Atũmwo
10 Na rĩrĩ, kũu Kaisarea nĩ kwarĩ mũndũ wetagwo Korinelio, na aarĩ mũnene wa thigari iria cietagwo mbũtũ ya Italia. 2 Aarĩ mũndũ wetigĩrĩte Ngai hamwe na andũ othe a nyũmba yake, na nĩ aaheaga andũ iheo nyingĩ cia tha na agathaitha Ngai ategũtigithĩria. 3 Kũrĩ ta thaa kenda cia mũthenya, akĩona wega kũgerera kĩoneki mũraika wa Ngai agĩũka harĩ we akĩmwĩra atĩrĩ: “Korinelio!” 4 Nake Korinelio akĩmũrora amakĩte akĩmũũria: “Nĩ kĩĩ Mwathani?” Akĩmũcokeria atĩrĩ: “Mahoya maku na iheo ciaku cia tha nĩ ciambatĩte mbere ya Ngai ihaana ta kĩndũ gĩa kĩririkano. 5 Nĩ ũndũ ũcio-rĩ, tũma andũ mathiĩ Jopa mageete Simoni ũrĩa wĩtagwo Petero. 6 Mũndũ ũcio anyitĩtwo ũgeni kwa mũtanduki njũa wĩtagwo Simoni, ũkoragwo na nyũmba hakuhĩ na iria.” 7 Na o hĩndĩ ĩyo mũraika ehera, agĩta ndungata ciake igĩrĩ hamwe na mũthigari ũmwe wetigĩrĩte Ngai kuuma harĩ arĩa maamũtungatagĩra, 8 akĩmataarĩria maũndũ mothe na akĩmatũma mathiĩ Jopa.
9 Rĩrĩa maathiaga na njĩra mũthenya ũrĩa warũmĩrĩire na magĩkuhĩrĩria itũũra rĩu, Petero agĩthiĩ nyũmba igũrũ ta thaa thita kũhoya. 10 No akĩigua ahũtiĩ mũno na nĩ eendaga kũrĩa. Na rĩrĩa irio ciahaaragĩrio, akĩona kĩoneki, 11 igũrũ rĩkĩhingũka na kĩndũ gĩatariĩ ta gĩtambaya kĩnene gĩa gatani gĩgĩikũrũkio nginya thĩ kĩnyitĩtwo mĩthia yakĩo ĩna; 12 na thĩinĩ wakĩo kwarĩ na nyamũ cia magũrũ mana cia mĩthemba yothe, na iria itambaga thĩ, na nyoni cia rĩera-inĩ. 13 Hĩndĩ ĩyo akĩigua mũgambo wamwĩra atĩrĩ: “Petero, ũkĩra ũthĩnje ũrĩe!” 14 No Petero akiuga: “Aca Mwathani, tondũ ndirĩ ndarĩa kĩndũ o na kĩ kĩrĩ thahu na gĩtarĩ gĩtheru.” 15 Mũgambo ũcio ũkĩmwĩra o rĩngĩ riita rĩa kerĩ: “Tiga kuuga atĩ indo iria Ngai atheretie irĩ na thahu.” 16 Gũgĩkĩka ũguo riita rĩa gatatũ, na o rĩo gĩtambaya kĩu gĩkĩambatio igũrũ.
17 O hĩndĩ ĩyo Petero arigĩtwo nĩ ũrĩa kĩoneki kĩu onete kĩoigĩte-rĩ, andũ arĩa maatũmĩtwo nĩ Korinelio makĩũria harĩa nyũmba ya Simoni yarĩ na makĩrũgama hau kĩhingo-inĩ. 18 Magĩĩtana na makĩũria kana Simoni ũrĩa wetagwo Petero aarĩ kũu. 19 Nake Petero o agĩĩcũrania ũhoro wa kĩoneki kĩu, roho ũkĩmwĩra: “Atĩrĩrĩ, nĩ harĩ arũme atatũ marakũũria. 20 Kwoguo ũkĩra, ũikũrũke ũthiĩ hamwe nao ũtarĩ na mathangania, nĩ gũkorũo nĩ niĩ ndĩmatũmĩte.” 21 Nake Petero agĩikũrũka harĩ arũme acio akĩmeera atĩrĩ: “Nĩ niĩ mũndũ ũrĩa mũracaria. Mũkĩte gwĩka atĩa hihi?” 22 Makĩmwĩra atĩrĩ: “Mũnene wa thigari wĩtagwo Korinelio, mũndũ mũthingu, wĩtigĩrĩte Ngai na wendetwo nĩ bũrũri wothe wa Ayahudi, araathirũo nĩ mũraika wa Ngai agũtũmanĩre ũthiĩ gwake nĩguo athikĩrĩrie ciugo ciaku.” 23 Agĩkĩmeera matonye maikare kũu marĩ ageni ake.
