DISOLO YA KULONGUKA 30
NKUNGA 97 Beto Ke Zingaka Sambu na Ndinga ya Nzambi
Landa Kubaka Mambote na Malongi ya Ntete-Ntete ya Biblia
“Mono ke zola kuyibusa beno mambu yai ntangu yonso, ata beno me zaba yo mpi beno me kangamaka ngolo na kieleka.”—2 PIE. 1:12.
NA BUNKUFI
Tala mutindu nge lenda sadila mambu ya mfunu yina nge me longukaka na malongi ya ntete-ntete ya Biblia, ata nge me longukaka yo banda bamvula mingi.
1. Inki mutindu malongi ya ntete-ntete ya Biblia sadisaka nge ntangu nge bandaka kulonguka kieleka?
MALONGI ya ntete-ntete ya Biblia me sobaka luzingu na beto. Mu mbandu, ntangu beto longukaka nde zina ya Nzambi kele Yehowa, beto yantikaka kuta kinduku ti yandi. (Yez. 42:8) Ntangu beto longukaka mambu yina ke kuminaka muntu kana yandi me fwa, yo sadisaka beto na kudiyangisa diaka ve nde bampangi na beto ya beto ke zolaka yina me fwaka, ke niokwamaka. Yo sadisaka beto mpi na kukatula boma ya bafwa. (Lon. 9:10) Diaka, ntangu beto longukaka mambu yina Nzambi ke silaka beto sambu na Paladisu awa na ntoto, yo sadisaka beto na kudiyangisa diaka ve sambu na luzingu na beto na bilumbu ke kwisa. Beto kumaka kundima nde beto ta zinga ve kaka bamvula fioti, disongidila bamvula 70 to 80, kansi mvula na mvula.—Nk. 37:29; 90:10.
2. Inki mutindu 2 Piere 1:12, 13 ke monisa nde ata Bakristu ya kuyela na kimpeve lenda baka mambote na malongi ya ntete-ntete ya Biblia?
2 Beto fwete mona ve mpamba malongi ya ntete-ntete ya Biblia. Mukanda ya 2 Piere kele mukanda yina ntumwa Piere sonikilaka Bakristu yina “kangamaka ngolo na kieleka.” (Tanga 2 Piere 1:12, 13.) Kansi ntangu yandi sonikaka mambu yai, Bakristu yango vandaka na kigonsa na kimpeve sambu balongi ya luvunu mpi bantu ya mbi, yina zolaka kuvidisa bo nzila ya kieleka, vandaka na dibundu. (2 Pie. 2:1-3) Piere vandaka kuzola kusadisa bampangi yango na kuvanda ngolo sambu na kutelemina malongi yina ya luvunu. Yo yina, yandi yibusaka bo mwa malongi yina bo zabaka dezia. Malongi yango lendaka kusadisa bo na kulanda kukangama na Yehowa tii na nsuka.
3. Sambu na nki Bakristu yonso fwete landa kuyindula mingi malongi ya ntete-ntete ya Biblia? Pesa mbandu.
3 Ata beto kele na kieleka banda ntama, beto lenda landa kubaka mambote na malongi ya ntete-ntete ya Biblia. Beto baka mbandu yai: Muntu yina ke lambaka banda ntama mpi muntu yina me zaba kulamba ntama ve, lenda sadila ba ingrédient ya mpila mosi ntangu bo ke lamba madia. Kansi, muntu yina ke lambaka banda ntama me longukaka kusadila ba ingrédient yango na mitindu mingi sambu na kulamba madia ya ntomo ya mutindu na mutindu. Mutindu mosi mpi, muntu yina ke sadilaka Yehowa banda ntama lenda baka malongi mingi na verse mosi kuluta muntu yina me yantika kulonguka Biblia. Sambu na nki? Sambu ntembe kele ve nde banda beto me bakaka mbotika, mambu ya luzingu na beto mpi mikumba na beto na dibundu ya Yehowa me sobaka. Kana beto ke sadila malongi yina beto me longukaka banda ntama na mambu yina beto ke kutana ti yo, beto lenda baka malongi mingi ya nkaka ya mfunu. Beto tala mambu yina Bakristu ya kuyela na kimpeve lenda longuka na malongi tatu ya ntete-ntete ya Biblia.
