DILONGI 14

Basisa Pwelele Bangindu ya Mfunu

Baebreo 8:1

NA BUNKUFI: Sadisa bawi na kulanda disolo na nge mpi basisa pwelele mambu yonso ya mfunu yina ke wakana ti lukanu mpi ntu-diambu ya disolo.

Vanda ti lukanu. Sosa kuzaba kana lukanu ya disolo na nge kele ya kuzabisa bawi diambu mosi, kundimisa bo to kusiamisa bo. Na nima, sala disolo na kuwakana ti lukanu na yo. Sala ngolo sambu mambu yonso ya mfunu ya disolo kusadisa nge na kulungisa lukanu na nge.

Kudiyula nde: ‘Inki bangiufula ziku bawi ke kudiyulaka to nki mambu bawi ke monaka mpasi na disolo yai? Inki kele bangiufula to mambu ya mpasi ya ntete-ntete yina ke yangisaka bo?’ Na nima, yidika disolo na nge na kutadila ndonga ya mambu yina ke pesaka bawi mpasi sambu bo landa nge mbote, kubakisa mpi kundima mambu yina nge ke longa.
Vutukila ntu-diambu mbala na mbala. Ntangu nge ke sala disolo, vutukila bangogo to bangindu ya mfunu ya ntu-diambu.
Basisa bangindu ya mfunu na mutindu ya pwelele mpi ya pete. Pona kaka bangindu ya mfunu yina ke wakana ti ntu-diambu ya nge ke tubila mpi yina nge lenda longa na ntangu ya bo me pesa nge. Tubila mwa bangindu ya mfunu, tendula na pwelele yonso konso kitini, pema mwa fioti mpi luta na kitini yina ke landa.

Nge lenda yantika ti bangindu ya mfunu sambu na kusadisa bawi na kulanda nge mbote mpi vutukila yo na nsuka ya disolo na nge sambu na kusadisa bawi na kuyibuka yo.