Luka

22 Na rĩrĩ, Gĩathĩ kĩa Mĩgate Ĩtarĩ Mĩimbie, kĩrĩa gĩtagwo Pasaka, nĩ gĩakuhĩrĩirie. 2 Na athĩnjĩri-Ngai arĩa anene na andĩki-Watho nĩ maacaragia njĩra njagĩrĩru ya kũmũũraga, tondũ nĩ meetigagĩra andũ. 3 Nake Shaitani akĩingĩra thĩinĩ wa Judasi, ũrĩa wetagwo Mũisikariota, ũmwe wa arĩa Ikũmi na Erĩ, 4 na agĩthiĩ kũrĩ athĩnjĩri-Ngai arĩa anene na arangĩri a hekarũ akĩaria nao ũrĩa angĩmũkunyanĩra kũrĩ o. 5 Magĩkenio nĩ ũndũ ũcio na makĩiguithanĩria mamũhe mbeca cia betha. 6 Kwoguo agĩtĩkĩra na akĩambĩrĩria gũcaria mweke mwega wa kũmũkunyanĩra kũrĩ o hatarĩ kĩrĩndĩ hakuhĩ.

7 Mũthenya wa mbere wa Mĩgate Ĩtarĩ Mĩimbie ũgĩkinya, rĩrĩa igongona rĩa Pasaka rĩarutagwo; 8 nĩ ũndũ ũcio Jesu agĩtũma Petero na Johana, akĩmeera: “Thiĩi mũgatũhaarĩrĩrie Pasaka.” 9 Nao makĩmũũria: “Ũkwenda tũkamĩhaarĩrĩrie kũ?” 10 Nake akĩmeera atĩrĩ: “Mwatonya thĩinĩ wa itũũra, nĩ mũgũtũngwo nĩ mũndũ ũkuuĩte ndigithũ ya maĩ. Mũmũrũmĩrĩre nginya nyũmba ĩrĩa arĩingĩra. 11 Na mwĩre mwene nyũmba ĩyo, ‘Mũrutani aroria atĩrĩ: “Ĩ ha nyũmba ya ageni kũrĩa niĩ na arutwo akwa tũngĩrĩĩra Pasaka?”’ 12 Nake mũndũ ũcio nĩ ekũmuonia nyũmba nene ya igũrũ, ĩrĩ na indo ciothe. Mĩhaarĩrĩriei kũu.” 13 Magĩthiĩ na makĩmĩkora o ta ũrĩa aameerĩte, na makĩhaarĩria Pasaka.

14 Rĩrĩa thaa ciakinyire, agĩikara metha-inĩ marĩ hamwe na atũmwo. 15 Na akĩmeera ũũ: “Nĩ ngoretwo ngĩĩrirĩria mũno kũrĩanĩra Pasaka ĩno na inyuĩ itananyamarĩka; 16 tondũ ngũmwĩra atĩrĩ, ndikamĩrĩa rĩngĩ nginya ĩkaahingio thĩinĩ wa Ũthamaki wa Ngai.” 17 Na akĩoya gĩkombe, agĩcokia ngatho na akiuga: “Kei gĩkĩ mũnenganĩrĩrie, na o mũndũ akĩnyuĩre, 18 tondũ ngũmwĩra atĩrĩ, kuuma rĩu, ndikanyua ndibei rĩngĩ o nginya Ũthamaki wa Ngai ũũke.”

19 Ningĩ akĩoya mũgate, agĩcokia ngatho, akĩwenyũranga, akĩmanengera, na akĩmeera: “Ũyũ ũrũgamĩrĩire mwĩrĩ wakwa, ũrĩa ũkũneanwo nĩ ũndũ wanyu. Ĩkagai ũũ nĩguo mũndirikanage.” 20 Agĩcoka agĩka o ta ũguo na gĩkombe marĩkia kũrĩa irio cia hwaĩ-inĩ, akiuga: “Gĩkombe gĩkĩ kĩrũgamĩrĩire kĩrĩkanĩro kĩrĩa kĩerũ kũgerera thakame yakwa, ĩrĩa ĩgũitwo nĩ ũndũ wanyu.

21 “No rĩrĩ, ũrĩa ũkũngunyanĩra arĩ hamwe na niĩ metha-inĩ. 22 Nĩ gũkorũo Mũrũ wa mũndũ nĩ ekũmũtiga inyuĩ o ta ũrĩa gũtuĩtwo; o na kũrĩ ũguo-rĩ, kaĩ mũndũ ũrĩa ũkũmũkunyanĩra arĩ na haaro-ĩ!” 23 Nao makĩambĩrĩria kũũrania nũ gatagatĩ-inĩ kao weendaga gwĩka ũguo.

