Atũmwo
3 Na rĩrĩ, Petero na Johana maambataga hekarũ-inĩ nĩ gũkorũo kwarĩ ithaa rĩa mahoya, thaa kenda cia mũthenya, 2 na mũndũ ũmwe waciarĩtwo arĩ muonju magũrũ nĩ gũkuuo aakuuĩtwo. O mũthenya andũ acio maamũigaga hakuhĩ na kĩhingo kĩa hekarũ kĩrĩa gĩetagwo Kĩhingo Gĩthaka, nĩguo ahoe iheo cia tha kuuma kũrĩ andũ arĩa maatonyaga hekarũ-inĩ. 3 Rĩrĩa onire Petero na Johana makĩenda gũtonya thĩinĩ wa hekarũ, akĩambĩrĩria kũmahoya iheo cia tha. 4 No Petero na Johana makĩmũrora makĩmwĩra atĩrĩ: “Ta tũrore.” 5 Nĩ ũndũ ũcio akĩmarora, atanyĩte kũheo kĩndũ nĩo. 6 O na kũrĩ ũguo, Petero akĩmwĩra: “Niĩ ndirĩ na betha kana thahabu, no kĩrĩa ndĩ na kĩo nĩkĩo ngũkũhe. Thĩinĩ wa rĩĩtwa rĩa Jesu Kristo ũrĩa Mũnazarini, rũgama wĩtware!” 7 Oiga ũguo akĩmũnyita guoko kwa ũrĩo akĩmũũkĩria. Na hĩndĩ o ĩyo makinya na thũngʼwa ciake ikĩgĩa na hinya; 8 akĩrũgama o rĩmwe na magũrũ make, akĩambĩrĩria gwĩtwara na agĩthiĩ hamwe nao hekarũ-inĩ akĩrũgarũgaga na akĩgoocaga Ngai. 9 Na andũ othe makĩmuona agĩĩtwara akĩgoocaga Ngai. 10 Nao makĩmũmenya, atĩ nĩwe ũraikaraga thĩ akĩhoyaga iheo cia tha kĩhingo-inĩ kĩrĩa gĩetagwo Kĩhingo Gĩthaka kĩa hekarũ, makĩgega na magĩkenio mũno nĩ ũndũ ũcio wekĩkĩte harĩ we.
11 Na rĩrĩ, mũndũ ũcio o anyitĩte Petero na Johana-rĩ, andũ othe magĩtengʼera harĩ o, harĩa heetagwo Gĩthaku gĩa Suleimani, magegete mũno. 12 Rĩrĩa Petero onire ũguo, akĩũria andũ acio atĩrĩ: “Andũ aya a Isiraeli, nĩ kĩĩ gĩatũma mũmakio mũno nĩ ũndũ ũyũ, ningĩ mũratũrora mũgegete nĩkĩ ta arĩ hinya witũ kana wĩrutĩri witũ harĩ Ngai watũhotithia gũtũma mũndũ ũyũ etware? 13 Ngai wa Iburahimu, na wa Isaaka na wa Jakubu, Ngai wa maithe maitũ ma tene, nĩ atũũgĩrĩtie Ndungata yake Jesu, ũrĩa mwaneanire na mũkĩmũkaana mũrĩ mbere ya Pilato, o na gũtuĩka Pilato nĩ aatuĩte atĩ nĩ ekũmuohora. 14 Mũgĩkaana mũndũ ũcio mũtheru na mũthingu, mũkiuga muohorerũo mũndũ warĩ mũũragani, 15 ĩndĩ mũkĩũraga Mũtongoria Ũrĩa Mũnene wa muoyo. No Ngai akĩmũriũkia kuuma kũrĩ arĩa akuũ, na ithuĩ tũrĩ aira a ũndũ ũcio. 16 Na kũgerera rĩĩtwa rĩake, na wĩtĩkio witũ harĩ rĩĩtwa rĩake, mũndũ ũyũ mũrona na nĩ mũmũĩ nĩ ahona. Wĩtĩkio witũ harĩ we nĩguo watũma mũndũ ũyũ ahone inyuothe mũkĩĩyonagĩra. 17 Na rĩrĩ, ariũ a Ithe witũ, nĩ njũĩ atĩ mwekire ũguo nĩ kũrigwo, o ta ũrĩa atongoria anyu meekire. 18 No na njĩra ĩyo Ngai nĩ ahingĩtie maũndũ marĩa aamenyithanirie o mbere kũgerera harĩ anabii ake othe, atĩ Kristo wake nĩ angĩkaanyarirĩka.
19 “Nĩ ũndũ ũcio-rĩ, mwĩrirei, na mũgarũrũke nĩguo mehia manyu marihũrũo, nĩguo hagĩe na mahinda ma gwĩkĩrũo hinya moimĩte kũrĩ Jehova* we mwene 20 na amũtũmĩre Kristo ũrĩa aamũrĩte nĩ ũndũ wanyu, na nĩwe Jesu. 21 Igũrũ no mũhaka rĩikare nake thĩinĩ warĩo nginya ihinda rĩa kwerũhia indo ciothe rĩkinye, rĩrĩa Ngai aaririe ũhoro warĩo kũgerera anabii ake a tene. 22 Ti itherũ Musa oigire atĩrĩ: ‘Jehova* Ngai wanyu nĩ akaamũrũgamĩria mũnabii ũtariĩ ta niĩ kuuma kũrĩ ariũ a Ithe wanyu. Na no mũhaka mũgaathikĩrĩria ũndũ ũrĩa wothe akaamwĩra. 23 Na mũndũ ũrĩa wothe ũtagathikĩrĩria Mũnabii ũcio nĩ akooragwo eherio biũ gatagatĩ-inĩ ka andũ.’ 24 Anabii othe kuuma Samueli na arĩa maamũrũmĩrĩire, arĩa othe marĩtie-rĩ, nĩ maamenyithanirie matekũhithĩrĩra ũhoro wĩgiĩ matukũ macio. 25 Inyuĩ nĩ inyuĩ ariũ a anabii acio na agai a kĩrĩkanĩro kĩrĩa Ngai aarĩkanĩire na maithe manyu ma tene, akĩra Iburahimu atĩrĩ: ‘Na kũgerera harĩ rũciaro rwaku, famĩlĩ ciothe cia thĩ nĩ ikaarathimwo.’ 26 Ngai arĩkia kwarahũra Ndungata yake, aambire kũmĩtũma kũrĩ inyuĩ ĩmũrathime na njĩra ya kũmũgarũra inyuothe kuuma ciĩko-inĩ cianyu njũru.”