3. Sambu na Nki Bantu ya Mbote Ke Monaka Mpasi?

Sambu na Nki Beto Fwete Baka Mvutu na Ngiufula Yai?

Yo ke pesaka beto mpasi na kumona bantu ya mbote ke niokwama. Yo ke pusaka bantu mingi na kuyindula nde yo kele mfunu ve na kuvanda muntu ya mbote.

Mambu Yina Beto Fwete Zaba

Bantu ya nkaka ke yindulaka nde bantu ya ke fwaka ke butukaka diaka. Bo ke tubaka nde bantu yina ke salaka mambu ya mbote ta fwa mpi ta butuka diaka na luzingu ya mbote kansi bantu yina ke salaka mambu ya mbi ta fwa mpi ta butuka na luzingu ya mpasi. Mambu yai ya bo ke yindulaka ke monisa nde muntu ya mbote mpi lenda niokwama kana yandi salaka mambu ya mbi na luzingu na yandi ya ntete na ntwala nde yandi butuka diaka. Kansi . . .

• Kana muntu yina ta butuka diaka ta yibuka nkutu ve luzingu na yandi ya ntete, sambu na nki yandi fwete mona mpasi mutindu yai?

• Kana yo lombaka nde beto bela to kukutana ti bisumbula sambu na mambu yina beto salaka na luzingu ya ntete, sambu na nki beto ke salaka yonso sambu na kuvanda na sante ya mbote mpi ke kuditaninaka na bisumbula bubu yai?

  LONGUKA MAMBU MINGI

  Tala video Sambu na Nki Nzambi Me Pesaka Nzila na Bampasi? na jw.org.

Mambu Yina Biblia Ke Longaka

Bampasi kele ve ndola ya Nzambi.

Nkutu mbala mingi, mambu ya kukonda kukana ke salaka nde beto kutaka ti bampasi, mu mbandu beto lenda kutana ti mpasi kaka sambu beto vandaka na kisika ya mbi mpi na ntangu ya mbi.

“Bantu ya ntinu ke nungaka ve ntangu yonso na nsaka ya kubaka ntinu, bantu ya ngolo ke nungaka ve ntangu yonso na bitumba, bantu ya mayele ke zwaka ve ntangu yonso madia, bantu ya ngangu ke vandaka ve ntangu yonso na bimvwama, bantu yina kele ti nzayilu ke nungaka ve ntangu yonso, sambu ntangu mpi mambu ya kukonda kukana ke kuminaka bo yonso.”—LONGI 9:11.

Nitu na beto ya kukonda kukuka mpi ke natilaka beto bampasi.

Mbala mingi bantu ke sadilaka ngogo “disumu” sambu na kutubila mambu ya mbi yina muntu ke salaka. Kansi Biblia ke sadilaka yo sambu na kutubila kifu yina bantu yonso, ya mbote ti ya mbi, ke butukaka ti yo, yina beto bakaka na bibuti na beto ya ntete.

“Mono butukaka na kifu, mpi na masumu katuka ntangu yina mama na mono bakaka divumu na mono.”—NKUNGA 51:5, Noti na nsi ya lutiti.

Disumu me natilaka bantu bampasi mingi.

Disumu me bebisaka kinduku na beto ti Nzambi yina gangaka beto mpi yo me bebisaka kuwakana na beto ti bigangwa yonso ya Nzambi. Yo me natilaka beto yonso disongidila bantu ya bampusu yonso bampasi mingi.

“Ntangu mono ke zola kusala mambu ya mbote, mambu ya mbi kele na mono.”—BAROMA 7:21.

“Lugangu yonso ke landa kudila kumosi mpi kumona mpasi kumosi.”—BAROMA 8:22.