Aroma
1 Nĩ niĩ Paulo, ngombo ya Kristo Jesu, ũrĩa wetirũo atuĩke mũtũmwo na agĩthuurũo ahunjagie ũhoro ũrĩa mwega wa Ngai, 2 ũhoro ũrĩa eeranĩire o mbere kũgerera anabii ake thĩinĩ wa Maandĩko marĩa matheru, 3 wĩgiĩ Mũrũ wake, ũrĩa woimire rũciaro-inĩ rwa Daudi na njĩra ya kĩĩmwĩrĩ, 4 no nĩ aamenyithanirio nĩ roho mũtheru atĩ nĩ Mũrũ wa Ngai rĩrĩa aariũkirio kuuma kũrĩ arĩa akuũ. Ũcio nĩwe Jesu Kristo, Mwathani witũ. 5 Kũgerera harĩ we nĩ twaamũkĩrire ũtugi mũnene na tũgĩtuwo atũmwo nĩguo andũ a ndũrĩrĩ ciothe monanie wĩtĩkio na mamwathĩkĩre nĩ getha makumagie rĩĩtwa rĩake, 6 ndũrĩrĩ-inĩ iria o na inyuĩ mwĩtĩtwo mũtuĩke a Jesu Kristo— 7 kũrĩ inyuothe mũrĩ Roma mwendetwo nĩ Ngai, inyuĩ mwĩtĩtwo mũtuĩke aamũre:
Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo.
8 Wa mbere, ngwenda gũcokeria Ngai wakwa Ngatho kũgerera harĩ Jesu Kristo nĩ ũndũ wanyu inyuothe, tondũ wĩtĩkio wanyu nĩ ũraario ũhoro waguo thĩinĩ wa thĩ yothe. 9 Tondũ rĩrĩ, Ngai ũrĩa ndutagĩra ũtungata mũtheru na ngoro yothe na njĩra ya kũhunjia ũhoro ũrĩa mwega wa Mũrũwe, nĩ mũira wakwa atĩ inyuĩ ndirĩ ndaaga kũmũgweta mahoya-inĩ makwa, 10 ngĩthaithanaga atĩ angĩkorũo rĩu no kũhoteke, njũke kũrĩ inyuĩ nĩ ũndũ wa wendi wa Ngai. 11 Nĩ gũkorũo nĩ ndĩrerirĩria kũmuona, nĩguo ndĩmũgaĩre iheo cia kĩĩroho nĩ getha mũgĩe na hinya; 12 kana rĩrĩ, twĩkĩrane hinya kũgerera wĩtĩkio, wanyu na wakwa.
13 No rĩrĩ, ariũ a Ithe witũ, ngwenda mũmenye atĩ, nĩ mahinda maingĩ ndanenda gũka kũrĩ inyuĩ—no ngoretwo ngĩgirĩrĩrio nginyagia rĩu—nĩ getha o na ngĩe na maciaro thĩinĩ wanyu o ta ũrĩa ngĩte namo thĩinĩ wa andũ arĩa angĩ a ndũrĩrĩ. 14 Ndĩ na thiirĩ kũrĩ Angiriki na arĩa matarĩ Angiriki, kũrĩ arĩa ogĩ na arĩa matarĩ athomu; 15 nĩ ũndũ ũcio nĩ ndĩrerirĩria mũno kũmũhunjĩria ũhoro ũrĩa mwega o na inyuĩ mũrĩ kũu Roma. 16 Tondũ ndiconokagĩra ũhoro ũrĩa mwega; ũcio nĩguo hinya wa Ngai wa kũhonokia mũndũ o wothe ũrĩ na wĩtĩkio, mbere kũrĩ Ayahudi na ningĩ kũrĩ Angiriki. 17 Nĩ gũkorũo thĩinĩ waguo ũthingu wa Ngai nĩ ũguũragio kũgerera wĩtĩkio na nĩ ũndũ wa wĩtĩkio, o ta ũrĩa kwandĩkĩtwo atĩrĩ: “No ũrĩa mũthingu egũtũũra nĩ ũndũ wa wĩtĩkio.”