Mũthenya ũyũ ũngĩ agĩũkĩra agĩthiĩ nao, na ariũ a Ithe witũ amwe a Jopa magĩthiĩ hamwe nake. 24 Mũthenya ũrĩa warũmĩrĩire akĩingĩra Kaisarea. Korinelio nake nĩ aamatanyaga na nĩ eetĩte andũ a mbarĩ ciao na arata. 25 Rĩrĩa Petero aatonyaga, Korinelio akĩmũtũnga, akĩgwa thĩ magũrũ-inĩ make, na akĩmũinamĩrĩra. 26 No Petero akĩmũrũgamia akĩmwĩra: “Ũkĩra; nĩ gũkorũo o na niĩ ndĩ o mũndũ.” 27 Na o akĩaragia nake, akĩingĩra thĩinĩ agĩkora andũ aingĩ magomanĩte. 28 Akĩmeera atĩrĩ: “Nĩ mũĩ wega atĩ Ayahudi matiĩtĩkĩrĩtio nĩ Watho kũnyitanĩra kana gũkuhĩrĩria mũndũ wa rũrĩrĩ rũngĩ, o na kũrĩ ũguo Ngai nĩ anjĩrĩte ndikone mũndũ o na ũmwe arĩ na thahu kana atarĩ mũtheru. 29 Na nĩkĩo hĩndĩ ĩrĩa ndĩratũmanĩirũo, ndoka itegũkararia. Rĩu-rĩ, mũrandũmanĩire nĩkĩ?”
30 Hĩndĩ ĩyo Korinelio akiuga: “Thikũ inya hĩtũku thaa o ta ici, ndaahoyaga ndĩ gwakwa nyũmba thaa kenda; na o rĩo, mũndũ wehumbĩte nguo ciahenagia akĩrũgama mbere yakwa 31 akĩnjĩra: ‘Korinelio, mahoya maku nĩ maiguĩtwo, na iheo ciaku cia tha nĩ iririkanĩtwo nĩ Ngai. 32 Nĩ ũndũ ũcio-rĩ, tũma andũ mathiĩ Jopa mageete Simoni ũrĩa wĩtagwo Petero. Mũndũ ũcio anyitĩtwo ũgeni kwa mũtanduki njũa wĩtagwo Simoni, ũkoragwo na nyũmba hakuhĩ na iria.’ 33 O hĩndĩ ĩyo ngĩgũtũmanĩra, na nĩ weka wega nĩ gũka. Ithuothe rĩu tũrĩ haha mbere ya Ngai nĩguo tũigue maũndũ mothe marĩa wathĩtwo nĩ Jehova* ũtwĩre.”
34 Nĩ ũndũ ũcio Petero akĩambĩrĩria kwaria, akiuga: “Rĩu nĩ ndaũkĩirũo wega atĩ Ngai ndarĩ mũthutũkanio, 35 no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we. 36 Aatũmire ndũmĩrĩri kũrĩ ciana cia Isiraeli agĩcimenyithia ũhoro ũrĩa mwega wa thayũ kũgerera harĩ Jesu Kristo—ũcio nĩwe Mwathani wa andũ othe. 37 Nĩ mũĩ maũndũ marĩa maaririo Judea guothe, kwambĩrĩria Galili thutha wa Johana kũhunjia ũhoro wa ũbatithio: 38 ũhoro wĩgiĩ Jesu wa kuuma Nazarethi, ũrĩa Ngai aamwamũrire kũgerera roho mũtheru na hinya, na agĩthiũrũrũka bũrũri agĩĩkaga maũndũ mega na akĩhonagia arĩa othe maahinyĩrĩirio nĩ Mũcukani, tondũ Ngai aarĩ hamwe nake. 39 Na ithuĩ tũrĩ aira a maũndũ mothe marĩa eekire bũrũri-inĩ wa Ayahudi na Jerusalemu, no nĩ maamũcuuririe mũtĩ igũrũ, makĩmũũraga. 40 Na mũthenya wa gatatũ Ngai akĩmũriũkia na agĩtũma oneke nĩ andũ, 41 na ti andũ othe, no nĩ ithuĩ, aira arĩa maathuurĩtwo nĩ Ngai o mbere, arĩa maarĩire na makĩnyua hamwe nake hĩndĩ ĩrĩa aariũkirio kuuma kũrĩ arĩa akuũ. 42 Ningĩ nĩ aatwathire atĩ tũhunjĩrie andũ na tũrute ũira kĩhinyio atĩ ũcio nĩwe Ngai aamũrire atuĩke mũtuanĩri cira wa arĩa marĩ muoyo na arĩa akuũ. 43 Anabii othe nĩ maaririe ũhoro ũmwĩgiĩ atĩ mũndũ o wothe ũmwĩtĩkĩtie nĩ ohagĩrũo mehia kũgerera rĩĩtwa rĩake.”
44 Hĩndĩ o ĩyo Petero aathiaga na mbere kũheana ũhoro ũcio, arĩa othe maamũthikagĩrĩria makĩamũkĩra roho mũtheru. 45 Nao arutwo* arĩa mookĩte hamwe na Petero makĩgega tondũ andũ a ndũrĩrĩ o nao nĩ maaheagwo kĩheo kĩa roho mũtheru. 46 Nĩ gũkorũo nĩ maamaiguire makĩaria na thiomi ngʼeni na makĩgooca Ngai. Nake Petero akĩmeera atĩrĩ: 47 “Hihi harĩ mũndũ ũngĩgiria aya maamũkĩra roho mũtheru o ta ithuĩ mabatithio na maĩ?” 48 Nĩ ũndũ ũcio agĩathana atĩ mabatithio thĩinĩ wa rĩĩtwa rĩa Jesu Kristo. Magĩcoka makĩmũũria aikare hamwe nao matukũ maigana ũna.