Mariko
5 Magĩcoka makĩringa mũrĩmo ũcio ũngĩ wa iria gĩcigo-inĩ kĩa Agerasi. 2 Na rĩrĩa Jesu oimire gatarũ-inĩ, o rĩo mũndũ warĩ na ndaimono agĩũka kũrĩ we oimĩte mbĩrĩra-inĩ. 3 Mũndũ ũcio aaikaraga kũu mbĩrĩra-inĩ, na nginyagia hĩndĩ ĩyo, gũtirĩ mũndũ o na ũmwe wahotete kũmuoha biũ, nginya na mĩnyororo. 4 Nĩ ohagwo kaingĩ na bĩngũ na mĩnyororo, ĩndĩ agatua bĩngũ icio na mĩnyororo ĩyo; na gũtirĩ mũndũ warĩ na hinya wa kũmũtooria. 5 Na rĩrĩ, aatũũraga akayaga kũu mbĩrĩra-inĩ na irĩma-inĩ ũtukũ na mũthenya agĩĩtihangagia na mahiga. 6 No rĩrĩa onire Jesu arĩ haraya, agĩtengʼera na akĩmũinamĩrĩra. 7 Agĩcoka akĩanĩrĩra na mũgambo mũnene akiuga: “Tũrorania kĩĩ nawe, Jesu, Mũrũ wa Ngai Ũrĩa ũrĩ Igũrũ Mũno? Ndakwĩhĩtithia na rĩĩtwa rĩa Ngai ndũkanyarire.” 8 Nĩ gũkorũo Jesu aamĩraga ũũ: “Uma thĩinĩ wa mũndũ ũyũ, wee ndaimono ĩno.” 9 No akĩũria mũndũ ũcio ũũ: “Wĩtagwo atĩa?” Nake akĩmũcokeria: “Njĩtagwo Legioni,* tondũ tũrĩ aingĩ.” 10 Na agĩthaitha Jesu maita maingĩ ndakaingate ndaimono icio kuuma bũrũri-inĩ ũcio.
11 Na rĩrĩ, kũu kĩrĩma-inĩ nĩ kwarĩ na rũũru rũnene rwa ngũrũe rũkĩrĩa. 12 Nĩ ũndũ ũcio ndaimono icio ikĩmũthaitha ũũ: “Twĩtĩkĩrie tũthiĩ tũingĩre thĩinĩ wa ngũrũe iria.” 13 Nake agĩciĩtĩkĩria. Nacio igĩkiuma thĩinĩ wa mũndũ ũcio na igĩthiĩ ikĩingĩra thĩinĩ wa ngũrũe, nacio ngũrũe igĩtengʼera kĩharũrũka-inĩ ikĩgwa thĩinĩ wa iria, ngũrũe ta ngiri igĩrĩ igĩkuĩra iria-inĩ ciothe. 14 No arĩithi a cio makĩũra na magĩthiĩ makĩheana ũhoro ũcio itũũra-inĩ na mĩgũnda-inĩ, na andũ magĩũka kuona ũrĩa gwekĩkĩte. 15 Nĩ ũndũ ũcio magĩkinya harĩ Jesu, na makĩona mũndũ ũcio warĩ na Legioni* aikarĩte thĩ ehumbĩte nguo na arĩ mũhonu meciria, na magĩĩtigĩra mũno. 16 Ningĩ, arĩa meeyoneire maũndũ macio makĩmaganĩra ũrĩa gwekĩkĩte harĩ mũndũ ũcio warĩ na ndaimono na harĩ ngũrũe. 17 Nĩ ũndũ ũcio makĩambĩrĩria gũthaitha Jesu oime kũu gĩcigo-inĩ kĩao.
18 Na rĩrĩa aaingĩraga thĩinĩ wa gatarũ, mũndũ ũcio warutĩtwo ndaimono akĩmũthaitha mathiĩ nake. 19 No rĩrĩ, Jesu ndaamwĩtĩkĩririe no aamwĩrire ũũ: “Inũka kũrĩ andũ anyu, na ũmeere maũndũ mothe marĩa Jehova* agwĩkĩire na tha iria akuonetie.” 20 Mũndũ ũcio agĩthiĩ na akĩambĩrĩria kũhunjia matũũra-inĩ ma Dekapoli maũndũ mothe marĩa Jesu aamwĩkĩire, na andũ othe makĩgega.
