Bansoba na Bunkufi
Na nsungi ya bamvula, Nzozulu ya Nkengi me sobaka mutindu na beto ya kubakisa mambu mingi ya mbikudulu ya Ezekiele. Mpi mukanda yai, Yehowa Me Vutula Lusambu ya Bunkete!, kele diaka ti bansoba ya nkaka. Tala kana nge lenda pesa mvutu na bangiufula yai.
Baluse iya ya bigangwa ya moyo ke monisa nki?
Mutindu beto vandaka kubakisa ntete: Konso luse na kati ya baluse iya ya bigangwa ya moyo to basherube ke monisa kikalulu mosi na kati ya bikalulu ya nene iya ya Yehowa.
Nsoba: Ata konso luse na kati ya baluse iya ya bigangwa yai ya moyo ke monisa kikalulu mosi na kati ya bikalulu ya nene iya ya Yehowa, baluse yonso iya ke monisa bikalulu yonso ya Yehowa. Diaka, baluse yai iya ke longa beto mambu mingi na yina me tala ngolo mpi nkembo ya Yehowa.
Kikuma ya nsoba: Ndinga ya Nzambi ke sadilaka mbala mingi ntalu iya sambu na kumonisa kima yina kele kibeni ya kukuka. Yo yina, kana baluse yina iya me vukana, yo ke vandaka kaka ve bikalulu yai iya ya kuyituka—yo ke vandaka kisina ya bikalulu yonso ya kuyituka ya Yehowa. Diaka, konso luse kele ya kigangwa yina ke monisaka bunene mpi ngolo. Ata mpidina, bigangwa yonso iya ya ngolo yina ke monisa bima ya Nzambi me salaka kele na nsi ya kiti ya kimfumu ya Yehowa. Mambu yai ke monisa nde Yehowa kele Mfumu ya Kuluta Nene.
Bakala yina vandaka ti kima yina sekretere ke tulaka tinta kele nani?
Mutindu beto vandaka kubakisa ntete: Bakala yina kele ti kima ya kutudila tinta ke monisa Bakristu ya bo me tulaka mafuta yina me bikalaka. Na nzila ya kisalu ya kusamuna mpi ya kukumisa bantu balongoki, bubu yai Bakristu ya bo me tulaka mafuta ke tulaka kidimbu ya kifwani na bambunzu ya bantu yina ta vanda na kati ya ‘kimvuka ya nene.’—Kus. 7:9.
Nsoba: Bakala yina kele ti kima yina sekretere ke tulaka tinta ke monisa Yezu Kristu. Yandi ta tula kimvuka ya nene kidimbu ntangu yandi ta tuba nde bo kele mameme na nsungi ya “mpasi ya nene.”—Mat. 24:21.
Kikuma ya nsoba: Yehowa me pesaka Mwana na yandi mukumba ya kusambisa. (Yoa. 5:22, 23) Na kuwakana ti Matayo 25:31-33, Yezu ta sambisa mbala ya nsuka mpi ta tuba banani kele “mameme” mpi banani kele “bankombo.”
Keti bampangi-bankento yina kele bandumba, Ohola mpi Oholiba, ke monisa mabundu ya Kikristu mpi mutindu yo me kabwanaka mpi yo me basisaka dibundu ya Katolika mpi ya Misioni?
Mutindu beto vandaka kubakisa ntete: Ohola (Samaria, nto-mbanza ya Izraele), yaya, ke monisa dibundu ya Katolika; Oholiba (Yeruzalemi, nto-mbanza ya Yuda), leke, ke monisa dibundu ya Misioni.
Nsoba: Bampangi-bankento yai ya kele bandumba kele ve bizuzi ya ke monisa mabundu ya Kikristu. Kansi, bampangi-bankento yai ke sadisa beto na kuzaba mutindu Yehowa ke kudiwaka ntangu bantu yina vandaka ntete bansadi na yandi ya kwikama ke salaka kindumba ya kimpeve. Yandi ke tadilaka mpi mabundu yonso ya luvunu mutindu mosi.
