Keti Kinsukami Kemonisaka nde Muntu Mendimama Ve na Nzambi?
NZAMBI kuzabisaka bantu ya Izraele ya ntama nde: “Ata muntu mosi ve ta vanda nsukami” na kati na beno. Yo vandaka mutindu yina sambu na Nsiku yina yandi pesaka bo, bansiku yankaka vandaka kutadila kukeba bansukami mpi nkutu kuyambula kulomba bamfuka. (Kulonga 15:1-4, 7-10) Yo yina, ata muntu mosi ve na kati ya bantu ya Izraele zolaka kuvanda nsukami, sambu Yehowa kusilaka na kusakumuna bo. Kansi, yandi zolaka kusakumuna bo kaka kana bo vandaka kulemfuka na Nsiku, kima yina bantu ya Izraele kusalaka ve.
Ata mpidina, dyambu yai vandaka kutendula mpenza ve nde Nzambi vandaka kundima ve bantu yina vandaka ve ti bima mingi ya kinsuni, mpi yo vandaka kutendula mpenza ve nde yandi vandaka kundima bayina vandaka ti bima mingi ya kinsuni. Bansadi mingi ya kwikama ya Nzambi kuvandaka bansukami na kinsuni. Mbikudi Amosi vandaka kukeba mameme mpi kusala kisalu ya ngolo na nsungi mosi buna konso mvula. (Amosi 1:1; 7:14) Ntangu nzala ya ngolo kukotaka na Izraele na bilumbu ya mbikudi Elia, mufwidi-nkento mosi ya nsukami muntu vandaka kupesa yandi madya, mpi nkento yango vandaka na mwa fufu mpi mafuta fyoti yina Nzambi vandaka kutanina na mutindu ya kuyituka na nsungi yina ya nzala. Elia ti mufwidi yina kukumaka ve bamvwama; kansi, Yehowa vandaka kupesa bo kaka bima yina bo vandaka na yo mfunu.—1 Bantotila 17:8-16.
Mambu ya kukonda kukana lenda sala nde bantu kukuma bansukami. Bisumbula mpi maladi lenda kanga muntu nzila ya kusala kisalu sambu na mwa ntangu fyoti to na nsungi mosi ya nda. Mpi lufwa lenda kumisa bantu bana ya nsyona mpi mifwidi. Kansi, mambu ya mpasi mpenza ya mutindu yai kemonisa ve nde muntu mendimama ve na Nzambi. Disolo ya Noemi mpi Ruti kele mbandu ya kepesa kikesa yina kemonisa mutindu Yehowa kekebaka bansukami na zola yonso. Ata lufwa ya babakala na bo kusalaka nde Noemi mpi Ruti kukuma bansukami ya ngolo, Yehowa Nzambi kusakumunaka bo mpi kubakaka bangidika sambu na kulungisa bampusa na bo.—Ruti 1:1-6; 2:2-12; 4:13-17.
Yo ke pwelele nde, kinsukami kele ve nzikisa ya kemonisa nde muntu mendimama ve na Nzambi. Bantu yina kele ya kwikama na Yehowa Nzambi lenda tula ntima na bangogo yai ya Ntotila Davidi: “Mono me kuma mbuta ntangu yai, mono kele diaka leki ve; mono me monaka ntete ve muntu ya mbote Mfumu Nzambi kubuya yandi to bana na yandi kulomba madia.”—Nkunga 37:25.
[Kifwanisu ya kele na lutiti 8]
Ata Noemi ti Ruti kuvandaka bansukami mpenza, Nzambi kusakumunaka bo mpi kukebaka bo na zola yonso