“Kaka Dikopa Mosi Dyaka”

ALLEN yantikaka kunwa malafu mingi ntangu yandi vandaka ti bamvula 11.a Yandi ti banduku na yandi vandaka kusakana na mfinda, na kulandaka mbandu ya bantu yina bo vandaka kutala na bafilme. Bantu yina bo vandaka kulanda mbandu kuvandaka ve bantu ya kyeleka, kansi malafu yina Allen mpi banduku na yandi vandaka kunwa kuvandaka ya kyeleka.

Tony vandaka ti bamvula 40 ntangu yandi yantikaka malembe-malembe kunwa malafu mingi, na luyantiku yandi vandaka kunwa dikopa mosi to makopa zole konso nkokila mpi na nima yandi kumaka kunwa makopa tanu to sambanu. Nsukansuka, yandi vandaka kuzaba dyaka ve makopa ikwa yandi vandaka kunwa na kilumbu ya mvimba.

Allen kusosaka lusadisu sambu na kimpika na yandi ya malafu. Tony kubuyaka lusadisu yina dibuta mpi banduku ya zola kupesaka yandi. Allen kele bubu yai na luzingu, yo yina yandi lenda ta disolo na yandi; kansi Tony kufwaka mwa bamvula meluta na aksida mosi na kaminio na nima ya kunwa malafu mingi.

Ata ntangu muntu kelutisa ndilu na kunwa malafu yandi mosi, dyambu yina kevandaka mpenza ti bupusi na luzingu ya bantu yankaka, mpi mbala mingi yo kenataka malanda ya mbi mpenza. Mbala mingi, kunwa malafu mingi kepusaka muntu na kutuba bangogo ya mbi, kusala mubulu, kubula mpi kufwa bantu, kusala ba aksida ntangu yandi ketambwisa kaminio mpi kulwala na kisalu, mpi yo kenataka bamaladi mingi mpenza. Konso mvula, kunwa malafu mingi kesalaka nde bantu kubebisa bamiliare ya badolare, tanga mpi bampasi yina yo kenataka na mabanza ya bantu yango bo mosi, ya mabuta mpi ya bana na bo.

Ata mpidina, kimvuka mosi ya États-Unis (National Institutes of Health) ketuba nde, “bantu yonso ve ya kenwaka malafu mbala na mbala kevandaka na kimpika ya malafu. Mpi bantu yonso ve ya kevandaka na kimpika ya malafu kenwaka yo konso kilumbu.” Bantu mingi yina kele ve bampika ya malafu mekumaka ti kikalulu ya kunwa malafu mingi kukonda kuzaba. Bankaka kenwaka ve mbala mingi, kansi bo kenwaka makopa kuluta tanu na mbala mosi.

Kana nge mepona na kunwa malafu, inki kiteso lenda monisa nde nge melutisa ndilu? Inki mutindu nge lenda zaba ntangu yina nge lenda yika ve “kaka dikopa mosi dyaka”? (Bingana 23:29, 30, Contemporary English Version) Masolo ya kelanda tatubila bansangu ya mfunu ya ketadila dyambu yai.

[Noti na nsi ya lutiti]