YEHOWA KELE NGANGI
4. Kuzaba nde Yehowa kele Ngangi na beto me sadisaka beto na nki?
4 ‘Nzambi muntu salaka bima yonso.’ (Baeb. 3:4) Beto ke zabaka nde Ngangi nkwa-ngolo yonso yina me luta bantu yonso na mayele muntu me salaka ntoto mpi bima yonso ya ke zingaka na zulu na yo. Yehowa ke zabaka beto mbote-mbote sambu yandi muntu me salaka beto. Kima ya kuluta mfunu kele nde, yandi ke tudilaka beto dikebi. Mambu yonso yina yandi ke lombaka beto na kusala ke vandaka sambu na mambote na beto. Kuzaba nde Yehowa kele Ngangi na beto me sadisaka beto na kusoba kibeni luzingu na beto mpi na kuzinga na kiese.
5. Kuzaba nki mambu lenda sadisa beto na kuvanda ya kudikulumusa? (Yezaya 45:9-12)
5 Kuzaba nde Yehowa kele Ngangi na beto ke sadisaka beto na kuvanda ya kudikulumusa. Yehowa yibusaka Yobi nde yandi kele Ngangi nkwa ngolo yonso ntangu Yobi kumaka kutula dikebi ya mingi na yandi mosi mpi na bantu ya nkaka. (Yobi 38:1-4) Mambu yai sadisaka Yobi na kubakisa nde mutindu Nzambi ke salaka mambu ntangu yonso, me luta na ntama kibeni mutindu bantu ke salaka mambu. Na kuwakana ti mambu yai, profete Yezaya sonikaka nde: “Keti ntoto ya tuma lenda tubila muntu yina salaka yo nde: ‘Inki nge ke sala?’”—Tanga Yezaya 45:9-12, noti na nsi ya lutiti.
6. Inki ntangu yo ke kumaka diaka mfunu mingi na kuyindula mayele mpi bunene ya Yehowa Ngangi na beto? (Tala mpi bifwanisu.)
6 Ntangu Mukristu ke kuma ti eksperiansi mingi, yandi lenda kuma kutula ntima mingi na bangindu na yandi mosi na kisika ya kubika nde Yehowa mpi Ndinga na yandi kutwadisa yandi. (Yobi 37:23, 24) Kansi nki ta salama kana muntu ke yindula mingi mayele mpi bunene ya kuyituka ya Yehowa? (Yez. 40:22; 55:8, 9) Yo ta sadisa yandi na kulanda kuvanda ya kudikulumusa mpi na kubakisa nde bangindu ya Yehowa kele mfunu mingi kuluta ya yandi mosi.
Inki lenda sadisa beto na kutadila bangindu na beto mosi na mutindu ya mbote? (Tala paragrafe 6)d
7. Inki mpangi Rahela salaka sambu na kundima nsoba yina dibundu ya Yehowa salaka?
7 Mpangi-nkento Rahela, na Slovénie, me bakisaka nde kuyindula nde Yehowa kele Ngangi na beto me sadisaka yandi na kundima nsoba mosi yina salamaka na dibundu ya Yehowa. Yandi ke tuba nde: “Bantangu ya nkaka, yo ke vandilaka mono mpasi na kundima bansoba yina bampangi ya ke twadisaka dibundu ya Yehowa ke salaka. Mu mbandu, ata mono talaka Rapore No 8 ya Nto-Kimvuka na Mvu 2023 sambu na mambu ya kubika mandefu, mono sepelaka ve ntangu mono monaka na mbala ya ntete mpangi mosi yina bikaka mandefu ke sala diskure. Yo yina mono sambaka Yehowa sambu yandi sadisa mono na kuyikama ti nsoba yai.” Mpangi Rahela bakisaka nde Yehowa, Ngangi ya zulu ti ntoto, ke zabaka mbote kibeni mutindu ya kuluta mbote ya kutwadisa dibundu na yandi. Kana nge ke kuka ve kuyikama ti ntendula mosi ya mpa to lutwadisu ya mpa yina dibundu ya Yehowa ke pesa, nge lenda baka ntangu ya kuyindula na kudikulumusa yonso mayele mpi ngolo ya mingi ya Yehowa Ngangi na beto.—Bar. 11:33-36.
