Mukanda ya Nto-Kimvuka

NA MBANDU ya Yezu, beto kesamba Nzambi na masonga yonso nde: “Zina na nge ya santu kuvanda ya lukumu.” Mpusa na beto ya ngolo ya kuzinga na kuwakana ti kisambu yai kemonana na mutindu beto kezingaka luzingu na beto bonso Bambangi ya Yehowa. Ya kyeleka, beto fwete suka ve kaka na kuzaba zina ya Nzambi. Beto fwete sadila konso dibaku sambu na kukumisa zina yina. Yo ke pwelele nde, lukumu ya kuluta nene yina konso muntu na kati na beto lenda vanda ti yo, kele ya kubingama Mbangi ya Yehowa.​—⁠Mat. 6:9; Yez. 43:⁠10.

Na kuwakana ti Nkunga 110:​3, bansadi ya Yehowa kele na luzolo ya kusala kisalu yina yandi metubaka nde bo fwete sala. Sambu na nki bantu ya bamvula yonso mpi ya mitindu yonso kekudipesa na kisalu ya kusamuna? Ntetentete, yo kele sambu bo kezolaka Nzambi mpi bo mekudipesaka na yandi. Kulonga 6:​5, 6 kelongisila beto na kuzola Yehowa ‘na ntima na beto yonso ti na ngolo na beto yonso.’ Zola yai ya masonga kepusaka beto na kusadila ntangu, ngolo, mpi bima na beto sambu na kunata mambote ya Kimfumu ya Nzambi na ntwala. Ebuna, mutindu mosi ya beto lenda sala yo kele kusamuna mingi kibeni na kutadila luzingu na beto.

Zola ya Yehowa sambu na bantu kele kikuma yina mepusaka yandi na kupesa lutwadisu sambu bo zabisa nsangu ya mbote ya Kimfumu na yandi na ntoto ya mvimba. Yandi kezola ve nde ata muntu mosi kufwa kansi yandi kezola nde bantu yonso kubalula ntima na mambu na bo ya mbi mpi kuvutuka na Ngangi na bo sambu bo bikala na luzingu. (2 Pie. 3:⁠9) Yehowa ketuba nde yandi kesepelaka ve na lufwa ya muntu ya mbi, kansi ‘yandi kezolaka mingi nde [muntu ya mbi] kubika kusala mbi, mpidina yandi lenda zinga.’ (Ezek. 33:11) Ntangu beto kesalaka kisalu ya kusamuna, beto kevandaka banzikisa ya kemonana yina kemonisaka zola ya Yehowa sambu na bantu. Ntembe kele ve nde kuzaba dyambu yai keyikaka kyese ya beto kevandaka na yo ntangu beto kesalaka kisalu yai ya mfunu.

Zola na beto ya ngolo sambu na Yehowa kemonanaka dyaka na mutindu beto ketadilaka Ndinga na yandi ya kupemama, Masonuku ya Santu. Kukonda Biblia, beto zolaka ve kuzaba Nzambi mpi kupusana penepene na yandi, mutindu Yakobo 4:8 kelomba beto na kusala. Beto zolaka mpi ve kuzaba sambu na nki beto kele na ntoto mpi mambu yina tasalama na bilumbu kekwisa. Beto zolaka kuzaba ve nde nkaka na beto Adami kele na kisina ya bampasi na beto. (Roma 5:12) Beto zolaka kuzaba mpi ve zola ya nene ya Nzambi kumonisaka na mutindu yandi pesaka Mwana na yandi mosi kaka ya kubutukaka bonso nkudulu sambu na beto. Yehowa kepesaka beto nzayilu ti mayele na yandi na mitindu mingi yankaka. Beto kebakaka na valere mingi kibeni dikabu yai ya Nzambi mepesaka beto, Ndinga na yandi ya kupemama! Ntonda na beto sambu na dikabu yai ya kitoko kibeni kepusaka beto na kusumba ntangu ya kutanga, kulonguka, mpi kuyindulula mambu ya yo ketubaka. (Ef. 5:​15, 16; Nk. 1:​1-3) Beto fwete mona ve mpamba ata fyoti ntangu ya beto kelutisaka na kutanga Ndinga ya Nzambi konso kilumbu. Kansi, zola na beto sambu na Nzambi fwete benda beto na Ndinga na yandi, mpi kusadisa beto na kuzaba yandi mbote-mbote mpi kukumisa ngolo zola na beto sambu na yandi.

Beto melongukaka na nsadisa ya Biblia nde ntangu Adami kusumukaka na Yehowa, yandi tulaka bana na yandi yonso, yika mpi konso muntu na kati na beto, na luzingu mosi ya mpasi mpi ya kukonda kivuvu. Kansi, Nzambi kubakaka bangidika sambu na kutomisa luzingu ya bantu. Yandi salaka bitapi sambu na kuzikisa nde lukanu na yandi sambu na ntoto talungana.​—⁠Kuy. 3:⁠15.

Ntembe kele ve nde konso muntu na kati na beto kele ti mpusa ya ngolo ya kusantisa zina ya kitoko ya Nzambi na beto. Ntangu beto kekuma ti nzayilu ya mingi ya Nzambi ya mbote kibeni yina Yehowa kele, yo kepusaka beto na kusala kumosi ti yandi mpi ti organizasio na yandi sambu na kuzabisa lukanu ti zina na yandi ya nene. Beto kekumaka kutula mpenza ntima nde yandi kendima beto mpi kesadisa beto ntangu yai, mpi nde beto tabaka luzingu ya kukonda nsuka na ntoto ya mpa.

Beto, bamambre ya Nto-Kimvuka, kezola kundimisa beno zola na beto sambu na beno bampangi ya babakala ti ya bankento ya beto kezolaka mingi. Beto kezola mpi kumonisa ntonda na beto ya masonga sambu na bikesa ya beno kesalaka na kusadila ntangu yai ya mebikala na ntwala ya ‘mpasi ya nene’ sambu na kuzabisa nsangu ya mbote na bantu mingi kibeni. (Kus. 7:14) Kana beno kesala mpidina, beno tapesa bo mpi dibaku yina beno mebakaka, disongidila dibaku ya kubaka nzayilu ya Nzambi mpi ya Kristu, nzayilu yina kenataka na luzingu ya mvula na mvula.​—⁠Yoa. 17:⁠3.

Bampangi na beno,

Nto-Kimvuka ya Bambangi ya Yehowa