Atũmwo
17 Ningĩ magĩtuĩkanĩria Amfipoli na Apolonia, magĩkinya Thesalonike, kũrĩa kwarĩ na thunagogi ya Ayahudi. 2 Paulo agĩtonya thĩinĩ o ta ũrĩa aamenyerete, na kwa ihinda rĩa thabatũ ithatũ akĩhũthĩra ihooto ciumĩte Maandĩko-inĩ kũmaiguithia, 3 akĩmataaragĩria na akĩmonagia na njĩra ya maandĩko atĩ no mũhaka Kristo angĩanyarirĩkire na ariũkio kuuma kũrĩ arĩa akuũ, akiugaga atĩrĩ: “Ũyũ nĩwe Kristo, Jesu ũyũ ndĩramũhunjĩria ũhoro wake.” 4 Nĩ ũndũ ũcio, andũ amwe magĩtuĩka etĩkia na makĩnyitanĩra na Paulo na Sila, na noguo Angiriki aingĩ arĩa maathathayagia Ngai meekire o hamwe na atumia aingĩ arĩa marĩ igweta.
5 No Ayahudi makĩigua ũiru, magĩcokanĩrĩria hamwe arũme maigana ũna oru kũu thoko-inĩ arĩa matarĩ wĩra maarutaga, makĩambĩrĩria ngũĩ thĩinĩ wa itũũra. Makĩingĩra na gĩthũri nyũmba kwa Jasoni makiugaga atĩ Paulo na Sila maneanwo nja kũrĩ kĩrĩndĩ. 6 No rĩrĩa maamaagire, magĩkururia Jasoni na ariũ amwe a Ithe witũ makĩmatwara kũrĩ anene a itũũra, makiugaga: “Andũ arĩa marehete thĩna thĩ yothe nĩ makinyĩte gũkũ o nakuo, 7 na Jasoni nĩ amanyitĩte ũgeni gwake. Andũ aya othe nĩ mareganaga na mawatho ma Kaisari, makoiga atĩ nĩ kũrĩ mũthamaki ũngĩ, nĩwe Jesu.” 8 Rĩrĩa kĩrĩndĩ na anene a itũũra maaiguire ũguo, makĩrakara; 9 na rĩrĩa Jasoni na acio angĩ maamanengerire mbeca cia kũmarũgamĩrĩra, makĩmareka mathiĩ.
10 Ũtukũ o ũcio ariũ a Ithe witũ magĩtũma Paulo na Sila mathiĩ Beroia. Rĩrĩa maakinyire, makĩingĩra thĩinĩ wa thunagogi ya Ayahudi. 11 Na rĩrĩ, andũ a kũu maarĩ na ngoro njega gũkĩra a Thesalonike, nĩ gũkorũo nĩ maamũkagĩra kiugo meciria-inĩ marĩ na wendi mũnene, na nĩ maathuthuragia Maandĩko o mũthenya na njĩra ndikĩru nĩguo mone kana maũndũ macio nĩguo maatariĩ. 12 Nĩ ũndũ ũcio, andũ aingĩ magĩtuĩka etĩkia, na noguo nginya atumia aingĩ arĩa maarĩ igweta a Ngiriki o ũndũ ũmwe na arũme maigana ũna. 13 No hĩndĩ ĩrĩa Ayahudi a kuuma Thesalonike maamenyire Paulo nĩ aahunjagia kiugo kĩa Ngai kũu Beroia, magĩũka kuo nĩguo macocere na mathogothe kĩrĩndĩ. 14 Nao ariũ a Ithe witũ makĩra Paulo o rĩo athiĩ iria-inĩ, no Sila na Timotheo magĩtigwo kũu. 15 Na rĩrĩ, arĩa maarĩ hamwe na Paulo makĩmũtwara nginya Athene, no akĩmeera atĩ Sila na Timotheo nĩ magĩrĩirũo gũthiĩ kũrĩ we narua o ũrĩa kũngĩahotekire, magĩcoka makiumagara.