Kikuma ya nsoba: Ata verse mosi ve ya Biblia ke monisaka nde Ohola mpi Oholiba kele bizuzi ya ke monisa mabundu ya Kikristu. Izraele mpi Yuda vandaka ntete bonso bankento ya kwikama ya Yehowa, kansi mabundu ya Kikristu me vandaka ntete ve bonso bankento ya Yehowa. Diaka, mutindu bo ke fwanisa bansadi ya kukonda kwikama ya Nzambi ti bankento ya bandumba na kapu 16 mpi 23 ya mukanda ya Ezekiele ke pesa kivuvu nde mambu ta toma. Mabundu ya Kikristu, mpi mabundu yonso ya Babilone ya Nene, kele ve ti kivuvu yai.
Keti mabundu ya Kikristu kele kizuzi ya ke monisa Yeruzalemi yina kolamaka?
Mutindu beto vandaka kubakisa ntete: Mabundu ya Kikristu kele kizuzi ya Yeruzalemi yina kolamaka. Yo yina, kufwa ya Yeruzalemi vandaka kumonisa mutindu mabundu ya Kikristu ta fwa.
Nsoba: Mambu yina vandaka kusalama na Yeruzalemi yina kondaka kwikama; mu mbandu lusambu ya biteki mpi mambu mingi ya mbi ke yibusa beto mambu yina ke salama na mabundu ya Kikristu, kansi beto ke tubaka diaka ve nde mabundu ya Kikristu kele kizuzi ya Yeruzalemi.
Kikuma ya nsoba: Kele ve ata ti verse mosi ya ke tuba nde mabundu ya Kikristu kele kizuzi ya Yeruzalemi. Na kuswaswana ti Yeruzalemi ya ntama, mabundu ya Kikristu me vandaka ntete ve ata fioti kisika ya lusambu ya bunkete. Ata Yehowa lolulaka Yeruzalemi na ntangu mosi buna, yandi ta lolula ve ata fioti mabundu ya Kikristu.
Keti mbona-meso ya muwanda ya mikwa ya kuyuma lunganaka?
Mutindu beto vandaka kubakisa ntete: Na mvu 1918 bo nataka Bakristu yina bo me tulaka mafuta, yina bo vandaka kuniokula, na kimpika na Babilone ya Nene, mpi bo vandaka bonso bantu ya kufwa mpi yo vandaka bonso nde bo ke sala ve ata kima. Kimpika yai ya ntangu fioti sukaka na mvu 1919 ntangu Yehowa pesaka bo kikesa mpi bo kumaka diaka kulonga nsangu ya Kimfumu.
Nsoba: Kimpika yai ya kimpeve yina salaka nde bo kuma bonso bantu ya kufwa salaka bamvula mingi mpi yo yantikaka bamvula mingi na ntwala ya mvu 1918. Yo yantikaka na mvu-nkama ya zole T.B. mpi yo sukaka na mvu 1919 T.B. mpi yo ke wakana ti nsungi ya kuyela ya bima yina kingana ya Yezu ya ble mpi ya matiti ya mbi ke tubila.
Kikuma ya nsoba: Kimpika ya Izraele ya ntama salaka bamvula mingi, yo yantikaka na mvu 740 N.T.B. mpi yo sukaka na mvu 537 N.T.B. Mbikudulu ya Ezekiele ke tuba nde mikwa kele ya “kuyuma” to ya “kuyuma kibeni,” yo ke monisa nde bantu yina mikwa vandaka kumonisa fwaka bamvula mingi me luta. Sambu mbikudulu ke tuba nde mikwa yina vutukaka na luzingu malembe-malembe, yo ke monisa nde yo ta baka ntangu mingi.
Kuvukisa bitini zole ya banti ke tendula nki?
Mutindu beto vandaka kubakisa ntete: Na nima ya nsungi mosi ya nkufi yina kukabwana kotaka na nsungi ya Mvita ya Ntete ya Ntoto ya Mvimba, Bakristu ya kwikama ya bo me tulaka mafuta yina me bikalaka kumaka diaka na bumosi na mvu 1919.