24 O na kũrĩ ũguo, makĩambĩrĩria gũkararania igũrũ rĩgiĩ nũ warĩ mũnene gũkĩra arĩa angĩ. 25 No we akĩmeera: “Athamaki a ndũrĩrĩ metũũgagĩria igũrũ rĩa andũ, nao arĩa marĩ na wathani igũrũ rĩa andũ magetwo Ateithania. 26 Ĩndĩ inyuĩ-rĩ, mũtiagĩrĩirũo gũkorũo mũtariĩ ũguo. No rekei ũrĩa mũnene gatagatĩ-inĩ kanyu atuĩke ta arĩ we mũnini, nake ũrĩa ũratongoria atuĩke ta arĩ we ũratungata. 27 Tondũ rĩrĩ, hihi nũ mũnene, nĩ ũrĩa ũikarĩte metha-inĩ kana nĩ ũrĩa ũratungatanĩra? Githĩ ti ũrĩa ũrĩ metha-inĩ? No niĩ ndĩ gatagatĩ-inĩ kanyu, ndariĩ ta ũrĩa ũratungatanĩra.

28 “No rĩrĩ, inyuĩ nĩ inyuĩ mũkoretwo hamwe na niĩ magerio-inĩ makwa; 29 na nĩ ndarĩkanĩra kĩrĩkanĩro na inyuĩ, o ta ũrĩa Awa aarĩkanĩire kĩrĩkanĩro na niĩ, kĩa ũthamaki, 30 nĩguo mũkaarĩagĩra na mũkanyuĩra metha-inĩ yakwa thĩinĩ wa Ũthamaki wakwa, na mũgaikaragĩra itĩ cia ũnene mũtuagĩre mĩhĩrĩga ĩrĩa ikũmi na ĩĩrĩ ya Isiraeli cira.

31 “Simoni, Simoni, Shaitani nĩ oigĩte atĩ nĩ arenda kũmũthũngũthia inyuothe o ta ngano. 32 No nĩ thaithĩte Ngai nĩ ũndũ waku nĩguo wĩtĩkio waku ndũkaage hinya; nawe wacoka, ĩkĩra ariũ a Ithe wanyu hinya.” 33 Nake akĩmwĩra: “Mwathani, nĩ ndĩhaarĩirie gũthiĩ hamwe nawe kĩoho-inĩ o na gĩkuũ-inĩ.” 34 No we akĩmũcokeria: “Ngũkwĩra atĩrĩ Petero, ũmũthĩ ũkũngaana maita matatũ ngũkũ ĩtanakũga.”

35 Ningĩ akĩmoria atĩrĩ: “Rĩrĩa ndaamũtũmire mũtarĩ na kamondo ka mbeca na mondo ya irio na iratũ-rĩ, nĩ harĩ kĩndũ mwagire?” Makĩmwĩra: “Aca!” 36 Nake akĩmeera: “No rĩu ũrĩa ũrĩ na kamondo ka mbeca nĩ akoe, na ũrĩa ũrĩ na mondo ya irio eke o taguo, nake ũrĩa ũtarĩ rũhiũ rwa njora endie nguo yake ya igũrũ agũre. 37 Tondũ ngũmwĩra atĩ, ũndũ ũrĩa mwandĩke no mũhaka ũhinge harĩ niĩ, atĩ, ‘Aataranĩirio hamwe na oini-watho.’ Nĩ gũkorũo ũndũ ũcio nĩ ũrahinga harĩ niĩ.” 38 Nao makĩmwĩra: “Mwathani, haha tũrĩ na hiũ igĩrĩ cia njora.” Nake akĩmeera: “Icio nĩ njiganu.”

39 Na akiuma, agĩthiĩ kĩrĩma-inĩ kĩa Mĩtamaiyũ o ta ũrĩa aamenyerete, nao arutwo makĩmũrũmĩrĩra. 40 Maakinya kuo, akĩmeera atĩrĩ: “Hoyagai nĩguo mũtikaingĩre magerio-inĩ.” 41 Na akĩehera hau maarĩ agĩthiĩ makinya maigana ũna, agĩturia maru na akĩambĩrĩria kũhoya, 42 akiuga: “Awa, angĩkorũo nĩ ũkwenda, njehereria gĩkombe gĩkĩ. O na kũrĩ ũguo, reke wendi waku wĩkĩke, no ti wakwa.” 43 Nake mũraika akiuma igũrũ na akĩmwĩkĩra hinya. 44 No aarĩ na ruo rũingĩ ũũ atĩ agĩthiĩ na mbere kũhoya na kĩyo makĩria; na thithino yake ĩkĩhaana ta mataata ma thakame magĩtaata thĩ. 45 Rĩrĩa aarĩkirie kũhoya na agĩthiĩ harĩ arutwo, agĩkora macũngĩte na manogete nĩ ũndũ wa kĩeha. 46 Akĩmoria atĩrĩ: “Mũrakoma nĩkĩ? Ũkĩrai na mũthiĩ na mbere kũhoya nĩguo mũtikaingĩre magerio-inĩ.”

