Inki Mutindu Bambangi ya Yehowa Ke Tadilaka Bantu Yina Vandaka Ntete na Dibundu na Bo?

Beto ke zolaka bantu yonso. Beto ke sadilaka bo mambu na mawete mpi beto ke zitisaka bo. Kana Mbangi mosi ya Yehowa ke kwisa diaka ve na balukutakanu mutindu yandi vandaka kukwisa ntete to kana yandi me yambula kusambila Yehowa, beto ke salaka yonso sambu na kusolula ti yandi. Beto ke songaka yandi nde beto ke zolaka yandi mpi beto ke salaka yonso sambu na kusadisa yandi na kukuma diaka nduku ya Yehowa.—Luka 15:4-7.

Bantangu ya nkaka, muntu mosi lenda sala kima mosi ya lenda sala nde bo katula yandi na dibundu. (1 Bakorinto 5:13) Kansi beto ke zolaka bampangi na beto mingi. Kana mpangi mosi me sala disumu, beto ke salaka yonso sambu na kusadisa yandi na ntwala na mpila nde bo katula yandi ve na dibundu. Ebuna ata bo katula yandi na dibundu, beto ke landaka kusadila yandi mambu na zola mpi ti luzitu kaka mutindu Biblia ke lombaka beto na kusala.—Marko 12:31; 1 Piere 2:17.

Inki ke salaka nde bo katula muntu na dibundu?

Biblia ke tubaka na pwelele yonso nde, kana muntu yina kele Mukristu me sala disumu mpi yandi me buya kuyambula mambu ya mbi, bo fwete katula yandi na dibundu.a (1 Bakorinto 5:11-13) Biblia ke tangaka masumu ya nene yina lenda sala nde bo katula muntu na dibundu, mu mbandu pite, kufwa muntu, kulawuka malafu mpi kumonisa bantu yina nge ke zingaka ti bo mpasi mpi kuyiba.—1 Bakorinto 6:9, 10; Bagalatia 5:19-21; 1 Timoteo 1:9, 10.

Ata mpidina, bo ke katulaka ve na mbala mosi muntu yina me sala disumu ya nene na dibundu. Bankuluntub ya dibundu ke salaka ntete yonso sambu na kusadisa yandi na kubika bikalulu ya mbi. (Baroma 2:4) Bo ke salaka yonso sambu na kusimba ntima na yandi. Sambu na yo, bo ke sadilaka yandi mambu mbote, na mawete mpi bo ke nganinaka yandi ve. (Bagalatia 6:1) Kusala mambu mutindu yina lenda pusa muntu yina me sala disumu na kubakisa nde yandi me sala mbi mpi yo lenda pusa yandi na kubalula ntima. (2 Timoteo 2:24-26) Kansi kana yandi landa kusala mambu yina Biblia ke buyisaka mpi yandi buya kubalula ntima ata bankuluntu ke landa kusadisa yandi, bo fwete katula yandi na dibundu. Bankuluntu ta pesa luzayisu na dibundu nde muntu yango kele diaka ve Mbangi ya Yehowa.

Bankuluntu zole ke tangila leke mosi ya bakala baverse ya Biblia. Nkuluntu mosi me simba yandi na dipeka mpi yandi ke tubila yandi. — Bankuluntu ke sala yonso sambu na kusimba ntima ya muntu mosi ya me sala disumu, bo ke sadila yandi mambu mbote, na mawete mpi bo ke nganina yandi ve

Lukanu ya kukatula muntu yina me pona kusala masumu ke nataka inki mambote? Ntete-ntete, yo ke monisaka nde dibundu ke sadila bansiku ya bikalulu ya mbote yina Nzambi me tulaka na yina me tala kuvanda ti bikalulu ya mbote mpi yo ke sadisaka bampangi ya dibundu na kulanda ve mbandu ya mbi ya muntu yina. (1 Bakorinto 5:6; 15:33; 1 Piere 1:16) Katula yo, kukatula muntu yina na dibundu lenda pusa yandi na kubika kusala mambu ya mbi mpi na kusala mambu ya mbote.—Baebreo 12:11.

