Atũmwo
20 Rĩrĩa ngũĩ yathirire, Paulo agĩtũmanĩra arutwo, na thutha wa kũmomĩrĩria, akĩmoigĩra ũhoro na akĩambĩrĩria rũgendo rwa gũthiĩ Makedonia. 2 Na thutha wa gũtuĩkanĩria icigo-inĩ icio ciothe akĩũmagĩrĩria mũno arĩa maaikaraga kũu, agĩkinya Ngiriki. 3 Agĩikara kuo mĩeri ĩtatũ, no tondũ Ayahudi nĩ maathugundaga kũmwĩka ũũru rĩrĩa aarĩ hakuhĩ gũtonya meri athiĩ Siria, agĩtua itua rĩa gũcoka agereire Makedonia. 4 Maathiire na Sopatiro mũrũ wa Puro wa kuuma Beroia, Arisitariko na Sekundo a kuuma Thesalonike, Gaiyo wa kuuma Deribe, Timotheo, o hamwe na Tukiko na Terofimo a kuuma mwena wa Asia. 5 Andũ acio magĩthiĩ mbere itũ magĩtweterera Teroa; 6 no thikũ cia Mĩgate Ĩtarĩ Mĩimbie ciathira, tũkiuma Filipi na meri, na thutha wa thikũ ithano tũkĩmakora Teroa, na tũgĩikara kũu thikũ mũgwanja.
7 Na rĩrĩ, hĩndĩ ĩrĩa twacemanĩtie nĩguo tũrĩe irio mũthenya wa mbere wa kiumia,* Paulo akĩambĩrĩria kwarĩria arĩa maacemanĩtie kũu tondũ nĩ aatanyĩte gũthiĩ mũthenya ũyũ ũngĩ; na agĩthiĩ na mbere kwaria o nginya ũtukũ gatagatĩ. 8 Na kũu twacemanĩtie nyũmba ya igũrũ nĩ kwarĩ na matawa maingĩ. 9 Hĩndĩ ĩrĩa Paulo aathiire o na mbere kwaria, mwanake ũmwe wetagwo Eutuko waikarĩte ndirica-inĩ akĩnyitwo nĩ toro mũritũ, na rĩrĩa aatooririo nĩguo, akĩgwa kuuma ngoroba ya gatatũ agĩkua. 10 No Paulo agĩikũrũka, akĩmũkomera na akĩmũhĩmbĩria, akiuga: “Tigai kũmaka, nĩ gũkorũo arĩ muoyo.” 11 Agĩcoka akĩambata na akĩambĩrĩria kwenyũranga mĩgate na akĩrĩa. Na rĩrĩ, agĩthiĩ na mbere kũmaarĩria nginya gũgĩkĩa, thutha ũcio akiumagara. 12 Nao makĩinũkia mwanake ũcio arĩ muoyo makenete mũno.
13 Tũkĩingĩra meri tũkĩamba gũthiĩ Aso, kũu nĩkuo twarĩ tuoe Paulo o ta ũrĩa aatwĩrĩte, tondũ aatanyĩte gũthiĩ kuo magũrũ. 14 Hĩndĩ ĩrĩa aatũkorire kũu Aso, tũkĩmũkuua na meri tũgĩthiĩ Mitulene. 15 Na mũthenya ũyũ ũngĩ tũkĩhaica meri tũkiuma kũu, tũgĩthiĩ tũgĩkinya mũrĩmo ũrĩa ũngĩ wa Kio, no mũthenya ũrĩa warũmĩrĩire, tũkĩrũgama Samo, naguo mũthenya ũcio ũngĩ tũgĩkinya Mileto. 16 Paulo nĩ aatuĩte kwaga kũingĩra Efeso nĩguo ndakahũthĩre mahinda mwena ũcio wa Asia, tondũ nĩ eehĩkaga nĩguo kũngĩahotekire, akinye Jerusalemu mũthenya wa Gĩathĩ kĩa Pentekoste.