18 Tondũ marakara ma Ngai nĩ maraguũrio kuuma igũrũ makerekerio harĩ maũndũ mothe matarĩ ma ũngai na matarĩ ma ũthingu ma andũ arĩa magiragĩrĩria ma na njĩra ĩtarĩ ya ũthingu, 19 nĩ gũkorũo maũndũ marĩa mangĩmenyeka megiĩ Ngai nĩ mamoĩ wega, tondũ Ngai nĩ amamenyithĩtie. 20 Tondũ ngumo ciake iria itonekaga na maitho nĩ cionekaga wega kuuma o hĩndĩ ĩrĩa thĩ yombirũo, nĩ ũndũ nĩ cionekaga kũgerera indo iria ciũmbĩtwo, o hamwe na hinya wake wa tene na tene na Ũngai wake, ũũ atĩ matingĩkorũo na kĩĩgwatio. 21 Nĩ ũndũ o na gũtuĩka nĩ mooĩ Ngai, matiamũgoocire o na kana makĩmũcokeria ngatho, ĩndĩ meciria mao maarĩ ma tũhũ na matiataũkagĩrũo, nacio ngoro ciao itarĩ na ũũgĩ ikĩgĩa nduma. 22 O na gũtuĩka mooigaga atĩ nĩ ogĩ, maatuĩkire irimũ 23 naguo riri wa Ngai ũrĩa ũtangĩkua makĩũhe mĩhianano ĩtariĩ ta mũndũ wa kũbutha, na nyoni, na nyamũ cia magũrũ mana, na iria itambaga thĩ.
24 Kwoguo nĩ ũndũ wa merirĩria ma ngoro ciao, Ngai akĩmatiganĩria mekage mĩtugo ĩtarĩ mĩtheru, nĩguo maagithie mĩĩrĩ yao ene gĩtĩo gatagatĩ-inĩ kao. 25 Magĩthuura gwĩtĩkia maheeni handũ ha ũhoro wa ma wĩgiĩ Ngai, na magĩthathaiya indo iria ciũmbĩtwo na magĩcirutĩra ũtungata mũtheru handũ ha marutĩre Mũũmbi, ũrĩa ũgoocagwo tene na tene. Ameni. 26 Nĩkĩo Ngai aamarekereirie marũmagĩrĩre merirĩria moru ma ngomanio, nĩ gũkorũo atumia arĩa maarĩ gatagatĩ-inĩ kao nĩ maagarũrire mũtugo wao wa ndũire makĩambĩrĩria gwĩka maũndũ matarĩ ma ndũire; 27 nao arũme magĩtigana na mũtugo wao wa ndũire na atumia na makĩhĩahĩa nĩ thuti nene kwerekera arũme arĩa angĩ, arũme kwa arũme, magekaga ciĩko cia ũtũrĩka na nĩ marĩkĩtie kwamũkĩra marĩhi mao biũ, kũringana na mehia mao.
28 O ta ũrĩa matoonire harĩ bata kũmenya Ngai wega, Ngai akĩmarekereria mathiĩ na mbere na mwĩcirĩrie ũrĩa aregete, mekage maũndũ matagĩrĩire. 29 Nao makĩiyũrũo nĩ maũndũ mothe matarĩ ma ũthingu, waganu, thuti, na ũũru, makĩiyũrũo nĩ rũmena, ũũragani, ngũĩ, maheeni, na kwenda gwĩka arĩa angĩ ũũru, andũ a njukũ, 30 acambania, andũ mathũire Ngai, matarĩ gĩtĩo, eĩkĩrĩri, etĩi, arĩa mathugundaga maũndũ moru, matathĩkagĩra aciari, 31 matarĩ ũtaũku, matahingagia irĩko, matarĩ wendo wa ndũire, na matarĩ tha. 32 O na gũtuĩka nĩ moĩ wega biũ watho ũrĩa mũthingu wa Ngai—atĩ arĩa mekaga maũndũ ta macio magĩrĩire gũkua—mathiaga o na mbere kũmeka na magetĩkania na arĩa mekaga maũndũ ta macio.