenda tanina beno na maboko na beto.’

Ezekiasi yulaka Yehowa nki yandi fwete sala. Yehowa vutulaka nde: ‘Kuwa ve boma ya mambu yina Rabshake ke tuba. Senakeribi ta baka ve Yeruzalemi.’ Na nima, Ezekiasi bakaka ndambu ya mikanda yina katukaka na Senakeribi. Mikanda yango vandaka kutuba nde: ‘Beno kudipesa. Yehowa ta gulusa beno ve.’ Ezekiasi sambaka nde: ‘Pardo, Yehowa, gulusa beto, sambu bantu yonso ta zaba nde nge kele Nzambi mosi kaka ya kieleka.’ Yehowa songaka yandi nde: ‘Ntotila ya Asiria ta kwisa ve na Yeruzalemi. Mono ta tanina mbanza na mono.’

Senakeribi vandaka kuyindula nde ntama ve Yeruzalemi ta kuma ya yandi. Kansi na mpimpa mosi, Yehowa tindaka wanzio mosi na kisika yina basoda vandaka na nganda ya mbanza. Wanzio fwaka basoda 185 000! Basoda ya ngolo ya ntotila Senakeribi fwaka. Yandi nungaka ve, yo yina yandi vutukaka na nzo sambu kima ya nkaka ya kusala vandaka ve. Yehowa taninaka Ezekiasi mpi Yeruzalemi, mutindu yandi silaka. Kana nge vandaka kuna na Yeruzalemi, keti nge zolaka kutudila Yehowa ntima?