Luka

24 No mũthenya wa mbere wa kiumia,* magĩkinya mbĩrĩra-inĩ rũcinĩ tene mũno makuuĩte indo cianungaga wega* irĩa maaharĩirie. 2 No magĩkora ihiga rĩgaragarĩtio rĩkeherio mbĩrĩra-inĩ, 3 na rĩrĩa maatonyire, matiakorire mwĩrĩ wa Mwathani Jesu. 4 O hĩndĩ ĩyo maagegetio nĩ ũhoro ũcio-rĩ, arũme erĩ mehumbĩte nguo irakenga makĩrũgama hau maarĩ. 5 Atumia acio makĩmaka na makĩinamia mothiũ mao, nao arũme acio makĩmoria: “Nĩ kĩĩ kĩratũma mũcarie ũrĩa ũrĩ muoyo gatagatĩ-inĩ ka arĩa akuũ? 6 Ndarĩ haha, nĩ gũkorũo nĩ ariũkĩtio. Ta ririkanai ũrĩa aamwĩrire atanoima Galili, 7 atĩ Mũrũ wa mũndũ no mũhaka aneanwo moko-inĩ ma andũ ehia na oragĩrũo mũtĩ igũrũ na mũthenya wa gatatũ ariũke.” 8 Nao makĩririkana ciugo ciake, 9 na makĩhũndũka kuuma mbĩrĩra-inĩ na makĩheana ũhoro wa maũndũ macio mothe kũrĩ arĩa Ikũmi na Ũmwe o hamwe na acio angĩ othe. 10 Atumia acio maarĩ Mariamu Mũmagidali, Joana, na Mariamu nyina wa Jakubu. Ningĩ atumia arĩa angĩ maarĩ nao nĩ maaheire atũmwo ũhoro ũcio. 11 No makĩona maũndũ macio ta arĩ ũrimũ, na makĩrega gwĩtĩkia atumia acio.

12 No Petero agĩũkĩra agĩtengʼera mbĩrĩra-inĩ ĩyo, na rĩrĩa aainamĩrĩire agĩcũthĩrĩria, no nguo cia gatani onire. Kwoguo akiuma hau amakĩtio nĩ ũrĩa gwekĩkĩte.

13 No rĩrĩ, mũthenya o ũcio arutwo erĩ maarĩ njĩra-inĩ magĩthiĩ gĩcagi gĩetagwo Emau, kĩrĩa kĩarĩ mairo ta mũgwanja* kuuma Jerusalemu, 14 na nĩ kwarĩrĩria maaragĩrĩria maũndũ macio mothe meekĩkĩte.

15 Na hĩndĩ ĩyo maathiaga magĩteeretaga ũhoro wa maũndũ macio-rĩ, Jesu akĩmakinyĩra na akĩambĩrĩria gũtwarana nao, 16 no matiahotire kũmũmenya. 17 Nake akĩmoria atĩrĩ: “Nĩ maũndũ marĩkũ macio mũraarĩrĩria mũgĩthiĩ na njĩra?” Nao makĩrũgama marĩ na kĩeha. 18 Ũmwe wetagwo Kileopa akĩmũũria atĩrĩ: “Kaĩ wee ũrĩ mũgeni ũraikara wiki thĩinĩ wa Jerusalemu atĩ ndũĩ maũndũ marĩa mekĩkĩte kuo matukũ-inĩ maya?” 19 Nake akĩmoria: “Maũndũ marĩkũ?” Makĩmwĩra atĩrĩ: “Maũndũ megiĩ Jesu ũrĩa Mũnazarini, ũrĩa ũrarĩ mũnabii ũrĩ hinya harĩ ciĩko na ciugo maitho-inĩ ma Ngai na ma andũ othe; 20 na ũrĩa athĩnjĩri-Ngai arĩa anene na atongoria aitũ maamũneanire atuĩrũo kũũragwo, na makĩmũhũũrĩra mũtĩ-inĩ na mĩcumarĩ. 21 No tũrerĩgagĩrĩra atĩ mũndũ ũcio nĩwe ũkũhonokia Isiraeli. Na makĩria ma ũguo, ũyũ nĩguo mũthenya wa gatatũ kuuma maũndũ macio mekĩka. 22 Igũrũ rĩa ũguo-rĩ, atumia amwe gatagatĩ-inĩ gaitũ o nao nĩ matũgegirie, tondũ nĩ megũthiĩte mbĩrĩra-inĩ rũcinĩ tene 23 na rĩrĩa magire gũkora mwĩrĩ wake, moka makiugaga atĩ ningĩ nĩ mona araika, arĩa mameerire atĩ arĩ muoyo. 24 Thutha ũcio andũ amwe arĩa tuuma nao nĩ mathiire mbĩrĩra-inĩ ĩyo, na makora gũtariĩ o ta ũrĩa atumia acio mekugĩte, na matinamuona.”