21 Thutha wa Jesu gũcoka na gatarũ mwena ũcio ũngĩ wa iria, kĩrĩndĩ kĩingĩ mũno gĩgĩthiĩ kũrĩ we, na aarĩ rũteere-inĩ rwa iria. 22 Mũrũgamĩrĩri ũmwe wa thunagogi wetagwo Jairo agĩũka, na thutha wa kuona Jesu, akĩĩgũithia thĩ magũrũ-inĩ make. 23 Na akĩmũthaitha maita maingĩ, akĩmwĩra: “Kairĩtu gakwa nĩ karwaru mũno. Ndagũthaitha, ũka ũgakaigĩrĩre moko nĩguo kahone gatũũre muoyo.” 24 Nĩ ũndũ ũcio Jesu agĩthiĩ hamwe nake, na kĩrĩndĩ kĩnene gĩkĩmũrũmĩrĩra na nĩ kĩahatĩkanagĩra harĩ we.
25 Na rĩrĩ, nĩ haarĩ na mũtumia watũũraga oiraga thakame mĩaka ikũmi na ĩĩrĩ. 26 Nĩ aanyamarĩtio mũno nĩ arigitani aingĩ na agakorũo ahũthĩrĩte indo ciake ciothe no ndaateithĩkĩte, ĩndĩ no kwĩhĩrũo eehagĩrũo. 27 Rĩrĩa aaiguire ũhoro wĩgiĩ Jesu, agĩthiĩ thutha wake arĩ kĩrĩndĩ-inĩ na akĩhutia gĩcũrĩ kĩa nguo yake ya igũrũ, 28 tondũ eeĩraga na ngoro ũũ: “Ingĩhutia o nguo yake ya igũrũ tu, nĩ ngũhona.” 29 Na kahinda o kau agĩtiga kuura, na akĩigua ahona mũrimũ ũcio mũru.
30 Na o hĩndĩ ĩyo Jesu akĩigua oimwo nĩ hinya, na akĩhũgũkĩra kĩrĩndĩ akĩũria: “Nũ wahutia nguo yakwa ya igũrũ?” 31 No arutwo ake makĩmũũria atĩrĩ: “Kĩrĩndĩ kĩrahatĩkanĩra harĩ wee, nawe ũroria, ‘Nũ wahutia?’” 32 O na kũrĩ ũguo, nĩ aaroraga mĩena yothe nĩguo one nũ wekĩte ũguo. 33 Tondũ mũtumia ũcio nĩ aamenyaga ũrĩa gwathiĩte, agĩthiĩ amakĩte na akĩinainaga akĩĩgũithia mbere yake na akĩmwĩra ũhoro wothe. 34 Nake akĩmwĩra atĩrĩ: “Mwarĩ wakwa, wĩtĩkio waku nĩ watũma ũhone. Thiĩ na thayũ, na ndũkanathĩnio nĩ mũrimũ ũcio mũru rĩngĩ.”
35 Na rĩrĩa aaragia, hagĩũka andũ moimĩte mũciĩ kwa mũrũgamĩrĩri ũcio wa thunagogi makĩmwĩra: “Kairĩtu gaku nĩ gakuire! Tiga gũthĩnia Mũrutani rĩngĩ.” 36 No Jesu akĩigua ũrĩa mooigaga na akĩra mũrũgamĩrĩri ũcio wa thunagogi ũũ: “Ndũgetigĩre, no gĩa na wĩtĩkio.” 37 No rĩrĩ, ndeetĩkĩririe mũndũ o na ũrĩkũ amũrũmĩrĩre tiga Petero, Jakubu, na Johana mũrũ wa nyina na Jakubu.
38 Nĩ ũndũ ũcio magĩkinya nyũmba ya mũrũgamĩrĩri ũcio wa thunagogi, na agĩkora andũ makĩnegena, magĩcakayaga na makarĩra manĩrĩire. 39 Arĩkia kũingĩra, akĩmoria atĩrĩ: “Mũrarĩra na mũkanegena nĩkĩ? Kairĩtu kau gatikuĩte ĩndĩ nĩ gũkoma gakomete.” 40 Maigua ũguo, makĩambĩrĩria kũmũthekerera na kĩnyũrũri. No arĩkia kũmeera moime nja othe, agĩta aciari a kairĩtu kau na arutwo ake, magĩthiĩ harĩa gaakomete. 41 Agĩcoka akĩnyita kairĩtu kau guoko, agĩkeera: “Talitha kumi,” ũguo nĩ kuuga: “Kairĩtu, ndakwĩra atĩrĩ, ‘Ũkĩra!’” 42 Na o hĩndĩ ĩyo kairĩtu kau gagĩũkĩra na gakĩambĩrĩria gwĩtwara. (Kaarĩ ka mĩaka ikũmi na ĩĩrĩ.) Na nĩ ũndũ ũcio, arĩa maarĩ ho magĩkena mũno. 43 No we akĩmakaania maita maingĩ matikeere mũndũ o na ũrĩkũ ũhoro ũcio, na akĩmeera mahe kairĩtu kau irio.