BIKUMA YINA KE SALAKA NDE NZAMBI KUBIKA BAMPASI
8. Inki mambote nge me bakaka mutindu nge me zabaka bikuma yina Nzambi ke bikaka nde beto mona bampasi?
8 Sambu na nki Nzambi ke bikaka nde beto mona bampasi? Bantu ya nkaka yina ke zabaka ve mvutu na ngiufula yai ke wilaka Nzambi makasi to ke tubaka nkutu nde Nzambi kele ve! (Bing. 19:3) Kansi, nge me longukaka nde disumu mpi kukonda kukuka yina beto me bakaka na Adami ke salaka nde beto mona bampasi kansi ve Yehowa. Nge me longukaka mpi nde ntima-nda ya Yehowa ke sadisaka bamilio ya bantu na kuzaba yandi mpi na kulonguka mutindu yandi ta katula bampasi kimakulu. (2 Pie. 3:9, 15) Kuzaba mambu yai me pesaka nge kikesa mpi yo me sadisaka nge na kukuma nduku na yandi.
9. Inki ntangu yo lenda vanda diaka mfunu mingi na kuyindula bikuma yina ke salaka nde Yehowa kubika bampasi?
9 Beto fwete vanda ntima-nda ntangu beto ke vingila nde Yehowa kukatula bampasi. Kansi kana muntu mosi ya beto ke zolaka me fwa to ntangu beto mosi to muntu mosi yina beto ke zolaka ke kutana ti bampasi to mpi kana bo ke sadila yandi to beto mosi mambu ya mbi, beto lenda kudiyula sambu na nki Yehowa ke katula ve bampasi nswalu. (Hab. 1:2, 3) Kana yo me kumina beto, yo ta vanda diaka mfunu mingi na kuyindula bikuma yina ke salaka nde Yehowa kubika nde bantu ya mbote kumona mpasi.a (Nk. 34:19) Beto fwete yindula mpi lukanu ya Yehowa ya kukatula bampasi yonso kimakulu.
10. Inki ke sadisaka mpangi Anne na kukanga ntima na mpasi ya lufwa ya mama na yandi?
10 Kuzaba bikuma yina ke salaka nde Nzambi kubika bampasi lenda sadisa beto na kukangila yo ntima. Mpangi-nkento Anne na île Mayotte, na océan Indien ke tuba nde: “Lufwa ya mama na mono mwa bamvula me luta ke pesaka mono mawa mingi kibeni. Kansi mbala na mbala, mono ke yibukaka nde Yehowa ve muntu kele na kisina ya bampasi. Yandi kele ti nzala ya ngolo ya kumanisa bampasi yonso mpi ya kufutumuna bafwa. Kuyindula mambu yai ke pesaka mono kikesa mpi ngemba.”
11. Tubila mwa bikuma yina ke salaka nde Yehowa kubika bampasi mpi mutindu yo ke sadisaka beto na kulanda kulonga nsangu ya mbote.
11 Kuzaba bikuma yina ke salaka nde Nzambi kubika bampasi ke pesaka beto mpusa ya ngolo ya kulanda kulonga nsangu ya mbote. Na nima ya kutubila mutindu ntima-nda ya Yehowa ke sadisaka bantu yina ke balulaka ntima na kuguluka, Piere sonikaka nde: “Beno tadila mutindu ya bantu yina beno fwete vanda. Beno fwete vanda bantu ya bikalulu ya santu mpi kusala bisalu ya ke monisa kukangama na Nzambi.” (2 Pie. 3:11) Kisalu ya kulonga nsangu ya mbote kele mpi na kati ya “bisalu ya ke monisa kukangama na Nzambi.” Bonso Tata na beto, beto ke zolaka mpi bantu. Beto ke zolaka nde bo zinga na nsi-ntoto ya mpa. Yehowa kele ntima-nda mpi yandi ke pesa bantu ya teritware na beno dibaku ya kusambila yandi. Kuvanda nduku ya kisalu ya Nzambi mpi kusadisa bantu mingi na kuzaba yandi na ntwala nde nsuka kukwisa, kele dibaku ya nene sambu na nge!—1 Bak. 3:9.
BETO KE ZINGA NA “BILUMBU YA NSUKA”
12. Kuzaba mambu yina Biblia ke tubaka sambu na “bilumbu ya nsuka” ke pusa beto na kusala nki?
12 Biblia tubilaka mbote-mbote bikalulu yina bantu ta kuma ti yo na “bilumbu ya nsuka.” (2 Tim. 3:1-5) Kana beto tala kaka bikalulu ya bantu yina ke zinga pene-pene ti beto, beto ta bakisa nde Biblia tubaka masonga. Mutindu bantu ke kuma ti bikalulu ya mbi kibeni ke pusa beto na kutudila diaka Ndinga ya Nzambi ntima mingi.—2 Tim. 3:13-15.
