YO ME KATUKA NA MIKANDA NA BETO YA NTAMA

“Beto Bakaka Kikesa mpi Bantima na Beto Fulukaka na Zola”

NA SUKA ya Kitanu Septembri 1922, bantu 8 000 fulukaka na nzo ya lukutakanu ya nene. Na suka yina, ntangu vandaka me yantika kukuma ngolo. Ntwadisi tubaka nde na lukutakanu yina ya mfunu, bantu lenda basika ntangu lukutakanu ke salama kansi bo lenda kota diaka ve.

Na luyantiku bo yimbaka bankunga, na nima Joseph Rutherford mataka na estrade, bampangi mingi yitukaka. Sambu ntangu vandaka mingi, bankaka telamaka yo yina yandi zabisaka bo na mawete yonso na kuvanda mpi kuwidikila. Ntangu diskure yantikaka, keti bantu monaka kitenda ya lele yina bo kangaka na zulu, yina vandaka ti bisono na zulu na yo?

Mpangi Rutherford salaka disolo yina vandaka ti ntu-diambu “Kimfumu ya zulu me finama.” Yandi salaka yo kiteso ya ngunga mosi ti ndambu, yandi vandaka kutuba na ndinga ya ngolo. Yandi tubilaka mutindu baprofete ya ntama vandaka kulonga ti kikesa kukwisa ya Kimfumu. Na nsuka ya disolo, yandi yulaka nde “Keti beno ke kwikila nde Ntotila ya nkembo me yantika kuyala?” Bampangi tubaka na ndinga ya ngolo nde: “Ee!”

Mpangi Rutherford tubaka nde “beno vutuka na kilanga, beno bana ya Nzambi ya kuluta kuzanguka! Beno tala Ntotila ke yala! Beno kele bantu yina ke zabisaka nsangu na yandi. Yo yina, beno samuna, beno samuna, beno samuna.”

Na ntangu yina, bo kulumusaka kitenda ya lele yina bo sonikaka na zulu na yo nde: “Beno samuna Ntotila ti Kimfumu!”

Ray Bopp ke yibuka nde: “Bampangi waka kiese mingi.” Anna Gardner ke tuba nde “nzo nikanaka sambu bantu bulaka maboko ngolo.” Fred Twarosh ke tuba nde: “Bampangi yonso telamaka na mbala mosi.” Evangelos Scouffas tubaka nde, “yo vandaka bonso nde ngolo mosi telamisaka beto na bisika yina beto vandaka, beto telamaka mpi beto dilaka.”

Bampangi mingi na lukutakanu yina vandaka dezia kulonga nsangu ya mbote. Ata mpidina, bo bakaka diaka kikesa mpi sobaka mutindu ya kutadila kisalu yango. Ethel Bennecoff tubaka nde Balongoki ya Biblia “bakaka kikesa mpi bantima na [bo] fulukaka na zola.” Na nima ya lukutakanu, mpangi-nkento Odessa Tuck, yina vandaka ti bamvula 18, pesaka mvutu na ngiufula, “Nani mono ta tinda?” Yandi tubaka nde: “Mono zabaka ve na wapi mono ta kwenda, inki mutindu mono ta kwenda mpi inki mono ta kwenda kusala. Mono vandaka kaka kuzola kulanda mbandu ya Yezaya, yina tubaka nde: ‘Mono yandi yai! Tinda mono!’” (Yez. 6:8) Ralph Leffler tubaka nde banda kilumbu yina,“beto yantikaka kibeni kusamuna Kimfumu yina bantu ke longa bubu yai na ntoto ya mvimba.”

Ya kieleka, lukutakanu yina salamaka na 1922 na mbanza Cedar Point, na provense ya Ohio kele na kati ya mambu ya nene ya dibundu ya Yehowa. George Gangas ke tuba nde, “Lukutakanu yina pesaka mono mpusa ya kukonda diaka ve balukutakanu.” Yandi ke yibuka nde na nima yandi kondaka ve ata lukutakanu mosi. Julia Wilcox sonikaka nde: “Mono ke waka kiese mingi ntangu yonso yina mikanda na beto ke tubilaka lukutakanu yina salamaka na 1922 na Cedar Point.” Mono ke tubaka ntangu yonso nde, ‘Mersi Yehowa mutindu nge sadisaka mono na kuvanda na lukutakanu yina.’”

Bubu yai, bampangi mingi mpi ke vilaka ve mambu yina bo longukaka na lukutakanu mosi ya nene, mingi-mingi mambu yina pesaka bo kiese, kikesa mpi pusaka bo na kuzola mingi Nzambi na beto ya nene mpi Ntotila yina yandi me ponaka. Ntangu beto ke yibukaka mambu yango, beto ke tubaka mpi nde, “Mersi Yehowa mutindu nge sadisaka mono na kuvanda na lukutakanu yina.”

Mambu yina Salamaka Vandaka Mvutu ya Kisambu

Arthur ti Nellie Claus kumaka na ntwala mpi bo ponaka bisika ya mbote ya kuvanda. Arthur ke tuba nde: “Mono vandaka kuwa mambu yonso yina mitubi vandaka kutuba.” Na mbala mosi, yandi waka divumu mpasi. Yandi basikaka malembe na nganda, yandi bakisaka nde yandi lenda vutuka diaka ve na kisika yina yandi vandaka. Mpangi mosi yina vandaka kupesa bantu bisika yulaka yandi nde: “Sambu na nki nge ke basika na ntangu yai ya mfunu?” Arthur zabaka nde yo kele mfunu nde yandi basika.

Ntangu yandi vandaka kuvutuka, yandi waka bantu ke bula maboko ngolo na lukutakanu. Ntangu yandi vandaka kusosa kisika yina yandi lendaka kuwidikila mambu yina ke salama na kati ya nzo ya lukutakanu, yandi monaka kisika mosi yina yandi lendaka kumata na plafo ya nzo yina, fenetre ya plafo vandaka ya kukangula, yo lombaka kumata kiteso ya bametre iya ti ndambu.

Na zulu ya plafo, Arthur monaka bampangi mingi ya babakala ke kudiyangisa. Bo vandaka kutala-tala mutubi. Bo zabisaka bampangi yina nde bo ta zenga bansinga yina vandaka na zulu na mbala mosi sambu kitenda ya lele yina bo kangaka na zulu kukita. Kansi bo vandaka ti mfunu ya mbele ya fioti sambu na kuzenga bansinga. Keti Arthur vandaka ti mbele ya fioti na poshi? Bo yitukaka na kumona nde Arthur vandaka ti mbele ya fioti. Arthur mpi bampangi vandaka kaka kuvingila ntangu yina bo ta songa bo na kuzenga bansinga. Ntangu mpangi Rutherford tubaka na mbala ya zole nde “beno samuna,” bo zengaka bansinga yango.

Bantu yonso yina vandaka na lukutakanu ke tendulaka nde kitenda ya lele yina vandaka ti bakulere tatu, yo vandaka kukulumuka malembe mpi yo vandaka kunikana. Yo vandaka ti kifwanisu ya Yezu na kati-kati.

Na nima, bampangi zabisaka Arthur nde bo tulaka kimatilu na kisika yina kansi bantu katulaka yo. Bo vandaka ve ti mpila ya kukulumuka, yo yina bo sambaka Yehowa na kutindila bo muntu mosi yina kele ti mbele ya fioti. Bampangi yina ndimaka kibeni nde Yehowa pesaka mvutu na kisambu na bo na mutindu mosi ya kuyituka.