Kusadisa Bantu na Nsi-Ntoto na Kutanga mpi Kusonika

Agostinho ke vandaka na Brésil. Yandi ke tuba nde: “Mono yelaka na ferme mpi beto vandaka kibeni bansukami. Yo lombaka nde mono zenga nzo-nkanda sambu mono banda kusala mpi mono sadisa dibuta na beto.” Yandi longukaka kutanga mpi kusonika ntangu yandi lungisaka bamvula 30. Yandi ke tuba nde: “Kuzaba kutanga mpi kusonika me sadisaka mono na kuditudila ntima.”

Kana Agostinho zabaka kutanga, yo kele sambu Bambangi ya Yehowa sadisaka yandi. Banda bamvula kuluta 70, Bambangi ya Yehowa me longaka bantu kuluta 250 000 na kutanga mpi na kusonika. Kansi sambu na nki bo ke yidikaka mambu sambu na kulonga bantu na kutanga mpi na kusonika? Inki mambote malongi yango me natilaka bantu yina?

Kana Muntu Me Zaba Ve Kutanga mpi Kusonika, Yandi Lenda Longuka Ve

Na 1935, Bambangi ya Yehowa vandaka kulonga nsangu ya mbote na bansi 115. Sambu bamisionere kusimba ntima ya bantu yina vandaka ve kutuba bandinga na bo, bo vandaka kutudila bo badiskure yina bo me kotisaka ndinga ya bo balulaka na bandinga mingi sambu bo landa yo. Bantangu ya nkaka, bamisionere yango vandaka kupesa bantu mikanda yina bo me balulaka na bandinga na bo. Bantu mingi vandaka kusepela ti mambu ya kele na Biblia, kansi mutindu bantu mingi vandaka ve kuzaba kutanga mpi kusonika, mpila ya kulonguka mambu mingi mutindu bo vandaka kuzola vandaka ve.

Mutindu bantu yina lendaka ve kukuka kutanga Biblia bo mosi, yo vandaka mpi mpasi sambu bo zaba mutindu bo lenda sadila bansiku ya Biblia na luzingu na bo. (Yozue 1:8; Nkunga 1:2, 3) Yo vandaka mpi mpasi sambu bo lungisa mikumba na bo ya Bakristu. Mu mbandu, yo vandaka mpasi kibeni sambu bibuti yina zabaka ve kutanga kulonga bana na bo malongi ya Biblia. (Kulonga 6:6, 7) Ntangu bantu yai vandaka kukuma Bambangi ya Yehowa, bo vandaka kukuka ve kusadila Biblia sambu na kulonga bantu ya nkaka.

Lukanu ya Kulonga Bantu Kutanga mpi Kusonika

Na bamvu 1940 mpi 1950, Nathan Knorr ti Milton Henschel kwendaka na bansi mingi sambu na kuyidika kisalu ya kulonga bantu nsangu ya mbote. Bampangi yai zole vandaka na kati ya bampangi yina vandaka kutwadisa kisalu ya Bambangi ya Yehowa na ntangu yina. Na bansi yina bantu vandaka ve kuzaba kutanga mpi kusonika, bampangi yai siamisaka Babetele na kuyidika mambu sambu bo yantika kulonga bantu mutindu ya kutanga mpi ya kusonika na mabundu.

Babetele tindilaka mabundu mikanda sambu na kusonga bo mutindu mambu fwete salama na ntangu bo ta pesaka bantu malongi yina. Na bansi ya nkaka, bamfumu ya luyalu salaka mikanda mpi pesaka bametode yina lenda sadisa bantu na kulonguka kutanga mpi kusonika. Na bansi yango, Bambangi ya Yehowa sadilaka mikanda yina sambu na kulonga bantu. Mu mbandu na Brésil, Betele tindilaka mabundu bisadilu mpi mikanda yina luyalu ya insi yai pesaka bo. Kansi na bansi ya nkaka, Bambangi ya Yehowa bantu vandaka kubasisa bametode na bo mosi sambu na kulonga bantu mutindu ya kutanga mpi ya kusonika.

Bantu yonso lendaka kukwenda kulanda malongi yina: babakala, bankento, bana mpi bambuta. Lukanu na yo vandaka ya kulonga bantu mutindu bo lenda tanga bandinga na bo ya bwala. Sambu na kulungisa lukanu yina, bantangu ya nkaka yo vandaka kulomba nde dibundu kuyidika mambu sambu bantu kulonguka kutanga mpi kusonika na bandinga mingi.

Malongi Yina Ke Sadisa Bantu

Inki mambote bantu yina me landaka malongi yina me bakaka? Mpangi-nkento mosi ke tuba nde: “Ntangu yai, mono lenda bakisa mambu yina Biblia ke tuba, mpi mambu yina yo ke tuba ke simba kibeni ntima na mono. Kuzaba kutanga ke sadisaka mono na kusolula ti bantu ya nkaka kukonda kuwa boma, mpi mono me longaka bantu mingi nsangu yina kele na Biblia.”

Malongi yina me sadisaka bantu mingi na kubakisa mbote mambu yina kele na Biblia. Katula yo, yo me sadisaka bo mpi na mambu ya nkaka. Yai kele mambu yina Isaac, Mbangi mosi ya Yehowa ya ke vandaka na Burundi tubaka: “Kulonguka kutanga mpi kusonika me sadisaka mono na mambu mingi katula kuzaba mambu mingi yina Biblia ke tubaka. Yo me sadisaka mono na kulonguka mambu ya me tala kutunga banzo. Kutunga banzo me kumaka kisalu na mono mpi bubu yai, mono ke twadisaka bisalu ya nene ya kutunga.”

Jesusa kele mpangi-nkento mosi ya ke vandaka na Pérou. Yandi longukaka kutanga mpi kusonika ntangu yandi kumaka ti bamvula 49. Yandi ke tuba nde: “Sambu na kulungisa bampusa ya dibuta na mono, yo ke vandaka mfunu nde mono tanga ntalu yina bo me tula bima na zandu. Na ntwala, yo vandilaka mono mpasi. Kansi awa, na nsadisa ya malongi yina, mono me kumaka kuditudila ntima ntangu mono ke kwendaka kusumba bima.”

Bamvula mingi me luta, bamfumu ya luyalu na bansi mingi me sikisaka Bambangi ya Yehowa mutindu bo ke pesaka maboko na kisalu ya kulonga bantu kutanga mpi kusonika. Bubu yai mpi, Bambangi ya Yehowa ke longaka bantu mutindu ya kutanga mpi ya kusonika na nsadisa ya bametode mpi ya bisadilu yina bo me yidikaka diaka mbote mutindu bo me zabaka mbote mutindu ya kusala kisalu yai. Bo me salaka mpi bo me basisaka tumikanda kiteso ya bamilio 224 na bandinga 720. Yo ke sadisaka bantu na kulonguka kutanga mpi kusonika to mpi yo ke sadisaka bantu yina me longukaka ve mingi.a