17 O na kũrĩ ũguo, arĩ Mileto agĩtũmana Efeso agĩta athuri a kĩũngano. 18 Nao maathiĩ kũrĩ we, akĩmeera atĩrĩ: “Inyuĩ nĩ mũĩ wega ũrĩa ndaatũũraga hamwe na inyuĩ kuuma mũthenya wa mbere ũrĩa ndokire mwena ũyũ wa Asia, 19 ũrĩa ndaatungatagĩra Mwathani ndĩ na wĩnyihia mũingĩ na ndĩ na maithori na magerio marĩa mooimanaga na Ayahudi tondũ nĩ maathugundaga kũnjĩka ũũru, 20 na inyuĩ ndiagire kũmwĩra maũndũ o mothe marĩa mangĩamũgunire kana ngĩaga kũmũruta mũingĩ-inĩ na nyũmba o nyũmba. 21 No ndaarutaga ũira kĩhinyio kũrĩ Ayahudi na Angiriki atĩ merire, macokerere Ngai na magĩe na wĩtĩkio thĩinĩ wa Mwathani witũ Jesu. 22 Rĩu-rĩ, thiĩte Jerusalemu nĩ ũndũ wa gwathĩkĩra roho, o na gũtuĩka ndiũĩ maũndũ marĩa ngũkorana namo kũu, 23 o tiga atĩ roho mũtheru nĩ ũnjĩraga maita maingĩ ndĩ matũũra-inĩ mothe nĩ ngũikio njera na nyarirũo. 24 No rĩrĩ, ndionaga muoyo wakwa mwene ũrĩ wa bata harĩ niĩ, ũndũ ũrĩa wa bata nĩ atĩ ndĩkie ihenya rĩakwa na ũtungata ũrĩa ndaaheirũo nĩ Mwathani Jesu, wa kũruta ũira kĩhinyio wĩgiĩ ũhoro ũrĩa mwega wa ũtugi mũnene wa Ngai.
25 “Na atĩrĩ, nĩ njũĩ atĩ gũtirĩ o na ũmwe gatagatĩ-inĩ kanyu ndaahunjĩirie ũhoro wa Ũthamaki ũkoona ũthiũ wakwa rĩngĩ. 26 Kwoguo ndĩmwĩtĩte nĩguo mũtuĩke aira ũmũthĩ ũyũ atĩ niĩ ndikoorio thakame ya mũndũ o na ũmwe, 27 nĩ gũkorũo ndirĩ ndaaga kũmwĩra maũndũ mothe megiĩ wendi* wa Ngai. 28 Mwĩmenyererei inyuĩ ene na mũmenyerere rũũru ruothe, rũrĩa roho mũtheru ũmwamũrĩte inyuĩ mũtuĩke arori a ruo, nĩguo mũrĩithagie kĩũngano kĩa Ngai, kĩrĩa aagũrire na thakame ya Mũrũ wake mwene. 29 Nĩ njũĩ atĩ ndarĩkia gũthiĩ, njũi ndĩani nĩ ikaingĩra gatagatĩ-inĩ kanyu na itikaiguĩra rũũru tha, 30 na gatagatĩ-inĩ kanyu inyuĩ ene nĩ gũkaagĩa andũ makaaragia maũndũ mahĩtanu nĩguo magucĩrĩrie arutwo mamarũmĩrĩre.
31 “Nĩ ũndũ ũcio-rĩ, ikaragai mwĩiguĩte, na mũtikanariganĩrũo atĩ ihinda-inĩ rĩa mĩaka ĩtatũ ũtukũ na mũthenya, ndiatigire gũtaara o mũndũ gatagatĩ-inĩ kanyu ndĩ na maithori. 32 Rĩu-rĩ, mũrogitĩrũo nĩ Ngai na kiugo gĩa ũtugi wake mũnene, kĩrĩa kĩngĩmwĩkĩra hinya na kĩmũhe igai gatagatĩ-inĩ ka arĩa othe atheru. 33 Ndirĩ nderirĩria betha kana thahabu kana nguo ya mũndũ o na ũmwe. 34 Inyuĩ ene nĩ mũĩ atĩ ndaatũire ndutaga wĩra na moko maya nĩguo hingie mabataro makwa o hamwe na ma arĩa makoretwo na niĩ. 35 Nĩ ndĩmuonereirie maũndũ-inĩ mothe atĩ no mũhaka mũrute wĩra na kĩyo nĩguo mũteithagie arĩa matarĩ na hinya na no mũhaka mũririkanage ciugo cia Mwathani Jesu, hĩndĩ ĩrĩa we mwene oigire ũũ: ‘Kũheana nĩ kũrĩ gĩkeno kĩnene gũkĩra kwamũkĩra.’”
36 Arĩkia kuuga maũndũ macio, agĩturia maru hamwe nao othe na akĩhoya. 37 Na rĩrĩ, othe makĩrĩra mũno, makĩhĩmbĩria Paulo na makĩmũmumunya, 38 nĩ gũkorũo nĩ maanyitĩtwo nĩ kĩeha nĩ ũrĩa aamerĩte atĩ matingĩkona ũthiũ wake rĩngĩ. Magĩcoka makĩmuumagaria nginya meri-inĩ.