Aroma
15 No ithuĩ arĩa tũrĩ na hinya-rĩ, nĩ twagĩrĩirũo gũteithagia arĩa matarĩ na hinya, na tũtigekenagie ithuĩ ene. 2 O ũmwe witũ nĩ akenagie mũndũ ũrĩa ũngĩ na amwĩkage maũndũ mega, nĩguo amwĩkĩrage hinya. 3 Tondũ o na Kristo ndeekenagia we mwene, ĩndĩ o ta ũrĩa kwandĩkĩtwo: “Kĩnyũrũri kĩrĩa andũ makũnyũrũragia nakĩo nĩ niĩ kĩgwĩrĩire.” 4 Nĩ gũkorũo maũndũ mothe marĩa maandĩkirũo tene maandĩkirũo marĩ ma gũtũruta, nĩ getha kũgerera ũkirĩrĩria witũ na kũgerera kũmĩrĩrio nĩ Maandĩko tũgĩe na kĩĩrĩgĩrĩro. 5 Rĩu-rĩ, Ngai o ũcio ũheanaga ũkirĩrĩria na akomanĩrĩria aromũteithia nĩguo mũkoragwo na mwerekera wa meciria o ta ũrĩa Kristo Jesu aarĩ naguo, 6 nĩ getha mũgoocage Ngai, o we Ithe wa Mwathani witũ Jesu Kristo mũrĩ na ũrũmwe na mũrĩ na mũgambo o ro ũmwe.
7 Nĩ ũndũ ũcio-rĩ, nyitanagai ũgeni, o ta ũrĩa Kristo o nake aamũnyitire ũgeni, nĩ getha Ngai agoocagwo. 8 Tondũ ngũmwĩra atĩ Kristo aatuĩkire ndungata ya arĩa maruĩte nĩguo aguũrie ũũma wĩgiĩ Ngai, na onanie atĩ ciĩranĩro iria Ngai eerĩire maithe maitũ ma tene nĩ cia ma, 9 ningĩ nĩ getha ndũrĩrĩ igoocage Ngai nĩ ũndũ wa tha ciake. O ta ũrĩa kwandĩkĩtwo ũũ: “Nĩkĩo ndĩkũgoocaga thĩinĩ wa ndũrĩrĩ, na ngainĩra rĩĩtwa rĩaku.” 10 Ningĩ kwĩrĩtwo atĩrĩ: “Kenai inyuĩ ndũrĩrĩ, hamwe na andũ ake.” 11 Na gũkeerũo atĩrĩ: “Goocai Jehova,* inyuĩ ndũrĩrĩ ciothe, nao andũ othe nĩ mamũgooce.” 12 O na ningĩ Isaia oigĩte atĩrĩ: “Mũndũ ũmwe wa nyũmba ya Jesii nĩ agooka na nĩ agaathaga ndũrĩrĩ nyingĩ, nacio nĩ ikaaigaga mwĩhoko wacio harĩ we.” 13 Ngai ũrĩa ũheanaga kĩĩrĩgĩrĩro aromũiyũria gĩkeno na thayũ nĩ ũndũ wa kũmwĩtĩkia, nĩ getha mũkĩrĩrĩrie kũgĩa na kĩĩrĩgĩrĩro mũrĩ na hinya wa roho mũtheru.
14 Ariũ a Ithe witũ, niĩ mwene ndirĩ na nganja o na hanini kũmwerekera, atĩ o na inyuĩ nĩ mũiyũrĩtwo nĩ wega, na mũkaiyũrũo nĩ ũmenyo, na atĩ nĩ mũhotaga gũtaarana mũndũ na ũrĩa ũngĩ. 15 No rĩrĩ, ndamwandĩkĩra maũndũ mamwe itekũhithĩrĩra, nĩ getha ndĩmũririkanie o rĩngĩ, tondũ wa ũtugi mũnene ũrĩa heetwo nĩ Ngai 16 nĩguo nduĩke ndungata ya Kristo Jesu kũrĩ ndũrĩrĩ. Ndutaga wĩra mũtheru wa ũhoro ũrĩa mwega wa Ngai, nĩ getha ndũrĩrĩ icio ituĩke igongona rĩretĩkĩrĩka, rĩtheretio na roho mũtheru.