47 Na hĩndĩ o ĩyo aaragia, kĩrĩndĩ gĩgĩũka gĩtongoretio nĩ mũndũ ũrĩa wetagwo Judasi, ũmwe wa arĩa Ikũmi na Erĩ, na agĩkuhĩrĩria Jesu, nĩguo amũmumunye. 48 No Jesu akĩmũũria atĩrĩ: “Judasi, ũrakunyanĩra Mũrũ wa mũndũ na njĩra ya kũmũmumunya?” 49 Rĩrĩa arĩa maarĩ hakuhĩ nake moonire ũrĩa gwathiaga, makĩmũũria: “Mwathani, tũmahũũre na rũhiũ rwa njora?” 50 O na ũmwe wao agĩtinia gũtũ kwa ũrĩo kwa ndungata ya mũthĩnjĩri-Ngai ũrĩa mũnene, gũkĩgwa. 51 No Jesu akiuga atĩrĩ: “Rĩu nĩ ũguo.” Na akĩhutia gũtũ kũu na akĩmũhonia. 52 Jesu agĩcoka akĩra mũthĩnjĩri-Ngai ũrĩa mũnene na arangĩri a hekarũ na athuri arĩa mookĩte kũmũnyita atĩrĩ: “Muoka kũrĩ niĩ na hiũ cia njora na njũgũma ta ndĩ mũtunyani? 53 Hĩndĩ ĩrĩa ndĩrakoragwo na inyuĩ thĩinĩ wa hekarũ o mũthenya, mũtiranyitaga. No gaka nĩ kahinda kanyu, na ka wathani wa nduma.”

54 Magĩcoka makĩmũnyita magĩthiĩ nake na makĩmũtwara thĩinĩ wa nyũmba ya mũthĩnjĩri-Ngai ũrĩa mũnene; no Petero nĩ aamarũmagĩrĩra arĩ haraya. 55 Rĩrĩa maakirie mwaki nja gatagatĩ na magĩikara thĩ, Petero aarĩ gatagatĩ-inĩ kao. 56 No rĩrĩa mũirĩtu ũmwe warĩ ndungata aamuonire aikarĩte thĩ agĩota mwaki, akĩmũbaara wega na akiuga: “O na mũndũ ũyũ oima hamwe nake.” 57 No agĩkaana, akiuga: “Mũtumia ũyũ, niĩ ndiũĩ mũndũ ũyũ.” 58 Thutha wa kahinda kanini, mũndũ ũngĩ akĩmuona na akĩmwĩra: “O nawe ũrĩ ũmwe wao.” No Petero akiuga: “Mũthuri ũyũ, niĩ ndirĩ ũmwe wao.” 59 Na thutha wa kĩndũ ithaa rĩmwe, mũndũ ũngĩ akĩambĩrĩria kuuga ũũ atĩtĩrithĩtie: “Ti itherũ o na mũndũ ũyũ oima hamwe nake, tondũ nĩ Mũgalili!” 60 No Petero akiuga: “Mũthuri ũyũ, niĩ ndiũĩ ũrĩa ũroiga.” Na o hĩndĩ ĩyo aaragia, ngũkũ ĩgĩkũga. 61 Hĩndĩ ĩyo Mwathani akĩĩhũgũra akĩrora Petero, nake Petero akĩririkana ciugo cia Mwathani rĩrĩa aamwĩrĩte: “Ũmũthĩ ngũkũ ĩtanakũga, ũkũngaana maita matatũ.” 62 Akiumagara na akĩrĩra arĩ na ruo rũnene.

63 Nao andũ arĩa maanyitĩte Jesu makĩambĩrĩria kũmũnyũrũria, makĩmũringaga; 64 na thutha wa kũmũhumbĩra ũthiũ, makamũũria: “Mũnabii ũyũ, ta twĩre nũ wakũringa?” 65 Na makiuga maũndũ mangĩ maingĩ ma kũmũruma.

66 Na gwakĩa, kĩama gĩa athuri, hamwe na athĩnjĩri-Ngai arĩa anene na andĩki-Watho magĩcokanĩrĩra makĩmũtwara nyũmba ya Sanhedrini* na makĩmwĩra: 67 “Akorũo wee nĩwe Kristo, twĩre.” No we akĩmeera: “O na ingĩmwĩra, gũtirĩ hĩndĩ mũngĩnjĩtĩkia. 68 Ningĩ-rĩ, o na ingĩmũũria kĩũria, mũtingĩnjokeria. 69 No rĩrĩ, kuuma rĩu, Mũrũ wa mũndũ arĩikaraga guoko-inĩ kwa ũrĩo kwa Ngai ũrĩa ũrĩ hinya.” 70 Maigua ũguo, othe makĩmũũria: “Kwoguo-rĩ, wee nĩwe Mũrũ wa Ngai?” Nake akĩmeera: “Inyuĩ ene nĩ mwoiga atĩ nĩ niĩ we.” 71 Nao makiuga atĩrĩ: “Tũrakĩbatara ũira ũngĩ wa kĩ? Nĩ gũkorũo ithuĩ ene nĩ tweiguĩra kuuma kanua-inĩ gake mwene.”