DISOLO YINA KELE NA LUTITI YA ZULU | BAMBANGI YA YEHOWA KELE BANANI?
Bambangi ya Yehowa Kele Bantu ya Nki Mutindu?
Kimvuka na beto kele na kele na ntoto ya mvimba mpi beto ke vukanaka ve ti mabundu ya nkaka. Ata babiro ya ke twadisaka bisalu na beto kele na États-Unis, Bambangi ya Yehowa mingi ke zingaka na bansi ya nkaka. Bambangi ya Yehowa bamilio kuluta nana ke longaka bantu Biblia na bansi kuluta 230. Bo ke landaka mambu yai ya Yezu tubaka: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso.”—Matayo 24:14.
Na bisika yonso ya beto ke zingaka, beto ke zitisaka bansiku ya leta. Kansi, beto ke salaka ngolo na kukota ve na mambu ya politiki. Beto ke zitisaka ntuma yina Yezu pesaka Bakristu na ‘kuvanda ve bantu ya nsi-ntoto.’ Yo yina, beto ke kotaka ve na mambu ya politiki mpi ke nwanaka ve bitumba. (Yoane 15:19; 17:16) Nkutu, na Mvita ya Zole ya Ntoto ya Mvimba, bo tulaka Bambangi ya Yehowa na boloko, bo niokulaka bo sambu bo buyaka kukota na mambu ya politiki. Episikopo mosi na Allemagne sonikaka nde: “Bambangi ya Yehowa me fwana na kutuba nde bo mpamba kele bantu yina kansansa na bo buyisaka bo na kusala kisalu ya kisoda na luyalu ya Hitler.”
“[Bambangi ya Yehowa] ke kangamaka ngolo na minsiku ya Biblia. Beto lenda pesa bo biyeka ya nene na politiki, kansi bo ta zola ve ata fioti. . . . Bo ke zitisaka bamfumu ya luyalu kansi, bo ke kwikilaka nde kaka Kimfumu ya Nzambi ta manisa bampasi ya bantu.”—Nová Svoboda, zulunalu mosi ya République Tchèque.
Diaka, beto ke zingaka kisika mosi ti bantu yonso. Yezu sambaka Nzambi sambu na balongoki na yandi nde: “Mono ke lomba nge na kukatula bo ve na nsi-ntoto.” (Yoane 17:15) Yo yina, nge ke monaka Bambangi ya Yehowa ke sala kisalu, ke kwenda na zandu mpi ke kota nzo-nkanda ti bantu yina kele ve Bambangi ya Yehowa.