“Mono Vandaka ti Bangiufula Mingi ya Kukonda Bamvutu”

MUTINDU MONO VANDAKA

Mono butukaka na mbanza La Ceiba na Honduras. Mono vandaka mwana ya nsuka. Na dibuta na beto, beto vandaka bana tanu. Mono vandaka mwana ya bakala kaka mono mosi. Katula yo, kaka mono mpamba muntu vandaka kifwa-makutu na dibuta na beto. Beto vandaka kuvanda na kartie mosi ya mavwanga ke vandaka mingi mpi beto vandaka bansukami. Luzingu kumaka diaka mpasi mingi ntangu papa fwaka na aksida mosi ya yandi kutanaka ti yo na kisalu ntangu mono vandaka ti bamvula 4.

Mama salaka yonso sambu na kusadisa mono ti bampangi na mono ya bankento. Kansi bantangu ya nkaka, yandi vandaka kukonda mbongo sambu na kusumbila mono bilele. Kana mvula me noka, madidi vandaka ngolo mpi mono vandaka ve ti bilele ya madidi.

Ntangu mono vandaka kuyela, mono longukaka Ndinga ya Bidimbu ya Honduras (LESHO). Yo sadisaka mono na kusolula ti bifwa-makutu ya nkaka. Mama ti bampangi na mono ya bankento zabaka ve Ndinga ya Bidimbu. Kansi, bo vandaka kusala bidimbu kaka mpidina kana bo ke zola kusonga mono kima. Ata mpidina, mama vandaka kuzola mono mpi yandi vandaka kutanina mono na bigonsa. Kaka na mwa bidimbu yina yandi vandaka kusala, yandi longaka mono na kubuya mambu ya mbi bonso kunwa makaya mpi malafu yina ke lawusaka. Yo yina, mono vandaka na kiese sambu mono kudibebisaka ve na bima yina ya mbi.

Ntangu mono vandaka leke, mama vandaka kunata mono na eglize ya Katolika. Kansi mono vandaka kukanga ve ata kima sambu ata muntu mosi ve vandaka kuzaba ndinga ya bidimbu sambu na kutendula mono mambu ya bo vandaka kutuba. Yo vandaka kulembisa mono nitu. Yo yina, ntangu mono lungisaka bamvula 10, mono vandaka kukwenda diaka ve na eglize. Kansi mono vandaka kaka ti nzala ya kuzaba mambu mingi ya me tala Nzambi.

Na 1999 ntangu mono lungisaka bamvula 23, mono kutanaka ti nkento mosi ya katukaka na États-Unis mpi yandi vandaka mundimi ya eglize évangelique. Yandi vandaka kulonga mono mambu ya Biblia mpi Ndinga ya Bidimbu ya Amerika (ASL). Mono vandaka kuzola mingi kibeni mambu ya mono vandaka kulonguka. Yo yina, mono bakaka lukanu ya kukuma pastere. Mono kwendaka kuzinga na Porto Rico sambu mono kota na kimvuka mosi ya Bakristu yina ke longaka bifwa-makutu. Ntangu mono vutukaka na La Ceiba na 2002, mono basisaka eglize ya bifwa-makutu ti lusadisu ya mwa banduku. Patricia vandaka na kati ya banduku yina, mpi na nima yandi kumaka nkento na mono.

Mutindu mono muntu vandaka pastere ya eglize na beto, mono vandaka kusala masolo na Ndinga ya Bidimbu ya Honduras (LESHO). Mono vandaka kusala bifwanisu ya masolo ya Biblia mpi mono vandaka kuta yo sambu bifwa-makutu kubakisa. Mono vandaka kukwenda kutala bifwa-makutu ya bambanza ya pene-pene sambu na kupesa bo kikesa mpi kusadisa bo na bampasi na bo. Nkutu mono me salaka banzietelo ya kimisionere na États-Unis ti na Zambie. Kansi na kutuba masonga, mono vandaka ve kuzaba mambu mingi ya Biblia. Mono vandaka kaka kuvutukila mambu yina bo longaka mono mpi kutendula mambu yina mono vandaka kubakisa na kutadila bifwanisu. Ya kieleka, mono vandaka ti bangiufula mingi ya kukonda bamvutu.

Kilumbu mosi, bandimi ya nkaka ya eglize na mono yantikaka kukusila mono makambu. Bo vandaka kutuba nde mono ke lawukaka malafu mpi nde mono ke basikaka ti bankento ya nkaka. Yo pesaksa mono mpasi mpi mono waka makasi mingi. Ntangu fioti na nima, mono ti Patricia beto yambulaka eglize yina.

MUTINDU BIBLIA SOBAKA LUZINGU NA MONO

Mbala na mbala, Bambangi ya Yehowa vandaka kukwisa kutala mono ti Patricia. Kansi beto vandaka kubuya kibeni kuwa bo. Kansi ntangu beto yambulaka eglize na beto, Patricia ndimaka kulonguka Biblia ti bakala mosi mpi nkento na yandi ya Bambangi ya Yehowa. Bazina na bo Thomas ti Liccy. Bo vandaka ve bifwa-makutu, kansi bo vandaka kutuba ndinga ya bidimbu. Yo yitukisaka mono mingi. Na nima, mono kumaka kuvukana ti Patricia ntangu yandi vandaka kulonguka Biblia ti bo.