Nsoba: Mbikudulu ke monisa nde Yehowa ta sala na mpila nde bansadi na yandi kukuma kaka mosi. Na nima ya mvu 1919, na nima ya bantangu, Bakristu mingi yina kele ti kivuvu ya kuzinga na ntoto vukanaka ti Bakristu yina bo me tulaka mafuta yina me bikalaka. Bimvuka yai zole ke sambila Yehowa na bumosi.
Kikuma ya nsoba: Mbikudulu ke tuba ve nde bo zengaka ntete kitini mosi ya nti na bitini zole mpi nde na nima bo vukisaka yo sambu yo kuma kitini mosi ya nti. Mbikudulu ke tuba mpi ve nde kimvuka mosi ta kabwana mpi nde na nima yo ta vukana diaka. Kansi, yo ke monisa mutindu bimvuka zole ya kuswaswana ta vukana.
Gogi ya Magogi kele nani?
Mutindu beto vandaka kubakisa ntete: Gogi ya Magogi kele zina ya kifwani yina bo pesaka Satana ntangu bo kulaka yandi na zulu.
Nsoba: Gogi ya Magogi kele kimvuka ya makanda ya ntoto yina ta nwanisa bansadi ya Nzambi na nsungi ya mpasi ya nene.
Kikuma ya nsoba: Sambu mbikudulu ke tuba nde bo ta pesa Gogi bonso madia na bandeke ya ke diaka misuni mpi bo ta pesa yandi maziamu na ntoto, yo ke monisa nde Gogi kele ve kigangwa mosi ya kimpeve. Diaka, bitumba yina Gogi ta nwana ke wakana ti mambu yina mukanda ya Daniele mpi ya Kusonga ke tuba na yina me tala bitumba yina makanda ya ntoto ta nwanisa bansadi ya Nzambi.—Dan. 11:40, 44, 45; Kus. 17:14; 19:19.
Keti Ezekiele monaka mpi tambulaka na tempelo ya nene ya kimpeve yina ntumwa Polo tubilaka na nima?
Mutindu beto vandaka kubakisa ntete: Tempelo ya mbona-meso ya Ezekiele kele tempelo ya kimpeve yina ntumwa Polo tubilaka.
Nsoba: Ezekiele monaka ve tempelo ya kimpeve yina salamaka na mvu 29 T.B., kansi yandi monaka mbona-meso yina monisaka nde lusambu ya bunkete yina Nsiku ya Moize tubilaka ta vutuka ntangu Bayuda ta katuka na kimpika. Ntendula ya tempelo ya kimpeve yina ntumwa Polo pesaka na nsadisa ya mpeve santu ke tubila kisalu yina Yezu, Nganga-Nzambi ya Nene, salaka yantika na mvu 29 tii na mvu 33 T.B. Mbona-meso ya tempelo ya Ezekiele, yina tubilaka ve ata fioti nganga-nzambi ya nene, tubilaka mutindu Nzambi vutulaka lusambu ya bunkete yantika na mvu 1919 T.B. Yo yina, beto ke sosaka ve kuzaba kana mambu yonso mpi bima yonso ya bo tesaka ya tempelo ya mbona-meso ya Ezekiele kele bizuzi ya nki. Kansi, beto ke tulaka dikebi ntete-ntete na mambu yina mbona-meso ya Ezekiele ke longa beto na yina me tala bansiku ya Yehowa sambu na lusambu ya bunkete.
Kikuma ya nsoba: Tempelo ya mbona-meso ya Ezekiele me swaswana ti tempelo ya kimpeve na mitindu mingi ya mfunu. Mu mbandu, na tempelo ya Ezekiele, bo vandaka kupesa bimenga mingi ya bambisi; kansi na tempelo ya kimpeve, bo pesaka kaka kimenga mosi, “mbala mosi mpamba.” (Baeb. 9:11, 12) Bamvula mingi na ntwala nde Kristu kukwisa, ntangu lungaka ntete ve sambu Yehowa kumonisa bakieleka ya mfunu ya me tala tempelo ya kimpeve.