Samba

6 Keti Beto Tabaka Mambote Kana Beto?

KETI kusamba kenatilaka beto mambote? Ee, Biblia kemonisa nde bisambu ya bansadi ya kwikama ya Nzambi kenatilaka bo mambote mpenza. (Luka 22:40; Yakobo 5:13) Ya kyeleka, kusamba lenda natila beto mambote mingi na kimpeve, na mawi, mpi nkutu na kinsuni. Inki mutindu?

Yindula nde nge kele ti mwana mosi yina bo mepesa dikabu. Keti nge talonga yandi nde yo mefwana na kuvanda na kyese? To keti nge talonga yandi na kumonisa ntonda? Ntangu beto kemonisaka mawi ya mfunu na bangogo, beto ketudilaka yo dikebi mpi kekumisaka yo nkutu ngolo. Keti yo kele mutindu mosi na yina metala kusolula ti Nzambi? Ee! Beto tadila mwa bambandu.

Bisambu ya kuvutula matondo. Ntangu beto kepesaka mersi na Tata na beto sambu na mambu ya mbote ya yandi kesalaka sambu na beto, beto ketulaka dikebi na balusakumunu ya beto kezwaka. Nsukansuka, ntonda na beto keyelaka, beto kekumaka na kyese mingi mpi ti mabanza ya mbote kibeni.​—Filipi 4:6.

Mu mbandu: Yezu kumonisaka ntonda na mutindu Tata na yandi kuwaka mpi kupesaka mvutu na bisambu na yandi.​—Yoane 11:41.

Kisambu ya kulomba ndolula. Ntangu beto kelombaka ndolula na Nzambi, beto kesadisaka kansansa na beto na kukuka kununga bupusi ya masumu, beto kevandaka ti dibaku ya kuyindula masumu ya beto mesala, mpi na kutomisa makuki na beto ya kuzaba bunene ya masumu. Beto kebakaka mpi ndembikilu na kizitu ya mawi ya muntu ya menata makambu.

Mu mbandu: Davidi kusambaka sambu na kumonisa mawa na yandi mpi kumonisa nde yandi balulaka ntima.​—Nkunga 51.

Bisambu sambu na kulomba lutwadisu mpi mayele. Kulomba Yehowa sambu yandi twadisa beto to kupesa beto mayele ya beto kele na yo mfunu sambu na kubaka badesizio ya mbote lenda sadisa beto na kuvanda ti kudikulumusa ya masonga. Yo lenda yibusa beto bandilu na beto mpi kusadisa beto na kuyedisa kikalulu ya kutula ntima na Tata na beto ya zulu.​—Bingana 3:5, 6.

Mu mbandu: Na kudikulumusa yonso Salomo kulombaka lutwadisu mpi mayele sambu na kuyala Izraele.​—1 Bantotila 3:5-12.

Bisambu na ntangu ya mpasi. Kana beto kangudila Nzambi ntima na beto ntangu beto kekudiyangisa na mawi, beto tabaka ndembikilu na ntima mpi beto tatula ntima na Yehowa na kisika ya kuditudila ntima.​—Nkunga 62:9.

Mu mbandu: Ntotila Aza kusambaka ntangu yandi kutanaka ti mbeni mosi ya ngolo.​—2 Bansangu 14:10.

Bisambu sambu na mambote ya bankaka yina kele na mfunu ya lusadisu. Bisambu ya mutindu yai kesadisaka beto na kunwana ti bwimi, na kuyedisa kikalulu ya kuwila bankaka mawa mpi ya kuditula na kisika na bo.

Mu mbandu: Yezu kusambaka sambu na mambote ya balongoki na yandi.​—Yoane 17:9-17.

Bisambu ya kukumisa Nzambi. Ntangu beto kekumisaka Yehowa sambu na bisalu ti bikalulu na yandi ya kitoko, luzitu mpi ntonda na beto sambu na yandi keyelaka. Bisambu ya mutindu yai lenda sadisa beto mpi na kupusana penepene ya Nzambi yina kele Tata na beto.

Mu mbandu: Davidi kukumisaka Nzambi na kyese yonso sambu na lugangu na yandi.​—Nkunga 8.

Lusakumunu yankaka ya kekatukaka na kisambu kele “ngemba ya Nzambi, ngemba yina me luta mambu yonso ya bantu ke yindulaka.” (Filipi 4:7) Kuzwa ngemba na nsi-ntoto yai ya mavwanga kele lusakumunu mosi ya kuswaswana mpenza. Nkutu, yo kenataka mambote na kinsuni. (Bingana 14:30) Kansi, keti beto kezwaka yo kaka sambu na bikesa na beto mosi? To keti yo kelomba kima yankaka ya mfunu?

[Bangogo sambu na kubenda dikebi ya kele na lutiti 10]

Kisambu kenataka mambote mingi​—na kinsuni, na mawi, mpi kuluta yonso, na kimpeve