17 Nĩ ũndũ ũcio ndĩ na gĩtũmi gĩa kwĩraha thĩinĩ wa Kristo Jesu nĩ ũndũ wa maũndũ megiĩ Ngai. 18 Nĩ gũkorũo ndikwaria ũhoro ũngĩ tiga o ũrĩa Kristo ekĩte kũgerera harĩ niĩ nĩguo ndũrĩrĩ ciathĩke, kũgerera kiugo gĩakwa na ciĩko ciakwa, 19 na hinya wa ciama na maũndũ ma magegania, na hinya wa roho wa Ngai, kuuma Jerusalemu na gũthiũrũrũka Iluriko nĩ hunjĩtie kĩhinyio ũhoro ũrĩa mwega wĩgiĩ Kristo. 20 Na njĩra ĩyo, ngĩtua itua rĩa kwaga kũhunjia ũhoro ũrĩa mwega kũrĩa rĩĩtwa rĩa Kristo rĩarĩkĩtie kũmenyithanio, nĩ getha ndikae gwaka mũthingi-inĩ wa mũndũ ũngĩ; 21 no o ta ũrĩa kwandĩkĩtwo: “Arĩa mataaheirũo ũhoro ũmwĩgiĩ nĩ makoona, nao arĩa matarĩ maigua nĩ magaataũkĩrũo.”
22 Ningĩ kĩu nĩkĩo gĩatũmaga maita maingĩ nemwo nĩ gũka kũrĩ inyuĩ. 23 No rĩu gũtirĩ kũndũ itahunjĩtie icigo-inĩ ici, na nĩ ngoretwo ngĩrirĩria gũka kũrĩ inyuĩ mĩaka mĩingĩ. 24 Nĩ ũndũ ũcio-rĩ, rĩrĩa ngakorũo ngĩthiĩ Sipania, ndĩrerĩgĩrĩra atĩ nĩ ngaamuona na mũnyumagarie thutha wa gũkenera gũikarania na inyuĩ kwa ihinda. 25 No rĩu ndĩ hakuhĩ gũthiĩ Jerusalemu gũtungata arĩa aamũre. 26 Tondũ ariũ a Ithe witũ a Makedonia na Akaia nĩ makeneire kũgayana indo ciao na njĩra ya kũhotha nĩ ũndũ wa arĩa athĩni gatagatĩ-inĩ ka arĩa aamũre thĩinĩ wa Jerusalemu. 27 Nĩ ma nĩ makeneire gwĩka ũguo, na marĩ na thiirĩ wao; tondũ angĩkorũo andũ a ndũrĩrĩ nĩ maagaire maũndũ ma kĩĩroho hamwe nao-rĩ, o nao marĩ na thiirĩ wa kũmatungata na indo ciao cia kĩĩmwĩrĩ. 28 Kwoguo ndarĩkia gwĩka ũguo na ndaneana mĩhothi ĩno kũrĩ o, nĩ ngaagerera kũrĩ inyuĩ njerekeire Sipania. 29 Ningĩ, nĩ njũĩ atĩ rĩrĩa ngoka kũrĩ inyuĩ, nĩ ngaamũrehera irathimo nyingĩ iria ciumaga gwĩ Kristo.
30 Rĩu ariũ a Ithe witũ-rĩ, ndĩramũthaitha kũgerera Mwathani witũ Jesu Kristo na kũgerera wendo ũrĩa umanaga na roho, atĩ mwĩrutanĩrie hamwe na niĩ kũhoya Ngai nĩ ũndũ wakwa, 31 nĩ getha honokio kuumana na arĩa matarĩ etĩkia thĩinĩ wa Judea na nĩ getha arĩa aamũre thĩinĩ wa Jerusalemu mageetĩkĩra ũtungata wakwa, 32 nĩguo angĩkorũo nĩ wendi wa Ngai ngoka kũrĩ inyuĩ ndĩ na gĩkeno na njĩkĩrũo hinya hamwe na inyuĩ. 33 Ngai ũrĩa ũheanaga thayũ aroikara hamwe na inyuĩ inyuothe. Ameni.