13. Inki bangiufula beto lenda kudiyula na kuwakana ti mbandu ya Yezu na Luka 12:15-21?
13 Mutindu beto ke zabaka nde beto ke zinga na bilumbu ya nsuka, ke sadisaka beto na kusadila ntangu na beto na mutindu ya mbote kibeni. Mbandu yina Yezu pesaka na Luka 12:15-21, ke monisa mfunu ya kusadila ntangu na beto na mutindu ya mbote kibeni. (Tanga.) Sambu na nki Nzambi bingaka mvwama yina nde “zoba”? Sambu yandi vandaka kutula mambu ya mfunu mingi ve na kisika ya ntete, kansi ve sambu yandi vandaka mvwama. Yandi bumbaka ‘kimvwama sambu na yandi mosi kansi yandi vandaka ve mvwama na meso ya Nzambi.’ Yandi salaka kifu ya nene mutindu yandi sadilaka ve ntangu na yandi na mutindu ya mbote, sambu yandi bikalaka diaka ve ti ntangu mingi ya kuzinga. Yo yina Nzambi songaka yandi nde: “Na mpimpa yai bo ke lomba nge luzingu na nge.” Bubu yai mpi, mutindu nsuka ya nsi-ntoto yai ke pusana kibeni, beto lenda kudiyula nde: ‘Keti balukanu na mono ke monisaka nde mono ke tulaka mambu ya kuluta mfunu na kisika ya ntete? Inki balukanu mono ke songaka bana na mono na kuditudila? Keti mono ke sadilaka ngolo na mono, ntangu na mono mpi mbongo na mono ntete-ntete sambu na kubumba bimvwama sambu na mono mosi to sambu na kubumba yo na zulu?’
14. Mutindu mbandu ya mpangi Miki ke monisa yo, sambu na nki yo kele mfunu na kuyindula mingi mambu yina ke monisa nde beto ke zinga na bilumbu ya nsuka?
14 Mutindu na beto ya kutadila luzingu lenda soba kana beto ke yindula mingi mambu ya ke monisa nde beto ke zinga na bilumbu ya nsuka. Mambu yai kuminaka mpangi-nkento Miki. Yandi ke tuba nde: “Ntangu mono bakaka diplome ya sekondere, mono vandaka kaka kuzola kukota iniversite sambu na kulonguka bambisi. Mono vandaka mpi ti lukanu ya kukuma mupasudi-nzila ya ntangu yonso mpi ya kukwenda kusala na kisika yina mpusa ya bansamuni kele mingi. Banduku na mono ya kuyela na kimpeve songaka mono na kuyindula mbote-mbote kana mono ta kuka kulonguka bambisi na iniversite mpi kulungisa balukanu na mono ya kimpeve kaka na ntangu yina mosi. Bo yibusaka mono nde nsi-ntoto yai ta fwa ntama ve mpi nde na nsi-ntoto ya mpa, mono ta vanda ti dibaku ya kulonguka mvula na mvula bambisi mingi kibeni mutindu mono me zola. Yo yina, mono bakaka lukanu ya kulonguka mambu yina ta baka mono ve ntangu mingi mpi yina ta longa mono mambu ya mfunu yina lenda sadisa mono na luzingu. Yo sadisaka mono na kuzwa kisalu yina pesaka mono nzila ya kusala kisalu ya kimupasudi-nzila ya ntangu yonso mpi na nima ya kukwenda na Équateur, kisika yina mpusa ya bansamuni kele mingi.” Bubu yai, bakala ya mpangi Miki kele nkengi ya nziunga mpi bo ke salaka ti yandi kisalu ya nziunga na Équateur.
15. Sambu na nki beto fwete yambula ve na kulonga nsangu na bantu yina me sepela ntete ve ti yo? Pesa mbandu. (Tala mpi bifwanisu.)