Inki mutindu Bambangi ya Yehowa ke sadilaka bantu yina bo me katula na dibundu mambu?

Biblia ke tubaka nde Bakristu fwete ‘yambula kuvukana’ ti muntu ya bo me katula na dibundu, mpi nde bo fwete ‘dia nkutu ve ti muntu ya mutindu yina.’ (1 Bakorinto 5:11) Beto ke lutisaka ve ntangu kisika mosi ti muntu yina bo me katula na dibundu. Ata mpidina, beto ke salaka ve bonso nde beto me zaa yandi ve. Beto ke landaka kuzitisa yandi. Ata bo me katula yandi na dibundu, yandi lenda kwisa na balukutakanu mpi bampangi lenda pesa yandi mbote kana bo me zola.c Yandi lenda songa mpi bankuluntu na kusadisa yandi na kuvutuka na dibundu.

Bakala mosi ti nkento na yandi kele na Nzo ya Kimfumu, bo ke pesa nkento mosi ya bo me katulaka na dibundu mbote na kiese. — Bantu yina bo me katulaka na dibundu lenda kwisa na balukutakanu na beto

Inki ke salamaka kana bo me katula tata mosi ya dibuta na dibundu kansi nkento ti bana na yandi kele kaka Bambangi ya Yehowa? Kinduku ya kimpeve yina yandi vandaka ti yo ti dibuta na yandi ke zenganaka, kansi kinduku na bo ya kinsuni ke vandaka kaka. Mutindu bo ke zingaka na nzo mosi, yandi ta landa kulungisa bampusa ya nkento mpi bana na yandi mutindu yandi ke salaka yo mpi dibuta ya mvimba fwete landa kusadilana mambu ti zola.

Muntu yina bo me katula na dibundu lenda binga bankuluntu na kukwenda kutala yandi. Ntangu bankuluntu ke solula ti yandi, bo ta pesa yandi bandongisila ya zola yina me katukaka na Biblia mpi bo ta siamisa yandi na kubalula ntima mpi na kuvutuka na Nzambi. (Zekaria 1:3) Kana yandi me bika kusala mambu ya mbi mpi mambu ya yandi ke sala ke monisa nde yandi ke zola kibeni kuzitisa bansiku ya Biblia na luzingu na yandi, pana bo lenda vutula yandi na dibundu. Dibundu ta ‘lolula yandi na ntima ya mvimba mpi ta lembika yandi,’ kaka mutindu Bakristu ya Korinto salaka.—2 Bakorinto 2:6-8.

Inki mutindu bantu yina bo katulaka na dibundu mpi na nima vutukaka ke tadilaka lukanu yina?

Yai awa na nsi kele mambu yina Bambangi ya Yehowa yina bo katulaka na dibundu ebuna na nima bakaka lukanu ya kuvutuka na Yehowa ke tuba.

Maria ke zingaka na États-Unis. Yandi ke tuba nde: “Ntangu mono bakaka lukanu ya kuvutuka na dibundu, mono yindulaka nde bankuluntu ta yula mono mambu yonso ya mono salaka bamvula yonso yina mono vandaka ve na dibundu. Kansi bo songaka mono kaka nde, ‘Beto ke zola nde nge tula dikebi kaka mambu ya nge fwete sala sesepi.’ Ntangu bo tubaka mutindu yina, mono kudiwaka mbote.”

Malcom ke zingaka na Sierra na Leone. Yandi ke tuba nde: “Bampangi ya dibundu vandaka kuvingila ti nzala ya ngolo kuvutuka na mono na dibundu. Mono monaka kibeni nde mono kele mpi mfunu. Mambu yina Bampangi-babakala mpi bankento ya dibundu salaka sambu na mono, sadisaka mono na kubakisa nde Yehowa mpi dibundu me lolula mono, ebuna yo sadisaka mono na kudiwaka diaka ve mutindu mono vandaka kudiwa. Bankuluntu vandaka ntangu yonso kusadisa mono na kuvanda diaka ti kinduku ya ngolo ti Yehowa. Bo pesaka mono kikesa mpi bo sadisaka mono na kubakisa nde Yehowa ke bakaka mono kaka na valere mpi yandi ke zolaka mono.”

