Kinsweki ya 3

Tanina Kikalulu ya Kumonisa Ntonda

INKI BIBLIA KELONGAKA? “Beno pesa mersi na Nzambi na mambu yonso.”​—1 Tesalonika 5:18.

SAMBU NA NKI YO LENDA VANDA MPASI? Beto kezinga na kati ya bantu yina kevandaka lulendo mpi kepesaka ve mersi, mpi beto lenda yantika kusala bonso bo. (2 Timoteo 3:1, 2) Dyaka, beto lenda kudiwa bonso nde beto fwete yika bisalu mingi kibeni na luzingu na beto yina kele dezia ti mambu mingi. Makambu lenda lutila beto mpenza to beto lenda kudipesa mingi mpenza na mambu na beto mosi na mpila nde beto lenda vanda ve ti ntangu ya kusepela ti bima ya beto kele na yo dezia to ya kumonisa ntonda sambu na mambu yina bankaka kesadilaka beto.

INKI NGE LENDA SALA? Baka ntangu ya kuyindulula bima ya mbote yina nge kele na yo ntangu yai. Ya kyeleka, nge lenda yindula nde makambu melutila nge. Kansi, tadila mbandu ya Ntotila Davidi. Bantangu yankaka yandi vandaka kudiwa bonso nde makambu melutila yandi, mpi bampasi vandaka kulembisa ntima na yandi. Ata mpidina, yandi sambaka Nzambi nde: “Mono ke yindula mambu yonso ya nge salaka, mono lenda vila yo ve.” (Nkunga 143:3-5) Ata Davidi kukutanaka ti bampasi, yandi taninaka kikalulu ya kumonisa ntonda mpi kulandaka na kuvanda na kyese.

Yindula mambu yina bankaka mesalaka sambu na kusadisa nge, mpi monisa ntonda sambu na bikesa na bo. Yezu kupesaka mbandu ya nene na dyambu yai. Mu mbandu, ntangu nduku na yandi Maria kupakulaka yandi mananasi ya ntalu na ntu ti na makulu, bantu yankaka kuyulaka nde: “Nki mfunu ya kulosa mananasi yai mpidina?”a Sambu na bantu yina kumonaka yo mbi, yo lombaka nde bo teka mananasi yina mpi bo pesa mbongo yango na bansukami. Yezu kuvutulaka nde: “Beno bikisa yandi. Sambu na nki beno ke yangisa yandi?” Ebuna yandi yikaka nde: “Yandi me sala mambu yina ya yandi me mona mpila ya kusala.” (Marko 14:3-8; Yoane 12:3) Na kisika ya kutula dikebi na mambu yina Maria kusalaka ve, Yezu kumonisaka ntonda sambu na mambu yina yandi salaka.

Bantu yankaka kemonisaka ntonda na bo sambu bantu ya dibuta, banduku, to balusakumunu yankaka kaka na nima ya kuvidisa yo. Nge lenda buya nde mambu ya mawa ya mutindu yai kukumina nge kana nge keyindulula mambu ya mbote yina nge kele na yo ntangu yai! Sambu na nki ve kuyindula to kusonika listi ya bima yina nge fwete monisila ntonda?

Sambu “makabu yonso ya mbote mpenza” kekatukaka na Nzambi, beto fwete monisila yandi ntonda na beto na kisambu. (Yakobo 1:17) Kusala yo mbala na mbala lenda sadisa beto na kutanina kikalulu ya kumonisa ntonda mpi na kuyedisa kikalulu ya kusepela ti bima ya beto kele na yo.​—Filipi 4:6, 7.

[Noti na Nsi ya Lutiti]

[Kifwanisu ya kele na lutiti 6]

Keti nge kemonisaka ntonda sambu na mambu yina bankaka kesalaka sambu na nge?