Na nsadisa ya bavideo na Ndinga ya Bidimbu ya Amerika, beto longukaka Biblia mwa bangonda. Na nima, banduku na beto kumaka kutuba nde Bambangi ya Yehowa kele balongoki ya bantu. Yo yina beto yambulaka kulonguka Biblia. Thomas pesaka mono nkutu banzikisa ya ke monisa nde Bambangi ya Yehowa ke landaka ve bantwadisi ya bantu. Kansi mono buyaka kundimila yandi.

Mwa bangonda na nima, Patricia kumaka kudiyangisa mingi na mabanza. Yandi sambaka Nzambi na kutinda diaka Bambangi ya Yehowa na nzo na beto. Ntangu fioti na nima, Mbangi ya Yehowa mosi yina vandaka kuzinga pene-pene ti beto kwendaka kutala yandi. Yandi songaka yandi nde Liccy lenda kwisa kutala yandi. Liccy kudimonisaka kibeni nduku ya kieleka. Yandi vandaka kukwisa kutala Patricia konso mposo sambu na kupesa yandi kikesa mpi kulonga yandi Biblia. Ata mpidina, mono landaka kaka kuvanda ti badute sambu na Bambangi ya Yehowa.

Na 2012, Bambangi ya Yehowa salaka kampanie mosi sambu na kutubila video mosi na Ndinga ya Bidimbu ya Honduras. Video yango vandaka ti ntu-diambu Keti Nge Ta Zola Kuzaba Kieleka? Liccy natilaka beto yo. Ntangu beto talaka yo, mono waka mpasi mingi na kuzaba nde malongi mingi ya mono vandaka kulonga mu mbandu, bilungi ya tiya mpi nde moyo ke fwaka ve, ke vandaka ve na Biblia.

Na mposo ya kulanda, mono kwendaka kukutana ti Thomas na Nzo ya Kimfumu ya Bambangi ya Yehowa. Mono songaka yandi nde, mono ke zola kulonga kieleka ya Biblia na bifwa-makutu, kansi mono ta kuma ve Mbangi ya Yehowa. Mono vandaka ti ngindu ya kusala eglize ya nkaka ya mpa sambu na bifwa-makutu. Thomas sikisaka mono sambu na kikesa yina mono kumaka diaka ti yo. Na nima, yandi tangilaka mono Baefezo 4:5. Verse yai ke monisaka nde dibundu ya Bukristu fwete vanda na bumosi.

Thomas pesaka mono mpi video Bambangi ya Yehowa—Lukwikilu ya Kemonana na Bisalu, Kitini 1: Kubasika na Mudidi na Ndinga ya Bidimbu ya Amerika. Video yai ke monisa kimvuka mosi ya bantu ya tadilaka mbote-mbote Biblia sambu na kubakisa kieleka na yina me tala malongi ya ntete-ntete. Ntangu mono talaka yo, mono bakisaka mutindu bantu yina vandaka kudiwa. Bonso bo, mono vandaka kusosa kieleka. Video yina ndimisaka mono nde Bambangi ya Yehowa ke longaka kieleka sambu mambu ya bo ke ndimaka ke katukaka kaka na Biblia. Yo yina mono vutukilaka kulonguka Biblia, ebuna na 2014, mono ti Patricia beto bakaka mbotika mpi beto kumaka Bambangi ya Yehowa.

MAMBOTE YA MONO ME BAKAKA

Mono ke zolaka dibundu ya Bambangi ya Yehowa sambu mutindu Nzambi kele bunkete, dibundu yai kele mpi bunkete na mabanza. Bambangi ya Yehowa kele bunkete na kutuba mpi na bangwisana na bo ti bantu ya nkaka. Bo ke tulaka ngemba mpi bo ke kudipesaka kikesa. Bambangi ya Yehowa ke vandaka na bumosi mpi bo yonso ke longaka bakieleka kaka mosi ya Biblia yo vanda bo ke zingaka na nki insi mpi yo vanda bo ke tubaka inki ndinga.

Mono ke zolaka mingi kulonguka mambu yina Biblia ke longaka. Mu mbandu, mono longukaka nde Yehowa kele Nzambi Nkwa-Ngolo Yonso, nde yandi kele Mfumu ya ntoto ya mvimba. Yandi ke zolaka bifwa-makutu mpi bantu yina ke waka. Mono ke bakaka na valere ya mingi zola yina yandi kele ti yo sambu na mono. Mono longukaka mpi nde ntoto ta kuma paladisu mosi ya kitoko mpi nde bantu kele ti kivuvu ya kuzinga mvula na mvula ti sante ya kukuka. Mono ke vingila ti nzala ya ngolo nde mambu yai kulungana.

Mono ti Patricia, beto ke zolaka mingi kulonga bifwa-makutu ya nkaka mambu ya Biblia. Sesepi, beto me kumaka kulonga banduku na beto ya nkaka yina beto vandaka ti bo eglize mosi Biblia. Mono ke vandaka diaka ve ti bangiufula sambu na mambu ya mono ke longaka mutindu mono vandaka ntete ti yo ntangu mono vandaka pastere. Nsuka-nsuka, kulonguka na mono ya Biblia ti Bambangi ya Yehowa sadisaka mono na kuzwa bamvutu na bangiufula na mono.