Yidika Ntima na Nge

Ntangu beto ke longukaka Biblia, beto ke zolaka nde mambu yina beto ke longuka sambu na Yehowa kusimba bantima na beto to kimuntu na beto ya kati. Esdrasi me bikilaka beto mbandu ya mbote na mambu yai sambu yandi “yidikaka ntima na yandi sambu na kulonguka Nsiku ya Yehowa.” (Esd. 7:10) Inki mutindu beto lenda yidika mpi bantima na beto?

Samba. Sala kisambu na ntwala ya kubanda kulonguka. Lomba Yehowa na kusadisa nge na kubakisa mambu ya nge ke longuka mpi na kusadila yo.​—Nk. 119:18, 34.

Vanda ya kudikulumusa. Nzambi ke bumbilaka bantu ya lulendo kieleka, bayina ke tulaka ntima na mayele na bo mosi. (Luka 10:21) Buya kifu ya kusosa kulonguka mpi kusala bansosa kaka sambu na kuyitukisa bantu nde nge me zaba mambu mingi. Ndima na kudikulumusa yonso na kusoba mutindu na nge ya kuyindula ntangu yo ke wakana ve ti bangindu ya Nzambi.

Meka kulanda nkunga na beto mosi. Miziki ke vandaka ti bupusi na bantima na beto mpi yo ke sadisaka beto na kuvanda ya kuyilama sambu na kusambila Yehowa. Yo yina, kana nge me landa nkunga na beto mosi na ntwala ya kubanda kulonguka, yo lenda yidika ntima na nge sambu mambu ya nge ke longuka kusimba ntima na nge.