Kilumbu mosi na mpimpa, ntotila Nebukadenezare lalaka ndosi mosi ya kuyituka. Yo yangisaka yandi mingi yo yina yandi lalaka ve. Yandi bingaka banganga-nkisi na yandi mpi songaka bo nde: ‘Beno tendula ndosi ya mono me lala.’ Bo tubaka nde: ‘O ntotila, tela beto ndosi yango.’ Kansi, Nebukadenezare songaka bo nde: ‘Ve! Beno songa mono ndosi yina, kana ve mu ta fwa beno.’ Bo tubaka diaka nde: ‘Tela beto ndosi ya nge me lala, ebuna beto ta tendula yo.’ Yandi tubaka nde: ‘Beno ke sosa kukusa mono. Beno songa mono ndosi yina mono lalaka!’ Bo songaka ntotila nde: ‘Ata muntu mosi ve lenda sala yo. Diambu ya nge ke lomba lenda salama ve.’

Nebukadenezare waka makasi mingi yo yina yandi pesaka nsiku nde bo fwa bantu yonso ya mayele ya insi na yandi. Daniele, Shadraki, Meshaki mpi Abedi-Nego vandaka na kati ya bantu yina. Daniele songaka ntotila na kubikila yandi mwa ntangu. Ebuna yandi ti banduku na yandi sambaka Yehowa mpi bo lombaka yandi na kusadisa bo. Yehowa salaka nki?

Na mbona-meso, Yehowa monisaka Daniele ndosi ya Nebukadenezare mpi songaka yandi ntendula na yo. Kilumbu yina landaka, Daniele kwendaka kusonga nsadi ya ntotila nde: ‘Kufwa ve ata muntu mosi ya mayele. Mu lenda tendula ndosi ya ntotila.’ Nsadi yina nataka Daniele na Nebukadenezare. Daniele songaka ntotila nde: ‘Nzambi me monisa nge mambu yina ta salama na bilumbu ke kwisa. Ndosi na nge yo yai: Nge monaka kiteki ya nene ti ntu ya wolo, ntulu na yo mpi maboko na yo vandaka ya arza, divumu na yo mpi bambendi na yo vandaka ya kwivre, makulu na yo vandaka ya bibende, mpi bitambi na yo vandaka na bibende ya kuvukisa ti ntoto ya tuma. Na nima, ditadi mosi katukaka na ngumba, mpi yo tutaka kiteki na bitambi. Kiteki panzanaka, yo kumaka mfututu mpi yo pumbukaka na mupepe. Ditadi yina kumaka ngumba mosi ya nene, mpi yo fulukaka na ntoto.’

Ebuna Daniele tubaka nde: ‘Yai ntendula ya ndosi na nge: Kimfumu na nge kele ntu yina ya wolo. Arza kele kimfumu yina ta basika na nima na nge. Na nima kimfumu mosi yina kele bonso kwivre ta kwisa, mpi yo ta yala ntoto ya mvimba. Kimfumu yina ta landa ta vanda ngolo bonso kibende. Nsuka-nsuka, kimfumu ya kukabwana ta basika; bitini na yo ya nkaka ta vanda ngolo bonso kibende mpi ya nkaka ta vanda pete bonso ntoto ya tuma. Ditadi yina kumaka ngumba kele Kimfumu ya Nzambi. Yo ta fwa bimfumu yai yonso mpi yo ta yala mvula na mvula.’

Nebukadenezare fukamaka luse na ntoto na ntwala ya Daniele. Yandi tubaka nde: ‘Nzambi na nge muntu me zabisa nge ndosi yai. Kele ve ti Nzambi ya nkaka bonso yandi.’ Na kisika ya kufwa Daniele, Nebukadenezare tulaka yandi mfumu ya bantu yonso ya mayele mpi mfumu ya provense ya Babilone. Keti nge me mona mutindu Yehowa pesaka mvutu na kisambu ya Daniele?

Ntangu fioti na nima ya ntangu yina ntotila Nebukadenezare lalaka ndosi ya kiteki ya nene, yandi salaka kiteki mosi ya nene ya wolo. Yandi tedimisaka yo na nseke ya Dura mpi yandi bingaka bantu ya nene ya insi na yandi, tanga mpi Shadraki, Meshaki, ti Abedi-Nego, na kuvukana na ntwala ya kiteki yina. Ntotila tubaka nde: ‘Ntangu beno ta wa makelele ya bampungi, ya bakidare, mpi ya bakornemizi, beno fukama na ntwala ya kiteki! Konso muntu yina ta fukama ve, bo ta losa yandi na fulu ya tiya.’ Keti Baebreo tatu yina ta fukama na ntwala ya kiteki yina, to keti bo ta sambila kaka Yehowa?

Na nima, ntotila tubaka nde bo bula miziki. Bantu yonso fukamaka mpi sambilaka kiteki, katula kaka Shadraki, Meshaki, mpi Abedi-Nego. Bantu ya nkaka monaka yo mpi bo songaka ntotila nde: ‘Baebreo tatu yina buyaka kusambila kiteki na nge.’ Nebukadenezare bingaka bo mpi tubaka nde: ‘Mono ke pesa beno okazio ya nkaka ya kusambila kiteki. Kana beno sambila yo ve, mono ta losa beno na fulu ya tiya. Kele ve ti Nzambi yina ta kuka kugulusa beno na maboko na mono.’ Bo vutulaka nde: ‘Beto kele ve ti mfunu ya okazio ya nkaka. Nzambi na beto lenda gulusa beto. Kansi ata yandi gulusa beto ve, O ntotila, beto ta sambila ve kiteki yina.’

Nebukadenezare waka makasi mingi. Yandi songaka bantu na yandi nde: ‘Beno tula tiya na fulu mbala nsambwadi kuluta mutindu bo ke tulaka ntete!’ Na nima, yandi songaka basoda na yandi nde: ‘Beno kanga bo bansinga, mpi beno losa bo na fulu ya tiya!’ Fulu vandaka tiya mingi kibeni yo yina ntangu basoda kumaka pene-pene na yo, bo fwaka na mbala mosi. Baebreo tatu yina bwaka na tiya. Kansi ntangu Nebukadenezare talaka na kati, yandi monaka bantu iya ke tambula na fulu ya tiya kansi bantu tatu ve. Yandi waka boma mpi yandi yulaka bantu na yandi ya lukumu nde: ‘Keti beto losaka ve bantu tatu na tiya? Mono ke mona bantu iya, mpi muntu mosi ke monana bonso wanzio!’

Nebukadenezare pusanaka pene-pene ya fulu mpi tubaka na ndinga ya ngolo nde: ‘Beno basika, beno bansadi ya Nzambi ya Kuluta Zulu!’ Bantu yonso yitukaka na kumona Shadraki, Meshaki, mpi Abedi-Nego ke basika na tiya mpi tiya me sala bo ve ata kima mosi. Nitu na bo, nsuki na bo, mpi bilele na bo piaka ve tiya, mpi nkutu bo vandaka ve kubasika nsudi ya tiya.

Nebukadenezare tubaka nde: ‘Nzambi ya Shadraki, ya Meshaki, mpi ya Abedi-Nego kele nene. Yandi tindaka wanzio na yandi mpi gulusaka bo. Kele ve ti nzambi ya nkaka bonso Nzambi na bo.’

Bonso Baebreo tatu yai, keti nge me bakaka lukanu ya kubikala ya kwikama na Yehowa ata nge kutana ti konso diambu yina?