16 Na hĩndĩ ĩrĩa Paulo aametereire kũu Athene-rĩ, akĩrakara mũno ona atĩ itũũra rĩu rĩaiyũire mĩhianano. 17 Nĩ ũndũ ũcio akĩambĩrĩria kũhũthĩra ihooto kũiguithia Ayahudi thunagogi-inĩ o hamwe na andũ angĩ arĩa maathathayagia Ngai, na o mũthenya akaiguithia arĩa maakoragwo thoko-inĩ. 18 No andũ amwe arĩa maarũmagĩrĩra ũrutani wa Epikurio na Sitoiko makĩambĩrĩria gũkararania nake, amwe ao makoria: “Mũhũhũtĩki ũyũ arenda gũtwĩra atĩa?” Nao angĩ makoiga: “Aroneka ta arĩ mũhunjia wa ngai ngʼeni.” Moigaga ũguo tondũ Paulo nĩ aahunjagia ũhoro ũrĩa mwega wa Jesu na wĩgiĩ kũriũka. 19 Nĩ ũndũ ũcio makĩmũnyita na makĩmũtwara Areopago,* makĩmwĩra: “Ta tũtaarĩrie ũrutani ũcio mwerũ ũraria ũhoro waguo nĩ ũrĩkũ? 20 Nĩ gũkorũo ũraria maũndũ tũtarĩ twaigua, na tũrenda kũmenya wega ũrĩa maũndũ macio moigĩte.” 21 Nĩ gũkorũo andũ othe a Athene na arĩa mooimaga kũngĩ* gũtirĩ ũndũ ũngĩ meekaga tiga kũheana na gũthikĩrĩria maũndũ mageni. 22 Hĩndĩ ĩyo Paulo akĩrũgama Areopago* gatagatĩ akiuga:
“Athuri aya a Athene, nguona atĩ maũndũ-inĩ mothe inyuĩ mũrĩ etigĩri ngai gũkĩra andũ arĩa angĩ. 23 Ta rĩu-rĩ, hĩndĩ ĩrĩa ndĩrahĩtũkaga na ngarora na kinyi indo cianyu cia ũthathaiya, ndĩronire nginya kĩgongona kĩandĩkĩtwo ‘Kũrĩ Ngai Ũtoĩo.’ Hakĩrĩ ũguo-rĩ, ũcio mũthathayagia mũtekũmũmenya nĩwe ndĩramũmenyithia. 24 Ngai ũrĩa wombire thĩ na indo iria ciothe irĩ thĩinĩ wayo, arĩ we Mwathani wa igũrũ na thĩ-rĩ, ndaikaraga thĩinĩ wa hekarũ ciakĩtwo na moko; 25 o na ndatungatagĩrũo na moko ma andũ ta kũrĩ kĩndũ arabatara, nĩ gũkorũo we mwene nĩwe ũheaga andũ othe muoyo na mĩhũmũ na indo ciothe. 26 Na ombire andũ a ndũrĩrĩ ciothe kuumana na mũndũ ũmwe nĩguo maikare kũndũ guothe thĩinĩ wa thĩ, agĩtua mahinda marĩa maamũre na agĩkĩra mĩhaka ya kũrĩa andũ megũikara, 27 nĩ getha macarie Ngai, na meke ũguo na kĩyo, na mamuone, nĩ gũkorũo ndarĩ haraya na mũndũ o na ũmwe witũ. 28 Nĩ gũkorũo nĩwe ũtũmaga tũkorũo muoyo, tũkahota gwĩtwara, na tũgakorũo ho, o ta ũrĩa andĩki amwe anyu moigĩte, ‘Tondũ o na ithuĩ tũrĩ ciana ciake.’
29 “Kwoguo-rĩ, tondũ ithuĩ nĩ ithuĩ ciana cia Ngai, tũtiagĩrĩirũo gwĩciria atĩ Ngai ahaana ta thahabu kana betha kana ihiga, kana kĩndũ gĩicũhĩtio na ũũgĩ wa andũ. 30 Atĩrĩrĩ, Ngai ndaatindanĩire na mahinda macio ma kwaga ũmenyo; no rĩu nĩ aramenyithia andũ othe kũndũ guothe atĩ magĩrĩirũo kwĩrira. 31 Tondũ nĩ atuĩte mũthenya ũrĩa agaacirithia thĩ na kĩhooto akĩhũthĩra mũndũ ũrĩa amũrĩte, na nĩ ekĩrĩte ũndũ ũcio mũkonde na njĩra ya kũmũriũkia kuuma kũrĩ arĩa akuũ.”
32 Na rĩrĩ, hĩndĩ ĩrĩa maaiguire ũhoro wa kũriũkio, amwe makĩambĩrĩria kũmũnyũrũria, nao arĩa angĩ makiuga: “Nĩ tũrĩgũthikĩrĩria ũndũ-inĩ ũcio hĩndĩ ĩngĩ.” 33 Kwoguo Paulo akĩmatiga, 34 no andũ amwe makĩnyitanĩra nake na magĩtuĩka etĩkia. Amwe ao maarĩ Dionusio, ũrĩa warĩ mũcirithania thĩinĩ wa igooti rĩa Areopago,* na mũtumia wetagwo Damari, na angĩ.