Aroma
3 Gũkĩrĩ ũguo-rĩ, Mũyahudi akĩrĩte arĩa angĩ atĩa, kana bata wa kũrua nĩ ũrĩkũ? 2 Nĩ kwa bata na njĩra nyingĩ. Wa mbere, acio nĩo meehokeirũo ndũmĩrĩri ya Ngai. 3 Atĩrĩrĩ, korũo amwe ao matiarĩ na wĩtĩkio-rĩ, hihi gũkorũo matarĩ na wĩtĩkio nĩ kũngĩatũmire wĩhokeku wa Ngai wage kĩene? 4 Ũguo tiguo kũrĩ! Ngai nĩ atuĩke wa ma, o na kũngĩtuĩka atĩ andũ othe nĩ a maheeni, o ta ũrĩa kwandĩkĩtwo: “Nĩguo kuonekage atĩ maũndũ maku nĩ ma ũthingu rĩrĩa ũkwaria na ũkahootanaga rĩrĩa ũracirithio.” 5 No rĩrĩ, angĩkorũo kwaga ũthingu gwitũ gũtũmaga ũthingu wa Ngai woneke-rĩ, tũkiuge atĩa? Kaĩ Ngai akĩagaga kĩhooto rĩrĩa egũtũkinyĩria marakara make? (Ndĩraria o ta ũrĩa andũ maragia.) 6 Ũguo gũtingĩhoteka! Angĩkorũo nĩ ũguo-rĩ, Ngai agaagĩtuĩra thĩ atĩa?
7 No angĩkorũo maheeni makwa nĩ monanagia atĩ ũrĩa Ngai oigaga nĩ wa ma na magatũma andũ mamũgooce-rĩ, ndĩragĩtuĩrũo atĩ o na niĩ ndĩ mwĩhia nĩkĩ? 8 Kaĩ tũtangĩkiuga o ũrĩa andũ amwe maheenanagia atĩ ithuĩ tugaga, “Nĩ twĩkagei maũndũ moru nĩguo marĩa mega moneke”? Ituĩro rĩrĩa andũ acio magaatuĩrũo nĩ rĩa kĩhooto.
9 Tũkiuge atĩa? Hihi ithuĩ Ayahudi tũrĩ egega? Tiguo o na hanini. Tondũ nĩ tũrĩkĩtie kuonania atĩ Ayahudi o hamwe na Angiriki, othe nĩ ehia; 10 o ta ũrĩa kwandĩkĩtwo: “Gũtirĩ mũndũ o na ũmwe mũthingu; 11 gũtirĩ o na ũmwe ũrĩ na ũtaũku o na mũnini; gũtirĩ o na ũmwe ũcaragia Ngai. 12 Andũ othe nĩ magarũrũkĩte, othe matuĩkĩte a tũhũ; gũtirĩ o na ũmwe wao wonanagia ũtugi, o na ũmwe gũtirĩ.” 13 “Mĩmero yao nĩ mbĩrĩra ĩtarĩ hinge; nĩ maheenanĩtie na tũnua twao.” “Tũnua twao tũiyũire thumu wa nyoka.” 14 “Na tũnua twao tũiyũire irumi na marũrũ.” 15 “Mahanyũkaga na magũrũ mao gũita thakame.” 16 “Njĩra ciao cianangaga andũ na igatũma manyamarĩke, 17 na matirĩ mamenya njĩra ya thayũ.” 18 “Matiĩtigĩrĩte Ngai thĩinĩ wao.”
19 Rĩu-rĩ, nĩ tũĩ atĩ maũndũ mothe marĩa Watho ugaga, ũkoragwo ũkĩra arĩa marĩ rungu rwa Watho, nĩguo tũnua tuothe tũkirio na thĩ yothe ĩtuĩke ya kũherithio nĩ Ngai. 20 Nĩ ũndũ ũcio, gũtirĩ mũndũ o na ũmwe ũgaatuwo mũthingu nĩwe nĩ ũndũ wa kũrũmĩrĩra watho, nĩ gũkorũo watho ũtũteithagia kũgĩa na ũmenyo wĩgiĩ mehia.
21 No rĩu ũthingu wa Ngai nĩ ũguũrĩtio, no ti kũgerera watho, o ta ũrĩa kwandĩkĩtwo thĩinĩ wa Watho na Anabii, 22 ĩni, ũthingu wa Ngai kũgerera wĩtĩkio thĩinĩ wa Jesu Kristo, harĩ arĩa othe marĩ na wĩtĩkio. Tondũ gũtirĩ mũthutũkanio. 23 Nĩ gũkorũo andũ othe nĩ mehĩtie na makanyihĩrũo nĩ riri wa Ngai, 24 na amatuaga athingu nĩ ũndũ wa thogora ũrĩa Kristo Jesu aarĩhire nĩguo amahonokie. Kĩu nĩ kĩheo Ngai aamaheire nĩ ũndũ wa ũtugi wake mũnene. 25 Ngai aamũneanire arĩ igongona rĩa ũiguano kũgerera wĩtĩkio thĩinĩ wa thakame yake. Eekire ũguo akĩonania ũthingu wake mwene, nĩ gũkorũo Ngai nĩ ũndũ wa ũkirĩrĩria wake, nĩ kuohera ohanagĩra mehia marĩa meekirũo tene. 26 Eekire ũguo nĩguo onanie ũthingu wake mwene ihinda-inĩ rĩrĩ, nĩguo akorũo arĩ mũthingu nginya rĩrĩa aratua mũndũ ũrĩa wĩtĩkĩtie Jesu atĩ nĩ mũthingu.
27 Gũkĩrĩ ũguo-rĩ, kwĩraha kũrĩ ha? Ti gwĩtĩkĩrie o na hanini. Nĩ ũndũ wa watho ũrĩkũ? Ũrĩa wa ciĩko? Aca, no nĩ ũndũ wa watho ũrĩa wa wĩtĩkio. 28 Nĩ gũkorũo ithuĩ tũĩ atĩ mũndũ atuagwo mũthingu nĩ ũndũ wa wĩtĩkio no ti ũndũ wa gwathĩkĩra watho. 29 Kana hihi we nĩ Ngai wa Ayahudi oiki? Githĩ ti Ngai nginya wa andũ a ndũrĩrĩ? Nĩ Ngai wa andũ a ndũrĩrĩ o nao. 30 Tondũ Ngai nĩ ũmwe-rĩ, agaatua arĩa aruu athingu nĩ ũndũ wa wĩtĩkio na arĩa matarĩ aruu amatue athingu kũgerera wĩtĩkio wao. 31 Gũkĩrĩ ũguo-rĩ, hihi nĩ kũniina tũraniina watho kũgerera wĩtĩkio witũ? Tiguo o na hanini! Handũ ha ũguo, nĩ watho tũrongerera hinya.