25 Nĩ ũndũ ũcio akĩmeera: “Inyuĩ andũ aya mwagĩte ũũgĩ na aritũ ngoro harĩ gwĩtĩkia maũndũ mothe marĩa anabii marĩtie! 26 Githĩ Kristo ndaragĩrĩirũo nĩ kũnyarirũo na maũndũ macio nĩguo atonye riri-inĩ wake?” 27 Akĩambĩrĩria na Musa na Anabii othe, akĩmataarĩria maũndũ marĩa mamwĩgiĩ thĩinĩ wa Maandĩko mothe.

28 Mũthia-inĩ magĩkuhĩrĩria gĩcagi kĩrĩa maathiaga, nake akĩhaana ta ekũhĩtũka gĩcagi kĩu. 29 No makĩmũringĩrĩria aikare nao makĩmwĩra atĩrĩ: “Ikara gũkũ hamwe na ithuĩ, nĩ ũndũ kũrorete gũtuka na mũthenya ũrĩ hakuhĩ gũthira.” Nake akĩingĩra agĩikara nao. 30 Na rĩrĩa aaikarĩte metha-inĩ hamwe nao, akĩoya mũgate, akĩũrathima, akĩwenyũranga, na akĩmanengera. 31 Hĩndĩ ĩyo maitho mao makĩhingũka na makĩmenya atĩ nĩwe; no we akĩbuĩria magĩtiga kũmuona. 32 Na makĩĩrana atĩrĩ: “Na githĩ tũtikũhĩahĩaga ngoro agĩtwarĩria tũrĩ njĩra-inĩ, rĩrĩa egũtũtaaragĩria Maandĩko?” 33 Na magĩũkĩra o ithaa rĩu magĩcoka Jerusalemu, na magĩkora arĩa Ikũmi na Ũmwe na arĩa maagomanĩte hamwe nao, 34 arĩa mooigire atĩrĩ: “Nĩ ma Mwathani nĩ ariũkĩte, na nĩ oimĩrĩire Simoni!” 35 Nao magĩtaarĩria ũrĩa gwekĩkĩte marĩ njĩra-inĩ na ũrĩa maamũmenyire nĩ ũndũ wa kwenyũranga mũgate.

36 Na hĩndĩ ĩyo maaragia ũhoro wa maũndũ macio-rĩ, akĩrũgama gatagatĩ-inĩ kao akĩmeera: “Mũrogĩa na thayũ.” 37 No tondũ meeciragia nĩ kĩũmbe kĩa roho marona, makĩhahũka na makĩmaka. 38 Nĩ ũndũ ũcio akĩmoria: “Mũramaka nĩkĩ, na nĩ kĩĩ kĩratũma ngoro cianyu igĩe na nganja? 39 Ta rorai moko na magũrũ makwa muone atĩ nĩ niĩ; hutiai na muone, nĩ gũkorũo kĩũmbe kĩa roho gĩtirĩ nyama na mahĩndĩ ta ũũ mũrona ndariĩ.” 40 Na rĩrĩa aameraga ũguo, akĩmonia moko na magũrũ make. 41 No tondũ o na rĩo matietĩkirie nĩ ũndũ wa gũkena na kũgega-rĩ, akĩmoria atĩrĩ: “Mũrĩ na kĩndũ gĩa kũrĩa hau?” 42 Nao makĩmũnengera gĩcunjĩ gĩa thamaki hĩhie, 43 nake akĩoya na akĩrĩa makĩyonagĩra na maitho mao.

44 Agĩcoka akĩmeera atĩrĩ: “Ici nĩcio ciugo ciakwa iria ndamwĩrire rĩrĩa ndakoragwo hamwe na inyuĩ, atĩ maũndũ mothe marĩa mandĩkĩtwo igũrũ rĩakwa Watho-inĩ wa Musa na mabuku-inĩ ma Anabii na Thaburi no mũhaka mahinge.” 45 Agĩcoka akĩhingũra meciria mao biũ nĩguo mataũkĩrũo nĩ Maandĩko macio, 46 na akĩmeera, “Kwandĩkĩtwo atĩrĩ: atĩ Kristo nĩ angĩkaanyarirũo na mũthenya wa gatatũ ariũkio kuuma kũrĩ arĩa akuũ, 47 na nĩ ũndũ wa rĩĩtwa rĩake ndũrĩrĩ ciothe nĩ ingĩkaahunjĩrio, ciĩrire nĩguo cioherũo mehia​—kwambĩrĩria Jerusalemu. 48 Inyuĩ nĩ mũgaatuĩka aira a maũndũ macio. 49 Na rĩrĩ, nĩ ngũmũtũmĩra kĩrĩa Awa eeranĩire. O na kũrĩ ũguo, ikarai gũkũ itũũra-inĩ nginya rĩrĩa mũkaamũkĩra hinya kuuma igũrũ.”

50 Agĩcoka akĩmaruta nja akĩmatwara nginya Bethania, akĩoya moko make na igũrũ akĩmarathima. 51 Na o hĩndĩ ĩyo aamarathimaga, akĩmatiga akĩoywo agĩtwarũo igũrũ. 52 Nao makĩmũinamĩrĩra na magĩcoka Jerusalemu makenete mũno. 53 Na hĩndĩ ciothe maakoragwo thĩinĩ wa hekarũ makĩgooca Ngai.