KETI NGE ZABAKA YO?

Keti bo tungaka diaka tempelo ya Yeruzalemi na nima ya mvu 70 T.B.?

YEZU tubaka nde ata ditadi mosi ve ya tempelo ya Yehowa ta bikala na zulu ya ditadi ya nkaka mpi mbikudulu yango lunganaka ntangu basoda ya Roma yina vandaka na nsi ya lutwadisu ya Titus fwaka Yeruzalemi na mvu 70 T.B. (Mat. 24:2) Na nima, Ntinu Julian bakaka lukanu ya kutunga diaka tempelo.

Bo vandaka kubinga Julien, ntinu ya nsuka ya mumpani ya Roma. Yandi vandaka mwana-mpangi ya Constantin le Grand mpi yandi yelaka na malongi yina bo vandaka kubinga ya Bukristu. Kansi, na nima ya kukuma ntinu na mvu 361 T.B., yandi monisaka pwelele nde yandi buyaka malongi ya Bukristu ya bilumbu na yandi, yina vandaka ya mbi mpi yandi kumaka mumpani. Mikanda ya istware ke bingaka yandi “Aposta.”

Julien vandaka kuvweza dibundu ya Bukristu. Mosi ya bikuma kele nde, ntangu yandi vandaka ti bamvula sambanu, yandi monaka mutindu bantwadisi ya dibundu yina fwaka tata na yandi mpi bampangi na yandi. Bantu ya mayele ya ke longukaka mambu ya mabundu ke tubaka nde, Julien siamisaka Bayuda na kutunga diaka tempelo sambu yandi vandaka kukwikila nde yo zolaka kuvanda nzikisa sambu na kumonisa nde Yezu vandaka profete ya luvunu.a

Ntembe kele ve nde, Julien bakaka lukanu ya kutunga diaka tempelo. Bantu ya mayele ya ke longukaka mambu yina me lutaka, ke sosaka kuzaba kana Julien yantikisaka kisalu yango mpi inki kupusaka yandi na kuyambula yo. Kansi diambu yina beto me zaba kele nde, na ntwala nde Julien kulungisa bamvula zole na nima ya kubaka kimfumu, bo fwaka yandi mpi lukanu na yandi ya kutunga tempelo fwaka.