Sandi kele mpangi-nkento mosi ya ke zingaka na États-Unis. Yandi ke tuba nde: “Mono kele na kiese mutindu Yehowa ke zolaka bansadi na yandi mingi. Yandi ke salaka yonso sambu dibundu na yandi kulanda kuvanda bunkete. Bantu ya nkaka lenda mona nde lukanu ya kukatula muntu na dibundu kele lukanu mosi ya nku mingi. Kansi lukanu yina ke vandaka mfunu mpi yo kele kibeni kidimbu ya ke monisaka zola. Mono kele na kiese sambu tata na beto ya zulu kele tata mosi ya zola mpi yandi kele Nzambi yina ke lolulaka bantu.”

Mambu yina bantu ya kele ve Bambangi ya Yehowa ya me zaba bansiku mbote ke tuba

Batribinale mpi bantu yina me zaba bansiku mbote ke tuba inki mutindu Bambangi ya Yehowa ke katulaka bantu yina me sala masumu mpi me balula ve ntima na dibundu na bo? Tala mambu ya bo ke tuba awa na nsi.

Tribinale ya Nene ya Angletere mpi ya Pays de Galles tubaka na Kitanu 7 juin 2019 nde: “Yo me fwana nde dibundu yina ke zitisaka bansiku ya Biblia mpi ke salaka yonso sambu na kusadila yo kuvanda bantangu ya nkaka ti nswa ya kukatula muntu yina ke zitisa ve bansiku yina na dibundu. Kusala mpidina me fwana kaka ve kansi yo kele mpi mfunu sambu kana muntu ke kuka ve kuzitisa bansiku ya Biblia to yandi ke zola ve kuzitisa yo, yandi ke lungisa ve mambu yina yo ke lombaka sambu na kuvanda na dibundu yina, mpi kana bo katula yandi ve, yandi lenda vanda ti bupusi ya mbi na zulu ya bantu yina ke zola kuzitisa bansiku yina.”
Paulo Pinto de Albuquerque kele longi ya banzo-nkanda ya nene. Yandi vandaka mpi zuzi na Tribinale ya Ke Talaka Banswa ya Bantu na Eropa. Yandi ke tuba nde: “Batribinale ya Eropa mpi ya bisika ya nkaka me zengaka nde lukanu ya [kukatula] muntu. . . yina Bambangi ya Yehowa kele ti yo kele nswa yina nsiku me pesaka na yina me tala kimpwanza na mambu ya dibundu . . . mpi nkutu batribinale kele ve ti nswa ya kukota ma mambu yina.”

a Ntete beto vanda kusadila ngogo kubasisa muntu na dibundu sambu na kutubila muntu yina me buya kubalula ntima. Kansi awa beto ke sadila ngogo kukatula muntu na dibundu. Beto kesadila ngogo kukatula sambu yo kele ngogo yina Biblia ke sadilaka.

b Bankuluntu kele Bakristu ya babakala yina me kangamaka na Nzambi mpi ya kele ti eksperiansi mingi na mambu ya Nzambi. Bo ke longaka mambu ya ke katukaka na Biblia mpi bo ke twadisaka bansadi ya Yehowa mpi ke pesaka bo kikesa. Bo ke futaka bo ve sambu na kisalu yina bo ke salaka.—1 Piere 5:1-3.

c Diambu ya mbi kele nde, bantu mingi ya bo ke katulaka na dibundu, ke tubaka mambu ya luvunu sambu na dibundu mpi bo ke pusaka bantu ya nkaka na kusala mambu ya mbi bonso bo. Kana muntu me sala mutindu yina, beto ke sadilaka nsiku ya Biblia yina ke tubaka nde: “beno pesa yandi ve mbote”.—2 Yoane 9-11.