15 Beto fwete lemba ve nitu kana na mbala ya ntete bantu ke buya nsangu ya mbote. Bantu lenda soba. Beto tadila mbandu ya Yakobo mpangi ya Yezu. Yandi monaka mutindu yaya na yandi Yezu yelaka, mutindu yandi kumaka Mesia mpi longaka na mutindu yina ata muntu mosi ve me longaka. Kansi bamvula mingi lutaka mpi yandi kumaka ve longoki ya Yezu. Yandi kumaka longoki ya Yezu kaka na nima ya lufutumuku ya Yezu mpi yandi kumaka nkutu longoki mosi ya kikesa mpenza!b (Yoa. 7:5; Bag. 2:9) Yo kele mfunu na kuyambula ve kulonga nsangu ya mbote na bampangi na nge yina ke sepela ntete ve ti yo to nkutu ata na bayina me buyaka dezia kuwidikila nge. Kuvila ve nde beto ke zinga na bilumbu ya nsuka, yo yina yo kele mfunu mingi na kusadila mbote ntangu na beto sambu na kulonga mingi nsangu ya mbote. Mambu yina nge ke songa bantu bubu yai, bo lenda sadila yo na nima. Mbala ya nkaka bo lenda sadila yo nkutu na mpasi ya nene.c
Inki lenda sadisa beto na kulanda kulonga bampangi na beto ya dibuta nsangu ya mbote? (Tala paragrafe 15)e
LANDA KUMONISA NTONDA SAMBU NA BANGIBUSA YA YEHOWA
16. Inki mutindu bangibusa ya Yehowa ke natilaka beto mambote? (Tala mpi lupangu “Sadila Yo Sambu na Kusadisa Bantu ya Nkaka.”)
16 Bo ke yidikaka madia ya nkaka ya kimpeve sambu na bantu yina me longukaka ntete ve malongi ya ntete-ntete ya Biblia. Mu mbandu, badiskure ya bantu yonso yina beto ke landaka konso mposo, masolo mpi bavideo ya nkaka na jw.org mpi bazulunalu na beto ya bantu yonso, ke basikaka ntete-ntete sambu na bantu yina kele ve Bambangi ya Yehowa. Ata mpidina, beto ke bakilaka mpi bangibusa yango mambote mingi. Yo ke kumisaka ngolo zola na beto sambu na Yehowa, yo ke pusaka beto na kutudila diaka mpenza Ndinga na yandi ntima mpi yo ke sadisaka beto na kulonga mbote bantu ya nkaka malongi ya ntete-ntete ya Biblia.—Nk. 19:7.
17. Inki ntangu nge lenda yindula malongi ya ntete-ntete ya Biblia?
17 Beto Bambangi ya Yehowa, beto ke vandaka na kiese ntangu beto me baka ntendula ya mpa ya kieleka mosi ya Biblia. Ata mpidina, beto ke monisaka ntonda mingi sambu na malongi ya ntete-ntete ya Biblia yina sadisaka beto ntete na kundima kieleka. Kana beto ke dindamana kaka na bangindu na beto na kisika ya kulanda lutwadisu ya dibundu ya Yehowa, beto fwete yibuka na kudikulumusa yonso nde Yehowa Ngangi nkwa-ngolo yonso, yina kele mayele mingi, muntu ke twadisaka dibundu na yandi. Kana beto mosi to muntu mosi yina beto ke zolaka ke kutana ti bampasi, beto fwete vanda ntima-nda mpi kuyindula bikuma yina ke salaka nde Yehowa kubika bampasi. Diaka, ntangu beto ke yindula mutindu ya kusadila ntangu mpi bima na beto, beto fwete vila ve nde beto ke zinga na bilumbu ya nsuka mpi nde ntangu me bikala fioti. Bika nde bangibusa ya Yehowa kulanda kupesa beto kikesa, kukumisa beto mayele mpi kupusa beto na kukangama kaka na yandi.
NKUNGA 95 Nsemo Kusema Diaka Mingi
a Tanga disolo “Kubika Fioti Bampasi Yonso Kumana!” na Nzozulu ya Nkengi ya 1er juin 2007, balutiti 14-18.
c Tanga disolo “Inki Beto Me Zaba Sambu na Balusambisu ya Yehowa na Bilumbu Ke Kwisa?” na Nzozulu ya Nkengi ya mai 2024, balutiti 8-13.
d NTENDULA YA BIFWANISU: Kimvuka ya bankuluntu me buya ngindu yina nkuluntu mosi me pesa. Na nima, nkuluntu yango ke tala bambwetete na mpimpa mpi yandi me bakisa nde bangindu ya Yehowa kele mfunu mingi kuluta ya yandi.
e NTENDULA YA KIFWANISU: Mpangi-nkento mosi ke longuka yandi mosi mpi ke tadila mambu ya ke monisa nde beto ke zinga na bilumbu ya nsuka. Yo me pusa yandi na kubinga mpangi na yandi ya dibuta ya nkento mpi na kulonga yandi nsangu ya mbote.